1, 2. (a) Gin ango ma weko jo pa Lubanga gibedo ki yomcwiny i kareni? (b) Lunyodo ma Lukricitayo kacel ki luelda gitwero konyo jo matino me niang tyen lok me batija nining?

LAELDA mo owaco bot latin awobi mo ma nyinge Christopher ma mwakane tye 12 ni, “an angeyi nicakke wa i kare ma kinywali iye, dok cwinya yom me ngeyo ni meno imito nongo batija. Amito penyi kong, ‘Pingo imito nongo batija?’” Lapeny pa laelda-ni onongo pire tek adada? Ki lok ada, wan ducu wabedo ki yomcwiny me neno mwaka ki mwaka ka lutino alip mapol ginongo batija i twok loboni lung. (Latit. 12:1) Kitungcel bene, lunyodo ma Lukricitayo kacel ki luelda ma i kacokke gimito ngeyo ka lutino magi gumoko tamgi pigi kengi dok bene nongo gingeyo gin ma myero gitim.

 ² Lok pa Lubanga nyuto ni meno dyero kwowa bot Jehovah kacel ki nongo batija gubedo acakki me kwo macalo Lakricitayo ma weko wanongo mot ki bot Jehovah ento bene kare ma Catan cako kelo iye atematema. (Car. 10:22; 1 Pet. 5:8) Pi meno, lunyodo gikwanyo kare me pwonyo lutinogi gin ma bedo lapwonnye pa Kricito kwako. Pi lutino ma lunyodogi pe Lukricitayo, luelda me kacokke minigi kony wek gunge gin ma bibino macalo adwogi me bedo lapwonnye pa Yecu. (Kwan Luka 14:27-30.) Kit macalo mitte ni kigo pulan wek gero ot moni otum mapwot, bene mitte ni wayubbe maber wek wati ticwa bot Jehovah ki gen nio “wa i agikki.” (Mat. 24:13) Ento gin ango ma jo matino gitwero timone gin kikomgi wek gimok tamgi me tic pi Jehovah pi kwogi ducu? Kong dong wanenu.

3. (a) Lok pa Yecu ki Petero pwonyowa gin ango madok i kom batija? (Mat. 28:19, 20; 1 Pet. 3:21) (b) Lapeny mene ma wabinyamogi, ki dok pingo?

³ Tika ibedo ngat matidi ma mito nongo batija? Ka tye kumeno, nongo itye ka tam i yo matir! Obedo twon mot madit adada me nongo batija macalo ngat acel i kin Lucaden pa Jehovah. Ki lok ada, batija obedo gin ma mitte pi Lukricitayo, dok pire tek adada wek wanong larre i anyim. (Mat. 28:19, 20; 1 Pet. 3:21) Pien obedo mitini me gwoko kwonge ni bot Jehovah, man biweko i yubbe maber me nongo batija. Pi meno, ber me tam matut i kom lapeny adek magi wek okonyi me ngine kekeni ka dong itye atera me nongo batija. Lapenye gin ene: (1) Tika dong ateggi me moko tam pira kena? (2) Tika atye ki miti me timone? ((3) Tika aniang tyen lok me dyero kwona bot Jehovah? Kong dong wanen lapeny magi.

4, 5. (a) Pingo batija pe obedo pi jo ma guteggi keken? (b) Te lokke ngo ka kiwacci Lakricitayo moni oteggi?

⁴ Baibul pe waco ni meno jo ma dong guo mwaka ma cik wacci guteggi keken aye myero gunong batija. I Carolok  20:11 wakwano ni: “Kadiwa latin nyuto kit ma etye kwede i gin ma en tiyo, ka gin ma en tiyo-ni ber nyo tye atir.” Ngat ma pud tidi bene twero niang tyen lok mumiyo timo gin matir ber dok me dyero kwone bot Lacwecce. Pi meno, batija obedo gin ma pire tek dok mupore pi ngat matidi ma onyuto ni dong eteggi dok bene odyero kwone bot Jehovah.​—Car. 20:7.

⁵ Ka kiwacci ngat moni oteggi nongo te lokke ngo? Bedo ngat muteggi pe kwako dongo me kom keken. Baibul waco ni jo muteggi gitye ki ‘ryeko ma gupwonnye kwede me poko gin maber ki gin marac.’ (Ibru 5:14) Pi meno, jo muteggi gingeyo gin ma tye atir i wang Jehovah ki dok bene gimoko tamgi ki cwinygi ducu me timone. Macalo adwogine, man weko pe kitwero bwologi me timo gin marac; nyo pe kidiyogi kare ducu me timo gin matir. Ki lok ada, ngat matidi ma onongo batija bene twero lubo cik pa Lubanga kadi bed ni en pe tye kacel ki lunyodone nyo jo madongo mukene.​—Por ki Jo Pilipi 2:12.

6, 7. (a) Tit kong atematema ma Daniel owok ki iye i kare ma tye i Babilon. (b) Daniel onyuto nining ni etye ngat muteggi?

⁶ Tika jo matino gitwero nyuto ni guteggi i yo meno? Tam kong i kom labol pa Daniel ma kicoyo i Baibul-li. Twero bedo ni meno en onongo tye ki mwaka apar ki wiye i kare ma kitere i Babilon macalo opii. Cutcut, Daniel onongo ni etye ka kwo i kin jo ma gitye ki neno mapat i kom gin maber ki marac. Medo i kom meno, Daniel onongo dok tye ki ariya mukene: Onongo kitere calo ngat ma pire tek adada i Babilon. Ki lok ada, Daniel onongo tye i kin jo matino mukene ma kiyerogi me bedo ka cung i nyim kabaka! (Dan. 1:3-5, 13) Daniel nen calo onongo tye ki kare me nongo yweka i Babilon ma onongo pe twere bote ki i Icrael.

⁷ Daniel otero jami magi nining? Tika jami magi mamwonya-ni owiro tamme woko? Tika en oye ni jami magi ma gurumo ka ngete-ni gulok anga ma ebedo nyo obal niyene? Pe wacel! Baibul waco ni i kare ma Daniel tye i Babilon, en “omoko tamme pe me camo gin me kwer,” ma kubbe ki woro me goba. (Dan. 1:8) Daniel onyuto ka maleng ni ebedo ngat muteggi!

8. Gin ango ma itwero pwonyone ki i labol pa Daniel?

⁸ Gin ango ma itwero pwonyone ki i labol pa Daniel-li? Latin muteggi pe bedo ka cabbe ata i niyene. En pe bedo calo langogo nyo agogo ma bedo ka loko kala kome ma lubbe ki ka ma en ocung iye. En pe bedo calo larem Lubanga ka tye i Ot me Ker kun bene bedo calo larem jo me loboni ka en tye i cukul. Ma ka bedo ka cabbe acaba, en cung matek ka kitye ka temo niyene.​—Kwan Jo Epeco 4:14, 15.

9, 10. (a) Ngat matidi twero nongo adwogi maber nining ki i lwodo kit ma edok kwede i jami ma otemo niyene cokcok-ki? (b) Batija te lokke ngo?

⁹ Ki lok ada, pe tye ngat mo ma pe ki roc; lutino kacel ki jo madongo gitimo bal kare ki kare. (Latit. 7:20) Kadi bed kit meno, ka itye ka moko tam me nongo batija, ber adada me ngine keni wek iniang ka dong itye ma iyubbe me lubo cik pa Jehovah ki cwinyi ducu. Itwero niang nining? Penye kekeni ni, ‘An tika alubo cik pa Lubanga kare ducu?’ Tam kong kit ma idok kwede i kom jami ma otemo niyeni cokcok-ki. Tika dong  inyuto ni meno itye ki ryeko me poko kin gin maber ki marac? Ket kong ni kiteri calo ngat ma pire tek adada i lobo pa Catan-ni, kit ma otimme kwede i kom Daniel. Tika ibimedde ki ‘niang gin ma Jehovah mito ni itim,’ kadi bed ni mitine pat ki megi?​—Ep. 5:17.

¹⁰ Pingo omyero ipenye ki lapeny magi? Lapeny magi gibikonyi me neno batija calo gin ma pire tek adada. Kit ma kitito kwede malo-ni, batija nyuto ni dong ikwonge bot Jehovah. Ikwonge ni ibimare dok ibitiyo pire ki cwinyi ducu pi naka. (Mar. 12:30) Ngat acel acel ma onongo batija myero onen ni ecobo kwongene.​—Kwan Latitlok 5:4, 5.

11, 12. (a) Gin ango ma ngat ma mito nongo batija myero obed ki niango iye? (b) Ngo ma twero konyi me neno ni itero batija ma lubbe ki kit ma Jehovah neno kwede?

¹¹ Baibul waco ni jo pa Jehovah ma kwako wa jo matino “gibimine kengi” itiyo ticce. (Jab. 110:3) Pi meno, ngat ma mito nongo batija myero onen ni meno ada obedo mitine. Meno bimito ni ingine kekeni. Pingo? Pien kit ma idongo kwede calo bulu twero bedo pat ki pa jo mukene. Me labolle, twero bedo ni meno idongo i gang ma jone gitye i ada.

¹² Mwaki mukato angec twero bedo ni ineno dano mapol ka ginongo batija​—ma i kine tye iye jo ma mwakagi rom ki megi nyo bene omege ki lumege-ni. Ka meno tye ada, ci gin ango ma myero kong ingi maber adada? Gwokke adada pe me neno batija calo gin ma myero jo matino ducu gutim ka guo i mwaka moni. Gin ango ma itwero timone me neno ni itero batija ma lubbe ki kit ma Jehovah neno kwede? Kare ki kare kong myero ilwod tyen lok mumiyo batija obedo gin ma pire tek adada. Ki lok ada, itwero nongo tyen lok mabeco mapol i pwony man ki ma lubu.

13. Itwero niang nining ka ce miti me nongo batija oa ki i cwinyi?

¹³ Tye yo mapol me niang ka ada tam ma imoko me nongo batija oa ki i cwinyi. Me labolle, mitini me tic pi Jehovah ki cwinyi ducu binen i legani. Wat macok ma itye kwede ki Jehovah binen i jami ma iwaco i legani ki bene ka ilego bote kare ki kare. (Jab. 25:4) Yo acel ma pire tek ma Jehovah gamo kwede ki legawa aye me loko tamwa i kom Baibul. Pi meno, tutewa me kwano Baibul obedo yo mukene ma nyuto ni meno wamito nyikke cok bot Jehovah ki dok me tic pire ki cwinywa ducu. (Yoc. 1:8) Dong penye kekeni: ‘Tika atito gin ma i cwinya kikome i legana? Tika akwano Baibul kare ki kare?’ Dok ka wutye ki yub me Woro me Otyeno pi jo me ot, penye kekeni ni: ‘Tika acwako yub man ki cwinya ducu?’ Lagammi pi lapeny magi bikonyi me niang ka ce nongo batija obedo miti ma oa ki i cwinyi.

14. Tit kong apokapoka ma tye i kin dyere ki batija.

¹⁴ Jo mogo pe gingeyo apokapoka ma tye i kin dyere ki batija. Me labolle, jo matino mogo giwaco ni meno dong gidyero kwogi bot Jehovah ento pe gitye atera me nongo batija. Meno tika tye atir? Pien dyero kwoni bot Jehovah rom ki cikke me tic pi Jehovah pi naka. I kare me nongo batija, ngat moni nyuto ki jo mukene ni meno dong edyero kwone bot Jehovah. Pi meno, batija obedo  nyuto ka maleng bot dano ni dong ityeko dyero kwoni bot Jehovah i lega. Ma peya inongo batija myero inen ni iniang te lok me dyere.

15. Dyere te lokke ngo?

¹⁵ Kitwero wacone i yo macek ni, ka dong idyere bot Jehovah nongo dong ikwere kekeni dok ijalo kwoni bote. Ikwonge bot Jehovah ni ibiketo timo mitine bedo mukwongo i kwoni. (Kwan Matayo 16:24.) Kwong mo keken pire tek, ento ma dong pire tek loyo aye kwonge bot Lubanga Jehovah! (Mat. 5:33) Itwero nyutone nining ni ikwere kekeni dok ijalo kwoni bot Jehovah?​—Rom. 14:8.

16, 17. (a) Tit kong te lok me kwere kekeni. (b) Ngo ma ngat ma odyero kwone nongo tye ka wacone?

¹⁶ Me laporre, ket kong ni laremi mo omini mutoka macalo mic. Omini buk me mutoka meno ma nyuto ni in i rwode kun wacci atir ni: “Man mutoka ni.” Ento ka dok laremi-ni owacci ni: “Abigwoko layab me mutokane. Dok an aye abidwoyone ento pe in.” Ibiwinyo nining pi “mic” man? Cwiny ango ma ibibedo kwede i kom ngat ma omini mic man?

¹⁷ Tam kong dong i kom gin ma Jehovah mito ki bot ngat ma odyere bote, ngat ma owacce ni: “Atye ka mini kwona. Dong ajalle boti.” Ket kong ni ngat meno ocako kwo laiye aryo, nyo bene tye ka winye nyo yamo ki ngat ma pe laye i mung kono? Ka oye dog tic mo ma weko pe tiyo pi Jehovah ki cwinye ducu nyo pe cito i cokke kono? Meno pe bibedo calo gwoko layab me mutoka-ni? Ngat ma odyero kwone bot Jehovah nongo tye ka wacci: “Kwona tye me timo mitini makato ma mega. Ka mitte ni ayer i kin mitini ki mitina, ci abiyero gin ma imito bedo mukwongo kare ducu.” Meno birwatte ki tam pa Yecu i kare ma en pud onongo tye i lobo kany ma owaco ni: “Alor piny ki i polo, pe ka tiyo gin ma iya mito pira kena, ento ka tiyo gin ma ngat ma yam oora mito.”​—Jon 6:38.

18, 19. (a) Tit kong kit ma lok pa Rose gin ki Christopher nyuto kwede ni moko tam me nongo batija kelo mot mapol? (b) Iwinyo nining pi mot ma bino pi nongo batija?

¹⁸ Ki lok ada, batija obedo gin ma pire tek adada ma myero in nyo ngati mo keken pe oter calo gin me tuku. Kitungcel bene, obedo twon mot madit me dyero kwoni ki dok me nongo batija. Jo matino ma gimaro Jehovah dok giniang te lok me dyere pe gibigalle ki nongo batija; dok bene pe gibikoko ange pi tam ma gumoko. Lamego mo me mwaka apar ki wiye ma nyinge Rose owaco ni: “Amaro Jehovah dok pe aromo nongo yomcwiny ki i timo gin mukene mapat ki timo mitine. Pe tye gin mo mukene ma onongo pire tek bota adada makato moko tam me nongo batija.”

¹⁹ Christopher ma kiloko i kome i acakki me pwony man kono? En winyo nining pi tam ma en omoko me nongo batija i kare ma onongo tye ki mwaka 12? Christopher owaco ni cwinye yom adada pi tam ma emoko me nongo batija. En ocako tic macalo painia i kare ma oo mwaka 17, dok kicime me tic macalo lakony kor tic i kare ma oo mwaka 18. Kombeddi en tye ka tic i Betel. En owacci: “Tam ma amoko me nongo batija obedo tam matir. Kwona opong ki yomcwiny me tiyo tic pa Jehovah ki dulle.” Ka itye ki tam me nongo batija, itwero yubbe pire nining? Pwony ma lubo man bigamo lapeny meno.