1-3. (a) Ma lubbe ki Jabuli 5:4-6, Jehovah winyo nining i kom tim maraco? (b) Pingo watwero waco ni nywaro lutino i yo me buto obedo olungtuke me “cik pa Kricito”?

LUBANGA JEHOVAH dag tim maraco ducu. (Kwan Jabuli 5:4-6.) En tutwalle dag tim me nywaro lutino i yo me buto, pien man obedo tim me kipyeda ma lik! Kit macalo wan wabedo Lucaden pa Jehovah, walubo lanene, wadag tim me nywaro lutino dok pe waye ni otimme i kacokke.​—Rom. 12:9; Ibru 12:15, 16.

² Nywaro lutino i yo me buto tye olungtuke me “cik pa Kricito”! (Gal. 6:2) Pingo watwero wacone kit meno? Kit ma waneno kwede i pwony mukato-ni, cik pa Kricito​—ma obedo jami ducu ma Yecu opwonyo i lokke ki ticce​—jenge i kom mar. Kit macalo Lukricitayo me ada gilubo cik man, gitero lutino i yo ma weko gibedo labongo lworo dok giwinyo ni kimarogi. Ento nywaro lutino obedo tim marac, ma weko latin bedo ki lworo dok winyo ni pe kimare.

³ Ki cwercwiny, tim me nywaro lutino i yo me buto tye ka timme i wi lobo ducu, dok tim man bene dong ogudo wa Lukricitayo me ada. Pingo? “Jo maraco ki jo ma lugoba” gunya i kin piny, dok mogo gitemme me donyo wa i kacokke. (2 Tem. 3:13) Medo i kom meno, jo mogo ma giwacci gin lumemba me kacokke guweko mitigi macilo obwoyogi ci gunywaro lutino i yo me buto. Kong dong wanyamu tyen lok mumiyo nywaro lutino obedo bal madit adada. I ngeye, wabinyamo gin ma luelda gitimo ka lamemba  mo me kacokke otimo bal madit, man kwako wa nywaro lutino. Ka dong wabineno kit ma lunywal gitwero gwoko kwede lutinogi. *

4-5. Nywaro latin obedo bal i kom latin-ni nining?

⁴ Nywaro lutino kelo adwogi marac ma rii pi kare malac. Kelo adwogi marac i kom latin ma kinywaro-ni kacel ki jo ma gimaro latin man​—calo jo me pacogi ki omege ki lumege me kacokke. Nywaro lutino obedo bal madit adada.

⁵ Obedo bal i kom latin ma kinywaro-ni. Keto awano ki arem i kom jo mukene obedo bal madit. Kit ma wabineno kwede i pwony ma lubo man, ngat ma nywaro latin timo bal ma kit man kikome​—en wano latin i yo marac adada. En turo gen ma onongo latin-ni oketo i kome, dok weko latin man bedo ki lworo. Omyero kigwok lutino ki i tim marac man, dok lutino ma kinywarogi gimito kwecwiny ki kony.​—1 Tec. 5:14.

6-7. I yo ango ma nywaro lutino obedo bal i kom kacokke ki i kom gamente?

⁶ Obedo bal i kom kacokke. Lamemba me kacokke ma onywaro latin i yo me buto nongo okelo lewic i kom kacokke. (Mat. 5:16; 1 Pet. 2:12) Man tim marac atika i kom Lukricitayo milion mapol ma lugen ma gitye ka ‘lweny matek pi niye!’ (Juda 3) Pe waye ni dano ma otimo bal ma kit man labongo ngut, ma nongo obalo wa nying kacokke, obed i kinwa.

⁷ Obedo bal i kom gamente. Lukricitayo ‘myero guwiny luloc.’ (Rom. 13:1) Wanyuto ni watye luwiny bot luloc ka walubo cik pa gamente. Ka lamemba mo me kacokke oturo cik pa gamente, me labolle ka onywaro latin i yo me buto, ci nongo otimo bal i kom luloc. (Por ki Tic 25:8.) Luelda pe gitye ki twero me miyo pwod ki dano ma oturo cik me lobo moni. Kadi bed kit meno, gin pe gikano labal ma onywaro latin ento giweko gamente mine pwod ma rwatte ki balle. (Rom. 13:4) Labal-li kayo gin ma en ocoyo.​—Gal. 6:7.

8. Jehovah neno bal ma dano timo i kom luwotgi nining?

⁸ Ma dong rac loyo, man obedo bal i kom Lubanga. (Jab. 51:4) Ka dano otimo bal i kom lawote, nongo bene otimo bal i kom Jehovah. Me labolle, tam kong i kom Cik ma Lubanga omiyo ki jo Icrael. Cik man onongo waco ni ngat ma okwalo lawote tektek nyo i wi diro nongo “oturo cik pa Rwot [Jehovah].” (Levi 6:2-4) I yo acel-lu, lamemba me kacokke ma onywaro latin​—rom ma nongo okwalo nyo oyako bedo agonya pa latin-ni​—dok oturo cik pa Lubanga. Labal-li kelo alano madit i kom nying Jehovah. Pi tyen lok meno, omyero wakwer tim me nywaro lutino, pien man obedo bal madit i kom Lubanga.

9. Ngec ango ma jenge i kom Ginacoya ma dul pa Jehovah dong omiyo pi mwaki mapol, dok pingo?

⁹ Pi mwaki mapol dong, dul pa Jehovah omiyo ngec mapol ma jenge i kom  Ginacoya ma loko i kom nywaro lutino. Me labolle, pwony mogo i Wi Lubele ki Awake! onyamo kit ma jo ma kinywarogi gitwero lweny ki arem cwiny ma bino pi gin mutimme i komgi, kit ma jo mukene twero konyo ki cuko cwinygi, ki dong kit ma lunyodo gitwero gwoko kwede lutinogi. Dul pa Jehovah bene omiyo ki luelda tira matut ma jenge i kom Baibul ma nyuto gin ma myero gutim ka ngat mo onywaro latin. Dulwa bene pud tye ka medde ki ngiyo tira ma gimiyo bot luelda ma lubbe ki lok me nywaro lutino. Pingo? Me neno ni luelda gitye ka lubo cik pa Kricito kun ginyuto mar dok gingolo kop atir ka bal ma kit man otimme.

10-12. (a) Ka luelda gunongo lok ni ngat moni otimo bal madit, gin ango ma myero wigi opo iye dok ngo ma gitamo pire? (b) Ma lubbe ki Yakobo 5:14, 15, gin ango ma luelda giyelle matek me timone?

¹⁰ Ka luelda gitye ka cobo lok ma kubbe ki bal madit, myero wigi opo ni cik pa Kricito mito ni guter romi pa Lubanga ki mar dok gutim gin ma tye atir i wang Lubanga. Pi meno, myero gutam i kom jami mapol ka gunongo lok ni ngat mo otimo bal madit. Tic ma pire tek loyo ma luelda gitye kwede aye me kelo deyo bot Lubanga ki gwoko nyinge wek obed leng. (Levi 22:31, 32; Mat. 6:9) Gin mukene ma gitye ki miti me timone aye me konyo omege ki lumege me kacokke wek gugwok watgi ki Jehovah kun bene gikweyo cwiny jo ma kiterogi marac.

¹¹ Medo i kom meno, ka labal-li obedo lamemba me kacokke, ci luelda gibedo ki miti me konye wek oyub watte ki Jehovah, ka twere. (Kwan Yakobo 5:14, 15.) Lakricitayo ma oweko miti maraco obwoye woko ci otimo bal madit nongo kome lit i yo me cwiny. Man tyen lokke ni watte ki Jehovah oballe woko. * Watwero poro luelda ki ludaktar i yo me cwiny. Giyelle matek me ‘cango latwo [nyo labal-li].’ Gitwero tic ki tira me Baibul me konyo labal-li wek oyub watte ki Lubanga, ento man twere keken ka labal-li ongut pi balle.​—Tic 3:19; 2 Kor. 2:5-10.

¹² Dong nen ka maleng ni, luelda gitye ki tic madit adada i wigi. Giparo pi romi ma Lubanga omiyogi me agwoka. (1 Pet. 5:1-3) Gimito ni omege ki lumege gubed agonya dok labongo lworo i kacokke. Pi meno, pe gigalle ka guwinyo ni ngat moni otimo bal madit, ma i kine tye iye nywaro lutino. Tam kong i kom lapeny ma gitye i acakki me  paragraf 13,  15 ki  17.

13-14. Tika luelda gilubo cik pa gamente ma kwako doto bot luloc ngat ma koko me pyedo latin tye i kome? Tit kong.

 ¹³ Tika luelda gilubo cik pa gamente ma kwako doto bot luloc ngat ma koko me pyedo latin tye i kome? Ee. I kabedo ma cik magi tye iye, luelda myero gutute me lubo cik pa gamente ma kwako doto labalo ma onywaro latin. (Rom. 13:1) Cik ma kit magi pe turo cik pa Lubanga. (Tic 5:28, 29) Dong ka luelda guwinyo lok ni latin mo kinywaro, gikubbe ki jang gang kal cutcut me penyo kit ma gitwero lubo kwede cik ma kwako doto bal-li.

¹⁴ Ka luelda gitye ka lok ki latin ma kinywaro-ni kacel ki lunyodone, nyo ngat mukene ma ongeyo ni kinywaro  latin-ni, luelda poyo wigi ni gin aye gitye ki twero me doto bal-li bot luloc. Ento ka kidoto lamemba me kacokke ci lokke ongene woko i kabedo meno kono? Tika myero Lakricitayo ma odoto lok-ki owiny calo ekelo alano i nying Lubanga? Pe. Labal-li aye ma nongo okelo alano i nying Lubanga.

15-16. (a) Ma lubbe ki 1 Temceo 5:19, pingo olo lucaden aryo mitte ma peya luelda guketo komitti me ngolo kop? (b) Gin ango ma luelda gitimo ka guniang ni adot tye i kom lamemba mo me kacokke ni onywaro latin?

 ¹⁵ Pingo olo lucaden aryo mitte ma peya luelda guketo komitti me ngolo kop? Pien man aye gin ma Baibul mito wek ngolo kop atir obed tye. Ka ngat ma kimoro adot i kome-ni okwero ye bal meno, ci lucaden aryo mitte me moko adot man ma peya luelda guketo komitti me ngolo kop. (Nwo. 19:15; Mat. 18:16; kwan 1 Temceo 5:19.) Tika man tyen lokke ni omyero kong kinong lucaden aryo ma peya kidoto lok me nywaro latin bot luloc? Pe kumeno. Pe mitte ni luelda nyo jo mukene kong gunong caden aryo ka wek dong gudot ngat ma oturo cik bot luloc me gamente.

¹⁶ Ka guniang ni adot tye i kom lamemba mo me kacokke ni onywaro latin, luelda gitute me lubo cik pa gamente ma kwako doto bal meno, dok gicako kwedo lok meno ma lubbe ki cik me Baibul. Ka ngat ma koko tye i kome-ni okwero adot meno woko, ci luelda myero guwiny lok pa caden ma giwacci gingeyo gin mutimme. Ka ngat ma okelo koko-ni kacel ki dano mukene gitwero moko ni ngat meno onywaro latin-ni nyo latin mukene i kare mukato angec, ci luelda nongo gitye ki caden muromo me keto komitti me ngolo kop. * Ka caden acel keken aye tye, ci man pe tyen lokke ni ngat ma okelo koko-ni tye ka loko lok goba. Kadi bed lucaden aryo ma mitte me moko bal-li gipe, luelda giniang ni bal marac ma ocwero cwiny jo mukene nen calo otimme. Luelda gubimedde ki miyo kony ki kwe cwiny bot jo ma kicwero cwinygi-ni. Medo i kom meno, luelda gibimedde ki bedo ma wanggi twolo me gwoko kacokke ki i kom ngat ma koko me nywaro latin tye i kome-ni.​—Tic 20:28.

17-18. Tit kong tic ma komitti me ngolo kop tye kwede.

 ¹⁷ Tic ango ma komitti me ngolo kop tye kwede? Lok man ni “ngolo kop” pe te lokke ni luelda gingolo ka omyero labal-li onong pwod ki bot gamente pi turo cik. Luelda pe giluto wigi i tic pa jo giketo cik pa gamente i tic; giweko jo ma guturo cik i cing gamente. (Rom. 13:2-4; Tito. 3:1) Me ka meno, luelda gingolo nyo gimoko ka ce labal-li myero kiryem woko ki i kacokke nyo pe.

¹⁸ Tic pa luelda ma i komitti me ngolo kop tye me ngolo lok ma kubbe ki wat pa labal-li ki Lubanga nyo ki luye luwote. Gitiyo ki Baibul me moko ka labal-li ongut i kom balle nyo pe. Ka en okwero ngut i kom balle, ci kiryeme woko ki i kacokke, dok kimiyo lok angeya man bot kacokke. (1 Kor. 5:11-13) Ka en ongut, en romo medde ki bedo i kacokke. Ento, luelda gibimine ngec ni en pe binongo mot nyo tic mo keken i kacokke pi mwaki mapol nyo bene matwal. Pien ni luelda  giparo pi ber bedo pa lutino, gibimiyo ngec bot lunyodo i mung ni omyero gugwokke ka lutinogi tye i nget labal-li. Ka luelda gitye ka ciko lunyodo me gwokke ki i kom labal-li, omyero pe gutuc nying latin ma en onywaro-ni.

19-22. Gin ango ma lunyodo myero gutim wek gugwok lutinogi? (Nen cal ma tye i pok ngeye.)

¹⁹ Angagi ma gitye ki tic me gwoko lutino ki i awano? Lunyodo aye gitye ki tic man. * Lutinoni gubedo mot, nyo “ginaleya ma Rwot [Jehovah] miyo.” (Jab 127:3, Baibol) Jehovah omini tic me gwoko lutinoni. Gin ango ma itwero timo me gwoko lutinoni ki i tim me nywaro lutino i yo me buto?

²⁰ Me acel, bed ki ngec i lok madok i kom nywaro lutino. Tem niang kodi dano ango ma ginywaro lutino ki diro ma gitiyo kwede me bito lutino. Bed ki wang ma bit me neno ka ma peko twero a ki iye. (Car. 22:3; 24:3) Wi myero opo ni pol kare ngat ma nywaro latin obedo ngat ma latin ngeyo dok geno.

²¹ Me aryo, wek lutinoni gubed agonya me lok kwedi i cawa mo keken. (Nwo. 6:6, 7) Man kwako bedo ngat ma winyo lok mot. (Yak. 1:19) Wi opo ni lutino ma kinywarogi pol kare gibedo ki lworo me tito gin mutimme i komgi bot ngat mo keken. Giromo bedo ki lworo ni pe kibiye lokgi, nyo twero bedo ni ngat ma onywarogi-ni ominigi bwura ni ebitimo gin mo marac i komgi ka gudoto. Ka itye ki gung cwiny ni gin mo marac otimme i kom latinni, ci penye lapeny i yo me kica dok idi cwinyi iwiny lokke.

²² Me adek, pwony lutinoni. Tittigi gin ma myero gunge i kom buto. Ngec ma iminigi myero obed ma lubbe ki mwakagi kacel ki niangogi. Pwonygi gin ma myero guwacci ki ma myero gutim ka ngat mo otemo makogi i yo marac. Ti ki ngec ma dul pa Jehovah omiyo i kom kit me gwoko lutinoni.​—Nen bok ma wiye tye ni “ Pwonnye Kekeni dok Ipwony Lutinoni.”

23. Waneno tim me nywaro lutino i yo me buto nining, dok lapeny mene ma wabigamo i pwony ma lubo man?

²³ Macalo Lucaden pa Jehovah, waneno tim me nywaro lutino calo bal madit dok tim macilo adada. Lucaden pa Jehovah pe gikano labal ma onywaro latin ki i kom adwogi me balle, pien wan walubo cik pa Kricito. Ento, ka ominwa nyo laminwa mo kinywaro, gin ango ma waromo timone me konye? Pwony ma lubo man bigamo lapeny meno.