1. Jehovah kwayo jo ma giwore me timo gin ango? (Nen bene cal.)

 ANGA ma watwero lokke bote ka wamito cuko cwiny ki tira? Wangeyo lagam me lapeny meno. Watwero lega bot Lubanga Jehovah. Jehovah kwayowa me timo meno. En mito ni waleg bote kare ki kare—‘ma pe wakeng.’ (1 Tec. 5:17) Watwero bedo agonya me lega bote kun wapenyo pi tirane i kwowa me nino ducu. (Car. 3:5, 6) Kit macalo Jehovah obedo Lubanga ma cinge yot, en waco ni watwero lega bote tyen mapol kit ma wamito kwede.   

2. Gin ango ma wabinyamo i pwony man?

² Watero mic me lega calo gin ma pire tek. Kadi bed kit meno, pien watye ki tic mapol, watwero nongo ni tek me nongo cawa me lega. Watwero bene winyo calo omyero wadong rwom me legawa. Ki pwoc madit, watwero nongo cuko cwiny kacel ki tira i Ginacoya. I pwony man, wabinyamo gin ma watwero pwonyo ki bot Yecu ka odok i kom nongo cawa me lega. Wabinyamo bene kit ma watwero dongo kwede rwom me legawa ka walego pi jami abic ma pigi tego ma kibinyamogi-ni.

3. Gin ango ma Yecu oniang madok i kom lega?

³ Yecu oniang ni Jehovah tero legawa calo gin ma pire  tek adada. Con ma peya en obino i lobo, en oneno kit ma Wonne onongo gamo kwede lega pa co ki mon ma lugen. Me labolle, Yecu onongo tye i nget Wonne i kare ma En ogamo lega pa Anna, Daudi, Elia, ki jo mukene ma lugen. (1 Cam. 1:10, 11, 20; 1 Luker 19:4-6; Jab. 32:5) Meno aye oweko Yecu opwonyo lupwonnyene me lega kare ducu ki tekcwiny ni kibiwinyo legagi!—Mat. 7:7-11.

4. Pwony ango ma wanongo ki i lega pa Yecu?

⁴ Yecu oweko lanen maber pi lupwonnyene ki i lega ma en olego bot Jehovah. I kare me ticce me pwony, Yecu obedo ka lega teretere. Onongo mitte ni en okwany kare me lega pien pol kare onongo bedo ki tic mapol dok nongo lwak gurume woko. (Mar. 6:31, 45, 46) En onongo a odiko con ma piny pud col wek ebed ki kare me lega. (Mar. 1:35) Tyen makato acel, en obedo ka lega dyewor benebene ma peya omoko tam ma pire tek. (Luka 6:12, 13) Dok Yecu olego teretere i dyewor ma en peya oto pien en onongo oketo cwinye me cobo tic matek loyo ma onongo tye i nyimme i lobo kany.—Mat. 26:39, 42, 44.

5. Watwero lubo lanen pa Yecu nining ka odok i kom lega?

⁵ Lanen pa Yecu pwonyowa ni kadi bed watye ki tic mapol adada, pud mitte ni wakwany kare me lega. Calo Yecu, twero mitte ni waket cawa me lega. Gwok nyo watwero a odiko con nyo kong wabedo pi cawa mo otyeno ma peya wacito i kabuto. Ka watimo meno, wanyuto bot Jehovah ni watye ki pwoc pi mic mamwonya-ni. Laminwa mo ma nyinge Lynne wiye pud po kit ma en owinyo kwede i kare ma opwonyo ni lega obedo mic ma pire tek. En owaco ni, “I kare ma apwonyo ni atwero lok ki Jehovah i cawa mo keken, man okonya me neno Jehovah macalo Larema macok dok oweko abedo ki miti me dongo rwom me legana.” Labongo akalakala mo, pol pa wan bene wawinyo kit meno. Kong dong wanyamu jami abic ma pigi tego ma waromo lega pigi.

6. Ma lubbe ki Niyabo 4:10, 11, gin ango ma Jehovah opore me nongone?

⁶ Pak Jehovah. I ginanyuta mo me aura, lakwena Jon oneno ludongo 24 i polo ma gitye ka miyo woro bot Jehovah. Gupako Lubanga kun giwaco ni en opore “me nongo deyo ki woro ki teko.” (Kwan Niyabo 4:10, 11.) Lumalaika ma lugen bene gitye ki tyen lok mapol me miyo pak ki deyo bot Jehovah. Gitye i polo kacel kwede dok gingeye maber. Gineno kite i jami ma en timo. Dok ka giwoto ki neno kit pa Jehovah, man tugo cwinygi me pakke.—Yubu 38:4-7.

7. Watwero pako Jehovah pi gin ango?

⁷ Wan bene omyero wapak Jehovah i legawa. Watwero timo meno ki tite gin ma wamaro madok i kome ki dok pingo wamine woro. Ka itye ka kwano Baibul, tute me niang kit pa Jehovah mogo ma gudo cwinyi. (Yubu 37:23; Rom. 11:33) I nge meno, tit ki Jehovah kit ma iwinyo kwede i kom kite magi. Watwero bene pako Jehovah pien en konyowa kacel ki omegiwa ki lumegiwa ducu. En kare ducu paro piwa dok gwokowa.—1 Cam. 1:27; 2:1, 2.

8. Tyen lok mapatpat ango ma watye kwede me pwoyo Jehovah? (1 Jo Tecalonika 5:18)

⁸ Mi pwoc bot Jehovah. Watye ki tyen lok mapol me miyo pwoc bot Jehovah i legawa. (Kwan 1 Jo Tecalonika 5:18.) Watwero pwoye pi gin mo keken maber ma watye kwede, pien mic ducu mabeco gia ki bot Jehovah. (Yak. 1:17) Me labolle, watwero nyuto pwocwa pi kit ma lobo nen kwede mamwonya, kacel ki cwec ducu maleng mapatpat. Watwero bene pwoye pi kwowa, lupacowa, luremwa, kacel ki gen ma watye kwede. Dok wamito pwoyo Jehovah pi ye ni wabed ki wat macok kwede.

9. Pingo twero mitte ni wadong cwiny me nyuto pwoc bot Jehovah?

⁹ Twero mitte ni watute matek me tam i kom tyen lok ma watye kwede me bedo ki pwoc bot Jehovah. Jo mapol i kare-ni pe gimiyo pwoc. Dano pol kare gitamo keken i kom gin ma gitwero nongone makato tam i kom kit ma gitwero nyuto kwede pwoc pi jami ma gitye kwede. Ka wacako bedo ki tam ma kit meno, ci man twero weko legawa pong ki penyo pi jami ma wamito keken. Wek legawa pe obed kit meno, mitte ni wamedde ki dongo kacel ki nyuto pwoc pi jami ducu ma Jehovah timo piwa.—Luka 6:45.

10. Bedo ki cwiny me nyuto pwoc okonyo laminwa mo acel me kanyo pekkine nining? (Nen bene cal.)   

¹⁰ Cwiny me nyuto pwoc twero konyowa me kanyo pekki madongo. Nen  kong gin mutimme i kwo pa laminwa ma nyinge Kyung-sook, ma kicoyo pire i Wi Lubele me Januari 1, 2015. Ludaktar guwacce ni en tye ki two kanca ma mako obo ma onongo cok nekke woko. En owaco ni, “Lok me yot koma-ni obalo cwinya adada. Awinyo calo iwacci arwenyo jami ducu dok abedo ki lworo madit.” Gin ango ma okonye me kanyone? En owaco ni i dyewor ducu ma peya ebuto piny, ecito malo i wi otgi ci elego ki dwan malongo pi jami abic ma etye ki pwoc iye i nino meno. Man oweko cwinye opye mot dok otugo cwinye me nyuto marre pi Jehovah. En oniang ni Jehovah gwoko luticce ma lugen ka gitye ka kato ki i kwo matek dok omoko ni watye ki mot mapol i kwowa makato atematema ma wawok ki iye. Calo Kyung-sook, watye ki tyen lok mapol me nyuto pwoc bot Jehovah. Nyuto pwocwa i lega twero konyowa me kanyo pekki ma nongo cwinywa opye mot.

11. Pingo lupwonnye pa Yecu onongo gimito tekcwiny i kare ma en odok cen i polo?

¹¹ Leg Jehovah pi tekcwiny me tito kwena. Ma peya Yecu odok cen i polo, en opoyo wi lupwonnyene pi ticgi me miyo caden i kome “i Jerucalem ki i Judaya ducu ki i Camaria, wa i agikki lobo ducu.” (Tic 1:8; Luka 24:46-48) Ma pe orii i nge meno, luloc pa Lujudaya gumako lakwena Petero ki Jon ci guterogi i nyim Lukiko. Guciko co magi ma lugen-ni pe me tito kwena dok gubwurogi matek. (Tic 4:18, 21) Petero ki Jon gudok iye nining?

12. Ma lubbe ki Tic pa Lukwena 4:29, 31, gin ango ma lupwonnye pa Yecu gutimo?

¹² Petero ki Jon gudok i kom bwura pa lupwonye dini pa Lujudaya kun giwaco ni: “Wun wungol ka ce nen ber i wang Lubanga me winyowu makato winyo Lubanga; pien wan pe watwero weko tito pi gin ma yam waneno ki ma wawinyo.” (Tic 4:19, 20) I kare ma kigonyo Petero ki Jon, lukwena gulego bot Jehovah lega madok i kom timo mitine. Gulego ni: ‘Mi wan luticci watit lokki ki tekcwiny labongo lworo mo.’ Jehovah ogamo legagi meno ma gulego ki cwinygi ducu-ni.—Kwan Tic pa Lukwena 4:29, 31.

13. Gin ango ma watwero pwonyone ki i labol pa Jin-hyuk?

¹³ Watwero lubo lanen pa lupwonnye pa Yecu ka wamedde ki tito kwena kadi bed luloc gucikowa ni wajuk tito kwena. Nen kong labol pa ominwa ma nyinge Jin-hyuk, ma kitweye i buc pi bedo ma pe cwako tung ka mo. Ki i buc, kimine tic me poko cam ki jami mukene bot lumabuc ma kitweyogi i odigi kengi. Ento onongo kiye ki en me lok i kom jami ma mitte botgi keken. Onongo pe kiye ni en onywak kwedgi lok me Baibul. En olego pi tekcwiny ki diro me tito kwena i kare mo keken ma owec. (Tic 5:29) En owaco ni: “Jehovah ogamo legana kun omina tekcwiny ki ryeko me tic ki dakika abic keken me kwano Baibul ki lumabuc magi ki i doggolagi. Ci i otyeno, onongo acoyo waraga ma amiyo bot lumabuc magi orwone.” Wan bene waromo bedo ki gen matek ni Jehovah bikonyowa me cobo ticwa me pwony. Calo Jin-hyuk, watwero lega pi tekcwiny kacel ki ryeko.

14. Gin ango ma twero konyowa ka watye ka lweny ki pekki? (Jabuli 37:3, 5)

¹⁴ Leg pi kony pa Jehovah me lweny ki  pekki. Pol pa wan watye ka deno can pi two nyo cwercwiny, to pa ngat ma wamaro, peko ma i ot, aunauna, nyo peko mo mukene. Dok pekki mogo calo two gemo ki lweny oweko odoko tek adada me kanyo pekki magi. Tit ki Jehovah kit ma iwinyo kwede kikome. Titte pi pekoni kit ma itwero titone kwede bot laremi mo macok. Bed ki gen ni Jehovah “bikonyi.”—Kwan Jabuli 37:3, 5.

15. Lega twero konyowa nining me ‘diyo cwinywa i can’? Mi labol.

¹⁵ Mine kenwa i lego Lubanga labongo ilo cingwa bikonyowa me ‘diyo cwinywa i can.’ (Rom. 12:12) Jehovah ngeyo pekki ma luticce gitye ka kato ki iye—“dok winyo kokogi.” (Jab. 145:18, 19) Lapainia mo ma tye ki mwaka 29 ma nyinge Kristie oniang ni meno lok ada. En ocako bedo ki peko me two marac adada atura. Macalo adwogine, cwinye otur matek. Lacen, en oniang ni mamane tye ki two ma bineke woko. Kristie owaco ni: “Alego matek adada bot Jehovah ni omina teko ma mitte me kanyo nino acel acel. Atute matek me lubo yubba me woro Lubanga ki cito i cokke kacel ki kwan pira kena.” En omedde ni: “Lega okonya me kanyo kare mogo ma onongo kwo tye matek adada. Onongo angeyo ni Jehovah kare ducu cok kweda, dok tam meno okonya me bedo ma wiya opye mot. Kadi bed peko me twona pe ogik cutcut, Jehovah ogamo legana ki mina kuc kacel ki wic ma opye mot.” Dong omyero wiwa pe owil ni “[Jehovah] ngeyo laro dano ma gilworo Lubanga ki i ayelayela.”—2 Pet. 2:9.

16. Pingo wamito kony pa Jehovah me kwero atematema?

¹⁶ Leg pi kony pa Jehovah me kwero atematema. Macalo jo ma gitye ki roc, kare ducu mitte ni walweny matek i kom atematema me timo gin marac. Catan  tye ka timo jami ducu ma en twero wek kwero atematema obed matek adada. Yo acel ma en balo kwede tamwa obedo tic ki galowang macilo. Galowang ma kit meno weko tamwa pong ki jami macilo—weko wabedo jo pe leng i wang Jehovah dok twero weko watimo bal madit.—Mar. 7:21-23; Yak. 1:14, 15.

17. I nge lega pi kony, gin ango ma omyero watim me gwokke ki i atematema? (Nen bene cal.)

¹⁷ Wamito kony pa Jehovah ka wamito loyo atematema me timo gin marac. Yecu oloko kit man i lega pa Wonwa ni: ‘Pe iterwa i abita, ento ilarwa ki bot Larac.’ (Mat. 6:13) Jehovah mito konyowa, ento omyero wan aye waleg pi konye. Omyero bene wakwo ma rwatte ki legawa. Omyero watute matek ki kerowa ducu me gwokke ki kwano nyo winyo tam maraco mapol ma onya i lobo pa Catan. (Jab. 97:10) Watwero pongo tamwa ki jami mabeco ka wakwano Baibul i yo matut. Cito i cokke ki nywako i ticwa me pwony bene bigwoko tamwa. Dok Jehovah ocikke ni pe ebiweko kibitowa makato ma waromo cirone.—1 Kor. 10:12, 13.

18. Ka odok i kom lega, gin ango ma mitte ni wan ducu omyero watim?

¹⁸ Mitte ni wan ducu i kare-ni waleg matek makato i kare mo keken wek wamedde ki bedo lugen bot Jehovah i kare me agikki man ma kwo tek-ki. Kwany kare nino ki nino me lega ki cwinyi ducu. Jehovah mito ni ‘wayab cwinywa woko ducu bote’ i lega. (Jab 62:8) Pak Jehovah dok ipwoye pi jami ducu ma en timo. Leg en wek okonyi me bedo ma cwinyi tek i tic me pwony. Kwaye wek okonyi me lweny ki pekki kun ikwero atematema mo keken ma ikemme kwede. Pe iwek gin mo nyo ngat mo keken ogengi ki lega bot Jehovah kare ki kare. Ento, Jehovah gamo legawa nining? Wabigamo lapeny ma pire tek-ki i pwony ma lubo man.