1. Lok ada mene ma ipwonyo i kare ma pud icako kwano Baibul acaka?

 TIKA wi po i kom kare ma pud icako kwano Baibul acaka? Gwok nyo ibedo ki ur me niang ni Lubanga tye ki nyinge. Oromo bedo ni cwinyi okwe i kare ma iniang ni Lubanga pe wango dano i mac me kapiny. Dok nen calo ibedo ki yomcwiny ni ibineno joni me amara ma guto odoco dok ibibedo kwedgi i paradic i lobo kany.

2. Medo i kom pwonyo lok ada me Baibul, ngo mukene ma itimo me medde ki dongo i yo me cwiny? (Jo Epeco 5:1, 2)

² I kare ma imedde ki kwano Lok pa Lubanga, marri pi Jehovah bene omedde ki dongo. Mar meno otugo cwinyi me keto i tic gin ma ipwonyo. Imoko tam mabeco ma jenge i kom cik ma igi lac me Baibul. Ipwonnye me tam i yo ma atir ki me timo gin ma atir pien onongo imito yomo cwiny Lubanga. Kit macalo latin poro kit pa lanyodone ma en maro, in bene ibedo ka lubo kit pa Woru me polo.—Kwan Jo Epeco 5:1, 2.   

3. Lapeny macalo mene ma watwero pennye kwede?

³ Waromo pennye kekenwa ni: ‘Tika marra pi Jehovah tye matek i kare-ni makato i kare ma pud anongo batija nyen? Nicakke ma anongo batija, tika tamma ki kit ma atimo kwede jami tye calo pa Jehovah—tutwalle ka odok i kom nyuto mar bot omege ki lumege?’ Ka “mar ma onongo yam itye kwede mukwongo” okwe woko, pe iwek cwinyi otur. Gin ma kit meno bene otimme i kom Lukricitayo me cencwari me acel. Yecu pe okwerogi woko, dok en pe bikwerowa bene. (Yabo 2: 4, 7) En ngeyo ni dok watwero bedo ki mar ma yam wabedo kwede i kare ma pud wapwonyo ada nyen.

4. Ngo ma wabinyamo i pwony man?

⁴ Pwony man binyamo kit ma watwero medde kwede ki dongo marwa pi Jehovah ki pi jo mukene. I nge meno, wabineno mot mogo ma bino ka wajingo marwa pi Jehovah ki utmegiwa.

5-6. (a) Ariya ango ma lakwena Paulo okato ki iye i kare me ticce me pwony? (b) Gin ango ma otugo cwinye me medde ki tic pi Jehovah?

⁵ Lakwena Paulo onongo cwinye yom me tic pi Jehovah, ento timo meno pe obedo yot. Paulo onongo pol kare woto i bor piny, dok wot onongo pe yot i kare meno. I wotte, Paulo kare mogo okato ki i “can mua i lwak kulu mupong ki pii” ki “can mua bot luyak.” I kare mukene bene lumonene gugoye ki odoo. (2 Kor. 11:23-27) Dok utmege pa Paulo onongo pol kare pe ginyuto pwoc pi tutene me konyogi.—2 Kor. 10:10; Pil. 4:15.

⁶ Gin ango ma okonyo Paulo me medde ki tic pi Jehovah? Paulo onongo opwonyo lok mapol madok i kom kit pa Jehovah ki i Ginacoya kacel ki i jami mutimme i kome. Paulo omoko ka maleng ni Lubanga Jehovah mare. (Rom. 8:38, 39; Ep. 2:4, 5) Dok en bene ocako maro Jehovah matek. Paulo onyuto marre pi Jehovah ki ‘konyo jo pa Lubanga, dok pud omedde ki konyogi.’—Ibru 6:10.

7. Tit kong yo acel ma watwero dongo kwede marwa pi Jehovah.

⁷ Watwero dongo marwa pi Lubanga ki kwano Lokke i yo matut. Ka iwoto ki kwano Baibul, tute me niang gin ma tyeng acel acel tittiwa i kom Jehovah. Pennye kekeni ni: ‘Ginacoya man nyuto nining ni Jehovah marra? Gin ango ma anongo ki i ginacoya man ma konya me maro Jehovah?’

8. Lega twero konyowa nining me dongo marwa pi Lubanga?

⁸ Yo mukene ma watwero dongo kwede marwa pi Jehovah aye ki lega bote nino ducu kun watite kit ma wawinyo kwede kikome. (Jab. 25:4, 5) Ka watimo meno, ci Jehovah bigamo legawa. (1 Jon 3:21, 22) Laminwa mo i Acia ma nyinge Lucy owaco ni: “I acakkine, onongo amaro Jehovah pi jami ma apwonyo i kome. Ento i kare ma aneno kit ma en gamo kwede ki legana, marra pire omedde matek. Man oweko abedo ki miti me timo jami ma yomo cwinye.” b

9. Lok pa lakwena Paulo onyuto nining ni Temceo onongo tye ka tute me nyuto mar matut pi jo mukene?

⁹ Mwaki mogo i nge doko Lakricitayo, Paulo orwatte ki awobi mo ma nyinge Temceo. Temceo onongo maro Jehovah, dok onongo maro dano bene. I nge kare mo, Paulo owaco bot Lukricitayo me Pilipi ni: “Pe atye ki ngat mo mukene doki ma tye ki kit cwiny ma en [Temceo] tye kwede, ma twero paro piwu adada macalo en.” (Pil. 2:20) Ki kany, Paulo pe oloko i kom kero pa Temceo me doro yub nyo me lok i nyim lwak, ento Paulo onongo twero neno ni Temceo maro omege ki lumege matek. Labongo akalakala mo, kacokke ma Temceo okonyogi gubedo ka kuro binone ki miti madit.—1 Kor. 4:17.

10. I yo ma nining ma Anna gin ki cware gunyuto kwede margi pi omegigi ki lumegigi?

¹⁰ Wan bene wayenyo yo me konyo omegiwa ki lumegiwa. (Ibru 13:16) Nen kong gin mutimme i kom Anna, ma kiloko i kome i pwony mukato-ni. I nge yamo mo magwar, en kacel ki cware gulimo jo me ot mo ma  yamo-ni obalo wi otgi woko. Macalo adwogine, jo me ot man onongo gipe ki bongi maleng me aruka. Anna owaco ni: “Wacoko bongigi, walwoko, wagoyo dok wabano maber ci wadwoko botgi. Ki tung botwa, man onongo gin mo matidi, ento meno oweko wadoko lurem macok adada nio wa i kare-ni.” Mar ma Anna gin ki cware gitye kwede pi omege ki lumege otugo cwinygi me miyo kony ma kome.—1 Jon 3:17, 18.

11. (a) Tutewa me nyuto mar gudo jo mukene nining? (b) Ma lubbe ki Carolok 19:17, Jehovah dok iye nining ka wanyuto mar?

¹¹ Ka wabedo lukica dok wanyuto mar bot jo mukene, pol kare gitwero neno ni watye ka tute me lubo lanen pa Jehovah. Dok gitwero pwoyo cwiny me kica ma wanyuto makato kit ma watamo kwede. Laminwa Lucy, ma kiloko i kome con-ni, wiye pud po i kom jo ma gukonye. En owaco ni: “Atye ki pwoc madit pi lumege ducu ma onongo gitera i tic me pwony. Onongo gibino gigama ki paco, gilwonga me cam kacel kwedgi, dok gineno ni ao gang maber. Kombeddi dong aniang ni meno onongo mito tute matek ki botgi. Ento onongo cwinygi yom me timone.” Ngene kene ni pe dano ducu bipwoyowa pi gin ma watimo pigi. Lucy oloko kit man i kom jo ma yam gukonye: “Aparo ni kono onongo atwero culogi pi jami ducu ma gutimo pira, ento pe angeyo ka ma gin ducu gitye iye i kare-ni. Ento Jehovah ngeyo, dok alego ni en oculgi pira.” Lucy oloko kakare. Jehovah neno jami ducu ma watimo me nyuto kica bot jo mukene, kadi bed nen tidi adada. En neno meno calo gityer ma wele dit kacel ki banya ma en aye biculone.—Kwan Carolok 19:17.

12. Omege gitwero nyuto margi pi jo me kacokke nining? (Nen bene cal.)

¹² Ka in ibedo omego, itwero nyuto mar bot  jo mukene nining kun itimo jami me konyogi? Omego mo matidi ma nyinge Jordan openyo laelda mo gin ma etwero timo me miyo kony i kacokke. Laelda-ni opwoye pi dongone i yo me cwiny ci omine tam i kom jami mukene ma en twero timo. Me labolle, en omiyo tam ki Jordan ni obed ka o con i Ot me Ker kun moto jo mukene, omi lagam i cawa me cokke, onywak i tito kwena kacel ki gurupgi me tito kwena kare ki kare, dok oyeny yo mukene me konyo dano. I kare ma Jordan oketo tam meno i tic, en onongo pe tye ka pwonyo kit me timo jami magi keken, ento bene tye ka dongo marre pi omege ki lumege. Jordan opwonyo ni ka omego mo odoko lakony kor tic, en pe cako konyo jo mukene acaka; ento, en medde ameda ki konyogi.—1 Tem. 3:8-10, 13.

13. I yo ma nining ma mar otugo kwede cwiny omego mo ma nyinge Christian me tic macalo laelda doki?

¹³ Ket kong ni onongo yam itiyo macalo lakony kor tic nyo laelda. Jehovah pud wiye po i kom tic ma ibedo ka tiyone i kare mukato angec kacel ki mar ma otugo cwinyi me timone. (1 Kor. 15:58) En bene neno mar ma imedde ki nyutone. Omego mo ma nyinge Christian cwinye otur i kare ma kikwanye woko ki i tic macalo laelda. Kadi bed kit meno, en owaco ni: “Amoko tamma me timo gin ducu ma atwero me tic pi Jehovah pien amare—kadi bed atye ki mot me tic nyo pe.” I nge kare mo, kicime doki me tic macalo laelda. Christian oye ni: “Abedo ki lworo mo manok me tic doki. Ento amoko tamma ni kit ma Jehovah, pi kicane, oye ni ati macalo laelda doki, ci abitimone pi marra pire ki pi omegina ki lumegina.”

14. Ngo ma ipwonyo ki i lok pa laminwa mo ma bedo i Georgia?

¹⁴ Lutic pa Jehovah bene ginyuto mar pi dano luwotgi. (Mat. 22:37-39) Me labolle,  laminwa mo ma nyinge Elena ma bedo i lobo Georgia, owaco ni: “I acakkine, gin ma onongo tugo cwinya me tito kwena obedo marra pi Jehovah keken. Ento ma marra pi Wora me polo omedde ki dongo, marra pi dano luwota bene odongo. Atemo goyo i wiya kit pekki ango ma gitye kwede ki dok pwony mene ma twero gudo cwinygi. Ma abedo ka tam i komgi kit meno, mitina me konyogi bene odongo.”—Rom. 10:13-15.

15-16. Kit ma kinyuto kwede i cal-li, mot ango ma bino pi nyuto mar bot jo mukene?

¹⁵ Ka wanyuto mar bot utmegiwa, pe gin keken aye ginongo adwogi maber. I kare ma two Korona ocakke, omego mo ma nyinge Paolo kacel ki dakone gukonyo lumege mapol ma guteggi me pwonyo kit me tito kwena kun gitiyo ki cim cing, tabulet, nyo kompiuta. Lamego mo acel ma i acakkine onongo ni tek adada me tic ki tet magi lacen opwonyo tic kwedgi. En otiyo ki tet magi me lwongo wadine pi Nipo. Wadine ma romo 60 gubedo tye i Nipo kun gikubbe ki vidio! Laminwa-ni kacel ki wadine ducu gunongo adwogi maber ki i tute pa Paolo gin ki dakone. Lacen, laminwa-ni ocoyo bot Paolo ni: “Apwoyo yelle me pwonyo wan jo muteggi. Wiya pe biwil i kom kit ma Jehovah paro kwede piwa ki kit ma itute kwede matek me konyowa.”   

¹⁶ Jami mutimme calo man omiyo ki Paolo pwony ma pire tek. Opoyo wiye ni mar pire tek loyo ngec nyo diro ma kinywali kwede. En  owaco ni: “Onongo yam atiyo macalo laneno me adwol. I kare-ni, aniang ni kadi bed lutit kwena wigi dong owil woko i kom pwony ma amiyo, ento wigi pud po i kom jami ma atimo pigi.”

17. Anga mukene ma nongo adwogi maber ka wanyuto mar?

¹⁷ Ka wanyuto mar bot jo mukene, wan kikomwa bene wanongo adwogi maber i yo ma pe wabyeko. Omego Jonathan, ma bedo i lobo New Zealand, omoko lok man. I Ceng Abicel mo otyeno ma piny lyet, en oneno omego mo ma lapainia ma tye ka tito kwena kene i teng gudi. Jonathan omoko tamme me tic ki lapainia meno i Ceng Abicel otyeno ducu. En pe oniang i kare meno kit ma en kikome ebinongo kwede adwogi maber ki i nyuto cwiny me kica i yo man. Jonathan oye ni: “I kare meno i kwona, onongo pe amaro tic me pwony. Ento ma awoto ki winyo kit ma lapainia-ni cano kwede ki pwonye dok aneno kit ma ticce me pwony nyako kwede nyige, man oweko an bene acako nongo mit pa tito kwena. Omego-ni bene odoko larema macok dok okonya me nongo mit pa tic me pwony ki me nyikke cok ki Jehovah.”

18. Gin ango ma Jehovah mito ni watim?

¹⁸ Jehovah mito ni wan ducu wadong marwa pire ki pi jo mukene. Kit ma wapwonyo kwede, watwero jingo marwa pi Jehovah ki kwano kacel ki lwodo Lokke kun bene walego bote kare ducu. Watwero dongo marwa pi omegiwa ki lumegiwa ka wakonyogi i yo ma nen. Ka marwa woto ki dongo, wabinyikke cok ki Jehovah kacel ki omegiwa ki lumegiwa. Dok wabinongo mit pa lirem magi matwal!