BAIBUL opong ki lok ma oa ki i cwiny dano ma ‘kitgi cal kwedwa.’ (Yak. 5:17) Me labolle, watwero niang oyotoyot lok pa lakwena Paulo ma tye i Jo Roma 7:21-24 ni: “Ka amito tiyo gin ma atir, ci gin marac nyiko cok kweda. . . . An ma koma kec kuman-ni!” Lok ma kit man cuko cwinywa ka watye ka lweny ki gorowa.

Lakwena Paulo omedde ki tito kit ma en winyo kwede. I Jo Galatia 2:20, en otito ni Yecu “ceng omara ka omine gire pire kene pira.” Tika in bene iwinyo kit meno? Twero bedo ni pe tye kit meno kare ducu.

Ka watye ka lweny ki turcwiny pien watimo bal i kare mukato angec, ci twero bedo tek ki wan me ye mar kacel ki kica pa Jehovah, twero bene bedo tek makato me neno ginkok pa Yecu calo mot piwa. Tika Yecu mito ni wanen ginkok kit meno? Gin ango ma twero konyowa me neno ginkok calo mot piwa? Kong dong wanyamu lapeny aryo magi.

Lok ada tye ni Yecu mito ni wan ki acel acel wanen ginkok calo mot piwa. Watwero moko man i cwinywa nining? Go kong i wi gin mutimme ma kitito i Luka 23:39-43. Laco mo kiguru i kom yat i nget Yecu. Laco man oye ni en labalo. Bal meno nen calo obedo bal madit adada pien nek ma kit man onongo kineko ki lutim bal madongo. Laco man par onongo odiyo matek ci olego Yecu ni: “Po pira ka ibidonyo i kerri.”

Yecu odok iye nining? Go kong arem ma Yecu okato ki iye i kare ma en loko wiye wek enen laco man maber. Kadi bed arem onongo tye matek, Yecu obwunyo kwede dok ocuko cwinye kun waco ni, ‘Ada awacci tin ni, wabibedo kwedi i Paradic.’ Yecu onongo twero mere poyo wi laco-ni ni ‘wod pa dano obino pi miyo kwone me koko jo mapol.’ (Mat. 20:28) Ento Yecu onyuto i yo me kica kit ma ginkok gudo kwede laco man. Yecu onyuto cwiny me lirem i kare ma otiyo ki nyig lok ni ‘in’ ki ‘an.’ Dok en owaco ki laco-ni ni laco man bibedo i paradic i lobo kany.

Labongo akalakala mo, Yecu onongo mito ni laco man oye ginkok ma en emiyo ni obedo mot pire. Ka Yecu owinyo kit man i kom labal man ma onongo bene pe obedo ki kare me tic pi Lubanga, ci ngene kene ni en winyo kit meno bene i kom Lakricitayo ma onongo batija dok tiyo pi Lubanga. Dong gin ango ma twero konyowa me ye ni ginkok pa Kricito twero konyo wan ki acel acel kadi bed watimo bal madongo i kare mukato angec?

Kit macalo Yecu omiyo Paulo tic me tito kwena, Paulo onongo twero niang ni Yecu oto pire. I yo ma nining? En otito ni: “Apwoyo ngat ma omiya teko me tiyo tic  man, en Kricito Yecu Rwotwa, pien dong okwana me bedo lagen, ka oketa bene i ticce, kadi bed yam abedo ka yete pi keto ayela i kome ki balo nyinge.” (1 Tem. 1:12-14) Kit macalo Yecu omiyo ki Paulo tic man kadi bed Paulo onongo otimo jami maraco mapol, man onyuto bote ni Yecu lakica, marre, dok genne. I yo acel-lu, wan bene Yecu ominiwa tic me tito kwena. (Mat. 28:19, 20) Tika tic ma kimiyowa-ni twero konyowa me moko ni Yecu oto piwa bene?

Albert, ma onongo kiryemo woko ki i kacokke ci odwogo cen bot Jehovah i nge cokcok mwaki 34, owaco ni: “Kare ducu wiya po i kom bal ma atimo. Ento ka atye i tic me pwony, awinyo calo lakwena Paulo, ni an bene Yecu aye ma omina tic man. Weko abedo ki yomcwiny i kwona dok awinyo maber pi anyim mamwonya ma atye kwede.”​—Jab. 51:3.

Allan, ma onongo obedo latim aranyi i kare ma peya ongeyo ada, owaco ni: “Pud atamo i kom awano ducu ma aketo i kom jo mukene. I kine mogo, man turo cwinya adada. Ento apwoyo Jehovah matek me ye ni labalo calo an oter kwena maber bot jo mukene. Ka aneno kit ma dano gidok kwede i lok me kwena maber, wiya po ni Jehovah ber dok maro dano. Awinyo ni en tye ka tic kweda me konyo jo ma gin bene gitye ka lweny ki peko macalo mega.”

Ka watye i tic me pwony, watimo jami mabeco dok watamo tam mabeco bene. Konyowa me niang ni Yecu lakica, dok en marowa dok genowa.

Nio wang ma kijwero lobo marac pa Catan-ni woko, cwinywa twero bedo ka pidowa pi bal ma watimo yam con. Ngo ma bikonyowa me lweny ki tam ma kit meno?

Laminwa mo ma nyinge Jean, ma pol kare cwinye bedo ka pide pien obedo ka kwo kwo laiye aryo i kare ma pud en bulu, owaco ni: “Cwinya yom ni ‘Lubanga dit kato cwinywa woko.’” (1 Jon 3:19, 20) Wan bene watwero nongo kwe cwiny ki i niang ni Jehovah gin ki Yecu gingeyo maber ni wan lubalo. Wi opo ni, gumiyo ginkok, pe pi jo ma gipe ki roc, ento pi lubalo ma giye ngut i kom balgi.​—1 Tem. 1:15.

Wamoko i cwinywa kekenwa ni kimiyo ginkok piwa ki acel acel ka walego kun walwodo kit ma Yecu onongo tero kwede dano ma gitye ki roc ki dok ka watute me cobo tic me pwony ma Yecu ominiwa. Ka itimo kit meno ci ibiloko calo Paulo ma owaco ni: Yecu “ceng omara ka omine gire pire kene pira.”