Kinywala i taun me St. Paul, Minnesota, i lobo Amerika, i mwaka 1954. Lunyodona pe gubedo lucan nyo lulonyo dok onongo wabedo Lukatoli. An aye latin me aryone i kin lutino abic. Akwano i cukul pa Katoli, dok onongo abedo lagam micca. Kadi bed kit meno, onongo atye ki ngec manok adada i kom Baibul. Kadi bed ni onongo aye ni Lubanga ma ocweyo jami ducu tye, onongo ape ki gen mo keken i kom kanica pa Katoli.

I mwaka ma adonyo i univaciti ma kilwongo ni William Mitchell College of Law, Lucaden pa Jehovah gulima. Luot man gunongo atye ka lwoko bongo ci guye me dwogo i nino mukene. I kare ma gudwogo, onongo atye ki lapeny aryo pigi: “Pingo kwo pa jo maraco bedo maber loyo kwo pa jo mabeco?” ki “Ngo ma mitte wek ngat moni obed ki yomcwiny me ada?” Agamo ki botgi buk me The Truth That Leads to Eternal Life ki Baibul me New World Translation of the Holy Scriptures, ma onongo pok ngeye tye ma green dok nenone mit adada. Aye bene ni kikwan Baibul kweda.  Kwan man oyabo wanga adada. Niang ni Ker pa Lubanga obedo gamente ma biloyo lobo-ni ogudo cwinya adada. Onongo atwero neno ni loc pa dano pe ocobo peko mo keken ento oweko lobo opong ki arem, deno can, ki ngolo kop alenga.

Adyere bot Jehovah i acakki me mwaka 1982 ci anongo batija i St. Paul Civic Center i mwaka meno bene, i gure madit ma wi lokke obedo ni “Kingdom Truth.” Adok cen i kabedo meno i cabit ma lubo wek atim peny me agikki me doko lapilida. I acakki me dwe me Oktoba, aniang ni akato peny meno, ma te lokke ni onongo dong atwero cako tic macalo lapilida.

I gure madit me “Kingdom Truth,” arwatte ki omego Mike Richardson, ma onongo tiyo i Betel me Brooklyn, dok en otitta ni kiyabo opic ma neno lok i kom pido i gang kalwa madit. Wiya opo i kom lok pa Laetiopia ma tye kicoyo i Tic pa Lukwena 8:36 dok apennye kekena ni, ‘Gin ango ma genga penyo pi tic i Opic ma Neno Lok Kom Pido?’ Pi meno apenyo pi tic i Betel.

Lunyodona pe gubedo ki yomcwiny ni adoko Lacaden pa Jehovah. Babana openya ka tic i Betel bikela adwogi mo maber macalo lapilida. Atitte ni abibedo ka tic macalo ngat ma ojalle ajala. Awacce ni kibimina cente manok adada dwe ki dwe kit ma kimiyo ki Lubetel ducu.

Pien onongo dong aye woko me tic i kot, onongo pe atwero cito i Betel cutcut, pi meno acako tic i Betel i Brooklyn, New York i mwaka 1984. Kicwala ka tic i Opic ma Neno Lok Kom Pido. Tic ma onongo atimo i kot oyuba adada pi jami ma gutimme i nge meno.

Dulwa owilo ot ma kilwongo ni Stanley Theater i boma me Jersey City, i New Jersey, i Novemba mwaka 1983. Omege gupenyo pi lancic ma romo miniwa twero me roco mac elektwic ki lain me pii i ot man. I kare ma gurwatte ki ludito me taun meno, omege gutito botgi ni gimito tic ki Stanley Theater macalo ot me gure pi Lucaden pa Jehovah. Lok man okelo peko mo. Cik me boma me Jersey City i kom kit ma kitwero tic ki gedo mapatpat, onongo waco ni gedo ma kitiyo kwede pi woro omyero obed ka ma paci pa dano tye iye keken. Stanley Theater onongo tye i kabedo me timo biacara, pi meno ludito me boma man gukwero miniwa lancic woko. Omege gukoko apil, ento kibayo kokogi woko ki i kot.

 I cabit mukwongo ma adonyo i Betel, dulwa otero lok madok i kom twonowa lancic man i kot. Kit macalo an onongo pud aa ka tic i kot pi mwaki aryo i taun me St. Paul, Minnesota, onongo aniang lok ma kit meno adada. Lapilidawa acel olaro lok man kun waco ni Stanley Theater onongo dong kitiyo kwede pi yub mapatpat ma guro lwak mapol, calo nyuto cinema ki show pa luwer. Ci dong pingo omyero kikwer ni pe wati kwede pi gure ma kubbe ki worowa? Kot mamalo oneno lok man ci ongolo ni boma me Jersey City pe guworo twerowa me woro Lubanga. Kot man omiyo rukca ki luloc me boma man ni guminiwa lancic ma wamito, dok acako neno kit ma Jehovah ogoyo kwede laane i kom dulle ka gitiyo ki kot me dongo ticce. Cwinya obedo yom me nywako i tic man.

Omege gucako tic madit me roco ot man, dok kwero tyeko kwan pa kilaci me 79 me Gilead kitimo i gedo man i Sektemba 8, 1985, ma peya oo mwaka acel i nge cako tic man. Abedo ki mot me dongo tic me Ker macalo lamemba me gurup ma neno lok kom pido. Man okela yomcwiny madit loyo tic ma atiyo macalo lapilida ma peya abino i Betel. Onongo pe abyeko kulu ni Jehovah bitic kweda pi lok mukene mapol ma kubbe ki pido.

I kine ka mwaka 1980 ki wiye, onongo pol kare ludaktar ki odi yadi pe giworo twero pa lutwo ma Lucaden me kwero remo. Tutwalle mon ma guyac onongo gitye ki ariya madit pien pol kare lungolkop onongo gitamo ni mon magi gipe ki twero me kwero remo. Lungolkop onongo giwaco ni ka pe kimedo remo i kom dako ma iye tye ci en romo to woko dok man weko latinne dongo labongo mine.

I nino dwe 29 me Decemba, 1988, Laminwa Denise Nicoleau remo oony madwong ki i kome i nge nywalo wode. Remo odoko nok adada i kome mumiyo daktarne openyo ka en twero ye ni kimed remo i kome. Lamego Nicoleau okwero woko. Orwone odiko, ludito me ot yat man gupenyo langolkop ni omi ki ot yat twero me medo remo i kom laminwa. Labongo winyo tam pa Lamego Nicoleau nyo cware, dok labongo bene tittigi gin mo, langolkop man omiyo twero ki ot yat me medo remo i kom laminwa.

I Ceng Abic, nino dwe 30 me Decemba, ludaktar gumedo remo i kom Lamego Nicoleau kadi bed cware kacel ki wadine mukene ma gitye kwede i ot yat gukwero woko. Otyeno meno, kimako wadine mapol kacel ki luelda mogo pi temo gengo ludaktar ki medo remo i kom Lamego Nicoleau. I Ceng Abicel odiko me nino dwe 31 me Decemba, gajeti, telebijon, ki redio citecen ducu ma i New York City  ki i Long Island gukati ki lok i kom amako man.

I Ceng Baraja odiko, aloko ki langolkop me kot mamalo, ma nyinge Milton Mollen. Atitte gin mutimme, kun anwoyo ni langolkop ma oneno lok man omiyo twero me medo remo i kom laminwa labongo winyo lokke. Mollen owaco ni abin i opicce otyeno meno wek wanyam cik ma mako lok man. Omego Philip Brumley, ma loyo dipatmenwa, ocito kacel kweda i opic pa Langolkop Mollen otyeno meno. Langolkop olwongo lapilida me ot yat man bene me bedo tye. Laro lokwa obedo malyet. Oo i cawa mo, Omego Brumley ocoyo i karatac mo matidi ni, “dwok dwani piny” ci onyuta. Ka atamo iye, man onongo obedo tira maber adada pien an onongo dong akeco woko i tutena me nyuto ni lapilida me ot yat-ti otimo bal.

I nge cawa acel, Langolkop Mollen owaco ni man bibedo lok mukwongo i kot orwone odiko. I cawa ma watye ka a ki i opicce, Langolkop Mollen owaco ni lapilida pa ot yat meno tye ki “twon tic madit i wiye diki.” Man tyen lokke ni onongo pe bibedo yot pi lapilida-ni me nyuto ni ot yat-ti tye ki twero me medo remo i kom laminwa tektek. Awinyo calo Jehovah tye ka cuko cwinya ni kakare kere botwa me loyo pido man. Abedo ki ur adada me tamo ni Jehovah tye ka tic kwedwa me cobo mitine.

Watiyo wa i cwiny dyewor me yubo lok ma wabinyamo i kot i odiko. Ot kot man tye macok adada ki Betel me Brooklyn, pi meno pol pa dano ma gitiyo i Opic ma Neno Lok Kom Pido guwoto awota ki tyengi me cito i kot. I nge winyo lokwa, lungolkop angwen ma gitye ka neno lok man gumoko ni onongo myero pe kimed remo i kom laminwa. Kot mamalo ongolo kop ma cwako Lamego Nicoleau dok omoko ni tim me penyo pi twero ki i kot labongo kong winyo tam pa latwo obedo turo twero pa latwo.

Ma pe orii i nge meno, kot mamalo loyo i New York omoko ni Lamego Nicoleau tye ki twero me kwero yo me cango two ma kitiyo ki remo. Man obedo tyen me acel i kin pido angwen mapatpat ma kot mamalo loyo i lobo Amerika omoko tam ma kubbe ki kwero remo ma an bene anywako iye. (Nen bok ma wiye  tye ni “ Pido ma Waloyo i Kot Mamalo.”) Aribbe bene ki lupilida mukene me Betel i pido ma kwako twero pa lanyodo me gwoko latin, keto nyom, wilo ngom ki gedo.

Tyen mukwongo ma arwatte ki lamego Dawn, ma lacen odoko dakona, onongo nyomme me acel oket woko dok en tye ka gwoko lutinone adek kene. En onongo tye ki dog ticce dok tiyo bene macalo lapainia. En onongo okato ki i kwo matek, dok neno kit ma en tye ka cung kwede matek me tic pi Jehovah ogudo cwinya adada. I mwaka 1992, wacito kacel i gure madit me “Light Bearers” i boma me New York City, ci apenye ka watwero cako winnye pi nyom. Wanyomme i nge mwaka acel. Bedo ki dako ma kare ducu keto pi Jehovah bedo mukwongo dok layomcwiny obedo mic mua ki bot Jehovah. Dawn obedo dako maber adada pi kare ducu me kwowa kacel.​—Car. 31:12.

I kare ma wanyomme, lutinone-ni onongo gitye ki mwaka 11, 13, ki 16. Onongo amito ni abed wego maber botgi, pi meno abedo ka kwano kun aketo i tic tam ducu ma anongo ki i bukkewa ma loko i kom gwoko lutino ma in aye pe inywalo. Ariya obedo tye i kare mogo, ento cwinya yom ni lutino-ni dong gujola macalo laremgi ki wongi ma marogi. Lurem lutinowa onongo kare ducu wajologi i pacowa, dok onongo wamaro bedo kacel ki jo matino magi.

I mwaka 2013, an ki Dawn wakobo i kabedo ma kilwongo ni Wisconsin wek wagwok lunyodowa ma guti woko. Ki ur madit, pe kijuka tic i Betel. Amedde ki miyo kony ma kubbe ki lok kom pido kun acito pi kare mogo ka kilwonga.

I Sektemba 2018, anongo ni atiko yubo dwana tutwal ka amito lok. Daktarna opima ento pe omedo ki niang gin ma onongo tye ka kelo peko man. Lacen, daktar mukene owaco ni kong acit bot daktar ma neno lok kom ler. I Januari 2019, daktar ma neno lok kom ler-ri otitta ni nen calo atye ki two ma mako ler ma kubo adam ma i kare mo binya i koma ducu.

I nge nino adek, i kare ma atye ka tuko tuku mo ma amaro adada, apoto ci aturo ngut cinga ma lacuc. Man onongo obedo tuko ma atuko pi kare me kwona ducu dok angeyo adada. Pi meno, aniang ni kerona me doro ler koma tye ka rweny woko. Abedo ki ur adada i kom kit ma two man onya kwede oyotoyot. Odoko tek adada me lok, wot, kacel ki mwonyo jami.

Cwinya yom ni abedo ki mot me tic ki ngecca macalo lapilida me konyo dul pa Jehovah. Dok cwinya yom ni acoyo pwony mapol i gajeti ma ludaktar, lupilida, ki lungolkop gikwano. Aloko bene ki dano i but lobo mapatpat kun acung pi twero pa jo pa Jehovah me yero yo me cango two ma pe tiyo ki remo. Kadi bed kit meno, pud aloko calo lakwena Luka ma ocoyo i Luka 17:10 ni, ‘An latic ma pe konyo gin mo; atiyo gin ma myero atim keken.’