1. Pingo jo mogo gupore me awora, ki dok gin ango ma wabinyamo i pwony man?

WANYUTO woro bot dano nining? Watimo man kun nongo wawinyogi dok bene wamwolle botgi. Pol kare wanyuto woro bot jo ma gutimo gin mo maber nyo jo ma gitye ka tic matek nyo ma rwom me dog ticgi lamal. I pwony man, wabinyamo lok i kom angagi ma myero waworgi ki dok pingo.

2, 3. (a) Pingo Jehovah opore me nongo deyo? (Nen cal ma tye i pot karatac 3.) (b) Latin romo ma kiloko i kome i Niyabo 5:13 obedo anga, dok pingo myero wamiye deyo?

² Niyabo 5:13 waco ni “Ngat ma obedo i wi komker” ki “Latin romo” gupore me nongo deyo. “Ngat ma obedo i wi komker” aye Jehovah. I Niyabo cura 4, cwec ma i polo giwacciwa tyen lok acel mumiyo Jehovah, “Ngat ma obedo i wi komker ca, ma bedo kwo nakanaka,” opore me nongo deyo. Giwacci: Jehovah “Lubangawa, in imyero me  nongo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.”—Niyabo 4:9-11.

³ “Latin romo” ma kiloko i kome i Niyabo 5:13 en aye Yecu Kricito. Wangeyo nining? I kare ma Yecu tye i lobo kany, onongo kilwonge ni “Latin romo pa Lubanga ma kwanyo bal me lobo!” (Jon 1:29) Tika tye kabaka mo ma oye me miyo kwone macalo ginkok pi jone? Ki lok ada, meno obedo tyen lok mupore me miyo deyo bot Yecu. Yecu opore me nongo deyo pien en “Kabaka pa luker ducu, Rwot pa rwodi.” (1 Temceo 6:14-16) Twero bedo ni in bene iwinyo kit macalo cwec ma i polo giwinyo kwede i kare ma guwero ni: “Latin romo ma gineko-ni en aye ma myero me nongo twero, lonyo, ryeko ki teko, woro ki deyo kacel ki pwoc!”—Niyabo 5:12.

4. Pingo tye me ryeko botwa me keto deyo i kom Jehovah gin ki Kricito?

⁴ Jon 5:22, 23 waco ni Jehovah oketo Kricito me bedo langolkop pa dano ducu. Meno aye tyen lok ma pire tek botwa me miyo deyo bot Yecu. Ki dok ka watimo man nongo watye ka woro Jehovah bene. Ka waworo Yecu gin ki Wonne ci wabinongo kwo ma pe tum.—Kwan Jabuli 2:11, 12.

5. Pingo dano ducu gupore me awora?

⁵ “Lubanga ocweyo dano i kit calle kikome.” (Acakki 1:27) Man te lokke ni dano mapol gitwero nyuto kit calo pa Lubanga. Me labolle, dano twero nyuto mar ki kica. Dano bene kicweyogi ki cwiny ma ngoligi kop, kero me ngeyo gin maber ki marac, ki gin mupore ki ma pe opore. (Jo Roma 2:14, 15) Jo mapol gimaro jami maleng dok gimito bedo ki kuc ki jo mukene. Man pe tye me ur pien Jehovah obedo Lubanga me kuc dok pe mito anyobanyoba. Ki lok ada, kicweyo dano ducu ki kero me lubo kit Jehovah. Pi meno, mitte ni waworgi.—Jabuli 8:5.

6, 7. Lucaden pa Jehovah dok gipat ki jo mapol nining ka odok i kom miyo deyo bot jo mukene?

⁶ Wangeyo ni tye dano mukene ma gupore me awora, ento twero bedo tek me ngeyo kit kodi woro ango ma myero wami ki dok i rwom ma mene. Tye kumeno pien cwiny me lobo pa Catan-ni orwako lwite adada i cwiny dano mapol ma gitye ki roc. Dano mapol gitero jo mukene calo lubangagi. Ma ka minigi woro i kit ma Jehovah cwako, dano giworo jo mukene mukato kare woko. Giporo kit me ruk ki kwo pa luwibye ki lutela dini, lutuku, lutuk filim, ki dong jo mogo muywek.

⁷ Lukricitayo me ada gingeyo ni pe opore me miyo deyo bot dano wa i rwom meno. Ki i kin dano ducu ma gukwo i lobo, Yecu kene aye ma oweko lanen maber me aluba. (1 Petero 2:21) Wiwa myero opo ni “dano ducu gubalo, pe gio i kom deyo pa Lubanga.” (Jo Roma 3:23) Pe tye dano mo ma opore me nongo worowa. Cwero cwiny Jehovah adada ka wamiyo deyo nyo woro i yo ma pe opore bot dano.

8, 9. (a) Lucaden pa Jehovah gineno lutela pa gamente nining? (b) Ngo ma twero weko pe wawinyo lutela?

 ⁸ Tye jo mogo ma gupore me awora pi rwom me dog ticgi. Me labolle, tam i kom lutela pa gamente ki jami ma gitimo piri. Gikonyo me gwoko kuc ki cobo miti pa lutedero. Wanongo adwogi mabeco mapol pi jami ma gitimo. Lakwena Paulo owaco ni myero wanen lutela pa gamente magi macalo ‘luloc ma giloyowa.’ En bene owaco ni myero walub cikgi: “Wucul gin ma myero bot ngat acel acel, wucul mucoro bot wegi mucoro, ki ajog bot wegi ajog, wulwor jo ma myero me alwora, wuwor jo ma myero me awora.”—Jo Roma 13:1, 7.

⁹ Macalo Lucaden pa Jehovah, watimo jami ducu ma watwero me nyuto bot lutela pa gamente ni waworogi. Ngene kene ni cik me lobe ducu pe girom, pien gin ma lutela gimito ki botwa i lobo moni pe twero bedo rom ki i lobo mukene. Kadi bed kit meno, wanotte ki lutela pa gamente ka nongo gitye ka tiyo ticgi. Ento, ka guwaco ni watim gin ma weko waturo cik pa Jehovah, pe watimo. Ka meno otimme, wabedo luwiny bot Jehovah dok wawore makato dano adana.—Kwan 1 Petero 2:13-17.

10. Lutic pa Jehovah i kare macon guweko lanen maber botwa i kare-ni nining?

¹⁰ Watwero nongo pwony ki bot lutic pa Jehovah me kare macon ma gunyuto woro i kom lutela pa gamente. Yucepu gin ki Maliam guweko botwa lanen maber adada. I kare ma Luroma gimito ngeyo wel dano ma tye i lobogi, Yucepu gin ki Maliam gucito i Beterekem ka cone kadi bed ni Maliam onongo dong iye odongo macok nywal. (Luka 2:1-5) Lakwena Paulo bene onyuto woro bot luloc. I kare ma kidote ni otimo gin mo marac, en otito gin ma otimme ki woro i nyim Kabaka Kerode Agripa ki Festo, gabuna pa Luroma ma loyo Judaya.—Tic pa Lukwena 25:1-12; 26:1-3.

11, 12. (a) Pingo pe myero wawor lutela dini i yo mo ma dok pat? (b) Gin ango ma otimme pien Lacaden mo me lobo Austria onyuto woro bot lawibye mo?

¹¹ Lutela dini kono? Tika myero waminigi woro i yo mo ma dok kite pat? Waworogi kit ma waworo kwede ki jo mukene-ni. Ento pe twero bedo gin maber ka dok waworogi i yo kite dok pat, kadi bed ni gimito. Pingo? Pien lutela me dini goba pe gipwonyo dano lok ada ma tye i Baibul madok i kom Lubanga. Yecu ocayo lutela dini goba kun lwongogi ni lugoba ki lutela maraco. (Matayo 23:23, 24) Kitungcel, pe rac me miyo woro bot lutela pa gamente. Macalo adwogine, i kare mogo dok gikonyowa.

¹² Ngat acel i kin lutela magi obedo Dr. Heinrich Gleissner, lawibye me lobo Austria. Lumony me Germany gumake i kare me Lweny me II me Wi Lobo. I kare ma kikete i gar wek kitere i kam, en orwatte ki Leopold Engleitner, Lacaden mo ma tye ki arima ma a ki i Austria. Omego Engleitner otito pi niyene i yo me woro bot Dr. Gleissner, dok en ociko iti ka winyo lok pa  Omego Engleitner. I kare ma lweny ogik, Dr. Gleissner, obedo ka tic ki rwomme me dog tic me konyo Lucaden ma i Austria kare ki kare. Twero bedo ni ingeyo jami mabeco mapol ma gutimme pien Lukricitayo gunyuto woro bot lutela pa gamente.

13. Angagi ma gupore me awora, ki dok pingo?

¹³ Omegiwa kacel ki lumegiwa bene gupore me awora. Man pore tutwalle pi omege ma gitelowa, me labolle, luelda, luneno me adwol, Komitti me Jang gang kal, ki dong lumemba me Lukiko Madit. (Kwan 1 Temceo 5:17.) Gin ducu giparo pi jo pa Lubanga, dok Baibul lwongogi ni ‘mot ma obedo dano.’ (Jo Epeco 4:8) Pi meno, myero waworgi labongo paro ka ma gia ki iye, rwom me kwangi, rwom me kwogi, nyo cente ma gitye kwede. Lukricitayo macon guweko botwa lanen maber adada i timo man. Guworo jo ma onongo gitye ka telogi, wan bene watimo kit meno i kare-ni. Ka watye kacel ki jo magi pe dok waterogi calo gubedo lumalaika, nyo ni gitek loyo jo mukene. Ento wanyutigi woro pi tic matek ma gitye ka tiyone ki cwiny me mwolo ma gitye kwede.—Kwan 2 Jo Korint 1:24; Niyabo 19:10.

14, 15. Luelda gipat ki lutela dini mukene-ni nining?

¹⁴ Luelda magi gitye macalo lukwat ma gimwol. Pe gimito ni kitergi calo jo ma guywek. Pi meno, gipat adada ki lutela dini me kare-ni ki ma i kare pa Yecu. Yecu oloko i komgi ni: “Gimaro bedo i kabedo me deyo i karama, ki  bedo i kom me dito i kacokke. Dok bene gimito ni dano omotgi wa i cuk-gu.”—Matayo 23:6, 7.

¹⁵ Luelda gilubo lok pa Yecu ni: “Pe myero gilwongwu ni, ‘Lapwony’, pien wutye ki lapwony acel, pi meno wun ducu dong odoko utmego. Dok bene pe wulwong dano mo ni wonwu i wi lobo, pien Wonwu tye acel, en aye ngat ma tye i polo. Pe bene gilwongwu ni lutel, pien wutye ki latelwu acel ma en aye Kricito ma Lubanga oyero. Dano madit ma loyo ki i kinwu aye bibedo laticwu. Pien ngat ma kette kene ni edit, gibidwokke piny, ento ngat ma mwolle kene gibimiyo doko dit.” (Matayo 23:8-12) Ka luelda ma gitye i kacokke i twok lobo-ni ducu ginyuto cwiny me mwolo dok gilubo lok pa Yecu, ci omege ki lumege bene bimarogi, kun bene giworogi.

16. Pingo myero watute matek me nyuto woro?

¹⁶ Twero tero kare wek wapwony kit me nyuto woro bot jo mukene. Man bene gin ma otimme i kom Lukricitayo me cencwari me acel. (Tic pa Lukwena 10:22-26; 3 Jon 9, 10) Ento tutewa bikelo adwogi maber. Ka wanyuto woro bot jo mukene i yo ma Jehovah mito, ci wabinongo mot mapol.

17. Adwogi maber ango ma bino pi nyuto woro bot jo ma gitye ki twero?

¹⁷ Ka waworo lutela ma giloyo kabedowa, ci labongo akalakala gibiweko wabedo agonya me tito kwena. Gitwero bedo bene ki pwoc i kom ticwa me tito kwena. Man en aye gin ma otimme mwaki mapol angec i lobo Germany i kare ma lapainia mo ma nyinge Birgit owoto i yub me kwero kwan pa nyare. Lupwonye guwaco ki Birgit ni obedo mot madit me bedo ki lutino pa Lucaden i ot kwan pi mwaki mapol. Onongo giwinyo ni lutino pa Lucaden oweko cukul odoko kabedo maber loyo. Birgit owaco botgi ni, “Lutinowa kipwonyogi me lubo cik pa Lubanga, ma meno tye iye woro lupwonyegi.” Lapwony acel owaco ni ka lutino ducu onongo gitye calo lutino pa Lucaden, pwony onongo bibedo gin mayot adada. Onongo gitye ki neno maber adada i kom lutino pa Lucaden dok man oweko lapwony acel obedo i gure madit.

18, 19. Gin ango ma myero wiwa opo iye ka watye ka nyuto woro bot luelda?

¹⁸ Cik ma iye lac ma tye i lok pa Lubanga twero konyowa me nyuto woro muporo bot luelda i kacokke. (Kwan Jo Ibru 13:7, 17.) Myero wapwogi pi tic matek ma gitye ka timone. Ka  walubo tira ma giminiwa, man biweko gitiyo ticgi ki yomcwiny. Baibul waco ni myero bene walub niyegi. Ento man pe te lokke ni myero watim jami ducu kit ma laelda mo ma ngene timo kwede, calo rukke, lokke, ki dong kit me pwonye. Ka ni watim kit meno, ci rom ma nongo watye ka lubo kor dano ma ka Kricito. Myero wiwa pe owil ni luelda gitye ki roc calo wan bene.

¹⁹ Ka wanyuto woro mupore bot luelda dok pe waterogi calo jo muywek i lobo-ni, man bikonyogi adada. Nining? Man bikonyogi me bedo jo mamwol dok weko pe gibedo ka tamo ni meno giber gikato jo mukene nyo ni jami ducu ma gitimo kare ducu tye atir.

20. Adwogi maber ango ma wanongo ka waworo jo mukene?

²⁰ Woro jo mukene weko pe wabedo ka paro piwa kenwa dok konyowa me bedo jo mamwol ka nongo kitye ka worowa. Gwokowa bene pien weko pe waturo gennewa ka jo ma waworo gutimo gin mo marac. Adwogi maber mukene aye ni weko wabedo ma wanote i dul pa Jehovah. Dul pa Jehovah pe miyo deyo mukato kare woko bot ngat mo keken, kadi bed ni laye nyo pe.

21. Adwogi maber ango ma wanongo ka wanyuto woro bot jo mukene?

²¹ Gin ma pire tek ma weko wanyuto woro bot jo mukene en aye ni yomo cwiny Lubanga. Nongo watye ka timo gin ma en mito ni watim dok wabigwoko genewa bote. Jehovah bidok i kom cac pa Catan ma owaco ni pe tye ngat mo ma twero bedo lagen nakanaka. (Carolok 27:11) Dano mapol pe giniang kit me nyuto woro i yo mupore bot jo mukene. Watye ki yomcwiny ni wangeyo kit me nyuto woro i yo ma Jehovah mito!