1. Miti ango ma wan dano ducu watye kwede?

IWINYO nining ka ngat mo ma ingeyo dok iworo wiye owil woko ki nyingi nyo marac loyo pe oniang kulu i komi? Man twero turo cwinyi adada. Pingo? Pien wan ducu watye ki miti ni jo mukene gumarwa. Ento pe wamito ni gunge nyingwa keken. Wamito ni gunge anga ma wabedo ki dok jami mabeco ma watimo.​—Wel 11:16; Yubu 31:6.

2, 3. Ngo ma twero timme i kom mitiwa me ngene bot jo mukene? (Nen cal ma tye i pot karatac man.)

² Ento ka pe wagwokke, watwero dongo miti marac me bedo jo ma guywek. Lobo pa Catan twero weko wabedo ki miti me bedo jo ma gingene mukato kare woko. Ka man otimme, pe wamiyo ki Wonwa ma i polo, Jehovah, woro ki deyo mupore pire.​—Niyabo 4:11.

³ I kare pa Yecu, lutela dini onongo gitye ki miti me nongo yweka. Yecu ociko lupwonnyene ni: “Wugwokke i kom lupwony-cik ma gimaro wot ma guruko bongngi  maboco, dok gimito ni dano gubed ka motogi wa i cuk-gu, gimaro bedo i kom pa ludito, ka gitye i kacokke, dok gimaro bedo i kabedo me deyo i karama.” En omedde ni: ‘Gibingolo kop madit i wigi makato.’ (Luka 20:46, 47) Ki tungcel, Yecu opwoyo dato mo ma lacan ma obolo nyig cente aryo, kun ngat mo mukene nen calo pe oneno. (Luka 21:1-4) Ki lok ada, Yecu onongo neno nongo pwoc ki deyo i yo mapat adada. Pwony man bikonyowa me neno deyo kit ma Jehovah neno kwede.

4. Anga ma imito ni inong cwak ki bote dok pingo?

⁴ Anga ma imito ni inong deyo ki bote? Man pe obedo deyo ki yweka ma pol pa dano gitute me nongone ka gukwano i rwom ma malo, ka biacaragi tye ka timo maber, nyo i yo mukene. Paulo otito anga ma myero watute me ngene bote i kare ma en owaco ni: ‘Ento kombeddi dong wungeyo Lubanga, nyo kong awacci, Lubanga dong ngeyowu; ci dok wutwero dok cen nining bot jami macon ma gigoro, ma konygi pe-ni? Pingo dok wumito bedo opiigi pi tyen me aryo?’ (Jo Galatia 4:9) Obedo twon mot madit adada me bedo ‘ngat ma Lubanga ngeyo’ pien en aye Laloc Mamalo ma loyo wi lobo ducu! Jehovah ngeyo anga ma wabedo, en marowa, dok mito ni wabed cok kwede. Jehovah ocweyowa wek wabed lureme.​—Latitlok 12:13, 14.

5. Ngo ma myero watim wek Jehovah ongewa?

⁵ Wangeyo ni Moses obedo larem Jehovah. I kare ma en olego bot Jehovah ni: “Nyutta kiti, wek angeyi,” Jehovah ogamme ni: “Abitiyo gin man ma iwaco-ni kikome; pien iyomo cwinya, dok angeyo in ki nyingi.” (Nia 33:12-17) Jehovah bene twero ngeyowa ki acel acel. Ento ngo ma myero watim wek wadok lurem Jehovah? Omyero wamare dok wadyer kwowa bote.​—Kwan 1 Jo Korint 8:3.

6, 7. Ngo ma twero weko warwenyo watwa ki Jehovah?

⁶ Kadi bed kit meno, mitte ni omyero wagwok watwa ki Wonwa me polo. Calo Lukricitayo me Galatia, omyero wawek bedo opii pa jami me lobo-ni ma ‘gigoro dok konygi pe,’ ma i kine tye iye yweka. (Jo Galatia 4:9) Lukricitayo magi ma i Galatia onongo dong gingeyo Lubanga dok Lubanga bene onongo ngeyogi. Ento Paulo owaco ni omege magi onongo gitye ka “dok cen” ka timo jami ma konygi pe. Obedo calo en tye ka penyogi ni: ‘Pingo wudok cen ka bedo opii pi jami ma gigoro dok konygi pe?’

⁷ Gin ma kit meno mono twero timme i komwa? Eyo, twero timme. Calo Paulo, i kare ma wapwonyo ada, romo bedo ni wajalo yweka ki jami mukene i lobo pa Catan. (Kwan Jo Pilipi 3:7, 8.) Twero bedo ni wajalo kwan me nono i rwom ma lamal, tic mabeco, nyo tiyo cente madwong adada. Gwok bene watye ki diro ma onongo biweko wadoko lawer nyo latuku ma oywek dok ma olony. Ento wajalo jami magi ducu. (Jo Ibru 11:24-27) Pe tye me ryeko ka wacako  koko ange pi jami ma wawekogi, ni kwowa onongo bibedo maber kono pe waweko jami magi! Tam ma kit meno twero weko wadok cen ka timo jami me lobo-ni, jami ma onongo yam wamoko tamwa ni ‘gigoro dok konygi pe.’

8. Ngo ma bikonyowa me jingo mitiwa me nongo cwak pa Jehovah?

⁸ Mitiwa me nongo cwak pa Jehovah twero dongo bedo matek ma kato mitti me nongo yweka ki i lobo-ni nining? Omyero waket tamwa i kom lok ada aryo ma pigi tego. Mukwongo, Jehovah kare ducu ngeyo dok pwoyo jo ma tiyo pire ki cwinygi ducu. (Kwan Jo Ibru 6:10; 11:6) Jehovah neno luticce ma lugen calo jo ma pigi tek bote adada, pi meno en nongo ni “pe tye kakare” ka wiye owil i komgi. Jehovah kare ducu “ngeyo jo ma gin jone kikome.” (2 Temceo 2:19) En “paro pi dano ma kite atir” dok ngeyo larogi.​—Jabuli 1:6; 2 Petero 2:9.

9. Jehovah onyuto cwak pi jone nining? Mi labol.

⁹ I kine mukene, Jehovah onyuto cwakke bot jone kun larogi i yo me aura. (2 Tekwaro 20:20, 29) Me labolle, tam kong kit ma Jehovah olaro kwede jone i Nam Makwar i kare ma mony pa Parao onongo tye ka ryemo korgi. (Nia 14:21-30; Jabuli 106:9-11) Tango man obedo me aura adada ma oweko dano pud gubedo ka lok iye i nge mwaki 40 kulu. (Yocwa 2:9-11) Tye me cuko cwiny adada me po i kom kit ma Jehovah onyuto kwede mar mere bot jone kun tiyo ki tekone me larogi i kare mukato angec, pien cokcok-ki Gog me Magog bicako lweny i komwa. (Ejekiel 38:8-12) I kare meno cwinywa bibedo yom ni wayenyo cwak pa Lubanga ento pe yweka me lobo-ni.

10. Ada mukene ango ma omyero waket tamwa iye?

¹⁰ Ada me aryo ma pire tek ma myero waket iye tamwa aye ni, Jehovah twero nyuto pwoc piwa i yo ma pe watwero byekone. Ka ngat moni timo jami wek enong pwoc ki bot jo mukene, ci Jehovah pe mine pwoc. Pingo tye kit meno? Pien kit ma Yecu owaco kwede, ka jo mukene pwoyogi, nongo dong gunongo bakacicgi woko. (Kwan Matayo 6:1-5.) Ki tungcel Jehovah ‘neno i mung’ jo ma pe gunongo pwoc pi jami mabeco ma gutimo bot jo mukene. En neno gin ma gitimo dok miyogi mot nyo goyo laane i komgi. Dok i kare mukene Jehovah miyo mot bot luticce i yo ma gin pe gitwero byekone. Kong dong wanyamu labol mogo.

11. Jehovah omiyo pwoc bot Maliam nining?

¹¹ Jehovah oyero nyako mo ma mwol ma nyinge Maliam me bedo min Wode,  Yecu. Maliam onongo bedo i taun mo matidi ma kilwongo ni Najaret, dok onongo bor adada ki Jerucalem ka ma ot pa Lubanga tye iye. (Kwan Luka 1:26-33.) Pingo Jehovah oyero Maliam? Lamalaika Gabriel otito ki Maliam ni “ilimo pwoc ki bot Lubanga.” Watwero neno ki i lok ma Maliam lacen owaco ki watte Elicabet ni Maliam onongo tye ki wat macok ki Jehovah. (Luka 1:46-55) Jehovah obedo ka neno Maliam, dok pi bedo lagen bote, Lubanga omiyo Maliam mot i yo ma en onongo pe twero byekone.

12, 13. Yecu onongo deyo nining i kare ma kinywale ki dok i nge nino 40?

¹² I kare ma kinywalo Yecu, angagi ma Jehovah otito botgi kwena me nywale pa Yecu? En pe otito bot luloc ma pigi tego ma i Jerucalem kacel ki i Beterekem. Me ka meno, en ooro lumalaika bot lukwat ma rwomgi lapiny ma onongo gitye ka gwoko romigi i tim macok ki Beterekem. (Luka 2:8-14) Lukwat magi gulimo latin lakere man. (Luka 2:15-17) Maliam gin ki Yucepu nen calo gubedo ki ur me neno ka kimiyo Yecu deyo i yo man. Kit ma Jehovah timo ki jami pat adada ki kit ma Catan timo kwede ki jami. I kare ma Catan ocwalo lutyet ki lakalatwe me limo Yecu ki lunyodone, dano weng ma i Jerucalem gungeyo, dok man okelo twon peko madit adada. (Matayo 2:3) Macalo adwogine, lutino mapol kinekogi.​—Matayo 2:16.

¹³ Cik ma Jehovah omiyo bot jo Icrael waco ni, i nge nino 40, dako ma onywalo awobi myero oter tyer bot Jehovah. Pi meno, Maliam gin ki Yucepu kacel ki Yecu guwoto pi kilomita abongwen (mairo abicel) nia ki i Beterekem me o i ot pa Lubanga i Jerucalem. (Luka 2:22-24) I kare ma gitye i yo, nen calo Maliam obedo ka tamo kace lalamdog onongo bitimo gin mo me deyo i kom Yecu. Yecu gire onongo deyo, ento pe i yo ma Maliam obedo ka tamone. Jehovah oyero Cimeon, laco  “ma kite atir ma lworo Lubanga” kacel ki lanebi mo ma dako ma nyinge Anna, dato ma mwakane 84, wek gutit ni Yecu bidoko Meciya nyo Kricito.​—Luka 2:25-38.

14. Jehovah omiyo mot ki Maliam nining?

¹⁴ Jehovah tika omedde ki miyo pwoc ki Maliam pien en ogwoko Yecu maber? Ada en omiyo. Lubanga oweko lok pa Maliam ki jami mogo ma en otimo kicoyo i Baibul. Nen calo Maliam pe obedo ki kare me wot kacel ki Yecu pi mwaki adek ki nucu ma Yecu obedo ka tito kwena. Pien Maliam onongo tye dato, twero bedo ni man oweko en oyero me bedo i Najaret. Man oweko en okeng neno jami mamwonya atika ma jo mukene guneno. Ento, en obedo tye i kare ma Yecu oto. (Jon 19:26) Lacen, Maliam obedo tye i Jerucalem kacel ki lupwonnye pa Yecu i kare ma cwiny maleng opye i komgi i Pentekote. (Tic pa Lukwena 1:13, 14) Kiwiro Maliam ki cwiny maleng kacel ki lupwonnye mukene. Ka tye kit meno, ci en onongo mot me bedo ki Yecu i polo pi naka. Man obedo twon mot madit atika pi tic ma en otimo!

15. Jehovah omiyo deyo nining bot Wode i kare ma en tye i lobo?

¹⁵ Yecu onongo pe mito yweka ki bot lutela dini nyo ki bot lucung i wibye. Ento tyen adek kulu, Jehovah kikome oloko ki i polo kun weko Wode ngeyo ni emare adada. Meno nen calo ocuko cwiny Yecu matek! Ingeye ma Yecu onongo batija i Kulu Jordan, Jehovah owacci: “Man aye Woda ma amare, ma cwinya yom i kome.” (Matayo 3:17) Nen calo Jon Labatija gin ki Yecu keken aye ma guwinyo dwan man. Lacen doki, mwaka acel ma Yecu peya oto, lukwenane adek guwinyo ka Jehovah waco kit man i kom Yecu: “Man aye Woda ma amaro; wuwinye.” (Matayo 17:5) Me agikkine, nino manok ma  Yecu peya oto, Jehovah dok oloko kwede ki i polo.​—Jon 12:28.

16, 17. Jehovah omiyo deyo ki Yecu i yo ma en onongo pe twero byekone nining?

¹⁶ Yecu onongo ngeyo ni dano gibiwacci en oyeto Lubanga dok ebito to me lewic. Kadi bed kit meno, en pud olego ni miti pa Lubanga omyero ocobbe ento pe mitine. (Matayo 26:39, 42) ‘Pi yomcwiny ma giketo i nyime en yam ociro yat, kun ocayo lewic ma giketo i kome,’ pien en onongo mito nongo deyo ki bot Wonne ento pe ki bot jo me lobo man. (Jo Ibru 12:2) Jehovah omiyo deyo bot Yecu nining?

¹⁷ I kare ma Yecu tye i lobo, en olego ni kimiye deyo ma yam ebedo kwede i polo kacel ki Wonne. (Jon 17:5) Pe tye ka mo keken i Baibul ma nyuto ni Yecu obedo ki gen me nongo deyo makato meno. En onongo pe ki miti me nongo bakacic mo ma dok kite pat pi timo miti pa Jehovah i lobo kany. Ento Jehovah otimo ngo? Jehovah omiyo Yecu deyo i yo ma en onongo pe twero byekone. I kare ma Jehovah ocero Yecu, en omine “dit ma malo twatwal” i polo. En bene omiyo Yecu kwo macalo cwec me cwiny ma pe twero to, kwo ma ngat mo keken onongo pe kwede mapat ki Jehovah! * (Nen lok ma tye i tere piny.) (Jo Pilipi 2:9; 1 Temceo 6:16) Man pud dong obedo mot madit adada ma Jehovah omiyo ki Wode pi timo mitine!

18. Ngo ma bikonyowa me yenyo cwak ki bot Jehovah ento pe ki i lobo man?

¹⁸ Ngo ma bikonyowa me yenyo cwak ki bot Jehovah ento pe ki i lobo man? Myero wiwa opo ni, Jehovah kare ducu ngeyo jo ma tiyo pire ki cwinygi ducu dok pol kare nyuto pwoc pigi i yo ma pe gitwero byekone. Tye jami mapol ma Jehovah bimiyowa i anyim ma pe watwero tam iye weng! Ento i kare-ni, ka pud watye ka kanyo peko i lobo man marac-ci, omyero wiwa opo ni lobo-ni bitum woko. Pi meno deyo nyo yweka mo keken ma iye bene bitum woko. (1 Jon 2:17) Ki tungcel Wonwa ma lamar, Jehovah wiye pe biwil i kom tic ma watiyo pire ki mar ma wanyuto pi nyinge pien en “pe ye gin ma pe tye kakare.” (Jo Ibru 6:10) Ki lok ada, en wang ma ominiwa mot, dok bene oromo bedo i yo ma pe watwero byekone kulu!