1-2. Pingo Ginacoya mogo pigi doko tek botwa ka alokaloka otimme i kwowa?

 I NINO me nyomgi, lanyom ki nyako ger ma ginen mwonya adada gitero itgi ka winyo pwony me Baibul ma loko i kom nyom. Ginacoya ma kinyamogi i pwony meno pe nyen botgi. Ento cakke ki i nino nyomgi, ginacoya magi pigi bibedo tek i kwogi me nino ducu. Pingo? Pien nongo dong mitte ni guket i tic macalo jo munyomme.

² Tye marom aroma ka Lukricitayo ma gunyomme gudoko lunyodo. Twero bedo ni, pi mwaki mapol guwinyo pwony mapatpat ma loko i kom kit me gwoko lutino. Ento cakke kombeddi, tam ma i pwony magi pigi bibedo tek botgi. Gin dong gibibedo ki latin ma megi ma myero gugwoki. Meno pud dong obedo tic madit ya! Pi meno, ka alokaloka otimme i kwowa, ginacoya mogo pigi doko tek adada botwa. Meno aye tyen lok acel mumiyo luwor Jehovah gikwano Ginacoya ‘i kare me kwogi ducu’ kit macalo luker me Icrael onongo myero gutim kwede, dok bene gibedo ka lwodone.—Nwo. 17:19.

3. Ngo ma wabinyamo i pwony man?

³ Lunyodo, wutye ki mot madit atika ma Lakricitayo twero bedo kwede, ma en aye, pwonyo lutinowu ki lok i kom Jehovah. Ento bimitte ni itim makato miyogi ngec i kom Lubanga keken. Mitte ni ikony lutinoni me mare matek. Ngo ma itwero timo me dongo mar pi Jehovah i cwiny lutinoni? I pwony man, wabinyamo cik ma igi lac me Baibul angwen ma twero konyo lunywal. (2 Tem. 3:16) Wabineno bene kit ma lunyodo mogo ma Lukricitayo  gunongo kwede adwogi maber pi keto tira me Baibul i tic.

4. Mi kong cik ma iye lac acel ma twero konyo lunyodo me dongo mar pi Jehovah i cwiny lutinogi. (Yakobo 1:5)

⁴ Cik ma iye lac me 1: Yeny tira ki bot Jehovah. Peny Jehovah me mini ryeko ma imito me konyo lutinoni me dongo mar pire. (Kwan Yakobo 1:5.) En aye obedo Ngat maber loyo ma twero mini tira. Tye tyen lok mapol ma oweko en opore. Nen kong tyen lok aryo. Mukwongo, Jehovah dong obedo lanyodo pi kare malac loyo ngat mo keken. (Jab. 36:9) Ki me aryo, tira me ryeko ma en miyo kare ducu kelo adwogi maber.—Ic. 48:17.

5. (a) Ngo ma dul pa Jehovah miyo me konyo lunyodo? (b) Kit ma kinyuto kwede i vidio-ni, ngo ma ipwonyo ki i kit ma Omego ki Lamego Amorim gugwoko kwede lutinogi?

⁵ Jehovah tiyo ki Lokke kacel ki dulle me miyo bot lunyodo ngec madwong ki i Baibul ma twero konyogi me pwonyo lutinogi me maro En. (Mat. 24:45) Me labolle, itwero nongo tira ma tye me kony i pwony ma wiye tye ni “Kony pi Jo me Ot,” ma onongo yam katti kare ki kare i magajin me Awake! ento i kare-ni katti i kabedowa me Intanet. Medo i kom meno, vidio mapol i jw.org tye ki penyo dano kacel ki tuko goga ma konyo lunyodo me keto tira pa Jehovah i tic ka giwoto ki gwoko lutinogi. *—Car. 2:4-6.

6. Wego mo acel winyo nining pi tira ma en ki dakone ginongo ki i dul pa Jehovah?

⁶ Lunyodo mapol gunyuto pwoc pi kony ma Jehovah miyo kun wok ki i dulle. Wego mo ma nyinge Joe oye ni: “Pwonyo lutinona adek-ki i ada pe obedo tic mayot. Wan ki dakona kare ducu walego bot Jehovah pi kony. Dok pol kare wawinyo calo pwony nyo vidio mo okatti i karene kikome me konyowa me lweny ki peko mo ma watye ka kato ki iye. Wajenge i kom tira pa Jehovah kare ducu.” Joe ki dakone gunongo ni pwony  kacel ki vidio magi tye ka konyo lutinogi me nyikke cok ki Jehovah.

7. Pingo pire tek ni lunyodo myero gutute matek me weko lanen maber? (Jo Roma 2:21)

⁷ Cik ma iye lac me 2: Bed lanen maber. Pol kare lutino gibedo ka neno lunyodogi dok giporo gin ma gineno-ni. Ngene kene ni, pe tye lanyodo mo ma pe ki roc. (Rom. 3:23) Kadi bed kit meno, lunyodo ma giryek gitute matek me weko lanen maber pi lutinogi. (Kwan Jo Roma 2:21.) Wego mo acel oloko kit man i kom lutino: “Gitye calo pama ma ywayo gin mo keken ma kibolo iye.” En omedo ni: “Giwacciwa ka pe watye ka timo jami ma wapwonyogi me timone.” Dong ka wamito ni lutinowa gumar Jehovah, marwa pire myero obed matek dok ma nen woko ka maleng.

8-9. Gin ango ma ipwonyo ki i lok pa Andrew ki Emma?

⁸ Tye yo mapol ma lunyodo gitwero pwonyo kwede lutinogi me maro Jehovah. Nen kong gin ma omego mo me mwaka 17 ma nyinge Andrew owaco: “Lunyodona kare ducu gupwonya kit ma lega pire tek kwede. Dyewor ducu Babana onongo lego kacel kweda, kadi bed onongo dong alego woko pira kena. Lunywala kare ducu onongo gipoyo wiwa ni: ‘Itwero lok bot Jehovah tyen mapol kit ma cwinyi mito kwede.’ Pi meno, lega odoko gin ma pire tek adada bota. Man oweko yot tutwal pira me lega ki me neno Jehovah macalo Wego ma lamar.” Lunyodo, wiwu myero opo ni marwu pi Jehovah twero konyo lutinowu me mare bene.

⁹ Nen bene labol pa laminwa mo ma nyinge Emma. I kare ma wonne owekogi, en owekogi ki banya madongo, ma onongo mitte ni minne aye ocul. Emma owaco ni: “Tyen mapol Mamana onongo pe bedo ki cente muromo, ento pol kare en onongo loko i kom kit ma Jehovah gwoko dok miyo gin ma mitte pi luticce. Onongo atwero neno ki i kit ma en kwo kwede ni ada en ye lok meno. Mamana onongo keto i tic gin ma en pwonyo.” Pwony ango ma wanongo? Lunyodo gitwero weko lanen maber kadi wa i kare ma jamine pe yot.—Gal. 6:9.

10. I kare mene ma onongo lunyodo ma Luicrael giloko ki lutinogi i kom Jehovah? (Nwoyo Cik 6:6, 7)

¹⁰ Cik ma iye lac me 3: Lok ki lutinoni kare ducu. Jehovah omiyo cik bot jo Icrael macon me pwonyo lutinogi lok i kome kare ducu. (Kwan Nwoyo Cik 6:6, 7.) Lunyodo magi onongo gitye ki kare mapol me lok ki lutinogi ki me dongo mar pi Jehovah i cwinygi. Me labolle, awobi ma Laicrael onongo twero tero cawa malac ka konyo wonne me pito kodi nyo kayo kac. Laminne onongo twero tero cawa malac ka konyo minne me kwoyo bongo, wiyo uci, ki timo tic mukene ma gang. Ka lunywal onongo giwoto ki tic kacel ki lutinogi, onongo gitwero lok i kom pwony mapatpat ma pigi tek. Me labolle, onongo gitwero lok i kom ber pa Jehovah ki kit ma en tye ka konyogi kwede.

11. Kare mene ma lunyodo ma Lukricitayo gitye kwede me lok ki lutinogi?

¹¹ I kare-ni, kwo pat adada ka kiporo ki kare macon. I lobe mapol, lunywal ki lutino pe gitwero bedo kacel i dyeceng. Lunyodo gitwero bedo i dog tic kun nongo lutino tye i cukul. Macalo adwogine, lunyodo myero guyeny cawa ma gitwero  lok ki lutinogi. (Ep. 5:15, 16; Pil. 1:10) Woro pi Jo me Ot miyo kare ma kit meno. Omego mo matidi ma nyinge Alexander owaco ni: “Babana kare ducu keto yub me woro pi jo me ot, dok pe ye ni gin mo keken obal yub meno. I nge kwan, waboko lok.”

12. Ngo ma myero lawi ot oket i tamme i cawa me woro pi jo me ot?

¹² Ka in ibedo lawi ot, ngo ma itwero timo me weko woro pi jo me ot bedo mamit pi lutinoni? Pingo pe ikwan bukwa manyen ma wiye tye ni Bed ki Kwo Maber Nakanaka! ki lutinoni? Buk man weko bedo yot me nyamo lok agonya. Mitini tye ni lutinoni gulok kwedi i kom kit ma giwinyo kwede kacel ki gin ma keligi par, pi meno pe iti ki kare me woro pi jo me ot me bedo ka cimo balgi. Dok tute me diyo kinigani ka i kare mukene giwaco jami ma pe rwatte ki lok me Baibul. Me ka meno, bed ki pwoc ka gutitti gin ma tye i cwinygi, dok icuk cwinygi me lok agonya kwedi. Itwero konyo lutinoni maber keken ka ingeyo kit ma giwinyo kwede.

13. Kare mene mukene ma lunywal gitye kwede me konyo lutinogi me nyikke cok bot Jehovah?

¹³ Wun lunyodo, wuyeny kare mo keken me konyo lutinowu me nyikke cok ki Jehovah. Pe mitte ni kong ikur pi cawa ma wuyubo pi kwanwu ka wek ipwonygi lok i kom Lubangawa ma lamar-ri. Nen kong gin ma mego mo ma nyinge Lisa owaco: “Wabedo ka tic ki jami ma tye i ngetwa me pwonyo lutinowa lok i kom Jehovah ki cwec. Me labolle, ka onongo gwokwa otimo gin mo ma oweko lutino gunyero, onongo watitigi ni man nyuto ni Jehovah obedo Lubanga ma layomcwiny, dok en ocweyowa ma watwero nongo yomcwiny kun bene wanyero.”

14. Pingo pire tek ni lunyodo gukony lutinogi me yero luremgi ki ryeko? (Carolok 13:20)

¹⁴ Cik ma iye lac me 4: Kony lutinoni me yero lurem mabeco. Lok pa Lubanga nyuto ka maleng ni lurem ma wayero gitwero kelo adwogi maber nyo marac i kwowa. (Kwan Carolok 13:20.) Wun lunywal, tika wungeyo lurem lutinowu? Tika dong irwatte kwedgi dok itero kare  kwedgi? Ngo ma itwero timone me konyo lutinoni me mako lurem ki jo ma gimaro Jehovah? (1 Kor. 15:33) Itwero konyo lutinoni me mako lurem mabeco ki lwongo jo ma gitye ki wat maber ki Jehovah gang wek wutim jami mogo kacel kwedgi.—Jab. 119:63.

15. Gin ango ma lunyodo gitwero timone me konyo lutinogi wek gunong lurem mabeco?

¹⁵ Nen kong labol pa wego mo ma nyinge Tony. En otito gin ma en ki dakone gutimo me konyo lutinogi abic me mako lurem mabeco: “Pi mwaki mapol, wan ki dakona wabedo ka lwongo omege ki lumege ma mwakagi ki tekwarogi patpat i gangwa. Wacamo kacel dok wanywako i woro pi jo me ot kacel kwedgi. Man obedo yo maber me ngeyo jo ma gimaro dok gitiyo pi Jehovah ki yomcwiny. Wabedo ki mot me lwongo luneno me adwol, lumiconari, ki jo mukene me bedo i gangwa. Lutinowa gupwonyo jami mapol ki i gin mutimme i kwogi, mit komgi, kacel ki tic matek ma gutimo pi Jehovah. Jami magi ducu okonyo lutinowa me nyikke cok ki Jehovah.” Lunyodo, wumok tamwu me konyo lutinowu wek gubed ki lurem mabeco.

16. Ngo ma itwero timone ka latinni owaco ni pe emito tic pi Jehovah?

¹⁶ Ket kong ni, kadi bed itute matek me konyo lutinoni, latinni mo acel owaco ni pe emito tic pi Jehovah. Pe itam ni pe ibedo lanyodo maber. Jehovah omiyo bot wan ducu—kadi wa lutinowa—mot me bedo agonya, ma meno kero me yero ka wabitic pi Lubanga nyo pe. Ka latinni omoko tamme me weko Jehovah, pe irweny gen ni nino mo en bidwogo. Wi opo i kom lapor pa latin awobi murwenyo-ni. (Luka 15:11-19, 22-24) Awobi-ni otimo jami maraco mapol, ento i agikkine, en odwogo cen. Jo mogo gitwero waco ni, “Meno obedo mere lapor keken. Tika twero timme ada?” Ee, twero timme! Ki lok ada, meno aye gin mutimme i kom awobi mo ma nyinge Elie.

17. Gin mutimme i kwo pa Elie cuko cwinyi nining?

 ¹⁷ Omego Elie oloko kit man i kom lunyodone: “Gutute matek me dongo mar pi Jehovah ki Lokke, Baibul, i cwinya. Ento i kare ma onongo atye i kine ka mwaka 15, adoko lajemo.” Elie ocako kwo kwo laiye aryo, dok okwero tute pa lunyodone ducu me konye me bedo ki wat maber ki Jehovah. I kare ma en oa woko ki gang, en ocako timo jami maraco. Kadi bed kit meno, i kare mogo en onongo nyamo lok me Baibul ki lareme mo. Elie owaco ni: “Ma amedde ki tito lok i kom Jehovah bot larema, anongo ni acako tam matut i kom Jehovah. Motmot, kodi me lok ada ma onongo tye i cwinya—kodi ma onongo lunywalla gutute matek me pitone—ocako dongo.” I nge kare mo, Elie odwogo cen i ada. * Go kong yomcwiny ma lunyodone gubedo kwede pi tutegi me pwonye me maro Jehovah cakke i kare ma en pud tidi!—2 Tem. 3:14, 15.

18. Iwinyo nining i kom lunyodo ma gitute matek me pwonyo lutinogi me maro Jehovah?

¹⁸ Wun lunyodo, Jehovah ominiwu mot madit adada, me pwonyo yalwak manyen pa dano ma gibiwore. (Jab. 78:4-6) Meno pe obedo tic mayot, dok wapwoyowu matek pi tutewu me pwonyo lutinowu! Ka wumedde ki tutewu me konyo lutinowu me maro Jehovah kacel ki bedo luwiny bote, wutwero bedo ki gen ni Wonwa me polo ma lamar-ri cwinye bibedo yom.—Ep. 6:4.