1. Omyero wanen mic me lega bot Jehovah nining?

 LACWE polo ki lobo, ominiwa mic mo ma pire tek adada. En ye ni waleg bote. Tam kong: Watwero tito lok ma tye i cwinywa bot Jehovah i cawa mo keken dok i leb mo keken labongo kong keto yub me lok kwede con. Watwero lega bote ki i wi kitanda me ot yat nyo ki i ot buc, kun nongo watye ki gen ni Wonwa ma lamar-ri biwinyo legawa. Pe waneno mic man calo gin ma konye pe.

2. Kabaka Daudi onyuto nining ni etye ki pwoc pi mot me lega?

² Kabaka Daudi onongo tye ki pwoc madit adada pi mic me lega. En owero bot Jehovah ni: “Wek legana obed i nyimi macalo odok eceta ma giwango ma duny makur.” (Jab. 141:1, 2) I kare pa Daudi, odok eceta maleng ma lulamdog onongo gitiyo kwede onongo kiyubo maber adada. (Nia 30:34, 35) Daudi onongo mito ni etam matut i kom gin ma ebiwacone ka etye ka lega bot Jehovah kit macalo jo ma onongo giyubo odok eceta-ni giyubo kwede maber. Meno aye bene obedo mitiwa i kare-ni. Wamito ni legawa oyom cwiny Jehovah.

3. Kodi cwiny ango ma omyero wabed kwede ka watye ka lega bot Jehovah, dok pingo?

³ Ka watye ka lega bot Jehovah, omyero wanyut woro madit adada. Tam kong i kom ginanyuta me aura ma Icaya, Ejekiel, Daniel, ki Jon guneno. Ginanyuta magi ducu gipat pat, ento gitye ki gin mo marom. Gin ducu ginyuto Jehovah macalo Kabaka ma rwomme lamal adada. Icaya ‘oneno Jehovah ma obedo i wi komkerre, kun  onyedde malo, madit twatwal.’ (Ic. 6:1-3) Ejekiel oneno Jehovah obedo i wi gadigadine me deyo ma i polo kun “mac . . . calo danyu,” orumo ka ngete ducu. (Ejek. 1:26-28) Daniel oneno “Ngat ma yam okwongo bedo kwo wa con,” ma oruko bongo matar calo pee, kun mac tye ka a ki i Komkerre. (Dan. 7:9, 10) Dok Jon oneno Jehovah ma obedo i wi kom ker kun danyu ma nen calo emeradi orumo komker woko dyere. (Yabo 4:2-4) Ka wawoto ki tamo i kom deyo ma Jehovah tye kwede ma lapore pe, man poyo wiwa ni mot me lega bote obedo mic madit adada dok ni omyero watim meno ki woro madwong. Ento omyero waleg nining?

4. Gin ango ma wapwonyo ki i lok mukwongo ma i lega ma Yecu omiyo macalo lapor i Matayo 6:9, 10?

⁴ Kwan Matayo 6:9, 10. I Pwonye me Wi Got, Yecu opwonyo lupwonnyene kit me lega i yo ma yomo cwiny Lubanga. I nge waco ni “wuleg kit man,” Yecu okwongo ki lok i kom jami ma pigi tego ma kubbe ki yub pa Jehovah: lonyo Nyinge; bino pa Kerre, ma bijwero lumone pa Lubanga ducu; ki dongo jami mabeco ducu ma En bitimo pi lobo-ni ki pi dano i anyim. Ka walego pi jami magi, wanyuto ni yub pa Lubanga pire tek botwa.

5. Tika pore piwa me lega pi jami ma gudo kwowa?

⁵ I bute me aryo ma lubo meno i lega ma Yecu omiyo macalo lapor-ri, en onyuto ni pore piwa me lega pi jami ma gudo kwowa. Watwero lego Jehovah ni ominiwa cam ma mitte pi nino meno, otimwa kica pi balwa, ogwokwa ki i atematema, dok olarwa ki i cing Larac-ci. (Mat. 6:11-13) Ka walego Jehovah pi jami magi, nongo watye ka nyutte ni wamito kony ki bote dok wamito yomo cwinye.

6. Tika omyero waleg pi jami ma kitito i lega ma Yecu omiyo macalo lapor-ri keken? Tit kong.

⁶ Yecu pe oketo macalo cik ni lulub kore gunwo lok ma i lega ma en omiyo macalo lapor-ri nyig lok ki nyig lok. I lega mukene ma Yecu olego bot  Lubanga, en olego pi jami ma patpat ma onongo pigi tek bote i kare meno. (Mat. 26:39, 42; Jon 17:1-26) I yo acel-lu, watwero lega pi gin mo keken ma gudo kwowa. Ka watye ki tam ma myero wamoki, waromo lega pi ryeko kacel ki niang matut. (Jab. 119:33, 34) Ka wabicako tic matek mo manyen, waromo lega pi kony me niang kit me timo tic meno. (Car. 2:6) Lunyodo gitwero lega pi lutinogi, lutino bene gitwero lega pi lunyodogi, dok wan ducu omyero waleg pi lutino kwanwa me Baibul kacel ki jo ma watito kwena botgi. Ento ka watye ka lega, pe omyero wagik ki penyo Jehovah pi jami ma wamito keken.

7. Pingo omyero wapak Jehovah i legawa?

⁷ Wiwa myero opo me pako Jehovah i legawa. Pe tye ngat mo mupore me nongo pak ma kato Lubangawa. En ‘ber dok weko bal pa dano.’ Jehovah bene obedo ‘Lubanga ma lakica dok maro dano, kiniga pe make oyot, dok mar mere ma pe lokke, ki genne, dwong.’ (Jab. 86:5, 15) Ada, watye ki tyen lok mabeco me pako Jehovah pi kite kacel ki jami ma en timo.

8. Jami mene ma watwero pwoyo Jehovah pire? (Jabuli 104:12-15, 24)

⁸ Medo i kom pako Jehovah i legawa, mitte bene ni wapwoye pi jami ducu mabeco ma en miyo botwa. Me labolle, watwero pwoye pi ature ma kalagi mwonya adada-ni, kwai cam mamit mapatpat, ki yomcwiny ma wanongo ki i bedo kacel ki luremwa ma wamaro. Wonwa ma lamar-ri miyowa jami magi ki mukene mapol ata me yomo cwinywa. (Kwan Jabuli 104:12-15, 24.) Ento ma pire tek loyo meno, wapwoyo Jehovah pi pwony ducu ma en miyowa ma weko niyewa bedo matek ki pi gen mamwonya ma watye kwede pi anyim.

9. Gin ango ma romo konyowa wek wiwa pe owil ki pwoyo Jehovah? (1 Jo Tecalonika 5:17, 18)

⁹ Wiwa twero wil woko oyotoyot me pwoyo Jehovah pi jami ducu ma en timo piwa. Gin ango ma twero konyi wek wi opo? Itwero coyo piny jami mogo ma ilego pire kun kare ki kare iroto me neno  kit ma Jehovah ogamo kwede lega magi. I nge meno, iromo lega me pwoye pi gamo legani. (Kwan 1 Jo Tecalonika 5:17, 18.) Tam kong i kom lok man: Ka jo mukene gupwoyowa, cwinywa bedo yom dok wawinyo ni gimarowa. I yo acel-lu, ka wiwa opo me pwoyo Jehovah pi gamo legawa, meno yomo cwinye adada. (Kol. 3:15) Ento tyen lok mukene ango ma watye kwede me pwoyo Lubanga?

10. Ma lubbe ki 1 Petero 2:21, pingo omyero wapwo Jehovah pi cwalo Yecu i lobo?

¹⁰ Kwan 1 Petero 2:21. Omyero wapwo Jehovah pi cwalo Wode me amara me pwonyowa. Wanongo pwony mapol i kom Jehovah ki kit me yomo cwinye ka wakwano gin mutimme i kwo pa Yecu. Ka wanyuto niye i kom ginkok pa Yecu, watwero bedo ki wat macok ki Lubanga Jehovah kun bene wabedo ki kuc kacel Kwede.—Rom. 5:1.

11. Pingo omyero waleg bot Jehovah i nying Yecu?

¹¹ Wapwoyo Jehovah ni watwero lega bote kun wawok ki bot Wode. Yecu aye obedo ngat ma Jehovah tiyo kwede me gamo legawa. Jehovah winyo dok gamo lega ma kilego i nying Yecu. Yecu otito ni: “Gin ducu ma wubilego i nyinga, abitiyone, wek giket deyo i kom Won pi Wod.”—Jon 14:13, 14.

12. Tyen lok mukene ango ma watye kwede me pwoyo Jehovah pi Wode?

¹² Jehovah timiwa kica kun jenge i kom ginkok pa Yecu. Ginacoya lwongo Yecu ni ‘lalamdog madit ma obedo i kabedo me deyo yo tung acuc i nget komker pa Won Deyo Madit i polo.’ (Ibru 8:1) Yecu aye “lakony ma cung piwa bot Lubanga Won.” (1 Jon 2:1) Pud dong watye ki pwoc madit bot Jehovah pi miniwa Lalamdog Madit ma winyo arem kacel kwedwa pi gorowa dok “bako doge piwa”! (Rom. 8:34; Ibru 4:15) Wabedo dano ma tye ki roc, dong labongo ginkok pa Yecu onongo pe bitwere me lega bot Jehovah. Labongo akalakala mo, ibiye ni pe waromo miyo pwoc muromo pi mic ma pire tek adada ma en omiyo botwa-ni—ma en aye mic me Wode me amara!

13. I dyewor ma Yecu peya oto, en onyuto nining ni emaro lupwonnyene?

¹³ I dyewor ma peya kineke, Yecu olego matek adada pi lulub kore kun kwayo Wonne ni ‘ogwokgi ki i cing Larac-ci.’ (Jon 17:15) Meno onyuto kit ma Yecu onongo marogi matek kwede! Kadi bed ni en onongo ngeyo ni ebikato ki i can malit adada, en onongo tye ka paro pi lukwenane.

14. Watwero nyuto nining ni wamaro omegiwa ki lumegiwa?

¹⁴ Calo Yecu, wan bene pe watamo pi jami ma wamito keken. Me ka meno, walego pi omegiwa ki lumegiwa kare ki kare. Ka watimo meno, nongo watye ka lubo cik pa Yecu ma owaco ni omyero wamar luwotwa dok wanyuto bot Jehovah ni wamaro luye luwotwa matek. (Jon 13:34) Lega pi omegiwa ki lumegiwa pe obedo balo cawa. Lok pa Lubanga wacciwa ni, “Lega pa dano ma kite atir tek, tye ki twero madwong.”—Yak. 5:16.

15. Pingo mitte ni waleg pi luye luwotwa?

¹⁵ Mitte ni waleg pi luye luwotwa pien gitye ka kato ki pekki mapol. Waromo lego Jehovah ni okonygi me kanyo two, can ma poto atura, lweny, aunauna, nyo pekki mukene mapat. Waromo bene lega  pi omege ki lumege ma gijalle me miyo kony ka ma can opoto iye atura. Twero bene bedo ni ingeyo ngat mo ma tye ka kato ki i peko mo matek. Pingo pe ileg pire kun ilwongo nyinge i legani? Wanyuto mar me omego ka walego Jehovah ni okonygi me kanyo pekki ma gitye ka kato ki iye.

16. Pingo omyero waleg pi omege ma gitelo wiwa?

¹⁶ Luelda me kacokke, gitye ki pwoc madit adada ni walego pigi dok ni lega magi konyogi. Lakwena Paulo onongo ngeyo ni pire tek ni jo mukene guleg pire. En ocoyo ni: “Wuleg bene pira wek Lubanga oyab doga, omiya gin ma myero aloki, wek atuc mung me lok me kwena maber ki tekcwiny.” (Ep. 6:19) I kare-ni bene, watye ki luelda mapol i kinwa ma gitiyo matek. Wanyuto mar pigi ka walego Jehovah ni ogo laane i kom ticgi.

17-18. Awene ma kitwero penyowa me lega pi jo mukene, dok gin ango ma myero wiwa opo iye?

¹⁷ I kare mukene, kitwero wacciwa ni omyero waleg pi jo mukene. Me labolle, lamego mo ma ocito ka kwano Baibul ki latin kwanne twero penyo lamego ma ocito kacel kwede ni oleg pi latin kwanne. Twero bedo ni lamego ma ocito kacel kwede-ni pe ngeyo latin kwan meno maber, dong en romo lego lega me agikki. I yo meno, en twero lego lega ma rwatte ki miti pa latin kwan-ni.

¹⁸ Kiromo penyo omego mo ni oleg i cokke me cito i tic me pwony nyo i cokke me dye cabit nyo tum cabit. Omege ma kiminigi mot ma kit meno, omyero wigi opo i kom tyen lok me cokke meno. Pe omyero kiti ki lega me miyo tira bot kacokke nyo me miyo lok angeya. Pol kare kimiyo dakika abic pi wer kacel ki lega, pi meno, omego ma tye ka lega-ni pe myero oti ki “lok mapol,” tutwalle i acakki me cokke.—Mat. 6:7.

19. Gin ango ma bikonyowa me bedo ma wayubbe pi nino me ngolo kop pa Jehovah?

¹⁹ Omyero wawek lega obed gin ma pire tek adada i kwowa ka wawoto ki  nyikke cok ki nino me ngolo kop pa Jehovah. Ma lubbe ki lok man, Yecu owaco ni: “Wubed ma wangwu twolo i kare ducu, kun wulego ni myero wubed ki tek me bwot ki i lok magi ducu ma bitimme.” (Luka 21:36) Ada, lega kare ducu bikonyowa me bedo ma wangwa twolo i yo me cwiny wek nino pa Lubanga pe onongwa ma pe wayubbe.

20. I yo ma nining ma legawa twero bedo calo odok eceta ma ngwece kur?

²⁰ Gin ango ma dong wanyamo i pwony man? Watye ki pwoc madit adada pi mic me lega. Jami ma pigi tek loyo ma omyero waleg pire obedo jami ma kubbe ki yub pa Jehovah. Wanyuto bene pwoc pi Wod pa Lubanga ki Kerre, dok bene walego pi luye luwotwa. Jehovah bene mito ni waleg pi jami ma mitte i kwowa me nino ducu ki pi kony me bedo ki niye matek. Ka watamo matut i kom legawa, wanyuto ni watye ki pwoc pi mic mamwonya man. Legawa bibedo calo odok eceta ma ngwece kur bot Jehovah—ma miyo “Cwinye bedo yom.”—Car. 15:8.