1-2. Calo Lot, ariya ango ma Lukricitayo gikemme kwede i kare-ni?

 KA WANENO tim me carocaro ma onya i kin dano i kare-ni, wawinyo kit ma Lot, laco ma kite atir-ri, onongo winyo kwede. En “yam cwinye ocwer twatwal pi tim kwele pa jo maraco,” pien onongo ngeyo ni Wonwa me polo dag tim maraco. (2 Pet. 2:7, 8) Kit macalo Lot onongo lworo dok maro Lubanga matek, en okwero lajwac tim me tarwang pa jo ma gurumo ka ngete. Wan bene i kare-ni dano ma gurumowa pe gitye ki woro pi rwom me kwo ma atir pa Jehovah. Kadi bed kit meno, pud watwero medde ki bedo ki kwo maleng ka wagwoko marwa pi Lubanga dok wadongo woro matut pire.—Car. 14:2.

² Jehovah konyowa me timo meno ki miniwa cuko cwiny ma wanongo i buk me Carolok. Lukricitayo ducu, co ki mon, jo matino wa ki jo muteggi, gitwero nongo adwogi maber ki i tira me ryeko ma nonge iye.

3. Tyen lok ango ma Carolok 17:3 miyo botwa me gwoko cwinywa? (Nen bene cal.)

³ Tyen lok acel ma pire tek mumiyo omyero wagwok cwinywa aye ni Jehovah ngiyo cwinywa. Man tyen lokke ni en neno gin ma jo mukene pe gitwero neno dok ngeyo ngat ma wabedo ki i iwa. (Kwan Carolok 17:3.) En bimarowa ka wabedo ka tamo pi tirane, ma twero weko wanongo kwo ma pe tum. (Jon 4:14) Ka watimo meno, ci tim carocaro ki goba pa  Catan kacel ki jo maraco ma i lobone pe bidoro kwowa. (1 Jon 5:18, 19) Ka wanyikke cok ki Jehovah, marwa ki worowa pire bidongo. Pien pe wamito cwero cwiny Wonwa, wabikwero kadiwa tam ma terowa i timo bal. Ka wakemme ki atematema, wabipennye ni, ‘Atwero cwero cwiny Ngat ma onyuta mar madit kit man nining?’—1 Jon 4:9, 10.

4. Lworo Jehovah okonyo laminwa mo me loyo atematema me timo bal nining?

⁴ Laminwa mo i lobo Croatia ma nyinge Marta, ma okemme ki atematema me donyo i tim tarwang, ocoyo ni: “Anongo ni tek adada me tam i yo ma atir ki me lweny ki miti me nongo yomcwiny me bal ma rii pi kare manok keken. Ento lworo ma atye kwede i kom Jehovah ogwoka.” b Lworo Lubanga okonye me timo meno nining? Marta owaco ni elwodo adwogi maraco ma bibino ka edonyo i tim me tarwang. Wan bene watwero timo meno. Adwogi marac loyo aye ni wabicwero cwiny Jehovah dok pe wabibedo ki kare me wore pi naka.—Acak. 6:5, 6.

5. Pwony ango ma inongo ki i gin mutimme i kom Leo?

⁵ Ka walworo Jehovah, wabigwokke pe me mako lurem ki jo ma gitimo jami maraco. Ominwa Leo, ma bedo i Democratic Republic of the Congo, oniang pwony meno. Mwaka angwen i nge batijane, en ocako mako lirem ki jo maraco. En otamo ni meno pe rac teke en kikome aye pe etye ka timo jami magi. Ento, ma pe otero kare, lureme maraco-ni guweko en ocako mato kongo wa i labyel kweri kacel ki donyo i tim tarwang. Ci en ocako tam i kom jami ma lunywalle ma Lukricitayo gupwonye ki kit ma yam cwinye yom kwede i kare ma etiyo pi Jehovah. Adwogine obedo nining? En ocako tam i yo  ma atir odoco. Ki kony pa luelda, en odwogo cen bot Jehovah. I kare-ni, en tye ki yomcwiny me tic macalo laelda ki lapainia keken.

6. Lapor i kom “mon” aryo mene ma wabinyamo kombeddi?

⁶ Kong dong wanyamu Carolok cura 9, ka ma wakwano lok i kom mon aryo. Dako acel cung pi ryeko ki mukene cung pi mingo. c Wi myero opo ni jo me lobo pa Catan-ni gimaro tim tarwang kacel ki neno cal macilo. (Ep. 4:19) Pi meno, pire tek adada ni wamedde ki dongo kit me lworo Lubanga kun wakwero timo gin marac. (Car. 16:6) Dong, wan ducu, kadi wabedo co nyo mon, watwero nongo adwogi maber ki i pwony ma tye i cura man. Kitito ni mon aryo-ni ducu gitye ka lwongo ngat ma ngecce nok—nyo “ngat ma wiye oding.” Bedo calo ngat acel acel i kingi tye ka waco ni, ‘Bin i oda ka cam.’ (Car. 9:1, 5, 6, 13, 16, 17) Ento gin ma timme i kom jo ma gidonyo ka cam i odi aryo magi pat adada.

7. Ma lubbe ki Carolok 9:13-18, gin ango ma timme i kom jo ma giye lwongo pa dako ma laming? (Nen bene cal.)

⁷ Kong wakwanu lwongo ma a ki bot “dako ma laming.” (Kwan Carolok 9:13-18.) Ki tek wic, en lwongo jo ma ngecgi nok ni, ‘Wulokke wubin kany ka cam.’ Gin ango ma timme i kom welene? “Jo ducu ma gicito bot dako-nu gito woko.” Iromo po i kom lapor mukene marom aroma ma kitiyo kwede con i buk me Carolok? Kicikowa i kom “dako ma lakwele.” Kiwacciwa ni: “Ka idonyo i ode ilwiny piny i to.” (Car. 2:11-19) Carolok 5:3-10 dok cikowa i kom “dako ma lakwele” mukene ma tyene “biteri wa i lyel.”

8. Tam ango ma omyero wamoki?

⁸ Jo ma giwinyo lwongo pa “dako ma laming” myero gumok tamgi: Tika gibijolo lwongone nyo gibikwero woko? Twero mitte ni wan bene wamok tam ma kit meno. Ngo ma wabitimo ka ngat mo tye ka bitowa me donyo i tim carocaro, nyo waneno cal macilo atura i Intanet nyo ka mukene?

9-10. Tit kong tyen lok mogo mumiyo omyero wakwer tim tarwang.

⁹ Watye ki tyen lok mabeco me kwero tim tarwang. Kiwaco ni “dako ma laming” tye ka lwongo ni: “Pii akwala lim matek.” “Pii akwala” obedo ngo? Baibul poro tim me buto i kin jo munyomme ki pii ma i wang it mamit. (Car. 5:15-18) Laco ki dako ma gunyomme i te cik gitye agonya me nongo mit  pa tim me buto. Ento, man pat adada ki “pii akwala.” Meno nen calo tye ka lok i kom tim me buto ma pe opore, nyo tim tarwang. Man pol kare timme i mung, kit macalo lakwo bene kwalo jami i mung. “Pii akwala” romo nen calo gin ma lim matek ka jo ma gitye ka matone gitamo ni ngat mo pe bingeyo timgi marac-ci. Ento nongo gitye ka bwolle kekengi pien Jehovah neno jami ducu! Ka warwenyo cwak pa Jehovah, meno aye gin makec nyo marac loyo, dong pe tye gin mo ma “lim” iye. (1 Kor. 6:9, 10) Ento lokke pe gik kany.   

¹⁰ Tim tarwang twero kelo lewic, yaco ma pe kiyubbe pire, keto kin jo me odi dok weko iwinyo calo konyi pe. Nen ka maleng ni, wanyuto ryeko ka wakwero donyo i “ot” pa dako ma laming kacel ki camo kwonne. Medo i kom rwenyo watgi ki Jehovah, pol pa dano ma gidonyo i tim tarwang ginongo two ma weko gito oyotoyot. (Car. 7:23, 26) Tyeng 18 me cura 9 gik kit man: “Jo ma gucito bot dako-nu ducu guto giyikogi i lyel.” Dong, pingo jo mapol gijolo lwongone ma terogi i can malit-ti?—Car. 9:13-18.   

11. Pingo neno cal me lewic obedo gin marac adada?

¹¹ Owic acel ma mitte ni wagwokke kwede obedo neno cal macilo me lewic. Jo mukene gitamo ni meno pe rac. Ento neno cal me lewic kelo adwogi marac i kom dano, weko girwenyo woro i komgi kekengi, pe gibedo ki woro i kom jo mukene, dok obedo gin ma jukone tek adada. Ka dano gibedo ka neno cal macilo, jwayone ki i tamgi tek adada. Medo i kom meno, neno cal macilo pe konyo me neko miti maraco; ento buko mac iye matek. (Kol. 3:5; Yak. 1:14, 15) Ada, pol pa dano ma gineno cal macilo i agikkine gitimo tim tarwang.

12. Wanyuto nining ni watye ka gwokke ki neno cal ma tugo miti maraco me buto i cwinywa?

¹² Ngo ma omyero wan macalo Lukricitayo watim ka cal macilo opye atura i wang cimwa nyo i kompiutawa? Omyero waruc cal man cutcut. Bibedo yot piwa me timo meno ka wiwa opo ni gin ma pire tek loyo ma watye kwede aye obedo watwa ki Jehovah. Ki lok ada, kadi wa cal mogo ma pe nen calo rac bene twero tugo miti maraco me buto i cwinywa. Pingo mitte ni wakwergi lajwac? Pien pe wamito cako wot i yo ma biterowa i timo tim tarwang kadi ki i cwinywa. (Mat. 5:28, 29) Laelda mo i lobo Thailand ma nyinge David owaco ni: “Apennye kekena ni: ‘Kadi bed cal magi pe cal macilo, tika cwiny Jehovah bibedo yom ka amedde ki nenogi?’ Tam i yo meno konya me lubo yo me ryeko.”

13. Gin ango ma bikonyowa me lubo yo me ryeko?

¹³ Ka walworo timo gin mo keken ma cwero cwiny Jehovah, man bikonyowa me lubo yo me ryeko. Lworo Lubanga aye ‘acakki’ nyo te guti me “ryeko.” (Car. 9:10) Waneno man i acakki me Carolok cura 9, ka ma kiporo ‘ryeko me ada’ ki dako mukene.

14. Lwongo mapat ango ma wanongo i Carolok 9:1-6?

¹⁴ Kwan Carolok 9:1-6. Ki kany, wakwano lwongo ma a ki bot Jehovah, Lacwecwa ki te guti me ryeko ducu. (Car. 2:6; Rom. 16:27) Lapor ma kitiyo kwede kany loko i kom ot madit ma tye ki wir abiro. Man nyuto ni Jehovah cinge yot dok jolo jo ducu ma gimito nongo pwonnye ki bote wek gidok ryek.   

15. Gin ango ma Lubanga lwongowa me timone?

¹⁵ Ki i lapor pa dako ma cung pi ‘ryeko me ada,’ wapwonyo ni Jehovah cinge yot dok  miniwa jami mabeco mapol. Tyeng magi tito ni dako man olwongo welle me bino ka cam i ode, oneko lee pi karama, dok oonyo kongo vinone. (Car. 9:2) d Medo i kom meno, tyeng me 4 ki 5 tito ni: “Bot ngat ma wiye oding en [ryeko] wacci: ‘Bin icam kwonna.’” Pingo omyero wajol lwongo ma a ki bot dako-ni? Jehovah mito ni lutinone gubed ryek dok maber. En pe mito ni watim jami ma biwanowa. Meno aye tyen lok mumiyo “en kano ryeko maber twatwal pi jo ma cwinygi atir.” (Car. 2:7) Ka walworo Jehovah, ci wabibedo ki miti me yomo cwinye. Wawinyo tirane me ryeko, dok cwinywa bedo yom me ketone i tic.—Yak. 1:25.

16. Lworo Lubanga okonyo Alain nining me moko tam me ryeko, dok adwogine obedo nining?

¹⁶ Nen kong kit ma bedo ki lworo mupore i kom Lubanga okonyo kwede Alain me moko tam me ryeko. Alain obedo laelda i kacokke dok tye lapwony i cukul. En owaco ni, “Pol pa lupwonye luwota onongo gitero filim ma nyuto cal macilo ni obedo yo me nongo pwonnye madok i kom tim me buto.” Ento Alain onongo ngeyo ni man pe obedo lok ada. En owaco ni: “Pien amaro dok aworo Jehovah, akwero neno filim magi lajwac. Atito bene bot lupwonye luwota tyen lok mumiyo akwero meno.” En onongo tye ka lubo tam ma a ki bot ‘ryeko me ada’ me ‘bedo ki niang matut.’ (Car. 9:6) Lok man ogudo cwiny lupwonye mogo matek mumiyo dong i kare-ni gitye ka kwano Baibul ki wire i cokke bene.

17-18. Mot ango ma jo ma gijolo lwongo pa ‘ryeko me ada’ gitye ka nongone, dok ngo ma gitye ka kurone i anyim? (Nen bene cal.)

¹⁷ Jehovah otiyo ki lapor madok i kom mon aryo-ni me nyutiwa kit ma watwero bedo kwede ki anyim ma opong ki yomcwiny. Jo ma gijolo lwongo pa “dako ma laming” giyelle me nongo yomcwiny ki i tim tarwang. Ki lok ada, pe giniang ni gin ma gitye ka timo kombeddi bigudo anyimgi. I agikkine, ‘gibito giyikogi i lyel.’—Car. 9:13, 17, 18.   

¹⁸ Jo ma gijolo lwongo ma a ki bot dako ma cung pi ‘ryeko me ada’ gibibedo ki anyim mapat! I kare-ni, wellene cwinygi yom pien gitye ka camo kwai cam me cwiny mapatpat ma kiyubo maber adada. (Ic. 65:13) Jehovah otiyo ki lanebi Icaya me waco ni: “Wucik itwu atika i lokka, ci wucam cam maber, dok wubed ki yomcwiny pi cam ma miyu ma amiyowu.” (Ic. 55:1, 2) Watye ka pwonnye me maro gin ma Jehovah maro ki me kwero gin  ma en dag. (Jab. 97:10) Dok watye ki yomcwiny pien watwero lwongo jo mukene me nongo pwony ki bot ‘ryeko me ada.’ Watye calo lutic ma gitye “ka lwongo dano ki i kabedo ma tye malo twatwal ma i gang madit, kun giwacci: Wubin kany, wun luming.’” Mot ma wan kacel ki jo ma gijolo lwongowa ginongo pe gik i kare-ni. Mot magi rii pi naka, pien ‘wabibedo kwo’ pi naka ka wamedde ki ‘bedo ki niang matut.’—Car. 9:3, 4, 6.

19. Ma lubbe ki Latitlok 12:13, 14, ngo ma omyero wamok tamwa me timone? (Nen bene bok ma wiye tye ni “ Lworo Lubanga Konyowa.”)

¹⁹ Kwan Latitlok 12:13, 14. Dong walego ni lworo Lubanga omedde ki gwoko cwinywa dok okonywa me bedo jo maleng i kitwa kun wabedo cok ki Lubanga i kare man me agikki ma piny rac-ci. Wabimedde ki lwongo jo mapol kit ma watwero me yenyo ‘ryeko me ada’ ki me nongo pwony ki bote pien wamaro dok waworo Jehovah ki cwinywa ducu.