WAN ducu wamito ni dano onenwa ni kitwa ber. Ento pe yot me nyuto ber kit i kare-ni. Tyen lok acel aye ni jo mapol ‘gidag gin maber.’ (2 Tem. 3:3) Gikwero lubo cik ma Jehovah oketo. Gin ma Jehovah waco ni ber gin giwaco “ni rac” dok gin ma en waco ni rac gin giwaco “ni ber.” (Ic. 5:20) Twero bedo tek me timo gin maber pi kit marac ma onongo wakwo kwede con kacel ki roc ma watye kwede. Pi meno, watwero winyo calo Anne, * ma kadi bed ni otiyo pi Jehovah pi mwaki mapol owaco ni, “Anongo tek mada me ye ni atwero bedo dano maber.”

Tye me yomcwiny ni wan ducu watwero dongo kit maber! Obedo but nyig ma nyak pi cwiny pa Lubanga, dok cwiny mere tek ma loyo ariya mo keken ma watwero rwatte kwede. Kong dong wanyamu ber kit i yo matut wek wapwony kit ma watwero nyutone kwede.

I yo macek, ber kit obedo timo gin maber, gin ma tye atir, labongo tam marac nyo col cwiny mo. Ngat ma kite ber pol kare yenyo yo me konyo jo mukene dok timo jami mabeco pigi.

Twero bedo ni ineno ni yot ki jo mukene me timo jami mabeco bot jo me pacigi ki luremgi, ento tika meno keken romo? Ki lok ada, wan ducu pe watwero nyuto ber kitwa kare weng pien Baibul wacciwa ni “pe tye dano mo ma kite atir i lobo man, ma timo gin maber keken ma pe balo.” (Latit. 7:20) Lakwena Paulo bene oye ni: “Angeyo ni gin mo maber pe ma bedo i iya.” (Rom. 7:18) Dong onen ka maleng ni ka wamito dongo kit man, omyero wapwony ki bot Jehovah, ma en aye wang it me kit maber.

Lubanga Jehovah aye ma moko ka gin moni ber. Ma lubbe ki kite, Baibul wacciwa ni: “In iber, dok itimo gin maber bene; pwonya ki cikki.” (Jab. 119:68) Kong dong wanyamu bute aryo me ber pa Jehovah ma kitito i tyeng man.

Jehovah ber. Ber pa Jehovah obedo but kite ma pire tek. Tam kong i kom gin mutimme i kare ma Jehovah owaco ki Moses ni: “Abimiyo berra ducu kato ki i nyimi.” I kare ma Jehovah tye ka nyuto deyone ki Moses ma i kine bene tye iye berre, Moses owinyo ka dwan mo waco ni: ‘Jehovah, Jehovah, Lubanga ma lakica dok maro dano, kiniga pe make oyot, marre ma pe lokke dwong, en lagen mada. En gwoko mar ma pe lokke pi jo alip ki alip, kun weko rocgi, ki tim aranyigi ki balgi. En pe biweko lubalo labongo pwod mo.’ (Nia 33:19; 34:6, 7) Man nyuto ka maleng ni Jehovah ber i yo ducu. Kadi bed ni Yecu aye dano ma kite ber loyo ma okwo i lobo, en pud owaco ni: “Pe tye ngat mo maber kono Lubanga keken.”​—Luka 18:19.

Tic pa Jehovah ducu ber. Jami ducu ma Jehovah timo nyuto ni en ber. “[Jehovah]  ber bot dano ducu, dok kica make i kom gin ducu ma en oketo.” (Jab. 145:9) Pien Jehovah kite ber dok pe poko kin dano, en miyo bot dano ducu kwo ki jami ma mitte wek gubed kwo. (Tic 14:17) En bene nyuto berre ki timiwa kica. Laco Jabuli owaco ni: “Ai Rwot [Jehovah], in iber dok itye atera me weko bal pa dano.” (Jab. 86:5) Watwero bedo ki gen ni “[Jehovah] pe twono dano ma gilube ma cwinygi leng, ki gin mo maber.”​—Jab. 84:11.

Wan ducu kicweyowa i cal pa Lubanga, pi meno watwero bedo jo mabeco kun watimo jami mabeco. (Acak. 1:27) Man pe obedo gin ma kinywalowa anywala kwede. Jehovah wacciwa ni omyero ‘wapwonnye me timo gin maber.’ (Ic. 1:17) Ento watwero dongo kit man mamwonya-ni nining? Nen kong yo adek ma watwero timone kwede.

Me acel, omyero waleg pi cwiny maleng, ma twero konyo Lukricitayo me bedo jo mabeco i wang Lubanga. (Gal. 5:22) Ada, cwiny maleng pa Lubanga twero konyowa me maro gin maber ki dago gin marac. (Rom. 12:9) Ki lok ada, Baibul nyuto ni Jehovah twero weko ‘wamoko matek i tic ki lok ducu mabeco.’​—2 Tec. 2:16, 17.

Me aryo, omyero wakwan Lok pa Lubanga. Ka watimo man, ci Jehovah bipwonyowa me ‘lubo yo ma tye atir keken’ dok wabibedo atera me “tiyo kit tic mo maber ducu.” (Car. 2:9; 2 Tem. 3:17) Ka wakwano Baibul dok walwodo lok ma wakwano, ci wapongo cwinywa ki jami mabeco i kom Lubanga ki mitine. Meno bedo calo watye ka medo lonyo ma watye kwede ma twero konyowa lacen.​—Luka 6:45; Ep. 5:9.

Me adek, watute me ‘lubo gin maber.’ (3 Jon 11) Wanongo lanen me aluba i Baibul. Ngene kene ni lanen maber loyo aye Jehovah ki Yecu. Ento pud watwero neno lanen pa jo mukene ma gingene pi bedo jo mabeco. Jo aryo ma watwero tam i komgi aye Tabica ki Barnaba. (Tic 9:36; 11:22-24) Itwero nongo adwogi maber ki i lanengi ka ikwano lok ma kicoyo i komgi i Baibul. I kare me kwanni, nen jami ma gutimo me konyo jo mukene. Tam i kom jami ma itwero timo me konyo jo gangwu nyo jo me kacokkewu. Dok nen bene jami mabeco mutimme i kom Tabica ki Barnaba pien gutimo ber bot jo mukene. In bene itwero nongo adwogi maber kit meno.

Waromo tamo bene i kom labol pa jo mogo ma i karewa-ni ma gitimo jami mabeco. Me  labolle, tam kong i kom luelda ma gitiyo matek i kacokke dok ‘gimaro gin maber.’ Jo mukene ma myero wiwa pe owil i komgi aye lumege ma lokgi ki lanengi “pwonyo gin maber.” (Tito 1:8; 2:3) Laminwa mo ma nyinge Roslyn otito ni: “Lamego mo ma larema yelle matek me konyo ki cuko cwiny jo mukene me kacokke. En tamo i kom pekkigi ci pol kare miyogi mic matino tino nyo konyogi i yo mukene. Anene calo ngat ma kite ber adada.”

Jehovah cuko cwiny jone me ‘lubo gin maber.’ (Amoc 5:14) Ka watimo kit meno, ci pe wabimaro cikke keken ento bene wabijingo mitiwa me timo jami mabeco.

Me timo gin maber, pe mitte ni omyero wami jami ma welgi tek nyo watim jami madongo pi jo mukene. Me labolle: Wek ginapita moni odong maber, pe waonyo iye pii madwong kicel keken ci otum. Me ka meno, waonyo iye pii manok kare ki kare. I yo acel-lu, ber kitwa bene nen woko i jami matino tino ma watimo pi jo mukene.

Baibul cuko cwinywa me ‘yubbe’ ki dok bedo ‘atera’ me timo gin ducu maber. (2 Tem. 2:21; Tito 3:1) Ka wabedo ma wangwa twolo i kom gin ma tye ka timme i kwo pa jo mukene, ci watwero neno kit me yomo cwinygi wek ‘okonygi, wek gudong i niye.’ (Rom. 15:2) Meno kwako bene nywako jami ma watye kwede ki jo mukene. (Car. 3:27) Me labolle, watwero lwongo ngat mo i pacowa pi cam mo manok nyo namo. Ka waniang ni ngat moni kome lit, watwero cwalo bote kad, walimme, nyo wagoyo bote cim. Ada, watwero yenyo kare me waco ‘lok mabeco ma dongo tam pa dano i yo ma mitte, wek jo ma winyo lokwa gunong kony ki iye.’​—Ep. 4:29.

Calo Jehovah, wan bene wayenyo yo me timo gin maber bot jo ducu. Pi meno omyero pe wapok kin dano. Yo acel maber me timo meno aye ki tito kwena maber me Ker-ri bot jo ducu. Kit ma Yecu ocikowa, wayelle me timo ber kadi wa bot jo ma dagwa. (Luka 6:27) Pe rac matwal me nyuto cwiny me kica ki timo gin maber bot jo mukene, pien “cik mo pe ma kwero gin macalo magi.” (Gal. 5:22, 23) Ka watimo ber kadi wa bot jo ma giterowa marac nyo kadi watye ka deno can, waromo ywayo jo mukene i ada dok wakelo deyo bot Lubanga.​—1 Pet. 3:16, 17.

“Dano maber limo mere bakacic maber pi gin maber ma en otiyo.” (Car. 14:14) Mot macalo mene? Ka watimo ber bot jo mukene, pol kare gin bene giterowa maber. (Car. 14:22) Kadi bed pe guterowa maber, meddewa ki timo jami mabeco twero loko tamgi.​—Rom. 12:20.

Ka watimo ber dok wajuko timo jami maraco, wanongo adwogi maber i kwowa bene. Omege ki lumege mapol giye lok man. Tam kong gin mutimme i kom laminwa Nancy. En owaco ni: “Adongo ma amaro tim bwami ki tarwang, dok onongo pe aworo ngat mo. Ento, ma acako pwonyo ki keto i tic kit maber ma Lubanga mito, cwinya ocako doko yom. Kombeddi dong atye ki woro i koma kekena.”

Tyen lok ma pire tek loyo mumiyo omyero wanyut ber kit aye ni man yomo cwiny Jehovah. Kadi bed jo mapol pe gineno jami ma watimo, ento Jehovah neno. En ngeyo jami mabeco ducu ma watimo ki tam mabeco ma watamo. (Ep. 6:7, 8) En culowa nining? “Rwot [Jehovah] bedo ki yomcwiny i kom dano ma kite atir.” (Car. 12:2) Pi meno omyero wamedde ki dongo kit maber. Jehovah ocikke ni “dano ducu ma timo gin maber binongo deyo ki woro ki kuc.”​—Rom. 2:10.