1. Gin ango ma oweko wan dano wapat ki lee?

JEHOVAH omiyo bot dano mot mo ma kite dok pat. Man obedo cwiny ma ngoliwa kop. Mot man weko wabedo pat ki lee. Wangeyo nining ni Adam gin ki Kawa onongo gitye ki cwiny ma ngoligi kop? I nge jemo i kom Lubanga, gin gukanne woko ki bote. Cwinygi obedo ka pidogi.

2. Cwiny ma ngoliwa kop-pi watwero porone ki lawala me dwoyo meli nining? (Nen cal ma tye i pot karatac man.)

² Cwiny ma ngoliwa kop-pi watwero porone ki lawala me dwoyo meli. Ngat ma cwiny ma ngole kop-pi pe opwonnye, rom ki lawala me dwoyo meli ma oballe woko. Wot ki meli ma kit meno twero kelo adwogi marac adada. Yamo madwong ki twagge pa pii twero bayo meli meno woko ki i yo ma myero olubi. Lawala me dwoyo meli ma tiyo maber konyo ngat ma tye ka dwoyone me lubu yo mupore wek pe gurweny i dye nam. Cwiny ma ngoliwa kop obedo ngec ma watye kwede i cwinywa ma nyuto botwa gin matir ki ma pe atir. Wek cwiny man oti maber, omyero igwok dok ipwony maber.

3. Ngo ma romo timme ka pe wapwonyo cwiny ma ngoliwa kop-pi maber?

 ³ Ka pe wapwonyo cwiny ma ngoliwa kop-pi maber, ci ding woko dok pe cikowa i kom gin marac. (1 Temceo 4:1, 2) Twero bene bwolowa ni ‘gin marac aye ber.’ (Icaya 5:20) Yecu owaco bot lulub kore ni: “Kare bibino ma dano ducu ma nekowu bitamo ni etye ka tic pi Lubanga.” (Jon 16:2) Meno aye gin ma jo ma guneko lapwonnye Citefano gutamo. (Tic pa Lukwena 6:8, 12; 7:54-60) Cakke con i tekwaro pa dano, jo ma ludini gutimo bal madongo, calo nek, kun giwaco ni gitimo pi Lubanga. Ento i ada, jami ma gutimo-ni turo cik pa Lubanga. (Nia 20:13) Ngene kene ni, cwinygi pe otelogi i yo matir!

4. Ngo ma myero watim wek cwiny ma ngoliwa kop-pi oti maber?

⁴ Dong ngo ma myero watim wek cwiny ma ngoliwa kop-pi oti maber? Cik kacel ki cik ma igi lac ducu me Baibul “konyo me pwony, me juko dano, me tiro kit pa dano, me nyebo dano wek gulub kit ma atir.” (2 Temceo 3:16) Myero wakwan Baibul nino ducu, walwod lok i kom gin ma wakwano, dok waket i tic i kwowa. Ka watimo meno, ci wabipwonnye me tam kit ma Jehovah tamo kwede. Dong wabibedo labongo akalakala mo ni cwiny ma ngoliwa kop-pi bitelowa maber. Kong dong wanyamu kit ma watwero tic ki cik kacel ki cik ma igi lac me Baibul me pwonyo cwiny ma ngoliwa kop.

5, 6. Cik pa Lubanga konyowa nining?

⁵ Ka wamito ni cik pa Lubanga okonywa, pe omyero wakwangi akwana nyo wangegi keken ci otum. Myero wamar dok wawor cikke. Baibul wacciwa ni: “Wukwer gin marac, wumar gin maber.” (Amoc 5:15) Ento watwero timo meno nining? Myero wapwonnye me neno jami kit ma Jehovah neno kwede. Kong waket kit man. Go kong ni itye ki peko me nino, ci daktar ocikki ni icak camo cam maber, irye ler, dok ilok kwoni i yo mukene. I nge lubo tamme, inongo adwogi maber! Ibiwinyo nining i kom tam ma daktar omiyo-ni?

⁶ I yo acel-li, Lacwecwa omiyo botwa cik ma weko kwowa bedo maber dok gwokowa ki i adwogi marac me bal. Me labolle, Baibul pwonyowa ni pe myero walok lok goba, wakwal kwo, wadony i tim me tarwang nyo tim me jok jok, dok pe wabed jo mager. (Kwan Carolok 6:16-19; Niyabo 21:8) Ka wanongo adwogi maber ma bino pi lubo cik pa Jehovah, ci marwa pire ki pi cikke dongo.

7. Labol pa jo ma gukwo i kare me Baibul konyowa nining?

⁷ Pe mitte ni kong wanong adwogi marac ma bino pi turo cik pa Lubanga ka wek wapwony gin matir ki marac. Watwero nongo pwony ki i bal ma jo mukene gutimo i kare mukato angec. Labol magi kicoyogi i Baibul. Carolok 9:9 waco ni: “Pwony dano maryek, ci ryekone bimedde ameda.” Pwony man a ki bot Lubanga dok obedo pwony ma pud dong ber loyo! Me labolle, tam kong i kom peko ma Daudi owok ki iye i kare ma en oturo cik pa Jehovah kun timo abor ki Bat-ceba. (2 Camuel 12:7-14) Ka itye ka kwano lok meno, pennye kekeni  ni: ‘Daudi onongo romo weyo peko magi nining? Kono onongo obed an, onongo abitimo ngo? Ka atye ka kato ki i atematema me timo abor, tika abibedo calo Daudi nyo calo Yucepu?’ (Acakki 39:11-15) Ka watamo matut i kom adwogi marac ma bal kelo, ci wabimedde ki ‘kwero gin marac.’

8, 9. (a) Cwiny ma ngoliwa kop-pi konyowa me timo gin ango? (b) I yo ango ma cwiny ma ngoliwa kop-pi tiyo kacel ki cik ma igi lac me Baibul?

⁸ Myero wagwokke ki jami ma Lubanga dagi. Ento ngo ma myero watim ka ce wakemme ki gin mo ma cik me Baibul pe loko iye atir atir? Watwero ngeyo gin ma Lubanga mito ni watim nining? Ka waweko Baibul pwonyo cwiny ma ngoliwa kop-pi, ci wabimoko tam me ryeko.

⁹ Kit macalo Jehovah marowa tutwal-li, en omiyo botwa cik ma igi lac ma twero doro cwiny ma ngoliwa kop-pi. En waco ni: “An a Rwot [Jehovah] Lubangawu amito pwonyowu wek wubed maber, kun atelowu i yo ma myero wuwot iye.” (Icaya 48:17, 18) Ka watamo matut i kom cik ma igi lac, dok waweko gudo cwinywa, ci watwero tiro cwiny ma ngoliwa kop-pi. Labongo akalakala mo, man bikonyowa me moko tam me ryeko.

10. Cik ma iye lac obedo ngo, dok Yecu otiyo ki cik ma igi lac i pwonye nining?

¹⁰ Cik ma iye lac obedo pwony me Baibul ma tito lok ada ma pire tek, dok konyowa me moko tam matir. Ngeyo cik ma igi lac me Baibul konyowa me niang kit ma Jehovah tamo kwede ki dok pingo en oketo cik mogo. Yecu otiyo ki cik ma igi lac me pwonyo lukwenane ni tam ki tim mogo kelo adwogi marac. Me labolle, en opwonyo ni akemo twero tero dano i tim gero, ki tam macilo twero tero dano i tim me tarwang. (Matayo 5:21, 22, 27, 28) Ka waye ni cik ma igi lac me Baibul odorwa, ci wabipwonyo cwiny ma ngoliwa kop-pi maber, dok wabimoko tam ma kelo deyo bot Lubanga.​—1 Jo Korint 10:31.

11. Cwiny ngat acel twero ngole kop i yo mapat ki pa ngat mukene nining?

¹¹ Kadi bed ni Lukricitayo ducu gupwonyo cwiny ma ngoligi kop kun gitiyo ki Baibul, ento pud giromo moko tam mapatpat. Labol acel twero bedo tam ma wamoko ka ce myero wamat kongo nyo pe. Baibul pe waco ni mato kongo rac, ento cikowa ni pe myero wamat madwong nyo wamer. (Carolok 20:1; 1 Temceo 3:8) Dong man mono te lokke ni ka Lakricitayo moni pe mato madwong, en dong pe myero otam i kom gin mukene ka tye ka moko tamme me mato kongo? Pe. Kadi bed cwiny ma ngole kop ye ni omat kongo, en myero otam pi cwiny jo mukene bene.

12. Lok ma kicoyo i Jo Roma 14:21 twero konyowa nining me woro cwiny jo mukene?

¹² Paulo onyuto kit ma bedo ki woro pi cwiny jo mukene pire tek kwede i kare ma en ocoyo ni: “Bedo ber mada ka pe icamo ringo, nyo kadi ki mato kongo, nyo tiyo gin mo ma bimiyo omeru poto.” (Jo Roma 14:21) Dong kadi bed watye ki twero me mato kongo, myero waye me jalo twerowa woko ka wangeyo ni romo balo cwiny Lakricitayo mukene. Romo bedo ni omego mo yam con onongo obedo lamero adada, ci i nge pwonyo ada en omoko tamme pe me mato kongo kadi matidi mo. Pe wamito ni watim gin mo keken ma romo weko omego-ni dok cen i kite macon. (1 Jo Korint 6:9, 10) Ket kong ni omego-ni obino calo welo i gangi, tika ibimiye kongo, kadi bed en okwero woko? Ngene kene ni pe ibitimo kit meno!

13. Temceo onyuto woro pi cwiny jo mukene nining wek ekonygi me jolo kwena maber-ri?

¹³ I kare ma Temceo pud obedo awobi, en oye ni gilire kadi bed man onongo lit adada. En ongeyo ni lirre pire tek adada bot Lujudaya ma en onongo bicito ka tito kwena botgi-ni. Calo Paulo, Temceo onongo pe mito balo cwiny ngat mo keken. (Tic pa Lukwena 16:3; 1 Jo Korint 9:19-23) Tika in bene itye atera me jalo jami ma imaro wek ikony jo mukene?

14, 15. (a) Watwero doko jo muteggi nining? (b) Lakricitayo muteggi tero jo mukene nining?

¹⁴ Wan ducu omyero wapwony jami makato “lok mukwongo i kom Kricito” wek “wamedde anyim ki pwony pa jo muteggi.” (Jo Ibru 6:1) Pe tyen lokke ni ka warii i ada ci nongo wateggi i yo me cwiny. Mitte ni watute matek wek wadok dano muteggi. Omyero ngec ki ryeko ma watye kwede obed ka medde kare ducu. Pi meno, mitte ni wakwan Baibul nino ducu. (Jabuli 1:1-3) Ka iwoto ki kwano Baibul nino ducu ci ngecci i kom cik kacel ki cik ma igi lac bimedde ameda.

¹⁵ Cik mene ma pire tek loyo pi Lukricitayo? Obedo cik me mar. Yecu owaco bot lupwonnyene ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) I Baibul, kiwaco ni mar aye “cik me ker” ki dok ni “mar aye ma cobo cik.” (Yakobo 2:8; Jo Roma 13:10) Pe watye ki ur ni mar pire tek kit man, pien Baibul waco ni “Lubanga aye mar.” (1 Jon 4:8) Ki tung bot Lubanga, mar pe obedo kit ma en winyo ki i cwinye keken. En nyuto marre i ticce. Jon ocoyo ni: “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire.” (1 Jon 4:9) Ka wanyuto marwa pi Jehovah, Yecu, utmegiwa ki dong jo mukene, nongo watye ka nyuto ni wan Lukricitayo muteggi.​—Matayo 22:37-39.

16. Ka wamedde ki teggi macalo Lukricitayo, pingo marwa pi cik ma igi lac me Baibul bene medde ameda?

¹⁶ Ka wamedde ki teggi macalo Lukricitayo, marwa pi cik ma igi lac me  Baibul bene bimedde ki dongo. Cik pol kare loko i kom gin acel keken ento cik ma igi lac kwako jami mapol. Me labolle, latin matidi pe niang rac pa mako lurem ki jo maraco, pi meno lunyodone omyero gukette cik me gwokke. (1 Jo Korint 15:33) Ento ka latin woto ki teggi, en woto ki pwonyo kit me tic ki cik ma igi lac me moko tam. Cik magi ma igi lac bikonye me moko tam maber i yero lurem. (Kwan 1 Jo Korint 13:11; 14:20.) Ka watiyo ki cik ma igi lac me moko tamwa kare ducu, man weko cwiny ma ngoliwa kop bedo ma genne. Dok bikonyowa me niang maber ngo ma Lubanga mito ka mitte ni wamok tamwa i kwowa me nino ducu.

17. Pingo watwero wacone ni watye ki jami ducu ma mitte me moko tam matir?

¹⁷ Watye ki jami ducu ma mitte me konyowa me moko tam ma yomo cwiny Jehovah. I Baibul, wanongo cik kacel ki cik ma igi lac ma konyowa me bedo jo ‘muteggi, ma bene wayubbe i yo ducu, ma waromo tiyo kit tic mo maber ducu.’ (2 Temceo 3:16, 17) Cik ma igi lac konyowa me niang kit ma Jehovah tamo kwede. Mitte ni watute matek me nongo cik magi ma igi lac-ci. (Jo Epeco 5:17) Omyero wati ki buke ki jami akwana ma wanongo ki i kacokke pa Lukricitayo calo Buk ma Konyo Lucaden pa Jehovah me Kwedo Lok, Watchtower ONLINE LIBRARY, ki dong JW Library app. Ka watiyo ki jami magi ci wabinongo adwogi maber adada ki i kwan piwa kenwa ki woro pi jo me ot.

18. Ngo ma timme ka waketo cik ki cik ma igi lac me Baibul i tic i kwowa?

¹⁸ Kwowa yubbe bedo maber adada ka waketo i tic cik ma igi lac me Baibul! Jabuli 119:97-100 waco ni: “Amaro cikki twatwal! Abedo ka lwodo lok i kom cikki dyeceng jwi. Cikki miyo abedo ryek akato lukworra woko, pien atye kwede nino ducu. Dong atye ki niang maber muromo, akato lupwonnya woko ducu, pien abedo ka lwodo lok i kom lok me cadenni kare ki kare. Aniang bene aloyo jo muteggi, pien alubo gin ma iciko.” Ka wakwanyo kare me lwodo matut cik ma igi lac me Baibul ci wabimoko tam me ryeko. Dok ka watiyo ki cikke kacel ki cik ma igi lac me pwonyo cwinywa, man biweko wadongo wang ma “warom ki Kricito, ma en aye jami ducu opong iye.”​—Jo Epeco 4:13.