Solomon, ma won Rekoboam, obedo kabaka me Icrael pi mwaki 40. (1 Luker 11:42) I nge to pa wonne, Rekoboam oa ki i Jerucalem ocito i Cekem me doko kabaka. (2 Tekwaro 10:1) Tika en onongo tye ki lworo me doko kabaka? Wonne Solomon onongo ngene matek pi ryekone. Ma pe orii, onongo mitte ni Rekoboam onyut ka en ada eryek dok etwero cobo peko mo matek.

Luicrael onongo kidiyogi matek ma oweko gucwalo luwanggi bot Rekoboam wek guwacce ni: “Woru oketo yec mapek i komwa. In dong ilok tic matego ma woru omiyowa, ki yec mapek ma en oketo i komwa-ni, obed mayot, ci wan wabibedo luticci.”​—2 Tekwaro 10:3, 4.

Rekoboam dong myero omok tam matek adada. Ka ce en oye lok pa dano, onongo bimitte ni en ki jo me ode kacel ki jo ma i gang kal gujal kwo mayot ma gungi kwede-ni. Ento, ka en okwero lok pa dano, onongo giromo jemo wa i kome. En otimo ngo? En ocako ki lok ki ludongo ma onongo yam gikonyo wonne. Ludongo guwacce ni omyero owiny lok pa lwak. Ento Rekoboam dok oloko ki awobe luwote ci oyero me winyo tamgi kun tero lwak marac. En owaco botgi ni: “Wora yam omiyo yecwu odoko pek, ento an abimedone bedo mapek; wora yam pwodowu ki del anino, an abipwodowu ki yib oton.”​—2 Tekwaro 10:6-14.

Tika tye pwony mo ma watwero nongone ki iye? I kare-ni bene watye ki jo ma dong guteggi dok gutiyo pi Jehovah pi kare malac ma gitwero konyowa me moko tam matir. Myero wanyut ryeko kun wawinyo tamgi.​—Yubu 12:12.

I nge winyo lok pa awobe luwote, Rekoboam ocoko lumonye me lweny i kom kaka ma gujemo-ni. Ento Jehovah ocwalo lanebi Cekem wek otittigi ni: “Wun pe wubicito ka lweny i kom lutuwu ma gin jo Icrael. Wek dano acel acel odok cen i  pacone, pien lok man oa ki bota.”​—1 Luker 12:21-24. *​—Nen lok ma tye i tere piny.

Tika obedo yot ki Rekoboam me winy lok pa Jehovah? Dano onongo gibitamo nining i kom kabakagi manyen-ni? En onongo owaccigi ni ebipwodogi “ki yib oton,” ento man dong en pe bitimo gin mo i kom jemo-ni! (Por 2 Tekwaro 13:7.) Kadi bed kit meno, kabaka ki monnye pe guparo kit ma dano tamo kwede i komgi, ento ‘gin ducu guwinyo lok pa Jehovah, ci gudok cen i pacogi, kit ma Jehovah owaco-ni.’

Pwony ango ma wanongo? Bedo me ryeko me winyo Lubanga, kadi bed dano mukene gingalowa pi timo meno. Lubanga bigoyo laane i komwa ka wabedo luwiny bote.​—Nwoyo Cik 28:2.

Tika Rekoboam onongo adwogi maber pi bedo lawiny? Rekoboam pud omedde ki loyo kaka me Benjamin ki Juda, dok en ocako gero boma manyen i kabedo magi. En bene ogero boma mogo “ci omiyogi gubedo matek mada.” (2 Tekwaro 11:5-12) Ma dong pire tek loyo, en kong obedo ka lubo cik pa Lubanga pi kare mo. Pien kaka me ker apar-ri gucako woro cal jogi, jo mogo ki i kingi gucito i Jerucalem me miyo cwak bot Rekoboam ki cwako woro me ada. (2 Tekwaro 11:16, 17) Ker pa Rekoboam odoko matek pien en obedo lawiny bot Jehovah.

I kare ma ker pa Rekoboam odok tek, en otimo gin mo me ur adada. En oweko lubo cik pa Jehovah dok ocako woro lubange me goba! Ento pingo? Tika en onongo dic ki bot minne, ma obedo nya jo Ammon-ni? (1 Luker 14:21) Pe wangeyo, ento Luicarel gulubo lanenne marac-ci. Pi meno, Jehovah oye ni Cicak, Kabaka me Ejipt oma boma mapol i ker me Juda. Meno otimme kadi bed ni Rekoboam onongo ogero boma magi matek adada!​—1 Luker 14:22-24; 2 Tekwaro 12:1-4.

Jami oballe omedde ameda i kare ma Cicak ki lumonye gubino ka turo Jerucalem ka ma Rekoboam onongo tye ka loc ki iye. Man aye kare ma Cemaya otito bot Rekoboam kwena mua ki bot Lubanga ni: “Wun wutyeko bwoto an woko, pi meno an bene atyeko miyowu i cing Cicak.” Rekoboam odok i kom tira man nining? En omwolle matek adada! Baibul wacciwa ni: “Rwodi me Icrael kacel ki kabaka gumwolle woko, omiyo guwacci, ‘Rwot [Jehovah] lokke tye kakare.’” Pi meno, Jehovah olaro Rekoboam ci pe kituro Jerucalem.​—2 Tekwaro 12:5-7, 12.

I nge meno, Rekoboam omedde ki loc i ker me Juda. Ma dong Rekoboam cok to, en omiyo mot mapol adada bot awobene. Nen calo en onongo pe mitti gujem i kom omingi Abija, ma onongo bileyo kom kerre. (2 Tekwaro 11:21-23) Meno obedo tam me ryeko ma en omoko maber loyo tam ma omoko i kare me bulune.

Kadi bed ni Rekoboam otimo jami mogo mabeco, Baibul loko kit man i kom locce: “En con obedo ka tiyo gin marac.” Pingo? Pien en ‘pe oketo cwinye ka yenyo Jehovah.’ Pi meno, cwiny Jehovah pe obedo yom i kome.​—2 Tekwaro 12:14.

Pwony ango ma wanongo ki i kwo pa Rekoboam? En olubo cik pa Jehovah i kare mogo. Otute bene me timo jami mabeco pi jo pa Lubanga. Ento en onongo pe tye ki wat macok ki Jehovah, dok pe obedo ki miti matek me yomo cwinye. Pi meno, en ojuko timo gin matir ci ocako woro lubange me goba. Man twero weko ipennye ni: ‘I kare ma Rekoboam ojolo tira pa Jehovah, tika ada en onongo ongut i kom balle dok mito yomo cwiny Lubanga? Nyo otimo mere pien dano aye guwacce ni otim?’ (2 Tekwaro 11:3, 4; 12:6) Lacen ma dong en cok to, en pud omedde ki timo jami maraco. En onongo pat adada ki kwarone Kabaka Daudi! Tye lok ada ni Daudi otimo bal mogo. Ento en ongut ki cwinye ducu pi bal madongo ma en otimogi. I kare me kwone ducu en onongo maro Jehovah ki woro me ada.​—1 Luker 14:8; Jabuli 51:1, 17; 63:1.

 Wapwonyo jami mapol ki i lok me Baibul man. Obedo gin maber ka dano miyo jami ma mitte pi jo me ode dok timo jami mabeco pi jo mukene. Ento wek wanong cwak pa Jehovah, omyero wawore i yo ma en mito dok wabed ki wat matek kwede.

Wek watim meno, omyero wabed ki mar matut pi Jehovah. Kit macalo ka wamitti mac omedde ki lyel, omyero wamed yen i tere, kit acel-lu bene, omyero wawek marwa pi Lubanga obed makwo ki kwano Lokke kare ki kare, lwodone, ki dong diyo cwinywa i lega. (Jabuli 1:2; Jo Roma 12:12) Mar ma kit man bikonyowa me yomo cwiny Jehovah i gin mo keken ma watimo. Man biweko wangut i kom balwa dok walego Jehovah ni otimwa kica. Man biweko pe wabedo calo Rekoboam ento wabimedde ki bedo lugen i woro me ada.​—Juda 20, 21.