Babana onongo tye laelda i kanica me United Church of Canada, pi meno cabit ducu en onongo cwalo wan ki lamera i Sunday school, ci lacen wacito kacel kwede i lega me cawa abic. I otyeno, onongo wacito kacel ki Mamawa i Ot me Ker. Man oweko obedo yot botwa me neno apokapoka ma tye i kin dini aryo magi.

Mamana onywako niyene manyen man ki lureme Bob ki Marion Hutcheson, ci gin bene gudoko Lucaden pa Jehovah. I mwaka 1958, Omego ki Lamego Hutcheson gutera kacel ki awobegi adek i gure madit me Divine Will International Assembly i boma me New York City, ma otero nino aboro. Ka atamo iye i kare-ni, aniang ni pe obedo yot botgi me cito kacel kweda, ento gure meno tye i kin jami mabeco loyo ma otimme i kwona ma wiya po iye.

I kare ma atye ki mwaka apar ki wiye, onongo wagwoko dyangi, opego, romi, kacel ki gweni dok onongo amaro gwoko lee magi adada. Pi meno, onongo amito kwan me doko daktar pa lee. Mamana otito ki laelda mo me kacokke tamma meno. Ki cwiny me kica, en opoyo wiya ni watye ka kwo “i kare me agikki” dok openya kit ma kwan pi mwaki mapol i univaciti bigudo kwede watta ki Jehovah. (2 Tem. 3:1) Macalo adwogine, amoko tamma pe me cito ka kwan i univaciti.

 Onongo pud pe angeyo gin ma omyero atim i nge tyeko kwanna me cinia. Kadi bed onongo anywako i tic me pwony i tum cabit ducu, onongo pe anongo mit pa tic me pwony dok atamo ni pe atwero tic macalo painia. Ki tungcel, babana ki ominne matidi ma pe gubedo Lucaden pa Jehovah, onongo gitye ka cuko cwinya me tic i kampuni mo madit me incuareny i Toronto. Omin babana-ni onongo tye ki rwom madit i kampuni meno, pi meno aye tic man.

Ki i Toronto, pol pa cawana ducu onongo atero i tic kun aribbe ki jo ma pe gubedo Lucaden dok man ogenga ki cito i cokke kacel ki tito kwena kare ki kare. I acakkine, onongo abedo ki babana madit ma pe tye Lacaden, ento i nge tone, onongo mitte ni anong kabedo mukene.

Omego ki Lamego Hutcheson, ma onongo gutera i gure madit i mwaka 1958, onongo gitye calo lunyodona. Gin gulwonga me cito ka bedo i ganggi dok gukonya me dongo i yo me cwiny. I mwaka 1960, an kacel ki wodgi John, wanongo batija. John ocako tic macalo painia, dok man ocuko cwinya me medo cawana i tic me pwony. Omege me kacokke guneno dongona i yo me cwiny, dok ma pe orii kicima me tic macalo omego ma i kare-ni dong walwongo ni Laneno me Cokke me Kwowa ki Ticwa.

I mwaka 1966, anyomo Randi Berge, lapainia mo ma kome mit adada ma tye atera me tic ka ma can lutit kwena tye iye. Laneno me adwolwa onyuto cwiny me lirem i komwa, ci ocuko cwinywa me konyo kacokke ma tye i Orillia, Ontario. Pi meno, wacoko jamiwa ci wacito cutcut.

I kare ma wao i Orillia, acako tic kacel ki Randi macalo painia marii. Mit kome i tic me pwony oguda adada! I nge tic matek me dongo dirona macalo painia, acako nongo mit pa tic ki Baibul kacel ki neno kit ma dano giniang kwede ada ma iye. Pud dong wabedo ki yomcwiny madit ya me konyo luot mo i Orillia me timo alokaloka i kwogi ci gudoko Lucaden pa Jehovah.

I kare ma wacito i lim mo i Toronto, arwatte ki Arnold MacNamara, ma onongo tye i kin omege ma gidoro wi tic i Betel. En openya ka wamito tic macalo painia keken. Agamme cutcut ni: “Wamito! Teke mere pe obedo i Quebec!” Cwiny me apokapoka pa jo ma giloko leb Muno i Canada i kom jo ma giloko leb French ma gibedo i Quebec onongo oguda adada. I kare meno, dano gubedo ka jemo i kom gamente dok onongo gimito ni Quebec opokke woko ki i kom Canada.

Arnold ogamo ni, “Quebec keken aye tye kabedo ma jang gang kal tye ka cwalo iye lupainia i kare-ni.” Cutcut aye me cito kunu. Onongo angeyo ni Randi tye ki miti me cito ka tic kunu. Lacen, aniang ni meno tye i kin tam mabeco loyo ma wamoko i kwowa!

I nge bedo i kilaci me pwonyo leb French pi cabit abic, an ki Randi, kacel ki luot mukene wacito i Rimouski, ma borre romo kilomita 540 (mairo 336) me a ki i Montreal. Onongo pud peya wapwonyo leb man maber, dok man onen i cokke mo acel i kare ma akwano lok angeya. Me ka waco ni i gurewa madit, wabibedo ki “welle ma gua ki i lobo Austria,” awaco ni wabibedo ki “welle ma gubedo udu.”

Ki i Rimouski, lumege angwen ma wigi nono ki Omego ki Lamego Huberdeau kacel ki anyiragi aryo gubino gumedde i kom wan angwen. Jo gang pa Huberdeau onongo gibedo i ot mo madit ma tye ki rum abiro me buto dok onongo ginywako ot man kacel ki lupainia mogo. Lupainia magi onongo gimine cente mo manok me konyo pango ot. Pol kare dano ma romo 12 nyo 14 onongo gibedo i ot meno. Macalo painia keken, an ki Randi onongo watito kwena cakke i odiko wa otyeno, pi meno wabedo ki pwoc ni kare ducu onongo ngat mo tye me tic kacel kwedwa—kadi wa i otyeno ma piny ngic adada.

Wat i kinwa ki lupainia ma lugen magi odongo matek dok onongo watye calo jo me ot acel. I kare mukene, onongo wagure i wang oo nyo wayubo nino mo ma wan ducu watedo kacel. Omego acel onongo ngeyo goyo wer, pi meno i Ceng Abicel otyeno onongo wamaro wer dok wamyelo kacel.

Jo mapol i Rimouski onongo gitye ki miti me pwonyo lok me Baibul! I kine me mwaki abic, wabedo ki yomcwiny me neno lutino kwan me Baibul mapol ka gidongo wa i nongo batija. Wel lutit kwena omedde wa i 35 i kacokke.

Tito kwena i Quebec okonyowa me doko lutit kwena mucwiny. Waneno kit ma Jehovah okonyowa kwede i tic me pwony kacel ki miniwa jami me kom ma mitte. Medo i kom meno, wapwonnye me maro tekwaro, leb, kacel ki jo ma giloko leb French—dok man oweko wamaro tekwaro pa jo mukene bene.—2 Kor. 6:13.

Ki ur madit, jang gang kal owacciwa ni wakob wacit i taun mo ma kilwongo ni Tracadie, ma tye i New Brunswick. Timo man pe obedo yot pien onongo pud apango ot mo apanga pi mwaki mapol dok onongo aketo cinga me tic macalo lapwony i cukul mo pi cawa manok cabit ki cabit. Medo i kom meno, lutino kwanwa mogo me Baibul onongo pud gudoko lutit kwena manyen dok tic me gero Ot me Kerwa onongo tye ka wot anyim.

Walego ki cwinywa ducu i tum cabit meno pi mot me tic manyen man ci wacito walimo Tracadie, ma onongo pat adada ki Rimouski. Ento  wamoko tamwa ni, kit ma Jehovah mitowa kunu-ni, wabicito. Watemo Jehovah dok waneno kit ma en okwanyo kwede ariya ducu ki i nyimwa. (Mal. 3:10) Kit macalo Randi obedo ngat ma pe paro pire kene, cwinye yom, dok tye ki wat macok ki Jehovah, man oweko dak obedo yot.

Omego ma nyinge Robert Ross keken aye onongo obedo laelda i kacokkewa manyen man. En kacel ki dakone Linda onongo kong gutiyo macalo painia i kacokke man, dok gumedde ki bedo iye i nge nywalo latin kayogi. Kadi bed onongo gitye ki tic me gwoko latingi, gucuko cwinywa adada pien onongo gubedo jo ma jolo wele dok komgi mit i tic me pwony.

I nge tic macalo painia pi mwaki aryo i Tracadie, wanongo mot me tic mukene atura—kilwongowa me tic macalo laneno ma woto awota. Wabedo ka limo adwol mapatpat ma kiloko iye leb Muno pi mwaki abiro, dok i ngeye kicwalowa ka limo adwol ma kiloko iye leb French ma tye i Quebec. Lanenowa me distrik ma i Quebec, ma nyinge Léonce Crépeault, onongo kare ducu pwoya pi pwonya. Ento lacen en onongo maro penya ni, “I yo ma nining ma itwero weko pwonyi bedo me kony bot utmege?” a Tirane magi okonya me keto cwinya i pwonya wek obed ma niang iye yot dok me kony bot utmege.

Mot me tic acel ma wiya pe biwil iye obedo tic ma kimina i mwaka 1978 i Gure Madit ma Kwako Lobe Mapol ma otimme i Montreal ma wiye obedo ni “Victorious Faith.” Abedo i dipatmen me yubo ginacama. Onongo watye ka byeko ni wel dano bibedo 80,000 dok onongo mitte ni wapitgi i yo mapat ki kit ma onongo watimo kwede con. Jami ducu onongo nyen: jami tedo, jami ma kibitedo, kacel ki yo me tedone. Onongo watye ki firij madongo gin 20 ento mukene pe obedo ka tic maber. I nino ma gure peya ocakke, onongo pe watwero donyo i bar man ka yubo jami nio wa i cwiny dyewor pien tuko mo onongo tye ka timme iye. Dok onongo mitte ni wamok mac ma piny dong cok ruu me tedo cam me odiko! Onongo waol adada, ento apwonyo jami mapol ki bot utmege ma wabedo ka tic matek kwedi, dok onongo gitye ki kit mabeco mapol. Wat i kinwa omoko matek dok pud watye lurem wa i kare-ni. Pud dong obedo twon yomcwiny madit ya me  bedo i gure ma pire tek man i Quebec, ka ma aunauna magwar otimme iye i kine ka mwaka 1940 me o i 1950!

Anongo pwony mapol ki bot luneno luwota ki i gure madito mapatpat ma onongo timme i Montreal. I mwaka mo acel, Omego David Splane, ma i kare-ni tye lamemba me Lukiko Madit, obedo ka doro gure madit. Lacen i gure mukene, ma kimina mot me tic meno David okonya me cobo ticca.

I mwaka 2011, ma dong watiyo macalo laneno ma woto awota pi mwaki 36, kilwonga me bedo lapwony me Cukul pi Luelda. I kine me mwaki aryo keken, an ki Randi wabuto i kabuto 75 mapatpat, kadi bed kit meno, cwinywa obedo yom pi jami ma wajalo. I tum cabit ducu, luelda onongo gibedo ma cwinygi yom adada pien giwinyo calo Lukiko Madit paro pi watgi ki Jehovah.

Lacen, apwonyo Cukul pi Lutit Kwena me Kerri. Lutino kwan me cukul man pol kare gibedo ki par macalo adwogi me tic mapol: bedo i ot kwan pi cawa abiro nino ducu, timo tic mogo ma kiminigi ki i kilaci otyeno pi cawa adek, kacel ki miyo pwony ma romo angwen nyo abic i nyim lutino kwan cabit ducu. An kacel ki lapwony lawota watitigi ni pe gibitwero timo jami magi ducu pigi kengi ento ki kony pa Jehovah keken. Wiya pe twero wil i kom kit ma lutino kwan magi onongo gibedo kwede ki ur me neno ni ki kony pa Jehovah, gubedo ki kero me cobo jami ma onongo pe gitamo ni gibitwero cobone.

Cwiny me lirem ma mamana onongo nyuto i kom lutino kwanne me Baibul okonyogi adada me dongo i yo me cwiny dok okonyo babana me loko tamme i kom ada me Baibul. I nge nino adek ma mamana oto kwede, babawa otimo gin mo me ur adada kun bino ka winyo pwony pi lwak i Ot me Ker, dok omedde ki wot i cokke pi mwaki 26 mukene. Kadi bed Baba pe omedo ki nongo batija, luelda guwacca ni kare ducu en onongo bedo ngat mukwongo me o i cokke cabit ducu.

Mamana owekiwa lanen maber adada. Lumegina adek ducu kacel ki coggi gitye ka tic pi Jehovah. Lumegina aryo gitye ka tic i jang gang kal—acel i Portugal ki mukene i Haiti.

An kacel ki Randi i kare-ni watiyo macalo painia keken i Hamilton, Ontario. I kare ma watiyo macalo laneno ma woto awota, onongo wanongo mit pa dok cen ka limo kacel ki kwano Baibul ki lutino kwan pa jo mukene. Ento i kare-ni dong watye ki yomcwiny me neno lutino kwanwa ka gidongo i yo me cwiny. Dok ka wamedde ki dongo lirem ki omege ki lumege i kacokkewa manyen man, wanongo cuko cwiny adada me neno kit ma Jehovah tye ka minigi cwak i kare mabeco ki i kare maraco.

Ka watamo i kom kwowa mukato, wabedo ki pwoc madit adada pi cwiny me lirem ma jo mapol gunyuto i komwa. Pi meno, wan bene watute me ‘paro pi’ jo mukene, ki cuko cwinygi me tic pi Jehovah i yo maber loyo ma gitwero. (2 Kor. 7:6, 7) Me labolle, i paco mo acel, laminwa mo ki wode kacel ki nyare onongo gitiyo macalo painia. Apenyo cwar laminwa-ni ka onongo dong ma naka yam otamo me tic macalo painia. En owacca ni etye ka miyo cwak bot lupainia adek kulu. Ci dok apenye ni, “Tika in itwero miyo kony maber kato Jehovah?” Acuko cwinye bene me nongo yomcwiny me tic macalo painia. I nge dwe abicel keken, en odoko painia.

An kacel ki Randi wabimedde ki ‘tucu bot yalwak me kare me anyim’ pi ‘tic me aura pa Jehovah,’ dok watye ki gen ni gibinongo mit pa tic pi Jehovah kit ma wan bene wanongo-ni.—Jab. 71:17, 18.