PI LUIBRU ma gibedo i Lobo ma Kiciko Pire, mwaka onongo cakke ki pwuru poto kacel ki coyo kodi, ma meno onongo timme i dwe ma i kare-ni rwatte ki Sektemba/Oktoba.

Dano onongo gingeyo ka dwe manyen ocakke kun gitiyo ki kare ma dwe tero me por, ma meno tero nino 29 nyo 30. Onongo gitiyo ki ceng me ngeyo acakki pa mwaka manyen. Ento mwaka ma kikwano kun gitiyo ki dwe cek ka kiporo ki mwaka ma kikwano kun kitiyo ki ceng. Pi meno, onongo mitte ni gunong kit mo me weko yo aryo magi me kwano mwaka bedo marom. Onongo gitimo man ki medo nino mogo nyo medo dwe mukene kare ki kare, gwok nyo ma peya mwaka manyen ocakke. Man onongo weko dwe ma meggi rwatte ki kare me coyo kodi ki kac.

Ento i kare pa Moses, Lubanga owaco ni dwe mukwongo me mwaka pi Luicrael bibedo dwe me Abib nyo Nican. Onongo bipoto i kine ka dwe me Marci/April. (Nia 12:2; 13:4) I dwe me Nican, onongo Luicrael gibedo ki kwer, ma gityero iye wi mwaka me cayiri bot Jehovah.—Nia 23:15, 16.

Lacoc mo ma okwano lok meno matut owaco ni onongo yot me ngeyo awene ma omyero gimed dwe mukene i kalenda. En bene owaco ni: “Onongo gikwero kwer me Kato i nino ma dwe ogudo got i dwe me Nican (14 Nican). Ento nino meno myero opot i nge nino ma cawa me dyeceng ki dyewor rom aroma. Pi meno, ka kiniang woko i agikki me mwaka ni kwer me Kato bibino con ma peya nino meno oromo, ci Lujudaya onongo gimedo dwe mukene ma peya dwe me Nican ocakke.”

Lucaden pa Jehovah gitiyo ki yo meno me moko nino kikome ma myero gikwer iye Cam me Otyeno pa Rwotwa, ma timme i kine ka Marci/April dok rwatte ki nino dwe 14 me Nican i kalenda pa Luibru. Kiniango kacokke ducu ma i but lobo-ni con i kom nino dwe man. *

Ento onongo Luibru gingeyo nining ka dwe moni otum dok dwe manyen ocakke? I kare-ni, itwero neno mere kalenda ma kigoyo nyo ma i cimmi. Ento i kare me Baibul, onongo pe yot kit meno.

I kare pa Nua, onongo gitero ni dwe acel acel tye ki nino 30. (Acak. 7:11, 24; 8:3, 4) Lacen, i kin Luibru, onongo pe gitero ni dwe acel acel tye ki nino 30. Pi Luibru, dwe manyen onongo cakke cutcut ka kineno dwe ma pud opor ni pere. Meno onongo tero nino 29 nyo 30 i nge acakki dwe mukato.

I nino mo acel, Daudi ki Yonacan guloko i kom acakki me dwe manyen kun giwaco ni: “Dwe diki por.” (1 Cam. 20:5, 18) Dong nen calo i karegi, onongo gingeyo woko con awene ma dwe manyen bicakke iye. Ento Luicrael onongo gingeyo nining awene ma dwe manyen cakke iye? Buk me Mishnah, ma tye ki cik kacel ki tekwaro pa Lujudaya, miyo ngec mo madok i kom lok man. Tito ni, i kare ma Lujudaya gudwogo cen ki i Babilon, Lukiko Madit pa Lujudaya aye onongo gimoko awene ma dwe manyen cakke iye. Pi dwe abiro, Lukiko man onongo girwatte odiko i nino dwe 30 me dwe meno. Co magi onongo gitye ki tic me moko awene ma dwe manyen bicakke iye. Onongo gimoko man nining?

Co ma onongo giketogi i wi cere mapatpat i Jerucalem onongo gikiyo piny i dyewor me neno dwe ma pud opor nyen. Onongo giniango Lukiko cutcut ka guneno. Ka co ma i lukiko gunongo ripot muromo ki bot luki piny ni kineno dwe manyen, ci onongo gimiyo lok angeya ni dwe manyen ocakke. Ento ket kong ni pol nyo lupwu oumo piny woko ma oweko luki piny pe gitwero neno dwe ma opor nyen-ni kono? Onongo gimiyo lok angeya  ni dwe ma gitye iye-ni tye ki nino 30, ci dwe manyen dong cakke orwone.

Buk me Mishnah tito ni onongo gicwalo lok ma Lukiko omoko me cako dwe manyen-ni ki lanyut me cwinyo mac i wi Got Jeituni, ma tye cok ki Jerucalem. I wi cere mukene ma i lobo Icrael, onongo gicwinyo mac me miyo ngec man i kin piny. Lacen, onongo gicwalo lukwena i kin piny me miyo lok angeya man. I yo meno, Lujudaya ma i Jerucalem ki i kabedo mukene mapatpat onongo kiniangogi ka dwe manyen ocakke. Man onongo weko gin ducu gikwero kwer mapatpat i kare marom.

Ibinongo chart ma kiketo-ni tye me kony adada me niang dwe, kwer, ki kare me oro nyo cwir i kalenda pa Lujudaya.