I 2012, lugol jami ma i te ngom gunongo agulu abino mo ma otyer ma dong orii mwaki 3,000 kulu. Lukwed lok cwinygi obedo yom adada. Pingo? Pe pi agulu meno ento pi coc ma onongo tye i kome.

I kare ma lugol jami ma i te ngom guribo agulu ka ma otyer-ni, onongo dong giromo kwano coc ma jo Kanaan gucoyo i kom agulu man. Kwanne ni: “Eshba’al Ben Beda,” ma gonye ni “Ecibaal wod pa Beda.” Man aye tyen mukwongo ma lugol jami ki i te ngom gunongo nying man i kom gin mo ma kiyubo wacon.

Ngat mukene ma kilwongo ni Ecibaal bene kiloko i kome i Baibul. En onongo obedo latin pa Kabaka Caulo. (1 Tekwaro 8:33; 9:39) Professor Yosef Garfinkel, ngat acel i kin jo ma gunong abino man, owaco ni: “Tye me yomcwiny me ngeyone ni nying ni Ecibaal bene tye i Baibul, dok bene dong tye i rekod pa jo ma gigolo jami ma i te ngom, gin acel keken ma obedo i kare me loc pa Kabaka Daudi.” Man obedo gin acel ma nyuto ni jo ma gigolo jami ma i te ngom gicwako lok ma tye i Baibul!

I Baibul, Ecibaal, wod pa Caulo bene onongo kilwongo ni Icbocet. (2 Camuel 2:10) Pingo kono kiloko “baal” ki “bocet”? Lukwed lok giwaco ni ngat ma ocoyo buk pa Camuel me aryo oweyo tic ki nying ni Ecibaal pien onongo poyo wi Luicrael i kom baal, lubanga me kot pa jo Kanaan. Ento kadi bed kit meno, i buk me tekwaro me acel, pud wanongo nying ni Ecibaal.