1, 2. (a) Tit kong pingo batija obedo gin ma pire tek adada. (b) Ngat ma mito nongo batija myero pe obed ki akalakala i kom gin ango?

TIKA ibedo ngat matidi ma tye ka yubbe me nongo batija? Ka tye kumeno, ci gin ma icok timone-ni obedo twon mot mo madit adada ma ngat mo keken twero bedo kwede. Kit ma waneno i pwony mukato angec, batija obedo gin ma pire tek adada. Nyuto dyereni ka maleng​—kwongeni bot Jehovah me tic pire pi naka kun iketo mitine bedo mukwongo i kwoni. Ki lok ada, pore me nongo batija ka nongo dong itwero dok itye ki miti me moko tam meno piri keni, dok bene nongo iniang tyen lok me dyere.

² Ka ce itye ki akalakala ni meno pe iyubbe pi nongo batija kono? Nyo ka imito nongo batija ento lunyodoni kitamo ni kong ikur manok wek ibed ki ngec muromo i kom kit me kwo calo Lakricitayo kono? Ka tye kit meno, pe iwek cwinyi otur. Maka meno, ti ki kare meno me dongo wek i nge kare manok nongo dong ipore me nongo batija. Me konyi me timo man,  itwero ngiyo jami adek magi (1) tam ma imoko, (2) ticci, ki dong (3) pwocci.

3, 4. Pwony ango ma jo matino gitwero nongone ki i labol pa Temceo?

³ Tam kong i kit ma itwero dok i kom lapeny magi: Pingo aye ni Lubanga tye ada? Gin ango ma weko aye ni Baibul obedo Lok pa Lubanga? Pingo aye ni lubo cik pa Lubanga ber loyo lubo yo me kwo me lobo-ni? Lapeny magi pe tye me kelo akalakala i cwinyi. Maka meno, gikonyi me lubo tira ma lakwena Paulo omiyo ni: “Wuniang i gin ma Lubanga mito, gin maber, ma yomo cwinye, ma roc mo pe iye.” (Rom. 12:2) Ento pingo onongo mitte bot Lukricitayo ma i Roma me niang gin ma onongo dong guye woko?

⁴ Tam kong i kom labol me Baibul man. Temceo onongo ngeyo Ginacoya maber adada. Minne kacel ki dadane onongo gupwonye ‘cakke i tinone’. Kadi bed kumeno, Paulo ocuko cwiny Temceo n: ‘In myero imedde i gin ma ipwonyo, ki ma dong iye adada.’ (2 Tem. 3:14, 15) Temceo oweko ada odoko yo me kwone. En oye ada pe ni pien minne ki dadane guwacce ni myero otim kit meno, ento pien en oniang dok oye pire kene ni meno ada.​—Kwan Jo Ibru 5:14.

5, 6. Pingo pire tek me pwonyo kit me tic ki ‘ryekoni’ con?

⁵ In kono? Oromo bedo ni in bene dong ingeyo lok ada ma i Baibul wacon. Ka tye kit meno, pingo pe iket macalo yubbi me ngiyo maber adada tyen lok me niyeni? Man bijingo niyeni dok bikonyi pe me bedo ka cabbe atata pi tam ma luwoti gimiyi, tam mugom me loboni, nyo bene kit ma iwinyo kwede.

⁶ Pwonyo ‘ryekoni’ con bikonyi me yubbe me miyo lagam mucwiny bot luwoti ka gipenyi lapeny mogo calo: ‘Ingeyo nining ni Lubanga tye ada? Pingo Lubanga ma lamar weko jami maraco timme? Twere nining ni Lubanga pe ki acakki wa ki agikkine?’ Ka iyubbe maber, ci lapeny magi pe bituro niyeni ento bitugo mitini me keto cwinyi ikwan piri keni i yo matut.

7-9. Tit kong kit ma pwony ma kati kare ki kare ma nonge i kabedowa me intanet ma wiye tye ni, “Baibul Mono Ada Pwonyo Gin Ango?,” twero konyi me jingo tam ma imoko.

⁷ Kwan piri kene i yo matut twero konyi me gamo lapeny, jwayo akalakala mo keken, ki dong moko tam matir. (Tic 17:11) Giminiwa jami tic mapol ma twero konyowa me timo meno. Jo mapol gunongo ni tye me kony me tic ki brocuwa me The Origin of Life​—Five Questions Worth Asking ki buk me Is There a Creator Who Cares About You? Medo i kom meno, bulu mapol gunongo adwogi maber ki i jami akwano mogo ma nonge i intanet i te “Baibul Mono Ada Pwonyo Gin Ango?” Pwony magi ma gikati kare ki kare-ni nonge i jw.org. Nen i te BIBLE TEACHINGS>TEENAGERS. Pwony acel acel giyubo me konyi me moko tammi ma lubbe ki pwony me Baibul.

⁸ In dong ingeyo jami ma gitye i Baibul, pi meno iromo gamo lapeny mogo ma gitye i pwony meno ma gikati kare ki kare-ni oyotoyot adada. Ento pingo iye lagam meno? Pwony meno konyi me ngiyo ginacoya mapol wek ico tam ma imoko piny. Gitwero konyi me yubbe i kit ma iromo tito ki niyeni bot jo mukene. Pwony ma wi lokke tye ni “Baibul Mono Ada Pwonyo Gin Ango?” ma  nonge i kabedowa me intanet, tye ka konyo jo matino mapol me moko tamgi. Ka itwero, pingo pe iti kwede macalo but yubbi me kwan piri keni?

⁹ Ka imedde ki jingo tam ma imoko, man bikonyi me moko tam ma pire tek wek inong batija. Latin anyaka mo ma tye ki mwaka apar ki wiye owaco ni: “Ma peya amoko tam me nongo batija, abedo ka kwano Baibul ci anongo ni man dini me ada. Nino ki nino akalakala ma onongo atye kwede owoto ki rweny motmot.”

10. Pingo ngene kene ni Lakricitayo ma onongo batija bikwo ma lubbe ki niyene?

¹⁰ Baibul waco ni: “Niye kene ka pe giketo i tic, [nongo] dong oto woko” (Yak. 2:17) Ka itye ki niye matek, ci ngene kene ni ibimoko tam matir dok binen i ticci. Kit tic ango? Baibul loko i kom “kit kwo maleng ki me woro Lubanga.”​—Kwan 2 Petero 3:11.

11. Tit kong te lok me “kit kwo maleng.”

¹¹ Me nyuto “kit kwo maleng,” omyero ikwo i yo matir. In itye ka timo meno nining? Me labolle, tam kong i kom jami ma otimme dwe abicel angec. In inyuto nining ni “ryekoni” dong ojing woko me poko gin maber ki gin marac? (Ibru 5:14) Itwero tam kong i kom kit ma icung kwede matek i kom atematema ki dic ma a ki bot luwoti? Tika kit ma ikwo kwede i cukul nyuto ni itye ki niye matek? In tika icung pi niyeni maka ye timo jami kacel ki luwoti pi lworo ni gibingali? (1 Pet. 4:3, 4) Ki lok ada, pe tye ngat mo ma pe ki roc. Kadi wa lutic pa Jehovah me kare macon bene gubedo ki lworo me tucu pi niyegi i dye lwak. Kadi bed kumeno, ngat ma odyero kwone bot Jehovah myero obed ki awaka me cung pi nying Lubanga, dok bene myero onyut meno i kit ma en kwo kwede.

12. “Kwo me     woro Lubanga” kwako gin ango, dok omyero wanen nining?

¹² “Kwo me     woro Lubanga” kono te lokke ngo? Man kwako tic me kacokke, me labolle wot i cokke ki dok nywako i tic me tito kwena. Man bene kwako ticci i yo me cwiny ma dano pe twero nenogi, me labolle, lega piri keni, ki dok kwan piri keni. Ngat ma odyero kwone bot Jehovah pe bineno kit yo me kwo man calo tic mamwa. Maka meno, bibedo ki tam kit pa Kabaka Daudi, ma owaco ni, “Cwinya bedo yom me tiyo gin ducu ma imito, ai Lubanga; amako cikki dok agwoko tye i cwinya.”​—Jab. 40:8.

13, 14. Jami tic ango ma watye kwede ma twero konyowa me kwo “kwo me     woro Lubanga,” dok man okonyo jo matino mogo nining?

¹³ Me konyi me keto yubbi, nen i pot karatac 308 ki 309 i buk me Questions Young People Ask​—Answers That Work, Volume 2, ka ma itwero coyo lagammi pi lapeny mogo ma tye calo, “Legani mono kwako jami macalo mene, dok lega magi ginyuto mari pi Jehovah nining?” Gin ango ma iketo iyubbi me kwan piri kekeni?” Tika inywako i ticwa me pwony kadi bed ni Lunyodoni pe gicito?” Buk man bene tye ki ka ma itwero coyo iye yubbi mogo ma imito cobogi, ma man kwako legani, kwan piri keni, ki dong ticwa me pwony.

¹⁴ Jo matino mapol ma gimito nongo batija guwaco ni kacoc ma tye i buk man okonyogi adada. Lamego mo matidi ma nyinge Tilda owaco ni: “Atiyo ki ka coc man me keto yub ma amito cobogi. Dok bene acobo yub magi ducu ki acel acel ma man oweko inge mwaka acel onongo dong apore me nongo batija.” Omego mo matidi ma nyinge Patrick bene onongo  adwogi maber i yo ma kit meno. En owaco ni: “Onongo dong angeyo yub ma mitte ni myero acob, ento coyogi piny oweko atiyo matek me cobogi.”

15. Tit kong pingo dyere obedo tam ma ngat acel acel myero omoki pire kene.

¹⁵ Lapeny acel ma tye i buk man ma twero weko ingine adada tye ni: “In tika ibitic pi Jehovah kadi bed lunyodoni nyo luremi guweko tic pire woko? Wi myero opo ni, macalo Lakricitayo ma onongo batija, ibicung piri keni inyim Jehovah. Ticci pire myero pe ocung i kom ngat mo keken kadi wa lunyodoni. Kit kwoni maleng ki me woro Lubanga ginyuto ni iloko ada odoko kit yo me kwoni dok ni itye ka dongo i yo me cwiny wek ibed mupore me nongo batija.

16, 17. (a) Gin ango ma myero ocuk cwiny ngat moni me doko Lakricitayo? (b) Lapor ango ma waromo tic kwede me nyuto pwocwa pi ginkok?

¹⁶ Laco mo ma onongo tye ki ngec i kom Cik pa Moses openyo Yecu ni: “Cik mene madit makato cik ducu?” Yecu odok iye ni, ‘Mar Rwot [Jehovah] Lubangani ki cwinyi ducu, ki kwoni ducu, ki tammi ducu.’ (Mat. 22:35-37) Yecu onyuto gin ma myero otug cwiny Lakricitayo me timo miti pa Lubanga, ma i kine tye iye batija​—mar pi Jehovah ki cwinyi ducu. Yo acel ma itwero dongo kwede ki mari i kom Jehovah aye me lwodo lok i kom mic ma pire tek ma Jehovah omiyo​—ginkok pa Wode. (Kwan 2 Jo Korint 5:14, 15; 1 Jon 4:9, 19.) Tam i kom ginkok ki adwogi maber ma bino pi mic man weko ibedo ki pwoc madit adada.

¹⁷ Kit ma ibidok kwede i kom mic me ginkok giromo porone i yo man: Ket kong ni meno ngat mo olari ki i pii ma onongo dong icok to. Tika onongo ibicito gang, iloko bongoni ci wi wil woko i kom ngat ma okonyi ni? Pe wacel! Ibiwinyo calo itye ki banya pa ngat meno ma olaro kwoni-ni. Ki lok ada, nongo itye kwo pi ngat meno! Wan ducu watye kwo pi Jehovah gin ki Yecu Kricito. Labongo ginkok, kono wan ducu rom ma konywa peke, pi adwogi me bal ki to. Ento pi mar madit ma Jehovah onyuto, omiyo kombeddi dong watye ki gen me kwo pi naka i paradic!

18, 19. (a) Pingo pe myero i bed ki lworo me cwako Jehovah? (b) I yo ma nining ma tic pi Jehovah weko ibedo ki kwo mayot?

¹⁸ Tika itye ki pwoc i kom jami ma  Jehovah otimo piri? Ka itye kwede, ci pe tye gin mo ma romo gengi me dyero kwoni bot Jehovah kacel ki nongo batija. Wi myero opo ni meno, dyero kwoni kwako kwonge bot Jehovah me tiyo mitine pi naka, kadi bed gin ango otimme. Tika myero ibedo ki lworo me kwonge bote? Pe wacel! Nge ni meno Jehovah ngeyo gin maber ma imito, dok en miyo bakacic bot jo ma yenye.” (Ibru 11:6) Dyero kwoni bot Jehovah kun inyuto ki nongo batija pe weko ibedo ki kwo matek. Ma ka meno, tic pi Jehovah biweko ibedo ki kwo mayot adada. Omego mo ma tye ki mwaka 24 ma onongo batija ma mwakane onongo cok romo 10 owaco ni: “Onongo atwero bedo ki ngec makato ka onongo anongo batija ma olo to adit manok, ento moko tam me dyero kwona i kare meno okonya me gwokke ki i yenyo jami mogo me lobo-ni.”

¹⁹ Jehovah pud dong pat ki Catan ya, ma obedo rwot ineka-ni! Catan pe bimiyo gin mo maber marii pi naka bot jo ma cwakke. Ki lok ada, twere nining? Catan kikome pe tye ki gin mo maber kacel ki gen pi anyim. Dong en twero miyo gin maber ma en pe kwede nining? Pe tye gin mo ma Catan romo mini pien en pe ki gen mo pi anyim!​—Yabo 20:10.

20. Ngat matidi twero dongo i yo me cwiny nining wek obed ma opore me dyero kwone ki nongo batija? (Nen bene bok ma wiye tye ni “ Jami ma romo Konyi me Dongo i Yo me Cwiny.”)

²⁰ Nen ka maleng ni, dyero kwoni bot Jehovah aye obedo gin maber loyo ma in iromo timone. Tika itye atera me dyero kwoni? Ka tye kumeno, ci pe ibed ka nguny ki ngeyi. Kitungcel, ka pud imito kare mo manok, ci ti ki tam ma kimiyo i pwony man me medde ameda anyim. Paulo ocoyo bot jo Pilipi ni: “Gin ma mitte keken aye ni myero wamedde me cung matek i yo ma dong wao iye.” (Pil. 3:16) Ka ilubo tam meno, ci inge kare mo manok, ibibedo atera me dyero kwoni bot Jehovah kun i nongo batija.