1. Tyen lok ango ma watye kwede me bedo ki yomcwiny?

WATYE ki yomcwiny madit adada me winyo kit ma lutic pa Lubanga gitye ka menyo kwede piny! I mwaka mukato-ni, jo pa Jehovah gukwano Baibul ki dano makato 10,000,000 kulu. Dano milion mapol ma gitye ki miti, gubedo tye i Nipo dok gupwonyo lok i kom mic pa Jehovah madit loyo, ma en aye ginkok.​—1 Jon 4:9.

2, 3. (a) Ngo ma pe twero gengowa ki “ryeny i lobo i kin dano calo lakalatwe”? (b) Ngo ma wabinyamo i pwony man?

² I twok lobo-ni ducu, Lucaden pa Jehovah giloko leb mapol mapatpat. Ento man pud pe twero gengowa ki pako Jehovah macalo jo ma gunote kacel. (Niyabo 7:9) Watwero “ryeny i lobo i kin dano calo lakalatwe” labongo paro pi leb nyo ka ma wabedo iye.​—Jo Pilipi 2:15.

³ Ticwa me tito kwena, notewa kacel macalo Lukricitayo, ki dong bedowa ma wangeyo ni kare dong odic woko kelo deyo bot Jehovah. Watwero menyo piny  nining i yo adek magi?​—Kwan Matayo 5:14-16.

4, 5. (a) Mapat ki tito kwena, i yo ango ma watwero weko derowa ryeny kwede? (b) Adwogi maber ango ma bino ka wanyuto cwiny me kica bot dano? (Nen cal ma tye i pot karatac 21.)

⁴ Tito kwena ki loko dano wek gudok lupwonnye pa Yecu obedo yo acel ma wamenyo kwede ki piny. (Matayo 28:19, 20) I mwaka 1925, pwony ma wiye tye ni “Dero i Lobo me Colpiny” otito ni, i kare me agikki-ni pe tye ngat mo ma twero gwoko genene ka pe “otiyo ki kare man me weko derone omeny piny.” Ci omedde ni: “Ngat moni twero timo man ka tito kwena bot dano kun bene loko kwone ma lubbe ki yo me dero.” (The Watch Tower, June 1, 1925) Medo i kom tito kwena, kit me kwowa bene kelo deyo bot Jehovah. Pol pa dano ginenowa ka watye ka tito kwena. Ka wabwunyo kwedgi dok wamotogi, man weko pe gitamo marac i komwa ki Lubanga ma waworo.

⁵ Yecu otito ki lupwonnyene ni: ‘Ka wudonyo i ot kong wumot dano ma i ot meno.’ (Matayo 10:12) I kabedo ma Yecu otito kwena iye, onongo obedo kit pa dano me jolo wele i odigi. I kabedo mapol i kare-ni, dano pe giye ni wadony i odigi. Pol pa dano gibedo ki lworo nyo gikeco ka guneno ngat ma pe gingeyo i nyim doggolagi. Ento ka wanyuto cwiny me lirem ki kica, gibedo agonya me lok kwedwa. Ka itye ka tito kwena i dye lwak kun itiyo ki lalor bukke, tika dong ineno ni ka ibwunyo dok imoto dano, ci gibedo agonya me bino ka kwanyo bukkewa? I kine mukene nongo gimito bene boko lok kwedwa!

6. Ngo ma tye ka konyo luot mo ma dong guteggi me medde ki tito kwena?

⁶ Luot mo ma guteggi dok gibedo i lobo Ulaya, pe dong gitwero tito kwena i ot ki ot kit ma yam gitimo kwede con, pien yotkomgi pe tye maber. Pi meno, gin giketo meja i nyim otgi ka ma gicano iye bukke mapatpat. Ganggi tye cok ki cukul mo, dong giketo bukke ma lunyodo twero bedo ki miti me kwanyone ka gubino ka gamo lutinogi. Lunyodo mukene gugamo bukke ma i kine tye iye Questions Young People Ask​—Answers That Work, Volume 1 ki 2. Laminwa mo ma tye painia pol kare bedo kwedgi ka gitye ka tito kwena i nyim otgi. Lunyodo gineno ni laminwa-ni tye ki cwiny me lirem dok bene luot-ti gitye ki miti me konyo dano. Lanyodo acel bene dong ocako kwano Baibul.

7. Itwero konyo luring ayela ma i kabedowu nining?

⁷ I kare-ni, dano mapol guringo guweko gangigi dok gitye ka kwo i lobe mukene calo luring ayela. Gin ango ma itwero timone me konyo luring ayela  ma i kabedowu? Mukwongo, iromo pwonyo kit me motogi i lebgi. Medo i kom meno, iromo tic ki JW Language app me pwonyo nyig lok mogo manok ma weko gicung giloko kwedi. Itwero nyutigi vidio nyo bukkewa ma tye i lebgi ma nonge i jw.org.​—Nwoyo Cik 10:19.

8, 9. (a) Cokkewa me dye cabit konyowa nining? (b) Lunyodo gitwero konyo lutinogi nining wek gumi lagam maber?

⁸ Jehovah miniwa jami ma mitte wek ticwa me tito kwena owot maber. Me labolle, pwony ma wanongo i Cokke me Kwowa ki Ticwa konyowa me bedo ki tekcwiny me dok cen ka lim nyo cako kwano Baibul ki dano.

⁹ Ka wele gubino i cokkewa, cwinygi bedo yom me neno kit ma lutino miyo ki lagam. Itwero pwonyo lutinoni me miyo lagamgi labongo kwanone ki i buk. Jo mukene gucako maro ada i kare ma guwinyo ka lutino miyo lagam ma a ki i cwinygi dok ma niang iye yot.​—1 Jo Korint 14:25.

10. Woro pi jo me ot konyo jo me odi me bedo ma gunote kacel nining?

¹⁰ Ka watute matek me pwonyo jo me odiwa me tic kacel ki kuc, man kelo deyo bot Jehovah. Me labolle, ka in lanyodo, ket yub me bedo ki Woro pi Jo me Ot labongo keng. Jo me odi mapol gineno yub me JW Broadcasting ma katti dwe ki dwe-ni, ci i ngeye ginyamo kit  ma giromo tic kwede ki jami ma gupwonyo. Wi opo ni tira ma mitte pi latin matidi pat ki tira ma mitte pi latin ma tye mwaka apar ki wiye. Tute matek me konyo jo me ot-ti ki acel acel wek gunong adwogi maber ki i woro pi jo me ot.​—Jabuli 148:12, 13.

11-13. Watwero konyo jo me kacokkewa me bedo ma gunote matek nining?

¹¹ Kadi bed pud itidi, itwero konyo jo ma i kacokkewu wek guwiny ni pigi tek. Yo me acel aye obedo me mako lurem ki omege kacel ki lumege ma mwakagi oteggi. Penygi ngo ma okonyogi me medde ki tic pi Jehovah pi mwaki mapol. Gitwero pwonyi jami mabeco mapol. Man bicuko cwinygi kacel ki in! Dok wan ducu, kadi bed mwakawa oteggi nyo pe, pud watwero konyo wele ma gubino i kacokkewa me bedo agonya. Gin ma myero itim aye ni imotgi, ibwuny kwedgi, inyutgi bot jo mukene ka dong ikonygi me nongo kabedo. Konygi wek gubed agonya i kacokke.

¹² Ka kicimmi me doro cokke me cito i tic me pwony, itwero konyo jo ma mwakagi oteggi me weko derogi omedde ki ryeny. Nen ni gitye ki wang tic macok dok mupore me atiya pigi. Ket yub pigi me tic ki jo matino. Omege ki lumege ma komgi lit pol kare cwinygi tur pien nongo pe gitwero tito kwena kit macalo yam con. Gubiwinyo maber ka gungeyo ni iparo pigi dok iniang pekogi. Kadi bed mwakagi lac dok gurii i ada, kica ma inyuto cuko cwinygi me medde ki tito kwena ki mit kom.​—Lulevi 19:32.

¹³ Luicrael gunongo mit pa woro Jehovah kacel. Laco jabuli ocoyo ni: “Nen kit macalo bedo ber ki me yomcwiny ka omego gibedo kacel ki mer i kingi!” (Kwan Jabuli 133:1, 2.) En oporo notegi ki moo ma ngwecce kur ma weko del kom bedo mapwot. I yo acel-lu watwero kelo yomcwiny bot omege ki lumege ka waloko maber dok ki kica botgi. Man weko jo me kacokke gibedo ma gunote matek. Tika itwero tute me ngeyo utmege ma i kacokkewu maber?​—2 Jo Korint 6:11-13.

14. Itwero weko deroni ryeny i kabedowu nining?

¹⁴ Derowa twero ryeny labongo paro ka ma wabedo iye. Kica ma inyuto twero weko jiranini gibedo ki miti me pwonyo lok i kom Jehovah. Pennye kekeni ni: ‘Jiranina gitamo ningo i koma? Tika ganga tye maleng dok maber? Tika pacona weko kabedowa nen maleng? Tika atye jirani ma konyo jo mukene?’ Peny Lucaden mukene kit ma kica ma ginyuto kacel ki lanengi maber ogudo kwede wadigi, jiranigi, lutic luwotgi kacel ki lutino kwan luwotgi.​—Jo Epeco 5:9.

15. Pingo mitte ni wabed ma wangwa twolo?

¹⁵ Ka wamito ni derowa omedde ki  ryeny matek, omyero wange kare ma watye ka kwo iye. Tyen mapol, Yecu otito ki lupwonnyene ni: “Wubed ma wangwu twolo.” (Matayo 24:42; 25:13; 26:41) Ka watamo ni ‘twon can madit atika-ni’ pud karene bor, ci pe wabibedo atera me konyo jo mukene wek gupwony lok i kom Jehovah. (Matayo 24:21) Ma ka weko derowa oryeny maber, tam ma kit man weko derowa ryeny niminimi nyo to woko bene.

16, 17. Ngo ma omyero itim wek ibed ma wangi twolo?

¹⁶ Mitte ni wabed ma wangwa twolo i kare-ni ma loyo i kare mo keken. Kwo tye ka medde ameda ki doko marac. Ento wangeyo ni agikki piny bibino i ninone kikome ma Jehovah omoko. (Matayo 24:42-44) Ka wawoto ki kurone, omyero wadi cwinywa, kun waneno anyim. Kwan Baibul nino ducu dok pe iwek lega bot Jehovah. (1 Petero 4:7) Nong pwony ki bot omege ki lumege ma gutiyo pi Jehovah pi mwaki mapol. Me labolle, itwero kwano jami ma otimme i kwo pa utmegiwa, calo pwony ma wiye tye ni, “Mako Dog Kanyi pa Lajudaya pi Mwaki Pyerabiro” [“Seventy  Years of Holding On to the Skirt of a Jew”] ma okatti i Watchtower me April 15, 2012, pot karatac 18-21.

¹⁷ Medde ki tic matek pi Jehovah. Nyut cwiny me kica bot jo mukene dok ikwany kare me bedo kacel ki omege ki lumege. Man bikeli yomcwiny dok ibiwinyo ni kare tye ka kato oyotoyot. (Jo Epeco 5:16) Pi mwaki mia acel ma dong okato-ni, lutic pa Jehovah gutimo jami mapol adada. Dok i kare-ni, pud watye ki tic me atiya madwong makato kare mo keken. Tic pa Jehovah odongo okato kit ma onongo watwero byekone kwede. Derowa tye ka ryeny maleng!

18, 19. Luelda gitwero konyowa me tic pi Jehovah ki mit kom nining? Mi labol.

¹⁸ Kadi bed ni watye ki roc, Jehovah pud ye ni wati pire. Me konyowa, en ominiwa ‘mot ma obedo dano’ ma gin aye luelda me kacokke. (Kwan Jo Epeco 4:8, 11, 12.) Pi meno, ka luelda gulimi, ti ki kare meno me nongo pwony ki i ryekogi.

¹⁹ Me labolle, jo me ot mo i lobo England onongo gitye ki peko i nyomgi, ci gupenyo luelda aryo pi kony. Dako pa omego-ni onongo winyo calo cware pe tye ka cobo ticce me doro woro pi jo me ot. Omego-ni otito ni en pe engeyo pwony maber dok oye ni pe etye ka doro woro pi jo me ot teretere. Luelda gukonyo jo me ot man me tam i kom labol pa Yecu. Gucuko cwiny omego-ni me lubo kit ma Yecu ogwoko kwede lupwonnyene. Kicuko cwiny lamego-ni bene me diyo cwinye i kom cware. Luelda gumiyo tam botgi i kom kit ma gitwero konyo lutinogi aryo-ni i worogi pi jo me ot. (Jo Epeco 5:21-29) Omego-ni otute matek me doko lawi ot maber. Luelda bene gucuko cwinye ni pe oil cinge woko ento omedde ki jenge i kom cwiny maleng pa Jehovah. Cwiny me mar ki kica ma luelda gunyuto okonyo jo me ot man adada!

20. Adwogi ango ma ibinongo ka iweko deroni omedde ki ryeny?

²⁰ ‘Tye ki yomcwiny dano ma lworo Jehovah, ma bedo kun lubo yone.’ (Jabuli 128:1) Ibibedo ki yomcwiny ka iweko deroni medde ki ryeny. Dong, pwony jo mukene lok i kom Lubanga, tute matek me konyo jo me ot-ti ki jo me kacokkewu me bedo ma gunote kacel, dok ibed ma ingeyo ni kare dong odic woko. Jo mukene gubineno lanenni maber-ri ci gibibedo ki miti me miyo deyo bot Wonwa Jehovah.​—Matayo 5:16.