1. Ma lubbe ki buk me Niyabo, gin ango ma Catan tye ka timo i kom jo pa Lubanga?

 BUK me Niyabo nyuto ni Ker pa Lubanga dong ocako loc i polo dok kiryemo Catan woko ki i polo. (Yabo 12:1-9) Ryemo Catan ki i polo okelo kuc bot jo ma i polo ento okelo can botwa. Pingo? Pien Catan tye ki akemo madwong dok tye ka lweny i kom jo ma gitiyo pi Jehovah i lobo kany.—Yabo 12:12, 15, 17.

2. Ngo ma bikonyowa me gwoko genewa bot Jehovah?

² Waromo medde ki gwoko genewa bot Jehovah nining kadi bed Catan tye ka lweny i komwa? (Yabo 13:10) Gin acel ma bikonyowa aye me ngeyo gin ma bitimme i anyim. Me labolle, i buk me Niyabo, lakwena Jon otito pi mot mogo ma wabinongo macok cok-ki. I kin mot magi tye iye jwero lumone pa Lubanga. Kong dong wanenu kit ma Niyabo loko kwede i kom lumone magi ki ngo ma bitimme i komgi.

3. Kodi lanyut macalo mene ma kitiyo kwede i buk me Niyabo?

³ I tyenge mukwongo, buk me Niyabo tittiwa ni gin ma wabikwano-ni kimiyo i “ginanyuta” nyo macalo lanyut. (Yabo 1:1, NWT) Wakwano lok i kom lee mapatpat ma gicung pi lumone pa Lubanga. Me labolle, tye “lee mo ma oa ki i nam.” Lee man “tunge tye apar ki wiye bene onongo tye abiro.” (Yabo 13:1) Lee mukene ma ‘okatti i ki ngom’ olubo kor lee me acel. Lee me aryo-ni, loko calo min kulu dok weko “mac a ki i polo.” (Yabo 13:11-13) I nge meno, waneno lee me adek, “lee mo makwar,” ma dako ma lakwele obedo i wiye. Lee adek magi gicung pi lumone pa Lubanga ma gubedo ka lweny i Kome kacel ki  Kerre pi kare malac. Pi meno, pire tek adada ni waniang i komgi.—Yabo 17:1, 3.

4-5. Lok ma kitito i Daniel 7:15-17 konyowa nining me niang lok i kom lee magi?

⁴ Ma peya waniang i kom lumone pa Lubanga magi, mitte ni kong waniang gin ma lee magi ki dako ma lakwele-ni gicung pire. Gin ma bikonyowa aye ka waweko but Baibul acel ogonyo but Baibul mukene. Pol pa lanyut ma kitiyo kwede i buk me Niyabo, dong kityeko tito pire woko i bukke mukene me Baibul. Me labolle, i lek mo ma lanebi Daniel oleko, en oneno “lee madito angwen gukatti woko ki i nam.” (Dan. 7:1-3) Daniel otitiwa gin ma lee magi gicung pire. Lee madongo angwen magi gicung pi “luker,” nyo gamente angwen. (Kwan Daniel 7:15-17.) Lok ma Daniel otito ka maleng meno konyowa me niang ni lee mager ma kiloko i komgi i Niyabo bene gicung pi gamente.

⁵ Kong dong wanyamu lanyut mogo ma kitiyo kwedgi i buk me Niyabo. Ka wawoto ki nyamo lanyut magi, wabineno kit ma Baibul konyowa me niang gin ma gicung pire. Wabicako ki nyamo lok i kom lee mager ma kitito pigi-ni. Mukwongo wabinyamo gin ma lee magi gicung pire. I nge meno, wabineno gin ma bitimme i komgi. I agikkine, wabineno kit ma lok meno gudowa kwede.

6. Lee mager ma wiye tye abiro ma kitito pire i Niyabo 13:1-4 cung pi gin ango?

⁶ Lee mager ma wiye tye abiro-ni cung pi gin ango? (Kwan Niyabo 13:1-4.) Waneno ni lee man kome tye calo kom kwac, tyene tye calo tyen nguu, doge tye calo dog labwor, dok tunge tye apar. Lee angwen ma kiloko i komgi i buk pa Daniel cura 7 bene komgi tye calo kom lee man. Ento i buk me Niyabo, jami ma tye i kom lee angwen magi kiribogi i kom lee acel, dok pe gitye lee angwen mapatpat. Pi meno, lee mager-ri pe cung pi gamente acel nyo oteka acel ma oloyo wi lobo. Medo i kom meno, Jon owaco ni lee-ni tye ka “loyo kaka ducu, dano ducu ki leb-gu, wa rok mapatpat ducu.” Pi meno, lee man dit loyo gamente mo acel keken. (Yabo 13:7) Lee mager-ri cung pi gamente ducu ma guloyo dano nio wa i kare-ni. *—Latit. 8:9.

7. Wic abiro-ni ki acel acel gicung pi gin ango?

⁷ Wic abiro magi ki acel acel gicung pi gin ango? Gin ma twero konyowa tye nonge i Niyabo cura 17, ma loko i kom cal lee ma kitito pire i Niyabo cura 13. I Niyabo 17:10, wakwano ni: “Gin bene gubedo luker abiro, ma jo abic i komgi dong gupoto woko, acel tye, ento acel mukene peya obino. Ka obino, myero kong ori pi kare mo manok keken.” Ki i kin gamente ducu ma Catan otiyo kwede, gamente abiro cung woko ka maleng macalo ‘wic.’ Gamente magi gubedo oteka ma guloyo wi lobo dok guketo aunauna i kom lutic pa Lubanga. I kare pa lakwena Jon, oteka abic magi onongo dong gutyeko loyo lobo woko: Ejipt, Aciria, Babilon, Media ki Percia, ki Grik. Oteka me abicel ma en aye Roma, onongo pud tye ka loc i kare ma Jon ocoyo buk me Niyabo. Gamente mene ma onongo bidoko oteka me abiro dok me agikki, nyo wic ma biloc?

8. Wic me abirone pa lee mager-ri cung pi gamente mene?

 ⁸ Wabineno kombeddi ni lok pa lunebi ma tye i buk pa Daniel konyowa me niang i kom wic me abirone dok me agikkine pa lee man. Gamente mene ma tye oteka dok ma tye ka loc i kare man me agikki, nyo i “nino pa Rwot”? (Yabo 1:10) Man obedo oteka me Britain ki Amerika. Watwero waco ni en aye obedo wic me abiro pa lee mager ma kitito pire i Niyabo 13:1-4.

9. Lee ma “tunge tye aryo calo latin romo” cung pi gin ango?

⁹ I Niyabo cura 13 wapwonyo ni wic me abiro-ni, ma en aye ker me Britain ki Amerika, bene timme calo lee mager ma “tunge tye aryo calo latin romo, dok bene onongo loko calo min kulu.” Lee meno “otiyo tic mogo madito ma bedo me aura twatwal, dok bene miyo mac a ki i polo bino piny i lobo ma dano bene gineno.” (Yabo 13:11-15) Niyabo cura 16 ki 19 lwongo lee mager man ni “lanebi ma lagoba.” (Yabo 16:13; 19:20) Daniel bene oloko i kom gin macal ki meno, ni ker me Britain ki Amerika “bitiyo gin ma tyeko piny woko.” (Dan. 8:19, 23, 24) Meno aye gin ma otimme kikome i kare me Lweny me Wi Lobo me II. Bom aryo ma kibolo i Japan ma oneko dano lumuku onongo lucayan me Britain ki Amerika aye guyubo. Pi meno ker me Britain ki Amerika oweko ‘mac oa ki i polo obino piny i lobo.’

10. ”Cal lee” cung pi gin ango? (Niyabo 13:14, 15; 17:3, 8, 11)

¹⁰ I nge meno, waneno dok lee mager mukene. Lee man cal ki lee ma wiye tye abiro ca, apokapoka ma tye aye ni lee me aryo-ni kome tye makwar. Kilwongo nyinge ni “cal lee” nyo “kabaka me aboro.” * (Kwan Niyabo 13:14, 15; 17:3, 8, 11.) Jon oniang ni “kabaka” man yam obedo tye ci orweny woko, lacen otuc odoco. Man rwatte adada ki dul me United Nations, ma cwako miti pa gamente ducu me wi lobo-ni! Con onongo kilwongo ni League of Nations. Dul man orweny woko i kare me Lweny me Wi Lobo me II. Lacen otuc macalo dul me United Nations.

11. Gin ango ma lee mager magi gitugo cwiny dano me timone dok pingo omyero pe walworgi?

¹¹ Lee magi gitiyo ki lok goba me tugo cwiny dano me jemo i kom Jehovah ki jone. Jon owaco ni bedo calo gitye ka coko “luker me wi lobo ducu” kacel i lweny me Armagedon, ma en aye “nino madit pa Lubanga Won Twer Ducu.” (Yabo 16:13, 14, 16) Ento pe omyero walwor gin mo keken. Lubangawa Jehovah, bidok iye oyotoyot me neno ni elaro jo ducu ma gicwako locce.—Ejek. 38:21-23.

12. Gin ango ma bitimme i kom lee mager magi ducu?

¹² Gin ango ma bitimme i kom lee magi ducu? Niyabo 19:20 gamo ni: “Ento gimako lee ca woko, kacel ki lanebi ma lagoba, ma yam obedo ka tiyo tic mogo me aura i nyime, ma obwolo dano ma onongo dong giketo poyo pa lee ca i komgi, ki ma yam onongo giworo calle-ni. Gin aryo-nu ducu, lee ki lanebi ma lagoba, gibologi woko makwo i nam me mac, ma tye ka lyel ki gweng calfa ma mac oliyo.” Dong i kare ma gamente magi pud gitye  ka loc, Lubanga bijwero lumone magi woko pi naka.

13. Gamente mogo me lobo-ni giketo lyeto ango i kom Lukricitayo?

¹³ Man bigudowa nining? Macalo Lukricitayo, omyero wabed lugen bot Lubanga kacel ki Kerre. (Jon 18:36) Me timo man, omyero wabed ma pe wacwako tung ka mo keken i tim me wibye me lobo man. Bedo ma pe wacwako tung ka mo keken twero bedo tek adada pien gamente me lobo-ni gimito ni lokwa ki ticwa onyut ni wacwakogi. Jo ma giye lyeto me cwako gamente magi ginongo poyo pa lee mager. (Yabo 13:16, 17) Dok ngat ma onongo poyo man doko lamone pa Jehovah dok bikeng kwo ma pe tum. (Yabo 14:9, 10; 20:4) Pud dong pire tek ya ni wan ducu ki acel acel wabed ma pe wacwako tung ka mo keken kadi bed kitye ka keto lyeto i komwa!

14. Gin me ur ango ma lakwena Jon oneno, kit ma kitito kwede i Niyabo 17:3-5?

¹⁴ Kwan Niyabo 17:3-5. Lakwena Jon owaco ni ‘ebedo ki ur madit tutwal’ i kom gin mo mukene ma eneno. Man gin ango? Dako ma obedo i wi lee mager mo acel i kin lee magi. Man “dako ma lakwele marac” ma nyinge kilwongo ni “Babilon Madit.” En timo “timme me abor-ri” kacel ki “luker me wi lobo ducu.”—Yabo 17:1, 2, 6.

15-16. “Babilon Madit” obedo gin ango, dok wangeyo man nining?

¹⁵ “Babilon Madit” obedo gin ango? Dako-ni pe obedo dul me wibye pien kiwaco ni en timo abor ki luloc me lobo-ni. (Yabo 18:9) Ki lok ada, en tute me doro wi luloc magi, ma kiporo ki bedone i wi lee-ni. Medo i kom meno, en pe obedo dul me biacara me lobo pa Catan-ni ma opong ki tim me woro ki camucana. Dul me biacara kiloko i kome ka mukene i buk me Niyabo dok kilwongo ni “lucat-wil me lobo.”—Yabo 18:11, 15, 16.

¹⁶ I Ginacoya, i kare mukene ka kiloko i kom jo ma timo tim kwele nyo tim me abor, nongo kitye ka lok i kom jo ma giwaco ni gitiyo pi Lubanga kun ginywako i tim me woro cal nyo gimako lirem ki lobo pa Catan. (1 Tekwaro 5:25; Yak. 4:4) Ento jo ma lugen kilwongogi ni “nyako maleng ma pud pe laco mo obedo kwede.” (2 Kor. 11:2; Yabo 14:4) Boma me Babilon macon obedo ka ma woro me goba ocakke ki iye. Pi meno, Babilon Madit cung pi woro goba ducu. Ki lok ada, en cung pi dini goba ma i wi lobo-ni ducu.—Yabo 17:5, 18; nen pwony ma tye i jw.org ma wiye tye ni “Babilon Madit Obedo Gin Ango?”

17. Gin ango ma bitimme i kom Babilon Madit?

¹⁷ Gin ango ma bitimme i kom Babilon Madit? Niyabo 17:16, 17 gamo lapeny meno kit man: “Dong tung lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke dong munero, gibicamo ringo kome ci giwango woko ki mac. Pien Lubanga aye ma oketo mit man i cwinygi.” Ada, Jehovah bitugo cwiny gamente me lobo-ni me tic ki lee makwar-ri, ma en aye United Nations, me lweny i kom dini goba ki me jwerone kwicikwici.—Yabo 18:21-24.

18. Watwero gwokke nining ki miyo cwak ki Babilon Madit i yo mo keken?

¹⁸ Man bigudowa nining? Mitte ni wamedde ki bedo i “dini me ada maleng,  ma cilo pe iye i nyim Lubanga Wonwa.” (Yak. 1:27) Pe omyero waye pwony goba, tim carocaro, ki tim jokjok pa Babilon Madit! Dok wabimedde ki waco ki dano ni ‘gua woko ki bote,’ wek pe gunywak i can ma Lubanga biketo i kome.—Yabo 18:4.

19. “Min kulu mo makwar” obedo anga?

¹⁹ Buk me Niyabo bene loko i kom “min kulu mo makwar.” (Yabo 12:3) Min kulu man lwenyo i kom Yecu kacel ki lumalaikane. (Yabo 12:7-9) Lwenyo bene i kom jo pa Lubanga dok miyo twerone bot lee mager nyo gamente pa dano. (Yabo 12:17; 13:4) Min kulu man obedo anga? “Obedo min kulu macon-ni, ma gilwongo ni Ladot, ki Catan.” (Yabo 12:9; 20:2) En aye miyo twero bot lumone pa Jehovah mukene-ni ducu.

20. Gin ango ma bitimme i kom min kulu?

²⁰ Gin ango ma bitimme i kom min kulu-ni? Niyabo 20:1-3 otito ni lamalaika mo bibolo Catan i bur ma tere pe gik ma bibedo calo buc pire. I kare meno ma nongo kibole i buc, Catan ‘pe dok bimedde ki bwolo rok ducu, nio wang ma mwaka alip acel dong okato.’ I agikkine, kibibolo Catan ki jogine “i nam me mac ki gweng calfa ma mac oliyo.” Meno tyen lokke ni, kibijwerogi woko matwal. (Yabo 20:10) Tam kong kwo i lobo ma Catan ki jogine gipe iye. Meno bibedo kare mamwonya ya!

21. Pingo lok ma wakwano i buk me Niyabo twero keliwa yomcwiny?

²¹ Pud dong cuko cwinywa ya me niang tyen lok me lanyut ma kitiyo kwedgi i buk me Niyabo! Watyeko niang angagi ma gubedo lumone pa Jehovah dok waneno gin ma bitimme i komgi. Ada, “ngat ma kwano lok ma gitito i buk man i nyim lwak tye ki [yomcwiny]”! (Yabo 1:3) Ento ka dong kityeko jwero lumone pa Lubanga woko, mot ango ma dano binongone? Wabinyamo meno i pwony me agikki i kin pwony adek magi ma gilubbe aluba-ni.