1-2. Ma lubbe ki Jabuli 25:14, ngo ma omyero watim ka wamito bedo ki wat macok ki Jehovah?

 KIT mene ma itamo ni pigi tek ka imito bedo ki wat macok ki ngat mo? Itwero gamo ni lurem mabeco myero gumarre dok gukonye i kingi. Oromo bedo ni pe itamo ni lworo obedo kit ma pire tek pi lurem mabeco. Ento, kit ma ginacoya ma pwony man jenge iye nyuto kwede, jo ma gimito bedo lurem Jehovah myero ‘gulwore.’—Kwan Jabuli 25:14.

² Kadi bed dong watiyo pi Jehovah pi mwaki mapol nyo manok, mitte ni wan ducu wabed ki woro matut pi Jehovah. Ento tyen lokke ngo me lworo Lubanga? Watwero pwonnye me lworo Jehovah nining? Dok gin ango ma watwero pwonyo madok i kom lworo Lubanga ki bot Obadia, Lalamdog Madit Yekoyada, ki Kabaka Yoaci?

3. Tit kong kit ma lworo twero gwokowa kwede.

³ Watwero bedo ki lworo ka watamo ni gin mo biwanowa. Kodi lworo meno ber pien konyowa me moko tam mabeco. Bedo ki lworo ni wabipoto weko wagwokke ki wot cok tutwal ki teng bur matut. Bedo ki lworo ni wabinongo awano weko waringo woko ki i gin ma keto kwowa ka mading. Ka walworo balo watwa ki ngat ma wamaro, man gengowa ki waco nyo timo gin mo ma pe nyuto kica.

4. Kodi lworo mene ma Catan mito ni wabed kwede i kom Jehovah?

 ⁴ Catan mito ni dano gubed ki lworo marac ma pe opore i kom Jehovah. Catan mito ni wabed ki tam calo pa Erifaji—ni Jehovah obedo Lubanga ma tye ki akemo cawa ducu dok mito miniwa pwod, dok pe watwero yomo cwinye kulu. (Yubu 4:18, 19) Catan mito ni wabed ki lworo mukato kare woko i kom Jehovah ma weko wajuko tic Pire woko. Me gwokke ki i owic man, myero wapwonnye me woro Jehovah kun nongo walworo cwero cwinye.

5. Tyen lokke ngo me lworo Lubanga?

⁵ Ngat ma tye ki woro matut pi Lubanga nongo marre dok pe mito timo gin mo keken ma twero balo watte kwede. Yecu onongo “lworo lubanga” kit meno. (Ibru 5:7, NWT) Cwinye obedo yom me lworo Jehovah. (Ic. 11:2, 3) En onongo tye ki mar matut pire dok mito bedo lawiny bote. (Jon 14:21, 31) Calo Yecu, wan bene watye ki woro matut pi Jehovah pien en lamar, ryek, ngolo kop atir, dok tek. Wangeyo bene ni Jehovah marowa matek dok kit ma wadok kwede i tirane gude. Ka wabedo lujemo, wacwero cwiny Jehovah, ento ka wabedo luwiny, wayomo cwinye.—Jab. 78:41; Car. 27:11.

6. Tit kong yo acel ma watwero pwonnye kwede me lworo Lubanga. (Carolok 2:5)

⁶ Pe kinywalowa ma walworo Jehovah; mitte ni wadong kit man adonga. (Kwan Carolok 2:5.) Yo acel ma watwero timo kwede meno aye ki ngiyo cwec. Ka wawoto ki neno ryeko pa Lubanga, tekone, ki marre piwa “i jami ducu ma en otiyo,” ci marwa kacel ki worowa pire bimedde. (Rom. 1:20) Laminwa mo ma nyinge Adrienne owaco ni, “Ka aneno jami ducu ma Jehovah ocweyo dok aneno kit ma en ryek kwede, man weko abedo ki ur dok konya me niang ni en mito gin maber loyo pira.” Lwodo lok man oweko en owaco ni, “Pe amito timo gin mo keken ma twero balo watta ki Jehovah, ngat ma omina kwo.” Pingo pe ikwany kare mo i cabit man me tam i kom gin mo ma Jehovah ocweyo? Timo meno bidongo marri ki woroni pi Jehovah.—Jab. 111:2, 3.

7. Lega twero konyowa nining me dongo lworo mupore pi Jehovah?

⁷ Yo mukene ma waromo dongo kwede kit me lworo Lubanga aye ki lega kare ki kare. Kare ducu ka walego bot Jehovah, man konyowa me ngeye maber. Kare ducu ka wapenye pi teko me ciro peko, poyo wiwa pi tekone me aura. Ka wapwoye pi mic me ginkok pa Wode, wapoyo wiwa i kom mar matut pa Jehovah piwa. Dok ka wabako dogwa bot Jehovah ni okonywa ki peko mo, wiwa po ni en ryek adada. Lega ma kit meno konyowa me dongo woro matut pi Jehovah. Dok jingo mitiwa me gwokke ki timo gin mo keken ma twero balo watwa kwede.

8. Gin ango ma watwero timone wek wamedde ki lworo Lubanga?

⁸ Watwero medde ki lworo Lubanga ka wakwano Baibul ki miti me nongo pwony ki i lanen mabeco ki maraco ma tye iye. Kong dong wanyamu lapor pa lutic pa Jehovah aryo ma lugen: Obadia, ma obedo lalo jami ma i ot pa Kabaka Akab ki Lalamdog Madit Yekoyada. I nge meno, wabineno gin ma watwero pwonyo ki bot Kabaka Yoaci me Juda, ma obedo lagen i acakkine ci lacen oweko Jehovah woko.

9. Bedo ki lworo pi Jehovah okonyo Obadia nining? (1 Luker 18:3, 12)

⁹ Tyen mukwongo ma Baibul oloko kwede  i kom Obadia, b otito ni: ‘Obadia onongo lworo Jehovah matek tutwal.’ (Kwan 1 Luker 18:3, 12.) Lworo ma kit man okonyo Obadia nining? Me acel, okonye me bedo ngat ma genne; pi meno, kabaka okete me bedo ngat ma loyo gang kal. (Por ki Nekemia 7:2.) Lworo ma Obadia obedo kwede i kom Lubanga bene omine tekcwiny—ma meno kit ma onongo mitte adada bote. En okwo i kare me loc pa Kabaka Akab, ma “otiyo gin ma nen marac i wang Rwot [Jehovah] makato jo ma gutelo nyime ducu.” (1 Luker 16:30) Medo i kom meno, Jejebel, dako pa Akab ma onongo woro Baal, onongo dag Jehovah adada ma oweko en otemme me jwayo woro me ada woko ki i ker me kaka apar ma tung kumalo. En bene oneko lunebi mapol pa Jehovah. (1 Luker 18:4) Labongo akalakala mo, Obadia otiyo pi Jehovah i kare ma onongo kwo tek adada.

10. Obadia onyuto tekcwiny nining?

¹⁰ Obadia onyuto tekcwiny nining? I kare ma Jejebel ocako dwaro lunebi pa Lubanga me aneka, Obadia okano lunebi 100 i boro ‘kun opoko kingi pyerabic pyerabic, ci obedo ka miyogi kwon ki pii-gu.’ (1 Luker 18:13, 14) Ka onongo Jejebel oniang gin ma Obadia otimo, kono onongo oneke woko. Ngene kene ni, Obadia obedo ki lworo, dok onongo pe mito to. Ento Obadia onongo maro Jehovah kacel ki jo ma tiyo Pire ma loyo kwone kikome.

11. I yo ma nining ma lutic pa Jehovah ma i kare-ni gitye calo Obadia? (Nen bene cal.)

¹¹ I kare-ni, lutic pa Jehovah mapol gikwo i lobe ka ma kiketo kigeng i kom ticwa. Calo Obadia, omege ki lumege magi pe gijuko tic pi Jehovah, kadi bed gimedde ki nyuto woro bot luloc. (Mat. 22:21) Ginyuto ni gilworo Lubanga ki bedo luwiny bote me kaka winyo dano. (Tic 5:29) Gitimo man ki medde ki tito kwena maber-ri kun bene gicokke kacel i mung. (Mat. 10:16, 28) Gitute me neno ni omege ki lumege gunongo jami ma mitte me medde ki bedo cok ki Jehovah. Nen kong labol pa omego Henri, ma bedo i lobo mo i Afrika ka ma onongo kiketo kigeng i kom ticwa  pi kare mo. I kare me kigeng meno, Henri odyere me poko bukkewa ma jenge i Baibul bot Lucaden luwote. En ocoyo ni: “Abedo ngat ma lalewic. Dong angeyo ada ni woro matut ma atye kwede pi Jehovah aye omina tekcwiny ma mitte me timo tic meno.” Tika itamo ni itwero bedo ki tekcwiny calo Henri? Itwero, ka idongo lworo mupore pi Lubanga.

12. I yo ma nining ma Lalamdog Madit Yekoyada ki dakone gunyuto ni gin lugen bot Jehovah?

¹² Lalamdog Madit Yekoyada onongo lworo Jehovah, dok lworo meno otugo cwinye me bedo lagen ki me cuko cwiny jo mukene me woro Jehovah. Man onen ka maleng i kare ma nya pa Jejebel ma nyinge Atalia, omayo ker i Juda. Dano onongo gitye ki tyen lok ma atir me lworo Atalia. En onongo ger adada dok laworo pi bedo daker mumiyo en otute me neko awobe pa kabaka ducu—kun gubedo likwayone kikome! (2 Tekwaro 22:10, 11) Latin acel i kin awobe pa kabaka—ma nyinge Yoaci—obwot pien Yekocabeat, dako pa Yekoyada, olare. En kacel ki cware gukano latin man dok gugwoke. I yo meno, Yekoyada ki Yekocabeat gukonyo me gwoko ngat mo ki i doggola pa Daudi ma onongo twero doko kabaka. Yekoyada onongo lagen bot Jehovah dok pe oweko lworo Atalia ogenge ki timo gin ma atir.—Car. 29:25.

13. I kare ma Yoaci onongo tye ki mwaka abiro, Yekoyada dok onyuto ni etye lagen nining?

¹³ I kare ma Yoaci onongo tye ki mwaka abiro, Yekoyada dok onyuto ni etye lagen bot Jehovah. En ogoyo pulan. Ka pulanne ocobbe kakare, Yoaci onongo bidoko kabaka, ma tye ki twero me leyo ker pa Daudi. Ento, ka yub meno pe ocobbe, onongo kibineko Yekoyada woko. Ki kony pa Jehovah, pulanne ocobbe kakare. Ki cwak pa ludito wi kaka kacel ki Lulevi, Yekoyada obedo ki kare me keto Yoaci macalo kabaka, dok oweko kineko Atalia woko. (2 Tekwaro 23:1-5, 11, 12, 15; 24:1) I nge meno, Yekoyada “ocako keto gicikke i kin Rwot [Jehovah] ki kabaka ki lwak, wek gubed lwak pa [Jehovah].” (2 Luker 11:17) Yekoyada bene “oketo lugwok doggola i doggola ot pa Rwot [Jehovah], wek dano mo ma kome ki keni pe odony iye.”—2 Tekwaro 23:19.

14. I yo ma nining ma kiketo deyo i kom Yekoyada pien en oketo deyo i kom Jehovah?

¹⁴ Jehovah onongo con otito ni: “Jo ma giketo deyo i koma an bene abiketo deyo i komgi.” Ki lok ada, en omiyo mot bot Yekoyada. (1 Cam. 2:30) Me labolle, en oweko kicoyo pi jami mabeco ma lalamdog madit man otimo wek wanong pwony ki iye. (Rom. 15:4) Dok i kare ma Yekoyada oto, kimine deyo ma kite dok pat me yikke “i gang kal pa Daudi i kin luker, pien en obedo ka tiyo tic maber i Icrael, kun tiyo pi Lubanga ki pi ot legane.”—2 Tekwaro 24:15, 16.

15. Ngo ma watwero pwonyo ki i lok madok i kom Yekoyada? (Nen bene cal.)

¹⁵ Lok madok i kom Yekoyada twero konyo wan ducu me dongo kit me lworo Lubanga. Luelda gitwero lubo lanen pa Yekoyada ki yenyo yo me gwoko kacokke kare ducu. (Tic 20:28) Jo muteggi gitwero nongo pwony ki bot Yekoyada ni ka gilworo Jehovah dok gimedde ki bedo lugen, En twero tic kwedgi me cobo yubbe. En pe wekogi niyak pien ni dong guteggi woko. Jo matino gitwero neno kit ma Jehovah otero kwede Yekoyada ci gilubo lanen pa Jehovah ki keto deyo i kom omege ki lumege ma guteggi, tutwalle jo ma dong gutiyo pi Jehovah pi mwaki mapol. (Car. 16:31) Me agikkine, wan ducu watwero  nongo pwony ki bot ludito wi kaka ki Lulevi ma gucwako yub pa Yekoyada. Dong omyero wamiyu cwak bot ‘jo ma telowa’ ki bedo luwiny botgi.—Ibru 13:17.

16. Ngo ma nyuto ni Kabaka Yoaci onongo goro i moko tam?

¹⁶ Yekoyada okonyo Kabaka Yoaci [nyo Yekoac] me bedo ngat ma kite ber. (2 Luker 12:2) Macalo adwogine, kabaka matidi-ni onongo mito yomo cwiny Jehovah. Ento i nge to pa Yekoyada, Yoaci owinyo lok pa rwodi ma pe giworo Jehovah. Adwogine obedo nining? En kacel ki lwakke “gudok ka woro Acera ma jok ma dako-ni, ki cal jogi apaya-gu.” (2 Tekwaro 24:4, 17, 18) Man ocwero cwiny Jehovah matek, ento en “pud omedde ki cwalo lunebi mogo botgi, wek gudwokgi cen. . . , ento dano gukwero winyo” lokgi. Gukwero winyo kadi wa lok pa Jekaria c wod pa Yekoyada, ma onongo pe obedo lanebi ki lalamdog pa Jehovah keken ento bene omaro pa Yoaci. Ki lok ada, Kabaka Yoaci oweko kineko Jekaria kadi bed lunywal pa Jekaria aye onongo gularo kwone.—2 Tekwaro 22:11; 24:19-22.

17. Gin ango ma otimme i kom Yoaci i agikkine?

¹⁷ Yoaci orwenyo lworo ma onongo en tye kwede i kom Jehovah woko, pi meno agikkine obedo marac adada. Jehovah onongo  owaco ni: “Jo ma gicaya pe abiketo cwinya i komgi.” (1 Cam. 2:30) Lacen, mony pa jo Ciria ma welgi nok guloyo “mony madit” adada pa Yoaci dok “guketo ret marac twatwal i kome.” I kare ma mony me Ciria gua woko, lutic pa Yoaci kikome gupiro lok ci guneke woko pi culo kwor pi remo pa Jekaria. Dano onongo gineno kabaka man ni kite rac adada ma oweko pe “giyiko en i lyel pa luker.”—2 Tekwaro 24:23-25.

18. Ma lubbe ki Jeremia 17:7, 8, watwero gwokke nining wek pe wabed calo Yoaci?

¹⁸ Gin ango ma watwero pwonyo ki i lanen pa Yoaci? En onongo tye calo yat ma lwite pe odonyo matut ma ogabbe i kom yat mukene matek. I kare ma yat matek ca—Yekoyada—oto, dok yamo me pwony pa jo mungak ocako kodo, Yoaci opoto woko. Lanene nyuto ni pe omyero wabed luwiny bot Lubanga keken pien ni lupacowa nyo jo mukene me kacokke guwekiwa lanen maber. Me medde ki bedo cok ki Jehovah, myero wajing marwa kacel ki worowa pire ki kwan piwa kenwa, lwodo lok, kacel ki lega kare ki kare.—Kwan Jeremia 17:7, 8; Kol. 2:6, 7.

19. Gin ango ma Jehovah mito ki botwa?

¹⁹ Gin ma Jehovah mito ki botwa pe tek tutwal ma pe watwero timone. Gin ma en mito ki botwa tye kicoyo i Latitlok 12:13 [NWT], ma waco ni: “Lwor Lubanga acel me ada dok ilub cikke ducu. Pien man aye tic ma myero dano otim.” Ka walworo Lubanga, wabibedo lugen bote kadi bed wakat ki i peko i kare me anyim, kit ma Obadia ki Yekoyada gutimo kwede. Pe tye gin mo ma bibalo watwa ki Jehovah.