1-2. Lapeny ango ma watwero pennye kwede ka odok i kom legawa?

 TIKA dong nino mo ipennye kekeni ka ada Jehovah tye ka gamo legani? Ka tye kit meno, ci nongo pe itye keni. Omege ki lumege mapol bene gipennye ki lapeny meno, tutwalle i kare ma nongo gitye ka kato ki i pekki. Ka watye ka kato ki i pekki, watwero nongo ni tek adada me niang kit ma Jehovah tye ka gamo kwede ki legawa.

² I pwony man, wabinyamo pingo watwero bedo ki gen ni Jehovah gamo lega pa jo ma giwore. (1 Jon 5:15) Wabinyamo bene lapeny magi: Pingo i kare mukene twero nen calo Jehovah pe tye ka gamo legawa? I yo mapatpat ango ma Jehovah gamo kwede legawa i kare-ni?

3. Pingo Jehovah mito ni waleg bote?

³ Ginacoya tittiwa ni Jehovah marowa matek dok ni piwa tek adada bote. (Ag. 2:7; 1 Jon 4:10) Meno aye tyen lok mumiyo en mito ni waleg bote pi kony. (1 Pet. 5:6, 7) Jehovah mito konyowa wek wabed cok kwede kun waciro pekkiwa.

4. Wangeyo nining ni Jehovah gamo lega pa jo ma giwore? (Nen bene cal.)

⁴ I Baibul, pol kare wakwano kit ma Jehovah ogamo kwede lega pa jo ma giwore. Tika iromo tam i kom labol mo? Labol acel aye pa Kabaka Daudi. En obedo ki lumone mapol maraco adada i kare me kwone ducu, dok kare ki kare en onongo lego bot Jehovah pi kony. I nino mo acel, en obako doge i lega ni: “Ai Rwot [Jehovah], winy legana; winy legana me bako dog ma akelo i nyimi! Gam  doga pi genni, pien in iporre!” (Jab. 143:1) Jehovah ogamo lega pa Daudi ci olare ki i cing lumonene mapol. (1 Cam. 19:10, 18-20; 2 Cam. 5:17-25) Daudi onongo twero lok ki tekcwiny ni: “[Jehovah] tye cok bot jo ducu ma kok bote, ma gikok bote ki ada.” Wan bene watwero bedo ki tekcwiny ma kit meno.—Jab. 145:18.

5. Tika lega pa luwor Jehovah me kare macon onongo kigamo kit ma gimito kwede kare ducu? Mi labol. (Nen bene cal.)

⁵ Jehovah twero gemo legawa i yo ma pe wabyeko kulu. Meno aye gin ma otimme i kom lakwena Paulo. En olego Lubanga ni okwany ‘okuto ma kirwako i kome.’ Tyen adek mapatpat, Paulo olego ni kikwany peko meno woko. Tika Jehovah ogamo legane magi? Ada en ogamo, ento pe i yo ma onongo Paulo ogeno. Me ka kwanyo peko meno woko, Jehovah omine teko ma onongo mitte me medde ki tic Pire ki gen.—2 Kor. 12:7-10.

6. Pingo i kare mogo twero nen calo Jehovah pe tye ka gamo legawa?

⁶ Wan bene i kare mogo wanongo lagam me legawa i yo mapat ki kit ma onongo wabyeko kwede. Watwero bedo ki gen ni Jehovah ngeyo yo maber loyo me konyowa. En bene “twero tiyo tic madwong twatwal ma kato gin ma watwero lego pire nyo keto i tamwa.” (Ep. 3:20) Pi tyen lok meno, lagamme pi legawa twero bino i cawa nyo i yo ma nongo pe wabyeko kulu.

7. Pingo twero mitte ni walok gin ma onongo walego pire? Mi labol.

⁷ Twero mitte ni walok gin ma onongo walego pire woko ka wawoto ki niang miti pa Jehovah maber. Nen kong labol pa ominwa Martin Poetzinger. Ma pe orii i nge nyomme, kitweyo Omego Poetzinger i kam me aunauna pa Nazi. I acakkine, en olego bot Jehovah ni okonye wek kigonye woko ki i kam meno wek edok cen ka gwoko dakone dok emedde ki tito kwena odoco. Ento i nge cabit aryo, en oniang ni Jehovah pe biweko kigonye i kare meno. Pi meno, en oloko legane ci ocako lega ni: “Jehovah, alegi ni inyutta gin ma imito ni atim.” En ocako tam matut i kom pekki ma omege ma i kam meno gitye ka cirone. Omege mapol i kingi onongo bene gitye ki  par madwong pi mongi ki lutinogi. Omego Poetzinger dok olego ni: “Jehovah, apwoyi pi tic manyen man ma imina. Konya wek abed ki kare me jingo ki cuko cwiny omegina.” En omedde ki bedo i kam meno pi mwaki abongwen kun cuko cwiny omegine!

8. Lok ada ma pire tek ango ma omyero wiwa opo iye ka watye ka lega?

⁸ Omyero wiwa opo ni Jehovah tye ki yubbe, dok en bicobone i cawa ma en omoko. Yub meno kwako jwayo pekki ducu ma miyo dano deno can—pekki calo can ma poto atura, two, ki dong to. Jehovah bitic ki Kerre me cobo yubbe man. (Dan. 2:44; Yabo 21:3, 4) Kadi bed kit meno, Jehovah pud oye ni Catan kong olo lobo man nio wa i kare ma en bikelo iye Locce. b (Jon 12:31; Yabo 12:9) Ka ni Jehovah ocob pekki pa jo ducu i kare-ni, ci twero nen calo Catan tye ka loyo lobo-ni i yo maber adada. Dong ka wawoto ki kuro Jehovah me cobo cikkene mogo, man pe tyen lokke ni en owekowa liyak labongo kony mo keken. Kong dong wanyamu jami mogo ma Jehovah timo me konyowa.

9. Jehovah twero konyowa nining ka wamito moko tam? Mi labol.

⁹ En miniwa ryeko. Jehovah ocikke ni ebiminiwa ryeko ma wamito me moko tam mabeco. Wamito ryeko ma a ki bot Jehovah tutwalle ka watye ka moko tam ma biloko kwowa matwal, me labolle ka watye ka moko tamwa ka omyero wanyomme nyo pe. (Yak. 1:5) Nen kong gin mutimme i kwo pa laminwa mo ma nyinge Maria. c En onongo tye ka nongo mit pa tic macalo painia i kare ma orwatte ki omego mo. Maria owaco ni: “I kare ma liremwa owoto ki dongo, miti i kinwa bene odongo. Onongo angeyo ni bimitte ni amok tam. Alego matek adada ma peya amoko tamma. Onongo amito tira pa Jehovah, ento onongo bene angeyo ni pe Jehovah aye bimoko tam pira.” Maria winyo calo Jehovah ogamo legane pi ryeko. Jehovah otimo man nining? Maria otimo kwed i bukkewa dok onongo pwony ma ogamo lapeny ma en onongo tye kwede. En bene owinyo tam me ryeko ma mamane ma lagen omine. Tam meno okonyo Maria me ngine kekene. I agikkine, en omoko tam me ryeko.

10. Ma lubbe ki 2 Jo Korint 4:7, gin ango ma Jehovah bitimone me konyo jo ma giwore? Mi labol. (Nen bene cal.)

¹⁰ En miniwa teko me ciro pekkiwa. Kit  ma Jehovah otimo kwede pi lakwena Paulo, en biminiwa teko me ciro pekkiwa. (Kwan 2 Jo Korint 4:7.) Nen kong kit ma Jehovah okonyo kwede omego mo ma nyinge Benjamin me kanyo pekkine. I kare me bulune, Benjamin kacel ki lupacogi gubedo ka kwo i kam pa luring ayela i Afrika. Benjamin owaco ni: “Alego teretere bot Jehovah, kun apenye ni omina teko me timo gin ma yomo cwinye. Jehovah ogamo legana ki mina wic ma opye mot kacel ki tekcwiny me medde ki tito kwena, ki dong bukkewa ma okonya me bedo cok kwede.” En bene owaco ni: “Kwano lok i kom gin mutimme i kwo pa Lucaden mukene kacel ki kit ma Jehovah okonyogi kwede me ciro pekkigi, oweko amoko tamma me bedo lagen.”

11-12. Jehovah twero yero me tic ki omegiwa ki lumegiwa me gamo legawa nining? (Nen bene cal.)

¹¹ En tiyo ki omegiwa ki lumegiwa. I dyewor ma Yecu peya omiyo kwone macalo gityer, en olego matek. En obako doge bot Jehovah ni pe owek jo mukene gutam ni en eyeto Lubanga dok gungol kop i kome pi meno. Ento me ka timo meno, Jehovah okonyo Yecu kun cwalo bote lamalaika me jingo cwinye. (Luka 22:42, 43) Jehovah bene twero konyowa kun weko omego nyo lamego mo limowa nyo goyo cim botwa me cuko cwinywa. Wan ducu watwero tic ki kare ma owec me loko “lok maber me kica” bot luye luwotwa.—Car. 12:25.

¹² Nen kong gin mutimme i kwo pa laminwa ma nyinge Miriam. Cabit mogo manok i nge to pa cware, Miriam onongo tye kene gang, ma cwinye otur adada. En onongo tye ka kok matek ma pe twero ling dok onongo winyo calo myero elok ki ngat mo. En owaco ni: “Onongo pe atye ki kero me goyo cim bot ngat mo keken, pi meno alego bot Jehovah. I kare ma onongo pud atye ka lega kun amedde ki koko, ngat mo ogoyo cimma. Meno onongo laelda mo, ma obedo larema macok.” Miriam onongo kwe cwiny ki bot laelda meno kacel ki dakone. En oye ni Jehovah aye otugo cwiny omego-ni me gone cim.

13. Mi labol ma nyuto kit ma Jehovah twero tic ki jo ma pe giwore me gamo legawa.

 ¹³ En twero tic ki jo ma pe giwore. (Car. 21:1) I kare mogo, Jehovah gamo lega pa jone ki tugo cwiny jo ma pe giwore me konyogi. Me labolle, en otugo cwiny Kabaka Aritakcec me ye ni Nekemia odok cen i Jerucalem wek omi kony me gero boma meno odoco. (Nek. 2:3-6) I kare-ni bene, Jehovah twero tugo kadi wa cwiny jo ma pe giwore me konyowa i kare ma wamito kony.

14. Gin mutimme i kwo pa Soo Hing cuko cwinyi nining? (Nen bene cal.)

¹⁴ Laminwa mo ma nyinge Soo Hing winyo calo Jehovah okonye kun tiyo ki daktarne. Wode kinywalo ma tye ki two wic mapatpat. Lacen, wode opoto ki ka mo ma lamal ci onongo awano marac adada, mumiyo onongo mitte ni en ki cware gujuk tic woko wek gugwok latingi meno. Macalo adwogine, gubedo ki peko me can lim. Soo Hing owaco ni ewinyo calo abutida ma kitelo iye wa i agikkine. En olego bot Jehovah ki cwinye ducu, kun penye pi kony. Daktarne oyenyo yo me konye kacel ki lupacone. Man oweko gunongo kony ki bot gamente kacel ki ot apanga ma welle yot. Lacen, Soo Hing owaco ni: “Waneno cing Jehovah i lok man. Ada, en obedo ‘Lagam lega.’”—Jab. 65:2.

15. Gin ango ma okonyo laminwa mo acel me niang ni Jehovah gamo legane?

¹⁵ Pol kare Jehovah pe gamo legawa i yo me aura. Ento lagam ma wanongo obedo gin ma wamito kikome me medde ki bedo lugen bot Wonwa me polo. Pi meno, bed ma wangi twolo me neno kit ma Jehovah gamo kwede legani. Laminwa mo ma nyinge Yoko onongo winyo calo Jehovah pe tye gamo legane, ento en ocako coyo piny jami ma en olego pire. I nge kare mo, en ocako ngiyo jami ma ocoyo i bukke ci oniang ni Jehovah kara ogamo pol pa legane, kadi wa mogo ma wiye owil woko iye. Kare ki kare, mitte ni watam kong matut i kom kit ma Jehovah tye ka gamo kwede legawa.—Jab. 66:19, 20.

16. Watwero nyuto niye nining ka odok i kom legawa? (Jo Ibru 11:6)

¹⁶ Wanyuto niye pe ki lega bot Jehovah  keken, ento bene ki jolo lagamme, labongo paro yo ma en ogamo kwede lega meno. (Kwan Jo Ibru 11:6.) Nen kong labol pa Mike gin ki dakone, Chrissy. Onongo guketo yub me tic i Betel. Mike owaco ni, “Macalo luot, wapongo fom pi mwaki mapol me tic i Betel dok walego bot Jehovah teretere ento pe kimedo ki lwongowa matwal.” Mike ki Chrissy gumedde ki bedo ki gen matek ni Jehovah ngeyo yo maber loyo me tic kwedgi. Gumedde ki timo jami ducu ma gitwero, me labolle tic macalo painia marii ka ma can lutit kwena tye iye ki dok miyo kony i gero odi me worowa. I kare-ni, gitye i tic me limo adwol. Mike owaco ni, “Jehovah pol kare pe ogamo legawa i yo ma onongo wamito, ento en ogamogi dok i yo maber makato ma onongo wabyeko.”

17-18. Ma lubbe ki Jabuli 86:6, 7, gin ango ma watwero bedo ki gen iye?

¹⁷ Kwan Jabuli 86:6, 7. Daudi, ma ocoyo jabuli man, onongo ngeyo ni Jehovah winyo dok gamo legane. In bene itwero bedo ki gen acel-lu. Labol ma kinyamogi i pwony man weko wabedo ki gen ni Jehovah twero miyo botwa ryeko kacel ki teko me ciro pekkiwa. En twero tic ki omegiwa ki lumegiwa nyo kadi wa jo ma kombeddi pe giwore me konyowa i yo mapatpat.

¹⁸ Kadi bed Jehovah i kare mogo pe gamo legawa i yo ma wamito, wangeyo ni en bigamo legawa. En biminiwa gin ma wamito i cawa ma wamito kikome. Pi meno, medde ki lega kun iye ni Jehovah biwinyo legani, bigwoki i kare-ni dok “bimiyi gin ducu ma cwinyi mito” i lobo manyen ma bino-ni.—Jab. 37:4.