LUBANGA JEHOVAH mito ni jo ma wore gubed ki kuc. En mito ni gugwok kuc i kingi ki luwotgi. Ka gutimo meno, ci kuc bed tye i kacokke. Kuc man biywayo dano mapol i kacokke.

Me labolle, ajwaka mo i lobo Madagascar oneno kuc ma tye i kin jo pa Jehovah ci obedo ki tam ni, ‘Ka nino mo amito donyo i dini, man aye bibedo dini ma abidonyo iye.’ I nge kare mo, en ojuko woro jogi, oketo alokaloka i kwo me otgi, ci ocako woro Jehovah, Lubanga won kuc.

Calo laco man, dano alip mapol mwaka ki mwaka gibino i kacokke pa Lukricitayo dok ginongo kuc ma onongo gimito tutwal-li. Ento wakwano i Baibul ni ka “nyeko marac, ki laro dito” tye i kacokke, ci twero balo wat ma tye i kin dano dok kelo peko mapol. (Yakobo 3:14-16) Baibul miniwa tam maber adada i kom kit ma watwero gwokke kwede ki i kom pekki man kun wabedo ki kuc i kinwa ki utmegiwa. Kong dong wanen kit ma tam man okonyo kwede jo mogo.

“Wiya onongo pe rwatte ki omego mo ma watiyo kwede. I nino mo acel ma onongo watye ka daa, jo aryo mo gudonyo ci gunongowa.”​—CHRIS.

“Lamego mo ma onongo amaro tic kwede i ticwa me pwony ongolo yubwa me cito ka pwony atura. I ngeye, en ojuko lok kweda woko. Pe onongo angeyo pingo gin meno tye ka timme.”​—JANET.

“Onongo watye ka lok ki cim wan adek. Ngat acel ki i kinwa omotowa ci oweko wan aryo ka lok. Atamo ni dong oneko cimme woko, ci acako lok marac i kome bot lawota acel ma odong-ngi, ento en kara onongo pud pe oneko cimme.”​—MICHAEL.

“Lupainia aryo mo ki i kacokkewa gucako bedo ki tele i kingi. Ngat acel ki i kingi ocako daa i wi lawote. Man oturo cwiny jo mukene adada.”​—GARY.

Magi twero nen calo pe peko madit. Ento twero kelo cwercwiny marii bot jo ma lok meno makogi dok twero balo kuc ma i kacokke. Ki yomcwiny, utmege magi gulubo tira me Baibul ci guyubo wat ma onongo oballe-ni. Tira mene ma itamo ni okonyogi?

“Pe wubed ka da iyo.” (Acakki 45:24) Yucepu omiyo tam man bot omegine i kare ma gitye ka dok bot wongi. Ka ngat mo pe juko kinigane ento akemo mako oyotoyot, ci gin mo marac ma otimme twero doko twon lok madit adada. Man bene twero cwero cwiny jo mukene. Chris oniang ni i kine mukene bedo tek bote adada me nyuto cwiny me mwolo ki dok me lubo tira. En onongo mito loko kite, pi meno en okwayo kica bot omego ma edaa kwede-ni. Dok Chris otute matek me juko kinigane. I kare ma omego acel-li oneno kit ma  Chris tye ka tute kwede, en bene ocako timo gin acel-li. I kare-ni dong gitye ki kuc i kingi dok gitiyo pi Jehovah kacel.

“Yub mo ma giyubo labongo nongo tam muromo pe twero cobbe maber.” (Carolok 15:22) I kare ma larem Janet ojuko lok kwede, Janet omoko tamme me keto tira ma i ginacoya man i tic. En ocito oloko ki lamego meno. Janet openye ka gwok nyo etimo gin mo marac ma ocwero cwinye. I acakkine, lokke onongo pe yot tutwal. Ento ka gumedde ki lok ma cwinygi opye, lok odoko yot. Lamego-ni oniang ni pe onongo eniang maber gin mo mutimme i kare mukato angec dok ni Janet kara pe otimo gin mo me cwero cwinye. En okwayo kica bot Janet, dok i kare-ni, gitye ki wat maber i kingi dok gitiyo pi Jehovah kacel.

“Pi meno, ka ikelo motti bot Lubanga, ma itye ka tyerone i kom keno tyer, ka ce ipo ni omeru onongo tye ki lok mo i komi, ci myero iwek motti kunnu i nyim keno tyer, ci idok cen; mukwongo kong wumer wuribbe ki omeru.” (Matayo 5:23, 24) Yecu omiyo tira man i Pwonye me Wi Got. I nge ma Michael owaco lok marac i kom omego acel-li, en owinyo marac adada. En omoko tamme me timo gin mo keken me yubo lok meno. Pi meno, en ocito bot omego acel-li ci okwayo kica pi gin mutimme. Gin ango ma otimme i ngeye? Michael owaco ni, “Omera otimma kica ki cwinye ducu.” I ngeye, gudoko lurem odoco.

“Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu.” (Jo Kolocai 3:12-14) Wi pud po i kom lupainia aryo ma gudaa i ticwa me pwony-nyi? Laelda mo okonyogi me niang ni gitye ka cwero cwiny jo mukene dok ni gitye ka weko jo mukene pe giwinyo agonya. En opoyo wigi ni myero gudi cwinygi i kom luwotgi dok gukony me gwoko kuc me kacokke. Guye tira meno dok guketo i tic. I kare-ni dong gitye ki kuc i kingi ka nongo gitito lok me kwena maber.

Tira meno ma nonge i Jo Kolocai 3:12-14 bene twero konyi me bedo ki cwiny me mwolo dok me timme kica bot ngat ma ocwero cwinyi, ki dok pe me keto lokke i cwinyi. Ento ka inongo tek me timo kica kono? Tye tira mo ma tye i Matayo 18:15 ma twero konyowa. Kadi bed Yecu onongo tye ka lok i kom bal madongo, en otito gin ma watwero timone ka lok mo tye i kinwa ki omego nyo lamego mo. Watwero cito bot ngat meno me lok i kom peko meno ki mwolo dok ki cwiny me kica kun watemme me cobo peko meno.

Tye tira mukene mapol ma nonge i Baibul ma twero konyowa. Polgi mito ni wajenge i kom cwiny pa Lubanga, wek wadong “nyig manyak pi cwiny maleng.” Nyig magi aye “mar, yomcwiny, kuc, diyo cwiny, kica, ber, gen, mwolo, gwokke ken.” (Jo Galatia 5:22, 23) Tam kong i kom lok man. Macin twero tic maber ka kionyo moo ka ma  kin nyonyo girwatte iye. I yo acel-li, bedo yot me cobo peko ma tye i kinwa kun nongo wabedo ki wat maber i kinwa ka wadongo kit magi mabeco ma gia ki bot Jehovah.

Wan ducu ki acel acel watye ki kit mapatpat. Kit ma waneno kwede jami ki kit ma watito kwede tamwa pe rom. Man twero weko wat i kinwa bedo me yomcwiny dok mamit. Ento bedo ki kit mapatpat bene twero kelo niango manok nyo anywena nywena. Laelda mo otito kit ma man twero timme kwede i kare ma owaco ni: “Ngat ma tye ki lewic pe twero bedo agonya ka tye i nget ngat ma loko tutwal dok ma pe lwor. Apokapoka man twero nen calo gin ma pe dit tutwal; ento twero kelo peko madit adada.” Tika iye ni jo ma kitgi patpat bene wigi pe twero rwatte? Kong wanen labol pa lukwena mo aryo. Ka watamo i kom Petero, ci wiwa twero po ni en obedo ngat ma onongo tito tamme ka maleng labongo lworo. Ka watamo dok i kom Jon, ci wagoyo cal pa omego ma lamar, ma pol kare onongo kong tamo matut ma peya owaco tamme ka maleng nyo ma peya otimo gin mo. Petero kacel ki Jon onongo kitgi patpat. Ento gutiyo kacel maber adada pi Jehovah. (Tic pa Lukwena 8:14; Jo Galatia 2:9) Twero bene bed kit meno i kare-ni. Kadi wa Lukricitayo ma kitgi patpat bene gitwero tic kacel maber.

Ento gin ango ma ibitimo ka ngat mo me kacokkewu otimo gin mo ma ocwero cwinyi? Bibedo ber ka wii po ni Yecu bene oto pi ngat meno kit ma oto kwede piri-ni, dok en mito ni inyut mar bot omeru nyo lameru. (Jon 13:34, 35; Jo Roma  5:6-8) Pe obedo gin matir ka imoko tammi pe me bedo larem ngat meno nyo itemme me weyo ngat meno woko. Ma ka meno, penye kekeni ni: ‘Tika omera nyo lamera man tye ka timo gin ma pe rwatte ki cik pa Jehovah? Tika en tye ka cwero cwinya akaka? Nyo tika pien kitwa pe rom? Tika en tye ki kite mogo mabeco ma atwero lubone?’

Me labolle, ka ngat meno loko tutwal ento in iling alinga, pingo pe iti kwede kacel i ticwa me pwony ci inen gin ma itwero pwonyone ki bote? Nyo gwok cinge yot ma loyo in? Tika dong ineno yomcwiny ma bino ki i konyo jo mutii, jo matwo, nyo jo ma mito kony? Tika itwero pwonyo ki bot ngat meno kit ma in bene itwero bedo ngat ma cinge yot? Ki lok ada, kadi bed ni kiti pat ki pa omego nyo lamego mo, pud itwero keto cwinyi i kom kite mabecone. Dok kadi bed ni pe itwero bedo lareme macok loyo, pud wutwero bedo ki wat macok. Man bikonyo me gwoko kuc i kinwu ki bene i kacokke.

I cencwari me acel, onongo tye lumege aryo ma nyingi Euodia gin ki Cintuke. Nen calo onongo gitye ki peko mo i kingi, ento lakwena Paulo ocuko cwinygi “me bedo ki cwiny acel i Rwot.” (Jo Pilipi 4:2) Wan bene wamito ni wawor Jehovah kacel ki utmegiwa kun wabedo ki kuc i kacokke.

Pingo pe myero wagalle ki kwanyo cwiny marac ma watye kwede i kom jo mukene? Watwero poro cwiny meno ki doo marac ma otwi i poto ature mo mamwonya. Ka pe waputo doo meno, gitwero medde ci gimayo poto meno woko. I yo acel-li, ka cwiny marac ma watye kwede i kom jo mukene odongo, ci twero gudo jo me kacokke ducu i yo marac. Ento ka wamaro Jehovah ki utmegiwa,  wabitemme ki kerowa ducu me gwoko kuc ma i kacokke.

Ka watemme me gwoko kuc i kinwa ki jo mukene, wabibedo ki ur me neno adwogi mabeco ma twero bino. Gin meno otimme i kom Lacaden mo acel. Man aye gin ma en owaco: “Onongo aneno calo lamego mo tera calo an latin matidi. Man onongo cwero cwinya adada. Ma cwercwinya omedde, pe abedo ka lok kwede i yo maber. Abedo ka tam ni, ‘En pe wora, dok an bene myero pe awore.’”

Ci lamego-ni otamo i kom gin ma onongo en bene etye ka timone. Laminwa-ni owaco ni: “Acako neno ni an bene kara atye ki goro, dok cwinya ocwer i koma kekena. Aniang ni myero alok kita. I nge lega bot Jehovah pi lok man, awilo ki lamego-ni mic mo matidi ci acone waraga me kwayo kica pi kit marac ma anyuto. Wakwako korwa dok waye me giko lokke kumeno. I kare-ni dong wape ki peko mo i kinwa.”

Dano ducu mito kuc. Ento cwiny marac nyo awaka twero weko ngat moni timo gin ma balo kuc. Tim ma kit man pol adada i kin jo me lobo, ento Jehovah mito ni jo ma wore gubed ki kuc. Lucaden pa Jehovah myero gubed ki kuc dok gunote i kingi. Jehovah oweko Paulo ocoyo bot Lukricitayo ni ‘gulub kit me kwo ma myero, ma rwatte ki lwongo ma yam gilwongogi iye.’ En ocuko cwinygi ni ka gitimo meno, myero gubed ki cwiny me ‘woro pi jo mukene, kun gibedo jo mamwol, ma giciro gin ducu ma balo cwiny dano, kun ngat acel acel diyo cwinye i kom lawote ki mar. Ki dok guket tek me gwoko ribbe ma cwiny maleng omiyogi wek gubed acel i twec me kuc.’ (Jo Epeco 4:1-3) “Twec me kuc” ma tye i kin jo pa Jehovah obedo gin mamwonya adada. Pi meno, watemme wunu ki tekwa ducu me jingo twec me kuc meno ki dok me cobo peko mo keken ma tye i kinwa ki utmegiwa.