1. Pingo Jehovah pe porowa ki jo mukene?

JEHOVAH pe mito ni jami ducu ki dano ducu gubed marom aroma. Man nen ka maleng i jami ma en ocweyo, kadi wa dano. Pe tye ngat mo marom aroma kwedi. Pi meno, Jehovah pe pori ki jo mukene. En ngiyo cwinyi. (1 Cam. 16:7) En bene ngeyo tekoni ki goroni kacel ki kit ma idongo kwede. En pe penyowa me timo gin mo ma kerowa pe romo. Mitte ni walub lanen pa Jehovah kun wanene kekenwa kit ma en nenowa kwede. Ka watimo kit meno, wabibedo ki ‘tam ma tye atir,’ kun nongo pe watamo ni piwa tek loyo jo mukene nyo ni konywa pe.​—Rom. 12:3.

2. Pingo pe obedo gin maber me porre ki jo mukene?

² Ngene kene ni watwero nongo adwogi maber ki i lubo lanen me niye pa omego nyo lamego mo ma cobo ticce me pwony maber. (Ibru 13:7) Man twero konyowa me dongo dirowa me pwony. (Pil. 3:17) Ento apokapoka madit tye i kin lubo lanen maber ma ngat moni oweko ki poro kwoni ki mege. Bedo ka porre ki jo mukene twero weko idongo cwiny me nyeko, cwinyi tur, nyo bene iwinyo calo konyi pe. Kit ma wanyamo kwede i pwonyo ma okato-ni, pyem ki jo mukene me kacokke twero balo watwa ki Jehovah. Ki mar, Jehovah ocikowa ni: “Dano acel acel kong ongi ticce kene ka ber, meno miyo tyen lok me wakkene bedo pi ticce kikome ma en otiyo, ma pe dok poro ki tic pa lawote.”​—Gal. 6:4.

3. I yo ma nining ma dong idongo watti ki Jehovah ma weko ibedo ki yomcwiny?

³ Jehovah mito ni ibed ki yomcwiny pi dongoni i yo me cwiny. Me labolle, ka inongo batija, cwinyi myero obed  yom ni icobo yub meno! Imoko tammi piri keni me timo meno. Marri pi Lubanga aye otugo cwinyi me timo meno. Tam kong kit ma idongo kwede i yo me cwiny nicakke i kare ma inongo batija. Me labolle, tika mitini me kwano Baibul ki kwan piri keni odongo? Tika lega ma ilego i kare-ni tye mamit dok ma a ki i cwinyi? (Jab. 141:2) Tika dong idongo dironi me cako lok ki dano i tic me pwony kacel ki diro me tic ki jami tic mapatpat ma watiyo kwedgi-ni? Dok ka itye ki jo gang, tika Jehovah okonyi me doko won ot, min ot, nyo lanyodo maber? Itwero bedo ki yomcwiny pi dongoni i yo magi.

4. Gin ango ma wabinyamo i pwony man?

⁴ Watwero konyo jo mukene me bedo ki yomcwiny i ticgi pi Jehovah. Watwero konyogi bene pe me bedo ka porre ki jo mukene. I pwony man, wabineno kit ma lunyodo gitwero konyo lutinogi, kit ma jo munyomme gitwero konnye i kingi, ki kit ma luelda ki jo mukene me kacokke gitwero konyo omege ki lumege. Me agikkine, wabineno cik mogo ma igi lac me Baibul ma gitwero konyowa me keto yub mupore ma watwero cobogi ma lubbe ki kwo ma watye ka kato ki iye.

5. Ma lubbe ki Jo Epeco 6:4, gin ango ma lunyodo omyero gugwokke adada ki timone?

⁵ Lunyodo omyero gugwokke ki poro latin acel ki latin mukene nyo ki keto gingi tutwal ni latin otim gin makato kerone woko. Ka lunyodo gibedo ka timo meno, ci gitwero turo cwiny latingi woko. (Kwan Jo Epeco 6:4.) Laminwa mo ma nyinge Sachiko * owaco ni: “Lupwonyena onongo gimito ni atim maber makato lutino ducu ma i kilaciwa. Medo i kom meno, mamana onongo bene keto gingi ni atim maber adada i cukul wek ami caden bot lapwonya ki babana ma onongo pe tye Lacaden. Ki lok ada, mamana onongo mito ni anong pacen 100 i peny, ma man onongo pe twere bota. Kadi bed dong atyeko kwan mwaki mapol angec, kare mogo pud abedo ka pennye kekena ka gin ma atye ka timo pi Jehovah-ni romo.”

6. Ngo ma lunyodo gitwero pwonyo ki i Jabuli 131:1, 2?

⁶ Pwony ma pire tek pi lunyodo nonge i Jabuli 131:1, 2. (Kwan.) Kabaka Daudi owaco ni pe etikke “i kom lok madito ata”  nyo jami ma kerone pe romo. Cwiny me mwolo oweko en owaco ni “cwinya okwe, aywe dong gira mot.” Ngo ma lunyodo gipwonyo ki i lok pa Daudi man? Wek lunyodo gubed mwol, pe myero guket gingi tutwal i komgi kekengi me cobo jami madongo dok pe guket gingi i kom lutinogi. Lunyodo gitwero konyo latingi me winyo ni konye tye ka giniang gin ma latin meno twero timo maber ki ma en pe twero timo maber kun bene gikonye me keto yub man en twero cobo. Laminwa mo ma nyinge Marina wiye po ni: “Mamana onongo pe pora ki omegina adek-ki nyo ki lutino mukene. En opwonya ni ngat acel acel tye ki motte mapat dok ni wan ducu piwa tek bot Jehovah. Pi kony pa mamana, pol kare pe apore ki jo mukene.”

7-8. Laco twero miyo deyo ki dakone nining?

⁷ Laco ma Lakricitayo myero omi deyo ki dakone. (1 Pet. 3:7) Miyo deyo ki ngat moni kwako mine kare kacel ki woro. Me labolle, laco miyo deyo ki dakone ka en tere macalo ngat ma pire tek. En pe penye me timo gin ma kerone pe romo. Dok en pe poro dakone ki mon mukene. Ka onongo en otim meno, adwogi marac ango ma twero bino? Laminwa mo ma nyinge Rosa, cware ma pe tye Lacaden pol kare bedo ka pore ki mon mukene. Leb maraco ma en tiyo kwede-ni weko Rosa winyo marac i kome kekene dok bene weko en bedo ki akalakala ka ce ngat mo twero mare. Rosa owaco ni, “Myero kare ducu kibed ka poyo wiya ni pira tek i wang Jehovah.” Ki tungcel laco ma Lakricitayo miyo deyo bot dakone. En ngeyo ni timo meno gudo watte ki dakone dok gudo watte ki Jehovah bene. *

⁸ Laco ma miyo deyo bot dakone pako dakone, wacce ni emare, dok pwoye. (Car. 31:28) Meno aye kit ma cwar Katerina, ma waloko i kome i pwony ma okato-ni okonye kwede i kare ma en onongo winyo calo konye pe ka epore ki jo mukene. I kare ma Katerina pud anyaka matidi, mamane onongo caye adada, dok pol kare onongo bedo ka pore ki anyira mukene, kadi wa lureme. Macalo adwogine, Katerina ocako porre ki jo mukene​—kadi wa i kare ma en odoko Lacaden pa Jehovah! Ento cware okonye me lweny ki tam man ki me dongo neno ma opore i kome kekene. Katerina owaco ni: “En mara, pwoya pi jami mabeco ma atimo, dok lego pira bene. En bene poyo wiya i kom kit mogo mamwonya ma Jehovah tye kwede dok konya me loko tam maraco ma atye kwede.”

9-10. Luelda ma lumar gukonyo laminwa mo nining pe me bedo ka porre ki jo mukene i yo marac?

⁹ Luelda gitwero konyo jo ma gimaro porre ki jo mukene nining? Nen kong gin mutimme i kom laminwa mo ma nyinge Hanuni, ma i kare ma en pud latin matidi onongo pe kipwoye. En wiye po ni: “An onongo lalewic dok awinyo calo lutino mukene-ni giber giloya. Nicakke i kare ma an pud latin matidi, abedo ka porre ki jo mukene.” Kadi wa i nge pwonyo ada, Hanuni onongo pud bedo ka porre ki jo mukene. Macalo adwogine, en onongo winyo ni konye pe i kacokke. Ento i kare-ni, en tye ka tic macalo lapainia ma cwinye yom. Gin ango ma okonye me loko nenone?

¹⁰ Hanuni owaco ni luelda ma lumar aye  gukonye me loko nenone. Gunyuto gengi i kome dok gupwoye pi lanene me niye. Hanuni owaco ni: “I kare mogo, luelda onongo gipenya ni acit ka cuko cwiny lumege mogo ma onongo gimito kony. Tic meno onongo weko awinyo ni an pira tek. Wiya pud po i kom kare mo ma luelda gupwoya pi cuko cwiny ma amiyo bot lumege mogo matino. Ci gukwanna 1 Jo Tecalonika 1:2, 3. Man pud dong ogudo cwinya ya! Pi kony pa lukwat mabeco magi, i kare-ni awinyo ni pira tek i dul pa Jehovah.”

11. Watwero konyo jo ‘ma cwinygi cwer’ nining kit ma kitito kwede i Icaya 57:15?

¹¹ Kwan Icaya 57:15. Jehovah paro adada pi ngat ma “cwinye cwer.” Wan ducu, pe luelda keken, watwero konyo me cuko cwiny omege ki lumege magi. Yo acel ma watwero cuko kwede cwinygi aye ki nyuto ni waparo pigi. Jehovah mito ni wanyutigi kit ma en marogi kwede. (Car. 19:17) Watwero konyo omegiwa ki lumegiwa ka wabedo jo mamwol. Pe wamito ywayo tam pa dano i komwa i yo ma twero tugo nyeko i cwinygi. Me ka meno, watiyo ki dirowa kacel ki ngecwa me cuko cwiny jo mukene.​—1 Pet. 4:10, 11.

12. Pingo dano ma rwomgi lapiny onongo gimaro bedo kacel ki Yecu? (Nen cal ma tye i pok ngeye.)

¹² Watwero pwonyo kit me tero jo mukene ka watamo i kom kit ma Yecu otero kwede lulub kore. Yecu aye obedo laco ma pud dong pire tek loyo ma okwo i lobo-ni. Kadi bed kit meno, en onongo ‘wor, dok mwol bene i cwinye.’ (Mat. 11:28-30) En pe obedo ka wakke ki ryekone kacel ki jami mapol adada ma en ngeyo. En opwonyo kun tiyo ki nyig lok kacel ki lapor ma niang iye yot dok gudo cwiny jo mamwol. (Luka 10:21) Yecu pe obedo calo lutela dini me karene ma luwakke, ma onongo giweko dano winyo calo pigi pe tek i wang Lubanga. (Jon 6:37) Me ka meno, en onongo tero dano ma rwomgi lapiny ki woro.

13. Kica ki mar pa Yecu onen woko ka maleng nining i kit me en otero kwede lupwonnyene?

¹³ Kica ki mar pa Yecu onongo nen ka maleng i kit ma en tero kwede lupwonnyene. En onongo ngeyo ni ryekogi kacel ki kerogi patpat. Pi meno, gin ducu onongo pe gitwero cobo tic marom i tic me pwony. Kadi bed kit meno, en onongo pwoyo tute pa ngat acel acel ma tute ki kerone ducu i tic me pwony. Niango ma atir ma Yecu tye kwede onen ka maleng i carolok ma en omiyo i kom lim. I carolok meno, ladit-ti omiyo ki opii acel acel lim “kit macalo en romo tic kwede.” I kin opii aryo ma komgi mit-ti, ngat acel otiyo lim mapol loyo lawote. Ento laditgi opwoyo gin aryo ducu ki lok acel-li, ni: “Itimo ber mada, in latic maber dok lagen.”​—Mat. 25:14-23.

14. Watwero lubo kit ma Yecu onongo tero kwede jo mukene nining?

¹⁴ Yecu terowa ki kica dok ki mar. En ngeyo ni ryekowa ki kerowa patpat, dok en bedo ki yomcwiny ka watimo gin maber loyo ma watwero. Bedo ber ka wan bene watero jo mukene kit ma Yecu terowa kwede. Pe wamito ni wawek laye lawotwa mo owiny calo konye pe nyo wawek lewic omake pien en pe twero tic calo jo mukene. Me ka meno, omyero wayenyu kare me pwoyo omegiwa ki lumegiwa pi miyo gin maber loyo bot Jehovah.

15-16. Laminwa mo acel onongo adwogi maber nining pi keto yub ma en twero cobone?

¹⁵ Keto yub miyo kwowa bedo ki tyen lok. Ento gin ma pire tek aye me keto  yub ma rwatte ki kerowa kacel ki kwo ma watye ka kato ki iye. Pe mitte ni waket yub marom aroma ki pa jo mukene. Ka watimo kit meno, ci cobone biloyowa woko dok cwinywa bitur. (Luka 14:28) Nen kong labol pa laminwa mo ma tye lapainia ma nyinge Midori.

¹⁶ I kare ma Midori tye latin matidi, wonne ma pe tye Lacaden onongo kare ducu wacce ni ominne ki laminne kacel ki lutino kwan luwote giber giloye. Midori owaco ni, “Onongo awinyo calo konya pe.” Ento i kare ma Midori owoto ki dongo, en obedo ka dongo genne i kome kekene. En owaco ni, “Onongo akwano Baibul nino ducu wek abed ki kuc i cwinya dok awiny calo Jehovah mara.” Medo i kom meno, en oketo yub ma en romo cobone, dok obedo ka lega matek wek ecob yubbe magi. Macalo adwogine, Midori dong twero bedo ki yomcwiny pi dongone i yo me cwiny.

17. Watwero medde ki ‘weko Lubanga roco tam me cwinywa doko manyen’ nining dok adwogine bibedo nining?

¹⁷ Tero kare malac me loko tam marac ma watye kwede i komwa kekenwa. Pi meno, Jehovah cuko cwinywa ni: “Wuwek Lubanga dong oroc tam me cwinywu odok manyen.” (Ep. 4:23, 24) Me timo meno, mitte ni walegi, wakwan dok walwod Lok pa Lubanga. Medde ki timo jami magi dok ileg Jehovah pi teko. Cwiny mere maleng bikonyi me loyo tim mo keken me porre ki jo mukene. Jehovah bene bikonyi me niang ka itye ka dongo cwiny me nyeko nyo awaka, kacel ki kwanyone woko oyotoyot.

18. Lok ma nonge i 2 Tekwaro 6:29, 30 twero kweyo cwinyi nining?

¹⁸ Kwan 2 Tekwaro 6:29, 30. Jehovah ngeyo gin ma tye i cwinywa. En bene ngeyo  ariya ma watye ka kato ki iye​—ma gin aye tam maraco me lobo man kacel ki roc ma watye kwede. Ka Jehovah tye ka neno kit ma watye ka lweny matek me loyo tam maraco magi, mare piwa bene dongo.

19. Lapor mene ma Jehovah otiyo kwede me nyuto kit ma en winyo kwede i komwa?

¹⁹ Me nyuto kit ma en marowa kwede, Jehovah tiyo ki lapor me mar ma tye i kin latin ki mine. (Ic. 49:15) Nen kong labol pa lamego mo ma nyinge Rachel. En ocoyo ni: “Anywalo nyara Stephanie ma tye abwogi. I kare ma anene pi tyen mukwongo, en onongo tidi adada dok goro. Ento ludaktar onongo giye ni atinge nino ducu pi dwe acel mukwongo me kwone i kare ma en tye i pamba i ot yat. I kare meno, an ki nyara wadongo wat macok adada i kinwa. En dong tye ki mwaka abicel dok kome pud tidi ka kiporo ki lutino mukene me mwaka abicel. Kadi bed kit meno, an amare adada pien en olwenyo matek wek ebed kwo, dok okella yomcwiny madwong i kwona!” Pud dong kweyo cwinywa ya me ngeyo ni Jehovah bene winyo kit mar acel-li piwa ka en nenowa ka tute matek me tic pire ki cwinywa ducu!

20. Macalo latic pa Jehovah ma odyere bote, tyen lok ango ma itye kwede me bedo ki yomcwiny?

²⁰ Kit macalo in itye latic pa Jehovah-ni, in ibedo ngat ma pire tek adada i ot pa Jehovah dok pe tye ngat mo marom kwedi. Jehovah pe onyiki cok bote pien iber iloyo jo mukene. En onyiki cok bote pien oneno cwinyi ci onongo ni ibedo dano mamwol dok ma en twero pwonyone. (Jab. 25:9) Bed ki gen ni ka itute ki keroni ducu me tic pire, en pwoyo meno matek. Ka imedde ki bedo lagen dok idiyo cwinyi, ci meno nyuto “cwiny ma genne ki maber.” (Luka 8:15) Dong, medde ki miyo bot Jehovah gin maber loyo ma itwero. Ci ibibedo ki tyen lok me nongo yomcwiny ‘pi ticci kikome ma itiyo.’