I MWAKA 1970, jo ma gigolo piny gunongo buk adola mo ma owang i kabedo ma kilwongo ni Ein Gedi, i lobo Icrael, ka ma cok ki tung kupoto ceng me Nam me Kado. Gunongo buk adola man i kare ma gitye ka golo ot cokke mo pa Lujudaya, ma owang i kare ma kiwango caro man i kine ka mwaka 500 ki 550 K.M. Kit ma onongo buk adola man owang marac adada-ni, onongo coc ma iye pe twero kwanne; dok bene pe kitwero yarone labongo balone. Kadi bed kit meno, pi diro tet manyen me menyo jami (3-D scanning technique), “kiyaro” buk adola man. Ki kony pa diro tet man, jami ma tye iye kikwano.

Menyo ma kimenyo-ni onyuto gin ango? Kinongo ni buk adola man obedo but Baibul. Bute ma odong-ngi tye ki tyeng mogo mukwongo me buk pa Lulevi. Tyeng magi gitye ki nying Lubanga i leb Ibru, kun gitiyo ki nukta angwen ma cung pi nying Lubanga-ni. Buk adola man nen calo kicoyo i kine ka mwaka 50 ki 400 K.M., ma nyuto ni man aye buk adola me leb Ibru ma dong ori loyo i nge buk adola me Dead Sea Scrolls. Lacoc mo ma nyinge Gil Zohar ocoyo i gajeti me The Jerusalem Post ni: “Ma peya kitiyo ki diro tet manyen me kwano buk adola me Ein Gedi, onongo tye mwaki ma romo 1,000 i kin buk adola ma orii loyo me Dead Sea Scrolls (ma kicoyo i 100 K.M.P.) ki buk adola ma lubo meno ma kilwongo ni Aleppo Codex (ma kicoyo i 930 K.M.). Ma lubbe ki lok pa ludiro, buk adola man nyuto ni, coc macon me bukke abic mukwongo me Baibul “kikobo maber pi mwaki alip mapol, dok bal ma bino pi kobo coc pe oloko tyen lokke.”