1, 2. Gin ango ma myero wan ki acel acel watam matut iye? (Nen cal ma i pot karatac man.)

KIT ma wanyamo kwede i pwony mukato-ni, Larac-ci owaco ni Jehovah pe opore me bedo Laloc. En owaco ni Jehovah pe loyo loc i yo maber dok ni dano gitwero bedo ki yomcwiny maloyo ka gulone kengi. Tika lok pa Catan-ni onongo tye kakare? Go kong kit ma dano onongo gitwero lone kwede kengi kun nongo gikwo pi naka. Tika onongo gibibedo ki yomcwiny makato kit ma onongo gibibedo kwede ka Lubanga aye tye Lalocgi? Tika cwinyi bibedo yom me kwo pi naka ka pe itye i te loc pa Lubanga?

² Ngat mo pe twero gamo lapeny magi piri. Ngat acel acel myero otam matut i komgi. Ci binen ka maleng boti ni yo me loc pa Jehovah aye maber loyo ducu dok mitte ni wacwak ki cwinywa ducu. Watwero bedo labongo akalakala i kom lok meno pi gin ma wakwano ki i Baibul. Kong  dong wanen gin ma Baibul waco i kom twero ma Jehovah tye kwede me loyo lobo.

3. Pingo Jehovah tye ki twero me loyo lobo ducu?

³ Jehovah aye Lalo lobo ducu pien en aye Lubanga won twer ducu ki Lacwec. (1 Tekwaro 29:11; Tic pa Lukwena 4:24) I ginanyuta ma lakwena Jon oneno ki i polo, en owinyo ka Kricito kacel ki luker 144,000 giwaco ni: “Rwotwa ki Lubangawa, in imyero me nongo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.” (Niyabo 4:11) Jehovah aye ma ocweyo jami ducu, pi meno en tye ki twero me loyo ginacweya ducu, ma tye i lobo nyo i polo.

4. Pingo bedo agonya pe miniwa twero me jemo i kom Lubanga?

⁴ Catan pe ocweyo gin mo keken. Pi meno en pe ki twero mo keken me loyo lobo-ni. Catan kacel ki luot ma kikwongo cweyogi gujemo i kom twero me loc pa Jehovah. (Jeremia 10:23) Tika bedo agonyagi-ni onongo minigi twero me jemo i kom loc pa Jehovah? Pe. Bedo agonya miyo ki ngat moni twero me moko tamme ento pe me jemo i kom Jehovah Lacwecwa. Ki lok ada, jemo i kom Lubanga obedo tic ki twero meno i yo marac. Macalo dano, wamito loc pa Jehovah kacel ki tirane.

5. Pingo Lubanga kare ducu moko tam matir?

⁵ Tam kong dok i kom tyen lok mukene mumiyo Jehovah tye ki twero me loc. En tiyo ki twerone i yo matir. En owaco ni: “An a Rwot [Jehovah] ma atye ka tiyo gin ma nyutu mar ma pe lokke, anyutu bene ngolo kop atir ki bedo ki kit ma atir i lobo.” (Jeremia 9:24) Jehovah pe mito cik ma dano gimoko wek okonye me moko tamme i kom gin matir. Ma ka meno, en aye ma moko cik pi dano. Jehovah omiyo cik bot dano ma lubbe ki kit ma en ngolo kop i yo matir. Laco Jabuli owaco ni: “Icibo komkerri i kom kit ma atir ki ngolo kop kakare.” Pi meno, cik ki tam ducu ma Jehovah moko tye atir. (Jabuli 89:14; 119:128) Catan owaco ni Jehovah pe Laloc maber. Ento Catan kikome bene pe twero kelo ngolo kop matir i lobo.

6. Pingo Jehovah tye ki twero me loc?

⁶ Tyen lok mukene mumiyo Jehovah tye ki twero me loc aye ni pien en tye ki ngec kacel ki ryeko me gwoko lobo. Waneno man ki i kom kit ma en omiyo kwede ki twero bot Wode me cango two i yo ma ludaktari pe gitwero. (Matayo 4:23, 24; Marako 5:25-29) Kadi bed ni magi onongo gubedo tango ki botwa ento onongo pe tango ki bot Jehovah. En niang kit ma kom dano tiyo kwede dok en twero cango ka ma lit kikome. En bene twero cero jo muto dok tye ki twero me gengo can ma poto atura.

7. Jehovah ryek lakwene ka iporo ki ryeko pa ngat mo keken i lobo pa Catan-ni?

 ⁷ Lobo ma Catan aye loyo pe twero kelo kuc, bed ni i kin jo ma gikwo i lobo acel nyo i kin lobe mapatpat. Jehovah keken aye ma tye ki ryeko me kelo kuc i lobo. (Icaya 2:3, 4; 54:13) Wawinyo calo lakwena Paulo ma owaco ni: “Lonyo pa Lubanga dwong ma okato kare! Ryekone kacel ki ngecce tut twatwal! Lok ma en ngolo tere pe tatte, niang i kite tek!”​—Jo Roma 11:33.

8. Iwinyo nining i kom kit ma Jehovah loyo kwede ki locce?

⁸ Kit ma waneno kwede, Baibul nyuto ka maleng ni Jehovah tye ki twero me loc. Dok bene nyuto gin mumiyo en obedo Laloc maber loyo ducu. Me acel aye pien en loyo locce i yo me mar. Wawinyo ni watye cok kwede ka watamo i kom kit ma ‘Lubanga lakica kwede dok maro dano, kun kiniga pe make oyot, marre ma pe lokke dwong, dok bene lagen mada.’ (Nia 34:6) Lubanga terowa ki woro madit adada. En paro piwa makato kit ma waparo kwede piwa kenwa. Larac-ci owaco ni Jehovah kano jami mabeco ki bot Luticce, ento meno obedo lok goba. Lubanga bene omiyo Wode me amara wek wabed ki gen me kwo pi naka.​—Kwan Jabuli 84:11; Jo Roma 8:32.

9. Wangeyo nining ni Lubanga tye ki miti i komwa ki acel acel?

⁹ Jehovah maro jone ducu macalo gurup. Ento en bene tye ki miti i kom ngat acel acel. Tam kong i kom gin ma otimme i kare macon. Pi mwaki ma romo miya adek, Jehovah obedo ka tic ki lungolkop me telo jone dok en omiyo guloyo lumonegi. Ento Jehovah pud obedo ka keto cwinye i kom jone ki acel acel i kare magi ducu. Ngat acel i kingi obedo dako ma nyinge Ruth. En onongo pe obedo Laicrael, ento ojalo jami mapol wek edok lawor Jehovah. Jehovah omine laco ki latin awobi. Ento makato meno, latin pa Ruth onongo bibedo i kin jo me ot ma Meciya bia ki iye. Jehovah oweko bene kicoyo lok kom Ruth i Baibul, i buk ma kilwongo ki nyinge. Itamo ni Ruth biwinyo nining ka en ocer ci oniang i kom jami magi ducu?​—Ruth 4:13; Matayo 1:5, 16.

10. Pingo watwero wacone ni Jehovah pe loyo locce ki gero?

¹⁰ Jehovah pe loyo locce ki gero. Ma ka meno, jo ma luwiny gibedo agonya dok ki yomcwiny. (2 Jo Korint 3:17) Daudi oloko i kom Jehovah ni: “Deyo ki dit tye bote, tek ki yomcwiny tye ka ma en bedo iye.” (1 Tekwaro 16:7, 27) Laco Jabuli owaco ni: “Gitye ki gum jo ma giwori kun giwero boti wer ki dwan malongo, ma giwoto i ceng me kicani, ai Rwot. Gibedo ki yomcwiny piri dyeceng jwi ma gidwori pi kiti muporre.”​—Jabuli 89:15, 16.

11. Watwero bedo labongo akalakala nining ni loc pa Jehovah aye maber loyo?

 ¹¹ Ka wabedo ka lwodo lok i kom kit mabeco ma Jehovah tye kwede, ci wabedo labongo akalakala ni en obedo laloc maber loyo ducu. Wabiwinyo calo laco jabuli ma oloko i kom Lubanga ni: “Bedo i dyekalli pi nino acel keken ber kato bedo ka mukene pi nino alip.” (Jabuli 84:10) Jehovah en aye ma ocweyowa, pi meno en ngeyo gin ma weko cwinywa bedo yom. En cinge yot adada dok miniwa jami mapol makato kit ma wamito kwede. Gin mo keken ma Jehovah mito ni watim tye pi ber bedowa. Kadi bed ni wajalo gin ma pire tek, pud wabibedo ki yomcwiny ka wabedo luwiny bot Jehovah.​—Kwan Icaya 48:17.

12. Tyen lok ango ma pire tek ma weko wacwako twero me loc pa Jehovah?

¹² Wapwonyo ki i Baibul ni i nge Mwaka Alip Acel me Loc pa Kricito, jo mogo gibijemo i kom twero me loc pa Jehovah. (Niyabo 20:7, 8) Gin ango ma biweko gitimo meno? I kare meno, Larac-ci bitute matek wek dano gunyut cwiny me woro. En obedo ka timo meno kare ducu. En twero temme me bito dano ni gitwero kwo pi naka kadi pe gubedo luwiny bot Jehovah. Ki lok ada, dano pe gitwero kwo pi naka labongo bedo luwiny bot Jehovah. Ento myero wapenye kekenwa ni, ‘Tika abiye lok goba meno?’ Ka ada wamaro Jehovah dok wangeyo ni en kite ber dok tye ki twero me loyo lobo ducu, ci pe wabiye lok goba meno. Wabibedo ki miti me bedo i te loc pa Lubanga keken pien en loyo locce i yo me mar.

13. Wacwako twero me loc pa Lubanga nining ka walubo lanenne?

¹³ Kit ma waneno kwede, Jehovah tye ki twero me loc dok yo me locce ber makato ducu. Mitte ni wacwak twero me locce ki cwinywa ducu. Wacwako locce ka wabedo luwiny dok walubo lanenne. Ka watute ki tekwa me timo jami kit ma Jehovah mito kwede nongo watye ka nyuto mar ki cwakwa i kom twero me locce.​—Kwan Jo Epeco 5:1, 2.

14. Luwi odi ki luelda gitwero lubo lanen pa Jehovah nining?

¹⁴ Wapwonyo ki i Baibul ni Jehovah kare ducu tiyo ki tekone i yo me mar. Luwi odi ki luelda ma gimaro twero me loc pa Jehovah gibilubo lanenne dok pe gibitero dano i yo me dic nyo ki gero. Lakwena Paulo otute ki tekke ducu me lubo lanen pa Lubanga gin ki Wode. (1 Jo Korint 11:1) En pe obedo ka keto lewic i wi jo mukene nyo diyogi wek gutim gin matir. Ma ka meno, en obedo ka cuko cwinygi i yo me mwolo wek gutim gin matir. (Jo Roma 12:1; Jo Epeco 4:1; Pilemon 8-10) I timo meno, Paulo olubo lanen pa Jehovah. Ka watero jo mukene i yo me mar, ci nongo watye ka cwako twero me loc pa Jehovah.

15. Wacwako loc pa Jehovah nining ka waworo jo ma en ominigi twero?

¹⁵ Wacwako bene loc pa Jehovah ka waworo dok wawinyo lok pa jo ma en ominigi twero. Kadi bed ni pe waniang nyo pe waye tam ma gimoko, pud wacwako korgi. Man pe gin ma jo me lobo  gitimo, ento man aye gin ma watimo me cwako loc pa Jehovah. (Jo Epeco 5:22, 23; 6:1-3; Jo Ibru 13:17) Dok cwinywa bedo yom pien Lubanga mito ni wabed maber.

16. Tam ma wamoko twero nyuto nining ni wacwako twero me loc pa Jehovah?

¹⁶ Watwero bene cwako twero me loc pa Lubanga ma lubbe ki tam ma wamoko. Jehovah pe miniwa cik ma kwako jami ducu i kwo. Ma ka meno, en tittiwa tamme ma lube ki gin moni. Man konyowa me niang gin ma myero watim. Me labolle, Jehovah pe oryeyo cik ma lube ki gin ma myero Lukricitayo guruk ki ma pe myero guruk. Ma ka meno, en wacciwa ni myero warukke maber dok ki woro i yo ma keto deyo i kome macalo Lucadenne. (1 Temceo 2:9, 10) En mito ni watam i kom kit ma tam ma wamoko twero gudo kwede jo mukene. (1 Jo Korint 10:31-33) Ka wamoko tam ma lubbe ki kit ma Jehovah tamo kwede, ci wanyuto ni wamarre dok wacwako kit ma en loyo kwede ki locce.

17, 18. Jo munyomme gitwero nyuto nining ni gicwako twero me loc pa Jehovah?

¹⁷ Nen kong yo acel ma Lukricitayo ma gunyomme gitwero nyuto kwede ni gicwako twero me loc pa Jehovah. Nyom pa luot moni pe twero bedo kit  ma onongo gitamo kwede. Peko magwar twero bedo tye i kingi. Ka tye kumeno, ci gitwero tam i kom kit ma Jehovah otero kwede rok me Icrael. Jehovah owaco ni en onongo etye macalo cwargi. (Icaya 54:5; 62:4) Rok meno gucwero cwiny Jehovah tyen mapol adada. Wat i kingi onongo tye macalo wat i kin luot ma gitye ki peko i nyomgi. Ento Jehovah pe oilo cinge woko oyotoyot i kom Luicrael. Ma ka meno, en obedo ka timmigi kica teretere dok ogwoko cikkene botgi.​—Kwan Jabuli 106:43-45.

¹⁸ Lukricitayo ma gunyomme ma gimaro Jehovah gitemme me lubo lanenne. Kadi bed ni peko tye i otgi, pe gitimo gin ma Baibul pe cwako me keto kenygi. Gingeyo ni Jehovah neno cikke me nyom calo gin ma pire tek adada dok en mito ni ngat acel acel myero ‘omok’ i kom lawote. Tim me abor obedo tyen lok acel keken ma Ginacoya ye kwede ki ngat moni me nyomme odoco i nge keto kenygi. (Matayo 19:5, 6, 9) Ka Lukricitayo gitute me timo jami ducu ma gitwero me gwoko nyomgi, ci nongo gitye ka cwako twero me loc pa Jehovah.

19. Gin ango ma myero watim ka watimo bal?

¹⁹ Wan ducu watye ki roc dok i cawa mukene watimo jami ma cwero cwiny Jehovah. En ngeyo man maber, dok meno aye oweko en ominiwa ginkok. Pi meno, ka watimo bal myero wakwa Jehovah wek otimiwa kica. (1 Jon 2:1, 2) Ma ka lungo wiwa i kom bal ma watimo, omyero wanong pwony ki iye. Myero wabed cok ki Jehovah, pien en bitimiwa kica dok bikonyowa me medde ki tic pire.​—Jabuli 103:3.

20. Pingo myero wacwak twero me loc pa Jehovah kombeddi-ni?

²⁰ I lobo manyen, dano gibedo i te loc pa Jehovah dok gibipwonyo kit matir pa Jehovah. (Icaya 11:9) Ento kadi wa i kare-ni pud watwero pwonyo kit ma en tamo kwede ki gin ma en mito ni watim. Cokcok-ki pe tye ngat mo ma bicayo twero me loc pa Lubanga. Pi meno myero watim jami ducu kombeddi-ni me cwako twero me loc pa Jehovah kun wabedo luwiny bote, watiyo pire ki gen, dok watute me lubo lanenne i jami ducu ma watimo.