1. Gin ango ma omyero watim me bwot ki i nino pa Jehovah?

 KA BAIBUL oloko i kom “nino pa [Jehovah],” nongo tye ka lok i kom kare ma Jehovah bijwero kwede lumonene ci laro jone. I kare mukato, Jehovah oketo pwod i kom rok mogo. (Ic. 13:1, 6; Ejek. 13:5; Jep. 1:8) I karewa-ni, “nino pa [Jehovah]” bicakke ka luloc gujwero Babilon Madit dok bigik i kare me lweny me Armagedon. Me bwot ki i “nino” meno, mitte ni wayubbe kombeddi. Yecu opwonyo ni omyero ‘wabed ma wayubbe’ pi “twon can madit atika.” Lok man ni “wubed ma wuyubbe” kitwero bene gonyone ni kare ducu wubed atera.—Mat. 24:21; Luka 12:40.

2. Pingo watwero nongo adwogi maber ki i 1 Jo Tecalonika?

² I waragane mukwongo bot Lukricitayo ma i Tecalonika, lakwena Paulo otiyo ki lapor mapol me konyo Lukricitayo magi me bedo ma guyubbe pi nino me ngolo kop pa Jehovah. Paulo onongo ngeyo ni nino pa Jehovah pe bibino i kare meno. (2 Tec. 2:1-3) Kadi bed kit meno, en ocuko cwiny utmegine me yubbe pi nino meno calo tye diki, dok wan bene watwero keto tirane i tic. Kong dong wanenu lok ma en onyamo madok i kom: (1) kit ma nino pa Jehovah bibino kwede, (2) anga ma pe bibwot i nino meno ki (3) kit ma watwero yubbe kwede me bwot.

3. I yo ma nining ma nino pa Jehovah bibino macalo lakwo i dyewor? (Nen bene cal.)

³ “Macalo lakwo ma bino i dyewor.” (1 Tec. 5:2) Man aye lapor mukwongo i kin adek ma Paulo otiyo kwede me tito kit ma nino pa Jehovah bibino kwede. Lukwo pol kare gitiyo ticgi oyotoyot i dyewor ma nongo dano pe oyubbe pigi. Nino pa Jehovah bene bituc atura kit meno, kun nguko pol pa dano ma pe guyubbe. Kadiwa Lukricitayo me ada mogo guromo bedo ki ur pi kit ma jamine bicobbe kwede oyotoyot. Ento pe calo jo maraco, wan pe kibijwerowa woko.

4. I yo ma nining ma nino pa Jehovah tye calo arem me nywal?

⁴ “Calo arem me nywal ma turu dako muyac.” (1 Tec. 5:3) Dako ma oyac pe twero byeko cawa mene kikome ma ebinywal iye. Ento en pe bedo ki akalakala mo ni cawa man bibino. Ka cawa meno oo, arem cakke atura, bedo malit kun pe jukke. I yo acel-lu, wan bene pe wangeyo awene ma nino pa Jehovah bicakke iye. Kadi bed kit meno, waye labongo akalakala mo ni tye ka bino dok ni ngolo kop pa Lubanga i kom jo maraco bicakke atura dok pe gibibwot ki iye.

5. I yo ma nining ma twon can madit atika-ni bibino calo rupiny?

⁵ Calo rupiny. Lapor me adek ma Paulo otiyo kwede dok loko i kom lukwo ma gitye ka kwalo kwo i dyewor. Ento i wang-ngi, lakwena Paulo oporo nino pa Jehovah ki rupiny. (1 Tec. 5:4) Lukwo mogo ma gibino i dyewor tic romo makogi matek ma weko pe gineno ni cawa tye ka cito oyotoyot. Dero me rupiny twero turogi atura kun nyuto ticgi woko ka maleng. I yo acel-lu, twon can madit atika binyuto jo ma gitye calo lukwo, ma gigak i col piny, kun gilungo wigi i tic ma pe  yomo cwiny Lubanga. Pe calo gin, wan watwero bedo ma wayubbe ki kwero tim ma pe yomo cwiny Jehovah kun walubo “gin ducu ma tye maber, dok atir, ki me ada.” (Ep. 5:8-12) I nge meno, Paulo otiyo ki lapor aryo ma gical me lok i kom jo ma pe gibibwot i nino pa Jehovah.

6. I yo ma nining ma pol pa dano gunino woko? (1 Jo Tecalonika 5:6, 7)

⁶ “Jo ma nino.” (Kwan 1 Jo Tecalonika 5:6, 7.) Paulo oporo jo ma pe gibibwot i nino pa Jehovah ki jo ma gitye ka nino. Pe gingeyo gin ma tye ka timme i ka ngetgi ki kit ma cawa woto kwede. Pi meno, pe gingeyo ka gin mo ma pire tek tye ka timme dok pe gidok iye. Pol pa dano ma i kare-ni, gunino woko i yo me cwiny. (Rom. 11:8) Pe giparo lanyut ma nyuto ni watye ka kwo “i kare me agikki” dok ni twon can madit atika-ni bicakke cokcok-ki. Ka alokaloka madongo otimme i lobo-ni, jo mogo gibedo ki miti i kwenawa madok i kom Ker-ri. Kadi bed kit meno, polgi gidok woko cen ka nino me ka bedo ma wanggi twolo. Kadi wa jo mogo ma giye ni nino me ngolo kop bibino, gitamo ni karene pud bor ata. (2 Pet. 3:3, 4) Ento, wan waniang ni pire tye ka doko tek botwa nino ducu me medde ki bedo ma wangwa twolo.

7. I yo ma nining ma jo ma Lubanga bijwerogi gitye calo lumero?

⁷ “Jo ma mer ki kongo.” Lakwena Paulo oporo jo ma Lubanga bijwerogi ki lumero. Jo ma gumer gigalle ki dok i kom gin ma tye ka timme i ka ngetgi, dok gimoko tam maraco. I yo acel-lu, jo maraco pe gidok i kom kwena me ciko dano ma Lubanga cwalo. Giyero yo me kwo ma biterogi i to. Ento kiciko Lukricitayo ni omyero gubed ma gigwokke, dok ma wigi kwiri. (1 Tec. 5:6) Lacoc mo ma okwano Baibul i yo matut owaco ni ngat ma pe omer bedo ma wiye opye mot dok kome pe myel. En twero bedo ki neno ma atir ma weko moko tam ma atir. Pingo omyero wabed ma wiwa opye mot dok ma komwa pe myel? Wek pe warwak wiwa i tim me wibye nyo dorre mogo me jemo ma timme i lobo-ni. Lyeto ma kibiketo i komwa me donyo i jami magi bimedde ameda ka nino pa Jehovah woto ki nyiko cok. Kadi bed kit meno, pe mitte ni wabed ki par i kom kit ma wabidok kwede iye. Cwiny maleng pa Lubanga twero konyowa me bedo ma wiwa opye mot ki me moko tam me ryeko.—Luka 12:11, 12.

8. Lapor mene ma kitiyo kwede i 1 Jo Tecalonika 5:8 me nyuto kit mogo ma mitte wek wabed ma wangwa twolo kun wagwokke? (Nen bene cal.)

⁸ “Waruku . . . nyonyo me gengo korwa, waruku bene . . . tok wiwa me lweny.” Paulo oporowa ki lumony ma guyubbe maber dok gurukke pi lweny. (Kwan 1 Jo Tecalonika 5:8.) Dano gigeno ni lamony myero obed atera me lweny i cawa mo keken ka lweny ocakke. Tye marom aroma kwedwa. Wabedo ma wayubbe pi nino pa Jehovah ki ruko nyonyo me gengo korwa, ma cung pi niye ki mar, kacel ki otok nyonyo, ma cung pi gen. Kit magi gitwero konyowa adada.

9. Niyewa gwokowa nining?

⁹ Nyonyo me gengo kor onongo gwoko adunu pa lamony. Niye ki mar gwoko cwinywa. Gikonyowa me medde ki tic pi Lubanga kacel ki lubo kor Yecu. Niye konyowa me moko ni Jehovah biminiwa bakacic ka wayenye ki cwinywa ducu. (Ibru 11:6) Man bitugo cwinywa me bedo lugen bot Latelawa, Yecu, kadi bed mitte ni wakany kwo matek. Watwero  jingo niyewa wek wabed ki teko me kanyo kwo ka wamedde ki nongo pwony ki bot Lukricitayo ma i kare-ni ma gugwoko gennegi kadi bed gukato ki i aunauna nyo can lim. Dok watwero gwokke ki i owic me maro lim ka walubo lanen pa jo ma gudwoko rwom me kwogi lapiny wek gubed ki kare me keto pi Ker-ri mukwongo i kwogi. b

10. Mar pi Lubanga ki pi dano luwotwa konyowa nining me diyo cwinywa i tito kwena?

¹⁰ Mar bene mitte adada wek wabed ma wangwa twolo kun wagwokke. (Mat. 22:37-39) Mar pi Lubanga konyowa me diyo cwinywa i tic me tito kwena kadi bed timo man twero kelo ayela i komwa. (2 Tem. 1:7, 8) Kit macalo wanyuto mar kadiwa bot jo ma pe gitiyo pi Jehovah, wamedde ki tito kwena i wang ticwa kun bene wamiyo caden ki cim kacel ki coyo waraga. Wamedde ki bedo ki gen ni nino mo dano giromo lokke ci gicako timo gin ma atir.—Ejek. 18:27, 28.

11. I yo ma nining ma mar pi omegiwa ki lumegiwa konyowa? (1 Jo Tecalonika 5:11)

¹¹ Marwa pi luwotwa kwako maro Lukricitayo luwotwa. Wanyuto mar meno ki ‘cuko cwinywa kekenwa, dok wakonnye bene kekenwa wek wadong i cwinywa.’ (Kwan 1 Jo Tecalonika 5:11.) Calo lumony ma gitye ka lweny cok ki luwotgi, wacuko cwiny luwotwa. Ki lok ada, lamony cinge twero cer ci wano lamony lawote i dog lweny, ento nongo pe otimo akaka. I yo acel-lu, wan bene pe wacwero cwiny omegiwa ki lumegiwa akaka dok pe waculo wang gin marac ki gin marac. (1 Tec. 5:13, 15) Wanyuto bene marwa ki woro omege ma gidoro kacokke. (1 Tec. 5:12) I kare ma Paulo ocoyo waraga man, onongo kacokke me Tecalonika pud pe orii ma romo mwaka acel. Luelda ma iye onongo nen calo ngecgi pud nok dok pe gitimo jami mogo i yo mupore. Kadi bed kit meno, onongo gupore me awora. Ka twon can madit atika-ni woto ki nyiko cok, twero mitte ni wajenge i kom luelda me kacokkewa pi tira ma loyo i kare-ni. I kare meno, oromo doko tek adada me nongo tira ki i gang  kalwa madit kacel ki i jang gang kal; dong pi meno, pire tek adada ni wapwonnye me maro ki woro lueldawa i kare-ni. Kadi bed gin ango otimme, omyero wagwokke kun pe waketo cwinywa i kom goro pa luelda, ento wiwa opo ni Jehovah tye ka tic ki Yecu Kricito me tiro co ma lugen magi.

12. Genwa gwoko tamwa nining?

¹² Kit macalo otok nyonyo gwoko wi lamony, genwa me larre gwoko tamwa. Ka genwa tye matek, waniang ni jami ma lobo-ni miyo konygi pe. (Pil. 3:8) Genwa konyowa me bedo ma wiwa opye mot. Meno aye gin ma otimme i kom Omego Wallace ki dakone Laurinda, ma gitiyo macalo Lubetel i Afrika. I kine me cabit adek keken, Laurinda orwenyo mine dok Wallace orwenyo wonne i to. Pi two Korona, onongo pe gitwero dok gang ka kweyo cwiny lupacogi i nge to pa lunywalgi magi. Wallace ocoyo ni: “Genna me nicer konya me tamo pigi, pe kit ma onongo gitye kwede i ninogi me agikki i lobo-ni, ento kit ma gibibedo kwede i ninogi mukwongo i lobo manyen. Gen man weko abedo ma wiya opye mot ka atye ka yelle ki cwercwiny nyo arem me cola.”

13. Gin ango ma watwero timo me nongo cwiny maleng?

¹³ “Pe wugeng cwiny maleng me tiyo tic i iwu.” (1 Tec. 5:19) Paulo owaco ni cwiny maleng tye ka tic i iwa. Ka pe wagengo ticce, ci wabibedo ki mit kom pi timo gin ma atir kacel ki kero me tic pi Jehovah. (Rom. 12:11) Ngo ma watwero timo me nongo cwiny maleng? Watwero lega pire, kwano Lok pa Lubanga, ki dong nywako i tic ma i dul pa Jehovah. Timo meno bikonyowa me dongo “nyig ma nyak pi cwiny maleng.”—Gal. 5:22, 23.

14. Ngo ma omyero wagwokke kwede wek wamedde ki nongo cwiny pa Lubanga? (Nen bene cal.)

¹⁴ Ka dong Lubanga ominiwa cwiny mere maleng, omyero wagwokke adada wek ‘pe wageng cwiny maleng me tiyo tic i iwa.’ Lubanga miyo cwiny mere maleng bot jo ma gigwokke me bedo ki tam kacel ki kit maleng. En pe bimedde ki miniwa cwiny mere maleng ka wabedo ka tamo pi jami macilo kun watimogi.  (1 Tec. 4:7, 8) Me medde ki nongo cwiny maleng, omyero bene ‘pe waca lok ma Lubanga miyo bot dano me atita.’ (1 Tec. 5:20) I tyeng man, “lok ma Lubanga miyo bot dano me atita” obedo kwena ma Jehovah miyo kun tiyo ki cwiny mere maleng, calo kwena ma kwako nino pa Jehovah ki kit ma kare dong odic woko. Pe watamo ni nino pa Jehovah nyo Armagedon pe bitimme i karewa-ni. Me ka meno, wanyuto ni watye ka kuro nino meno dok ni bibino cokcok-ki ka wamedde ki “kit kwo maleng ki me woro Lubanga” nino ducu.—2 Pet. 3:11, 12.

15. Watwero gwokke nining wek ngec ma pe tye kakare ki goba pa cen maraco pe obwolwa? (1 Jo Tecalonika 5:21)

¹⁵ I anyim macok cok-ki, lumone pa Lubanga gibimiyo lok angeya ni: “Kuc tye, piny okwe mot!” (1 Tec. 5:3) Lok goba ma cen maraco aye tye i ngeye biromo wi lobo ducu kun bwolo pol pa dano. (Yabo 16:13, 14) Ento wan kono? Pe kibibwolowa ka ‘wabedo ki wang mabit me neno [nyo temo] jami ducu.’ (Kwan 1 Jo Tecalonika 5:21.) Nyig lok me leb Grik ma kigonyo ni “wubed ki wang mabit me neno,” onongo kitiyo kwede me tito kit ma dano temo kwede nyonyo calo jabu nyo ryal me moko ni pe kirubo ki nyonyo mukene. Pi meno, mitte ni watem gin ma wawinyo nyo ma wakwano me moko ka tye lok ada. Meno onongo pire tek pi Lukricitayo me Tecalonika, dok pire bibedo tek ma loyo piwa ka wawoto ki nyikke cok ki twon can madit atika-ni. Me ka ye jami ducu ma dano waco latowang, watiyo ki niangowa me poro gin ma wakwano nyo ma wawinyo ki gin ma Baibul nyo dul pa Jehovah waco. Ka watimo meno, ci lok goba nyo diro pa cen maraco pe bibwolowa.—Car. 14:15; 1 Tem. 4:1.

16. Gen ma kome ango ma watye kwede, dok ngo ma omyero wamoku tamwa me timone?

¹⁶ Macalo gurup, jo pa Jehovah gibibwot ki i twon can madit atika-ni. Ento wan ducu ki acel acel pe wangeyo gin ma bitimme i komwa diki. (Yak. 4:14) Kadi bed kit meno, kadi wakat ki i twon can madit atika ma wakwo nyo wato woko ma pudi, Lubanga biminiwa mot me kwo ma pe tum ka wamedde ki bedo lugen. Jo ma kiwirogi gibibedo ki Kricito i polo. Romi mukene-ni gibibedo i paradic i lobo kany. Walego ni wan ducu waket cwinywa i kom genwa mamwonya-ni dok wabed ma wayubbe pi nino pa Jehovah!