Baibul pe tittiwa pingo. Ento miniwa ngec mogo ma twero tito pingo gumoko tamgi me medde ki bedo i Beterekem ma i Judaya pi kare meno me ka dok cen i Najaret.

Lamalaika onongo otito ki Maliam ni en bigamo ic ci nywalo latin. I kare ma lamalaika ominigi kwena-ni, Maliam ki Yucepu onongo gibedo i Najaret, boma mo ma i Galilaya. (Luka 1:26-31; 2:4) Lacen i kare ma gudwogo ki i Ejipt, gudok cen i Najaret. Yecu odongo kunu ci odoko Lanajaret. (Mat. 2:19-23) Meno aye tyen lok mumiyo watamo i kom Najaret ka walwongo nying Yecu, Yucepu, ki Maliam.

Maliam onongo tye ki watte ma nyinge Elicabet ma bedo i Judaya. Elicabet onongo obedo dako pa lalamdog ma nyinge Jekaria dok lacen odoko min Jon Labatija. (Luka 1:5, 9, 13, 36) Maliam olimo Elicabet dok obedo bote pi dwe ma romo adek i Judaya. I ngeye, Maliam odok cen i Najaret. (Luka 1:39, 40, 56) Meno aye gin ma omiyo Maliam onongo ngeyo kabedo meno maber.

Lacen, Yucepu oa woko ki i Najaret ci ocito i Beterekem pien Luroma gumiyo cik ni dano ducu gucit “ka cone, ngat acel acel i ganggi.” Beterekem onongo bene obedo kabedo ka ma kibinywalo iye Meciya ma lubbe ki lok pa lunebi. (Luka 2:3, 4; 1 Cam. 17:15; 20:6; Mika 5:2) I kare ma Maliam onywalo Yecu kunu, Yucepu pe oweko Maliam owoto wot mabor me dok cen i Najaret ki latin lakere. Gin gubedo i Beterekem, ma borre onongo romo kilomita abongwen (nyo mairo 6) ki i Jerucalem. Onongo bibedo yot pi gin me tero latin lakere man i ot pa Lubanga ki me miyo gityer ma rwatte ki Cik.—Levi 12:2, 6-8; Luka 2:22-24.

Lamalaika pa Lubanga onongo otito con bot Maliam ni wode bibedo i wi “komker pa kwarone Daudi” dok ‘biloc macalo Kabaka.’ Twero bedo ni Yucepu ki Maliam guniang kit ma pire tek kwede ni kinywal Yecu i gang pa Daudi. (Luka 1:32, 33; 2:11, 17) Oromo bedo ni gunongo ni tye me ryeko me bedo kunu kun gikuro tira mukene ki bot Lubanga.

Pe wangeyo kare ma rom mene ma onongo dong gutero i Beterekem i kare ma luryeko mogo adek gucito ka limogi. Ento kadi bed kit meno, lupaco man onongo dong gibedo i ot dok wodgi onongo dong tye “latin,” ento pe lakere. (Mat. 2:11) Nen calo me ka dok cen i Najaret, gin gumoko tamgi me bedo i Beterekem pi kare mo, dok Beterekem odoko pacogi.

Kerode omiyo rukca ni kinek “litino co woko ducu ki i Beterekem . . . cakke ki i kom litino me mwaka aryo dok kwede piny.” (Mat. 2:16) Lamalaika ociko Yucepu madok i kom lok man, pi meno, Yucepu ki Maliam guringo woko i Ejipt dok gubedo kunu nio wa i kare ma Kerode oto. Lacen, Yucepu otero jo gange i Najaret. Pingo pe gudok cen i Beterekem? Pien i kare meno, wod pa Kerode ma nyinge Arkelao onongo tye ka loc i Judaya dok obedo laco mager. Medo i kom meno, lamalaika dok ociko Yucepu pe me dok cen kunu. Ki i Najaret, Yucepu onongo twero pwonyo Yecu me doko lawor Lubanga me ada.—Mat. 2:19-22; 13:55; Luka 2:39, 52.

Nen calo Yucepu oto ma peya Yecu oyabo yo pi dano me cito i polo. Pi meno, Yucepu nen calo bibedo i kin jo ma kibicerogi i lobo. Jo mapol birwatte kwede dok gibipwonyo jami mapol ki bote madok i kom tyen lok mumiyo en kacel ki Maliam gumedde ki bedo i Beterekem i nge nywalo Yecu.