1. Ma lubbe ki 1 Petero 5:2, tic ma pire tek ango ma myero luelda gutim?

 JEHOVAH omiyo bot luelda tic me gwoko romine ma pigi tek adada bote-ni. Co magi ma lugen-ni gitero motgi me tic pi omege ki lumege calo gin ma pire tek, dok gitute matek me bedo “lukwat ma gin lukwat kikome.” (Jer. 23:4, NWT; kwan 1 Petero 5:2.) Pud dong watye ki mot madit ya me bedo ki co ma kit magi i kacokkewa!

2. Ariya ango ma luelda mogo gikato ki iye?

² Luelda gikemme ki ariya mapol i ticgi me gwoko romi. Me acel, gwoko kacokke kwako tic mapol. Laelda mo i lobo Amerika ma nyinge Tony, opwonnye me ngeyo ka ma kerone gik iye ka odok i kom tic ma en ye timone. En otito ni: “I acakki me two Korona, abedo ka ye tic mapol adada ma kwako yubo cokke ki tic me pwony. Ento kadi bed onongo ati marom mene, nongo tic mukene pud tye ka kura. I agikkine, onongo dong pe atwero nongo cawa me kwano Baibul, kwan pira kena, ki lega.” Laelda mo ma bedo i lobo Kosovo ma nyinge Elir, okemme ki ariya mapat. I kare ma en onongo tye i kabedo ma lweny ocek iye, en onongo ni tek me lubo tira ma a ki i dul pa Jehovah. En owaco ni: “Onongo mitte ni abed ki tekcwiny i kare ma jang gang kal omina tic me konyo omege ki lumege i kabedo ma pinye onongo rac adada. Abedo lwor, dok awinyo calo tira-ni onongo pe rwatte.” Lamiconari mo i Acia ma nyinge Tim, onongo ni tek adada me cobo jami ducu ma mitte nino ki nino. En owaco ni: “I kare mogo, awinyo ni aol mukato kare woko ma pe atwero tiyo tic me gwoko omege ki lumege.” Ngo ma romo konyo luelda ma gitye ka kato ki i ariya macal ki magi?

3. I yo ma nining ma jo ducu gitwero nongo kwede adwogi maber ki i nyamo labol pa Langolkop Gideon?

 ³ Luelda gitwero nongo pwony ki i labol pa Langolkop Gideon. (Ibru 6:12; 11:32) En obedo lakwat ki lagwok jo pa Lubanga. (Lungol. 2:16; 1 Tekwaro 17:6) Calo Gideon, luelda bene kicimogi me gwoko jo pa Lubanga i kare man ma piny tye marac-ci. (Tic 20:28; 2 Tem. 3:1) Pi meno, luelda gitwero nongo pwony mapol ki bot Gideon madok i kom mwolo, bedo lawiny, kacel ki ciro can. Medo i kom meno, kadi wa jo ma pe gitiyo macalo luelda bene gitwero dongo pwoc pi luelda kun giminigi cwak muromo ka gutamo matut i kom labol pa Gideon.—Ibru 13:17.

4. I yo ma nining ma Gideon onyuto ni emwol dok engeyo ka ma kerone gik iye?

⁴ Gideon onongo obedo laco mamwol dok ngeyo ka ma kerone gik iye. b I kare ma lamalaika pa Jehovah owaco bot Gideon ni kityeko yere me laro jo Icrael ki i cing jo Midian ma gitye oteka lweny, laco mamwol meno ogamo ni: “Kakawa tye matidi mo i kin jo Manace, dok an aye latin matidine ki i doggolawa.” (Lungol. 6:15) En owinyo calo pe epore pi tic meno, ento Jehovah onongo tye ki neno mapat. Ki kony pa Jehovah, Gideon ocobo ticce kakare.

5. Awene ma twero bedo tek pi laelda me nyuto mwolo?

⁵ Luelda gitute ki tekogi ducu me nyuto mwolo i jami ducu. (Mika 6:8; Tic 20:18, 19) Pe giwakke pi jami ma gutimo nyo ma gitwero timone. Dok pe gitamo ni konygi dong pe ka gutimo bal mo. Kadi bed kit meno, i kare mukene laelda twero nongo ni tek me bedo ngat mamwol. Me labolle, en twero ye me timo tic mapol ci i ngeye nongo ni cobogi ducu tek. Nyo kiromo lok i kome ki cac pi kit ma en ocobo kwede tic moni nyo jo mukene giromo pakke pi kit ma en ocobo kwede tic mukene. Gin ango ma luelda gitwero pwonyo ki bot Gideon ma bikonyogi loyo ariya magi?

6. Gin ango ma luelda giromo pwonyo ki bot Gideon madok i kom ngeyo ka ma kerogi gik iye? (Nen bene cal.)

⁶ Peny pi kony. Gideon onyuto ni engeyo ka ma kerone gik iye pien openyo pi kony ki bot jo mukene. (Lungol. 6:27, 35; 7:24) Luelda ma giryek bene gitimo kit meno. Tony, ma kiloko i kome con-ni, otito ni: “Pi kit ma adongo  kwede, amaro jolo tic mapol makato ma atwero cobone. Pi meno, amoko tamma ni omyero wanyam lok madok i kom mwolo i worowa pi jo me ot dok apenyo dakona pi tamme i kom kit ma atye ka timone kwede. Aneno bene vidio ma i jw.org ma wiye tye ni Calo Yecu; Pwony, Gen dok Imi Teko bot Jo Mukene.” Tony ocako penyo jo mukene me konye ki tic. Adwogine obedo ningo? Tony owaco ni: “Tic me kacokke tye ka cobbe maber, dok an bene atye ki cawa muromo me jingo watta ki Jehovah.”

7. Luelda gitwero lubo lanen pa Gideon nining ka kiloko kwedgi ki cac? (Yakobo 3:13)

⁷ Pe iwek akemo omaki ka ngat mo oloko kwedi marac. Gin mukene ma romo temo mwolo pa luelda obedo ka kiloko kwedgi i yo me cac. Labol pa Gideon dok romo konyogi. En onongo ngeyo ni etye ki roc, pi meno obedo ma kome opye mot i kare ma jo Epraim guloko kwede ki gero. (Lungol. 8:1-3) Gideon pe odok i lokgi ki gero. En onyuto ni ebedo ngat mamwol ki tero ite me winyo kokogi kun bene gamo lokgi i yo me kica. Man oweko akemogi ocako dok cen i kome. Luelda ma giryek gilubo lanen pa Gideon ka gitero itgi me winyo lok ki diro kun gidok iye ki mwolo ka kiloko kwedgi i yo marac. (Kwan Yakobo 3:13.) I yo meno, gikonyo me gwoko kuc i kacokke.

8. Luelda myero gudok iye nining ka kipakogi? Mi labol.

⁸ Dwok pak ducu bot Jehovah. I kare ma jo mukene gupako Gideon pi loyo lweny i kom jo Midian, en odwoko pak ducu bot Jehovah. (Lungol. 8:22, 23) I yo ma nining ma co ma kicimogi i kacokke gitwero lubo kwede lanen pa Gideon? Myero gumi pak ducu bot Jehovah pi jami ma gicobo. (1 Kor. 4:6, 7) Me labolle, ka kipwoyo laelda mo pi dirone me pwony, en twero dok iye ni pwony man oa ki i Lok pa Lubanga dok ni wan ducu wanongo pwonnye ki i dul pa Jehovah. Luelda myero gutam ka ce gipwonyo i yo ma kelo deyo bot Jehovah nyo gitimo mere me ywayo tam pa dano i komgi. Nen kong gin mutimme i kom laelda mo ma nyinge Timothy. I kare ma onongo pud kicime nyen, Timothy onongo maro miyo pwony pi lwak adada. En owaco ni: “Onongo amaro tic ki lapor maboco dok mamit i pwonya. Man onongo pol kare weko dano paka adada. Ento meno onongo weko lwak giketo cwinygi i koma, me ka keto cwinygi i kom Baibul nyo Jehovah.” I nge kare mo, Timothy oniang ni omyero elok yo me pwonye wek jo mukene pe guket tamgi tutwal i kome. (Car. 27:21) Adwogine obedo nining? En otito ni: “I kare-ni dong, omege ki lumege gititta kit ma pwonya okonyogi kwede me lweny ki peko, ciro atematema, nyo me nyikke cok ki Jehovah. Anongo yomcwiny madit ki i lokgi magi ma loyo ki i pak ma yam anongo i kare mukato angec.”

9. Gin ango ma oweko obedo tek ki Gideon me bedo lawiny bot Jehovah ki me nyuto tekcwiny? (Nen cal ma tye i pok ngeye.)

⁹ I kare ma kicimo Gideon macalo langolkop, onongo mitte ni en obed lawiny dok onyut tekcwiny. Kimine tic ma keto kwone ka mading me muko keno tyer pa wonne me woro jok Baal. (Lungol. 6:25, 26) Lacen, i nge guro monnye, Jehovah owaco ki Gideon tyen aryo ni odwok wel monnye piny. (Lungol. 7:2-7) I agikkine, kiwacce ni ocit ka lweny i kom gony pa lumonegi i cwiny dyewor.—Lungol. 7:9-11.

10. Gin ango ma twero weko bedo tek ki laelda me bedo lawiny?

¹⁰ Luelda myero gubed “atera me lubo tira.” (Yak. 3:17, NWT) Laelda ma lawiny kare ducu  bedo atera me lubo gin ma Ginacoya waco kacel ki tira ma a ki i dul pa Jehovah. I yo meno, en weko lanen maber pi jo mukene. Kadi bed kit meno, i kare mukene en twero nongo ni tek me bedo lawiny. Me labolle, en twero nongo tira mapol nyo tira magi twero lokke oyotoyot, ma weko doko tek me ketogi i tic. I kare mogo, en twero bedo ki gung cwiny ka ce tira moni twero tic nyo tye me ryeko. Nyo kiromo mine tic ma keto bedo agonyane ka mading. I yo ma nining ma luelda gitwero lubo kwede lanen pa Gideon ka gin ma kit meno otimme?

11. Gin ango ma twero konyo luelda me bedo luwiny?

¹¹ Niang maber tira ma kimiyo dok iket i tic. Lubanga otito ki Gideon kit me muko keno tyer pa wonne, ka ma myero ocan iye keno tyer manyen pi Jehovah, ki lee mene ma omyero kityer iye. Gideon pe obedo ki gung cwiny i kom tira meno. En otimo gin ma Jehovah owacce ni otim kikome. I kare-ni, luelda ginongo tira ki i dul pa Jehovah kun wok ki i waraga, lok angeya, ki tira mukene ma kwako ber bedowa i yo me cwiny ki i yo me kom. Wamaro luelda pien gilubo tira ma a ki bot Lubanga ki gen. Man weko dano ducu me kacokke ginongo adwogi maber.—Jab. 119:112.

12. Luelda gitwero keto i tic Jo Ibru 13:17 nining ka dul pa Jehovah oloko kit ma kitimo kwede ki jami?

¹² Bed atera me timo alokaloka. Wi opo ni Jehovah owaco ki Gideon ni owek cokcok lumonye ducu gudok cen paco. (Lungol. 7:8) En onongo twero tamo ni, ‘Tika ada alokaloka man mitte? Tika man obitiyo?’ Kadi bed kit meno, Gideon obedo lawiny. I kare-ni, luelda gilubo lanen pa Gideon ki bedo luwiny ka dulwa owaccigi ni gutim jami i yo manyen. (Kwan Jo Ibru 13:17.) Me labolle, i mwaka 2014 Lukiko Madit oketo alokaloka i kom kit ma kiculo pi gero Odi me Ker ki Odi me Gure. (2 Kor. 8:12-14) I kare mukato, onongo dulwa miyo lon bot kacokke me gero Ot me Ker, ci kacokke culo lon meno motmot. Ento i kare-ni, dulwa tiyo ki mot ma oa ki bot kacokke ducu ma i wi lobo me gero Odi me Ker ki Odi me Gure ka mo keken ma mitte iye, kadi bed kacokke meno gimiyo mot matidi adada. I kare ma Omego José owinyo pi alokaloka man, en obedo ki gung cwiny ka ce twero tic, kun tamo ni: ‘Pe kibigero kadi wa Ot me Ker acel mo. Man pe kit ma kitimo kwede jami i but lobo-ni.’ Ngo ma okonyo José me cwako tira meno? En owaco ni: “Lok ma nonge i Carolok 3:5, 6 poyo wiya me keto genna i kom Jehovah. Dok adwogine obedo maber adada! I kare-ni, watye ka gero Odi me Ker mapol dok bene wapwonnye me miyo mot i yo mapatpat wek kacokke ducu gubed marom.”

13. (a) Gin ango ma onongo Gideon tye ki gen matek iye? (b) Luelda gitwero lubo lanen pa Gideon nining? (Nen bene cal.)

¹³ Tim miti pa Jehovah ki tekcwiny. Gideon obedo lawiny kadi bed onongo lwor dok  ticce onongo keto kwone ka mading. (Lungol. 9:17) I nge nongo cuko cwiny ki bot Jehovah, Gideon obedo ki gen matek ni Lubanga bimine cwak i ticce me gwoko jo pa Lubanga. Luelda ma gibedo i kabedo ma kiketo kigeng i kom ticwa gilubo lanen pa Gideon. Ki tekcwiny, gitelo wi utmege i cokke ki i tic me pwony kadi bed kitye ka minigi bwura ni kibimakogi, abili bipenyogi, gibirwenyo ticgi, nyo kibiterogi i yo me gero. c I kare me twon can madit atika-ni, bimitte ni luelda gubed ki tekcwiny me lubo tira mo keken ma gibinongo, kadi bed lubo tira magi keto kwogi ka mading. Me labolle, waromo nongo tira madok i kom tito kwena me ngolo kop mapek calo pee kacel ki gin ma myero watim me bwot ki i lweny pa Gog me Magog.—Ejek. 38:18; Yabo 16:21.

14. Kitemo kero pa Gideon me ciro can nining?

¹⁴ Tic pa Gideon macalo langolkop onongo mito tek kom. I kare ma jo Midian guringo woko ki i dog lweny i dyewor, Gideon oryemo korgi cakke ki i Nota me Jejreel nio wa i Kulu Jordan, ma nen calo onongo ogabbe ki okuto tim kacel ki okuto lango. (Lungol. 7:22) Tika Gideon ogik woko i dog Kulu Jordan? Pe! Kadi bed onongo guol woko, en kacel ki jone 300 gungolo kulu ci gumedde ki ryemo kor lumonegi. I agikkine, gunongo jo Midian ci guloyogi.—Lungol. 8:4-12.

15. Pingo i kare mukene laelda nongo ni tek tutwal me medde ki ticce?

¹⁵ I kare mukene, laelda twero winyo calo eol mukato kare woko pi ticce me gwoko kacokke kacel ki jo me ode. I kare ma kit meno, luelda gitwero lubo lanen pa Gideon nining?

16-17. Gin ango ma okonyo Gideon me diyo cwinye, dok tekcwiny ango ma luelda gitwero bedo kwede? (Icaya 40:28-31) (Nen bene cal.)

¹⁶ Bed ki gen ni Jehovah bimini teko. Gideon onongo geno ni Jehovah bimine teko, dok meno aye gin ma Jehovah otimo. (Lungol. 6:14, 34) I kare mo, Gideon ki jone onongo gitye ka ryemo kor luker aryo me Midian ki  tyengi kun luker magi nen calo onongo gitye ka ngwec ki kinaga. (Lungol. 8:12, 21) Ento Lubanga okonyo jo Icrael me makogi ki me loyo lweny. I yo acel-lu, luelda bene gitwero jenge i kom Jehovah, Ngat ma “pe ol, pe bene doko goro.” En biminigi teko i kare ma nongo gimito.—Kwan Icaya 40:28-31.

¹⁷ Nen kong labol pa ominwa Matthew, ma tiyo macalo lamemba me Komitti ma Kubu kin Lucaden ki Ludaktari. Ngo ma konye me diyo cwinye i ticce? Matthew owaco ni: “Anongo teko ki bot Jehovah kit ma Jo Pilipi 4:13 waco kwede. Tyen mapol ka aol matek ma awinyo calo pe dong atwero medde, alego matek adada, kun abako doga bot Lubanga pi teko ma mitte me medde ki konyo omegina. I kare ma kit meno, awinyo calo cwiny pa Jehovah mina teko, kun konya me diyo cwinya.” Calo Gideon, lueldawa bene gitiyo matek me gwoko jo pa Jehovah, kadi bed i kare mukene timo meno pe yot. Ki lok ada, mitte ni gubed mwol kun giniang ni kare ducu pe gitwero cobo jami ducu ma gimito timo. Ento, gitwero bedo ki gen ni Jehovah biwinyo kokogi pi kony dok biminigi teko ma mitte me medde ki diyo cwinygi.—Jab. 116:1; Pil. 2:13.

18. Me wot wiye wiye; luelda gitwero lubo lanen pa Gideon nining?

¹⁸ Luelda gitwero nongo pwony mapol ki i lanen pa Gideon. Luelda myero gunyut mwolo dok gunge ka ma kerogi gik iye ka odok i kom tic ma giye timone ki kit ma gidok iye ka kiloko kwedgi i yo me cac. Mitte ni gubed luwiny dok gunyut tekcwiny, tutwalle kit ma agikki me lobo man woto ki nyiko cok-ki. Dok mitte ni gubed ki gen ni kadi bed gukat ki i ariya marom mene, Lubanga biminigi teko. Ki lok ada, watye ki pwoc pi lukwat magi ma gitiyo matek tutwal-li dok “myero wamaru co ma kit magi.”—Pil. 2:29, NWT.