1-2. I yo ma nining ma cikke pa Jehovah ma kicoyo i Icaya 65:16, 17 cuko cwinywa pe me ol woko?

“PE IOL WOKO!” Meno aye obedo wi lok madit me gure me rijon me mwaka 2017. Yub me gure madit man onyutiwa kit ma watwero medde ki ciro atematema mapatpat ma wakato ki iye. Mwaki angwen dong okato nicakke i kare meno, dok pud watye ka medde ki kanyo pekki i lobo man.

² Pekki ango ma ikato ki iye macok cok-ki? Tika irwenyo dano me gangwu nyo laremi mo i to? Tika itye ka kanyo two mo malit? Nyo mono itye ka canne ki pekki ma bino macalo adwogi me tiyo? Nyo can ma poto atura, tim gero, nyo aunauna? Nyo adwogi me two, calo two Korona? Pud dong watye ka kuro kare ma pekki magi bibedo pe​—ma wiwa biwil woko iye matwal!​—Kwan Icaya 65:16, 17.

3. Gin ango ma omyero watim kombeddi, dok pingo?

³ Kwo i wi lobo man tek, dok watwero kemme ki pekki madongo makato i anyim. (Mat. 24:21) Dong mitte ni wamedde ki jingo kerowa me diyo cwinywa. Pingo? Pien Yecu owaco ni: “Ka wudiyo cwinywu, ci wubilaro kwowu.” (Luka 21:19) Tamo kit ma jo mukene gitye ka kanyo kwede pekki macal ki mewa twero jingo kerowa me diyo cwinywa.

4. Pingo watwero waco ni Jehovah aye obedo lanen maber loyo me diyo cwiny?

⁴ Anga ma owekiwa lanen maber loyo me diyo cwiny? Lubanga Jehovah. Tika lagam meno weko ibedo ki ur? Ento ka ilwodo maber, ci ibiniang. Lobo man tye i te loc pa Larac-ci, dok opong ki pekki. Jehovah tye ki teko me giko pekki magi cutcut, ento en tye ka diyo cwinye kun kuro kare mo i anyim me timo meno. (Rom. 9:22) I kare-ni, Lubangawa pud tye ka medde ki diyo cwinye nio wang ma kare  meno oo. Kong dong wanenu jami abongwen ma Jehovah tye ka kanyone.

5. I yo ma nining ma dong kiketo cac i kom nying Lubanga, dok in iwinyo nining iye?

⁵ Jehovah oyero me kanyo cac ma dano giketo i kom nyinge. Jehovah maro nyinge, dok en mito ni dano ducu gunyut woro pire. (Ic. 42:8) Ento pi mwaki ma romo alip abicel, kibedo ka keto cac i kom nyinge. (Jab. 74:10, 18, 23) Man ocakke i poto me Eden i kare ma Catan (ma tyen lokke “Labal Nying”) okok i kom Lubanga ni en tye ka twono Adam ki Kawa gin mo ma gimito wek gibed ki yomcwiny. (Acak. 3:1-5) Nicakke i kare meno, dong kikok i kom Jehovah tyen mapol ni en twono dano jami ma mitte pi kwogi. Yecu obedo ki par ni dano pe gitye ka nyuto woro pi nying Wonne. Pi tyen lok meno, en opwonyo lupwonnyene me lega ni: “Wonwa ma tye i polo, giwor nyingi maleng.”​—Mat. 6:9.

6. Pingo Jehovah oye ni kare malac okati ma peya en ocobo lok madok i kom twerone me loc?

⁶ Jehovah tye ka kanyo jemo i kom twerone me loc. Jehovah tye ki twero me loyo polo ki lobo, dok yone me loc aye pud dong ber loyo. (Yabo 4:11) Ento Larac-ci otute matek me bwolo lumalaika ki dano wek gutam ni Lubanga pe ki twero meno. Lok madok i kom twero me loc pa Jehovah pe obedo gin mo ma onongo kitwero cobone i nino acel keken. Ki ryekone, Lubanga oye ni dano kong gumedde ki lone kengi wek gunen ki wanggi ni pe gitwero lone kengi labongo winyo lok pa Lacwec. (Jer. 10:23) Pien Lubanga obedo ka diyo cwinye, pe tye ngat mo ma bibedo ki akalakala ni Lubanga tye ki twero me loyo polo ki lobo. Dano ducu gibiniang ni yo me loc pa Lubanga aye ber loyo dok ni Kerre keken aye bikelo kuc ki ber bedo me ada i lobo.

7. Angagi ma gujemo i kom Jehovah, dok en bitimo gin ango i komgi?

⁷ Jehovah tye ka kanyo jemo pa lutinone mogo. Jehovah ocweyo lutinone ma lumalaika ki ma dano labongo roc mo keken. Ento lamalaika ma odoko Larac-ci (ma tyen lokke “Lajemo”) ojemo i kom Jehovah dok obwolo Adam ki Kawa ma onongo gipe ki roc mo keken, me jemo i kom Jehovah bene. Lumalaika ki jo mogo bene guribbe i jemo meno. (Juda 6) Lacen, kadi wa jo mogo ma i rok me Icrael, ma gin aye jo ma Lubanga oyero, gukwere ci gucako woro lubange me goba. (Ic. 63:8, 10) Jehovah cwinye otur adada. Kadi bed kit meno, en odiyo cwinye, dok pud bimedde ki diyo cwinye nio wang ma karene me jwayo lutim maraco oromo. Meno bikweyo cwiny jone ma lugen adada, ma gitye ka diyo cwinygi kacel kwede pi jami maraco ma tye ka timme i lobo-ni!

8-9. Lok goba ango ma kitye ka wacone i kom Jehovah, dok wan wadok iye nining?

⁸ Jehovah tye ka kanyo goba ma Catan waco i kome kare ducu. Catan okok i kom latic pa Jehovah, Yubu, kacel ki lutic pa Lubanga ducu ma lugen ni giwore pi rwot ineka. (Yubu 1:8-11; 2:3-5) Catan pud tye ka medde ki kok i kom dano wa i kare-ni. (Yabo 12:10) Waromo tic matek me nyuto ni lok pa Catan meno obedo lok goba ka wakanyo pekki ma wakato ki iye dok wabedo lugen bot Jehovah pien Wamare. Kit macalo otimme kwede i kom Yubu, Jehovah biminiwa mot bene pi diyo cwinywa.​—Yak. 5:11.

⁹ Catan tiyo ki lutela dini goba me kok i  kom Jehovah ni en cwinye col dok en aye tye ka kelo pekki i lobo-ni. Jo mogo bene giwaco ni ka latin oto, ci nongo Lubanga aye okwanyo latin meno otero i polo pien en mito medo wel lumalaikane. Meno pud dong obedo yeto Lubanga ya! Ento wan wangeyo ni Jehovah obedo Wego ma lamar. Ka two mo malit omakowa nyo ka danowa me amara oto, pe wakok i kom Lubangawa. Me ka meno, watye ki gen ni i kare mo, en bicobo pekki ducu. Watwero tito ki jo ducu ma giye winyo lokwa ni Jehovah obedo Lubanga ma lamar adada. Meno weko en bedo ki lok maber me agama bot ngat ma yete.​—Car. 27:11.

10. Gin ango ma Jabuli 22:23, 24 nyuto madok i kom Jehovah?

¹⁰ Jehovah tye ka kanyo neno ka luticce ma lugen gideno can. Jehovah obedo Lubanga ma lakica. En dag neno ka wakok pi pekki ma watye ka kato ki iye​—kadi bed meno aunauna, two, nyo peko ma bino pi roc ma watye kwede. (Kwan Jabuli 22:23, 24.) Jehovah winyo aremwa; en mito jukone, dok en bijukone woko. (Por Nia 3:7, 8; Icaya 63:9.) Kare bibino ma ‘en bijwayo pig wangwa woko ducu. To bene dong bibedo pe, kadi kumo nyo koko, nyo arem.’​—Yabo 21:4.

11. Jehovah winyo nining i kom luticce ma lugen ma guto?

¹¹ Jehovah tye ka kanyo to pa lureme. Jehovah winyo nining i kom co ki mon ma lugen ma guto? En tye ki miti matek me nenogi doki! (Yubu 14:15) Tika itwero goyo i wi kit ma Jehovah paro kwede lareme Abraim? (Yak. 2:23) Nyo Moses, ma onongo en loko kwede “wang ki wang”? (Nia 33:11) Dok en nen calo tye ki miti madit adada me winyo ka Daudi ki luco jabuli mukene giwero wer mamit me pak!  (Jab. 104:33) Kadi bed lurem Lubanga magi guto woko, Jehovah wiye pe owil i komgi. (Ic. 49:15) Wiye po i kom jami ducu madok i komgi. Baibul wacciwa ni, “gin ducu gitye kwo ki tung bote.” (Luka 20:38, NWT) I kare me anyim, en bicerogi, dok bibedo ki kare me winyo legagi kun bene jolo worogi. Ka irwenyo danoni me amara i to, walego ni lwodo tam magi okwe cwinyi.

12. Gin ango ma cwero cwiny Jehovah matek i kare man me agikki ma piny rac adada-ni?

¹² Jehovah tye ka kanyo neno dic ma jo maraco giketo i kom dano. I kare ma jemo ocakke i poto me Eden, Jehovah ongeyo ni jami kong biballe matek ma nongo pud peya oyubbe odoko maber. Jehovah dag tim maraco, ngolo kop alenga, kacel ki tim gero ma tye i lobo i kare-ni. En pol kare paro pi jo ma gigoro loyo​—calo jo ma pe gitwero gwokke kekengi, lutino kic kacel ki mon to. (Jek. 7:9, 10) Jehovah cwinye cwer adada, tutwalle ka oneno luticce ma lugen kiunogi dok kitweyogi i buc. Bed ki gen matek ni en maro wun ducu ma wutye ka diyo cwinywu kacel kwede.

13. Tim malik ango ma Lubanga tye ka neno i kin dano, dok en bitimo gin ango iye?

¹³ Jehovah tye ka kanyo tim tarwang malik ma dano gitye ka timo i kare-ni. Kicweyo dano me poro kit pa Lubanga ento yomo cwiny Catan ka dano gitimo tim maraco. I kare ma Lubanga oneno ni “bal pa dano odoko dit woko” i kare pa Nua, Jehovah “ongut pi cweyo dano i lobo, ocwero cwinye matek.” (Acak. 6:5, 6, 11) Tika lobo-ni dong odoko ber nicakke i kare meno? Pe wacel! Catan nen calo cwinye bedo yom adada ka neno nya pa tim tarwang malik, kadi wa buto i kin co ki co nyo mon ki mon! (Ep. 4:18, 19) Catan cwinye bedo yom makato ka obito luworo me ada me poto i bal. Ka kare pa Jehovah me giko tim maraco dong oromo, en binyuto ni edag tim me tarwang ki jwero lutim tarwang ducu ma gukwero loko kwogi woko.

14. Gin ango ma dano tye ka timo i kom cwec pa Lubanga?

¹⁴ Jehovah tye ka kanyo neno balle pa ginacweyane. ‘Dano pe tye ka loyo jo mukene ki tek’ keken, ento bene gitye ka balo lobo kacel ki neko lee ma Jehovah ominigi ni gugwok maber. (Latit. 8:9; Acak. 1:28) Lucayan mogo giwaco ni pi jami maraco ma dano tye ka timone, kwai lee ki ginapita ma romo milion acel kulu birweny woko i mwaki mogo manok keken anyim. Pe tek me niang pingo dano mapol gitye ka paro pi kabedo murumowa! Ki pwoc madit, Jehovah ocikke me ‘nyoto jo ma gitye ka nyoto lobo’ ki me loko lobo-ni me doko paradic.​—Yabo 11:18; Ic. 35:1.

15-16. Ngo ma myero otug cwinywa me kanyo pekki kacel ki Jehovah? Mi lapor.

¹⁵ Tam kong i kom pekki ducu ma Wonwa me polo dong okanyo pi mwaki alip mapol. (Nen bok ma wiye tye ni “ Gin ma Jehovah Tye ka Kanyo.”) Jehovah twero jwero lobo man marac-ci i cawa mo keken. Ento diyo cwinye okelo mot botwa! Tam kong i kom lapor man. Go kong ni, ludaktar guwaco ki laco mo ki dakone ni latin ma gibinywalo-ni bibedo ki goro mapol dok ni kwone bibedo matek kun bene bito woko ma pud tidi. Kadi bed kit meno, lunyodo man pud cwinygi yom i nge nywalo latin man kadi bed bibedo tek pigi me gwoko latin-ni. Pien gimaro latingi-ni, gin gibikanyo peko mo keken wek gimine kwo maber loyo ma gitwero.

 ¹⁶ I yo acel-lu, likwayo pa Adam ki Kawa ducu kinywalogi ma nongo gitye ki roc. Kadi bed kit meno, Jehovah pud marogi dok paro pigi. (1 Jon 4:19) Dok Jehovah pe tye calo lunyodo ma i laporwa-ni, pien En twero cobo pekkiwa ducu. En dong otyeko moko nino dwe ma ebicobo pekki ducu ma dano tye ka kato ki iye. (Mat. 24:36) Mar ma Jehovah tye kwede piwa myero otug cwinywa me kanyo pekki nio wang ma en ojwayogi.

17. Lok ma kitito i kom Yecu i Jo Ibru 12:2, 3 cuko cwinywa nining me medde ki diyo cwinywa?

¹⁷ Jehovah pud dong owekiwa lanen maber loyo me diyo cwiny. Yecu olubo lanen me diyo cwiny pa Wonne kore ki kore. I kare ma Yecu tye i lobo kany, en okanyo yet, lewic, kacel ki to i kom yat pi balwa. (Kwan Jo Ibru 12:2, 3.) Labongo akalakala mo, lanen me diyo cwiny pa Jehovah omiyo ki Yecu kero me kanyo pekki. Man bene twero jingowa.

18. Lok ma i 2 Petero 3:9 konyowa nining me niang gin ma diyo cwiny pa Jehovah tye ka cobone?

¹⁸ Kwan 2 Petero 3:9. Jehovah ngeyo kare maber loyo me jwero lobo man marac-ci. Diyo cwinye omiyo kare me coko lwak dano mapol ata-ni ma welgi romo milion mapol, ma giwore dok gipake. Gin ducu cwinygi yom ni Jehovah odiyo cwinye nio wang ma kinywalogi, gupwonnye me mare, dok gudyero kwogi bote. Ka dong dano milion mapol gukanyo nio wa i agikki piny, ci binen ka maleng ni Jehovah omoko tam ma atir pi kare ma en oyero me diyo cwinye!

19. Gin ango ma omyero wamok tamwa me timo, dok mot ango ma wabinongo?

¹⁹ Wapwonyo ki i lanen pa Jehovah kit me kanyo pekki labongo rwenyo yomcwinywa. Kadi bed Catan dong okelo arem ki pekki mapol adada, Jehovah pud medde ki bedo “Lubanga ma layomcwiny.” (1 Tem. 1:11, NWT) Wan bene watwero bedo ki yomcwiny ka wadiyo cwinywa kun wakuro Jehovah me lonyo nyinge, ilo malo twero me locce, giko tim maraco ducu, ki dong giko pekkiwa ducu. Omyero wamoku tamwa me medde ki diyo cwinywa kun wangeyo ni Wonwa bene tye ka diyo cwinye. Ka watimo meno, ci lok magi bicobbe pi wan ducu ki acel acel: “Ngat ma gitemo cwinye ka ocung matek tye ki gum [yomcwiny]; pien ka dong giteme, ce en oloyo, ci binongo mot me lalukana me kwo ma Rwot [Jehovah] ociko me miyo bot jo ma en maro.”​—Yak. 1:12.