1-2. (a) Jehovah obedo ka kubbe ki dano nining i kare mukato ki dong i kare-ni? (b) Ngo ma wabinyamo i pwony man?

JEHOVAH maro lok kwedwa. I kare mukato angec, en otiyo ki lunebi, lumalaika ki dong Wode, Yecu Kricito me tittiwa tamme. (Amoc 3:7; Gal. 3:19; Yabo 1:1) I kare-ni, en loko kwedwa kun tiyo ki Lokke, ma en aye Baibul. En omiyo Baibul botwa wek wapwony tamme dok waniang yone.

² I kare ma Yecu onongo tye i lobo, Jehovah oloko ki i polo tyen adek. Kong dong wanenu gin ma Jehovah owaco, gin ma watwero pwonyo ki i lokke, ki dong adwogi maber ma wanongo ki i lokke.

3. Kit ma wakwano kwede i Marako 1:9-11, gin ango ma Jehovah owaco i kare ma Yecu onongo batija, dok jami ma pigi tego ango ma lok meno omoko?

³ Marako 1:9-11 otito tyen mukwongo ma Jehovah oloko ki i polo. (Kwan.) En owaco ni: “In aye Woda ma amaro, ma cwinya yom i komi.” Man nen calo ogudo cwiny Yecu adada me winyo dwan Wonne ka tito mar ki gen ma en tye kwede i kom Wode! Lok pa Jehovah omoko jami adek ma pigi tek madok i kom Yecu. Me acel, Yecu aye Wode. Me aryo, Jehovah maro Wode. Ki dong me adek, cwiny Jehovah yom i kom Wode. Kong dong wanenu lok magi kore ki kore.

4. Yecu odoko Wod pa Lubanga i yo manyen ango i kare me batijane?

⁴ “In aye Woda.” I kare ma en otito lok man, Jehovah onyuto ni Yecu odoko Wode i yo manyen. Ma Yecu peya  obino i lobo, en onongo dong tye Wod pa Lubanga. Ento, i kare me batijane, en odoko Wod pa Lubanga i yo manyen. Kiwire ki cwiny maleng dok ocako bedo ki gen me dok cen i polo wek edok Kabaka ki Lalamdog Madit ma Jehovah ocimo. (Luka 1:31-33; Ibru 1:8, 9; 2:17) Pi meno i kare ma Yecu onongo batija, Wonne obedo ki tyen lok ma atir me waco ni: “In aye i Woda.”​—Luka 3:22.

5. Watwero lubo lanen pa Jehovah nining i nyuto mar ki cuko cwiny?

⁵ “In aye Woda ma amaro.” Lanen pa Jehovah i tito marre ki cwakke pi wode ka maleng poyo wiwa ni omyero wayeny kare me cuko cwiny jo mukene. (Jon 5:20) Wajing matek ka ngat mo ma wamaro onyutiwa mar dok opwoyowa pi gin mo maber ma watimo. Kit meno, omegiwa ki lumegiwa me kacokke kacel ki jo me odiwa gimito mar ki cuko cwiny ma a ki botwa. Ka wapwoyo jo mukene, wajingo niyegi dok wakonyogi me gwoko gennegi bot Jehovah. Mitte tutwal ni lunyodo gucuk cwiny lutinogi. Ka lunyodo gimiyo pwoc ki lutinogi dok ginyuto mar botgi, ci gikonyo lutinogi me bedo ma cwinygi yom.

6. Pingo omyero wabed ki gen i kom Yecu?

⁶ “Cwinya yom i komi.” Lok man nyuto ni Jehovah onongo tye ki tekcwiny ni Yecu bicobo tic kacel ki miti pa Wonne ducu kore ki kore. Pien Jehovah tye ki gen ma kit man i kom Wode, wan bene watwero bedo ki gen i kom Yecu ni en bicobo cikke pa Jehovah ducu piwa. (2 Kor. 1:20) Ka watamo matut i kom lanen pa Yecu, wabedo ki miti me pwonyo ki lubo lanene. Jehovah bene tye ki gen  ni macalo gurup, jone bimedde ki pwonyo lanen pa Wode.​—1 Pet. 2:21.

7. Ma lubbe ki Matayo 17:1-5, i kare mene ma Jehovah oloko ki i polo, dok en owaco gin ango?

⁷ Kwan Matayo 17:1-5. Tyen me aryo ma Jehovah oloko ki i polo bot Yecu obedo i kare ma kom Yecu “olokke woko.” Yecu onongo olwongo Petero, Yakobo, ki Jon me wot kacel kwede i wi got mo. I kare ma guo kuno, guneno ginanyuta mo ma kite dok pat. Wang Yecu oryeny calo ceng dok ginarukane odoko tar ma wil calo dero ceng. Moses ki Elia gunen ci gucako lok ki Yecu i kom tone kacel ki cerne. Kadi bed lukwena adek magi “onongo nino omako wanggi matek,” guneno ginanyuta me aura man i kare ma guco woko. (Luka 9:29-32) I nge meno, pol obino oumogi, ci guwinyo dwan mo ma kati ki i pol​—dwan Lubanga kikome! Kit ma otimme kwede i kare me batija pa Yecu, Jehovah otito pi cwakke i kom wode kacel ki marre pire, kun waco ni: “Man aye Woda ma amaro.” Ento i wang-ngi Jehovah omedo wi lokke ni: “Wuwinye.”

8. Adwogi ango ma ginanyuta man okelo i kom Yecu ki lupwonnyene?

⁸ Ginanyuta man onyuto deyo ki teko ma Yecu bibedo kwede i kare me anyim ka en tye ka loc macalo Kabaka me Ker pa Lubanga. Labongo akalakala mo, man ocuko cwiny Kricito dok ojinge pi can ki to malit ma onongo myero okany. Ginanyuta man bene odongo niye pa lupwonnye pa Yecu dok ojingogi pi atematema ma onongo gibikemme kwede ki tic matek ma onongo tye i nyimgi. Mwaki ma romo 30 anyim, lakwena Petero oloko i kom ginanyuta man, dok lokke onyuto ni gin ma guneno-ni onongo pud tye maleng i wiye.​—2 Pet. 1:16-18.

9. Tira ma tye me kony ango ma Yecu omiyo bot lupwonnyene?

⁹ “Wuwinye.” Jehovah oweko onen ka maleng ni emito ni wawiny dok walub lok pa Wode. Gin ango ma Yecu owaco i kare ma tye i lobo? En owaco jami mapol ma pigi tego ma omyero wawiny! Me labolle, en opwonyo lulub kore kit me tito kwena maber dok obedo ka poyo wigi ni omyero gubed ma wanggi twolo. (Mat. 24:42; 28:19, 20) En owaccigi ni omyero guket tek, dok ocuko cwinygi pe me ilo cinggi woko. (Luka 13:24) Yecu onwoyo ni lulub kore myero gumarre i kingi kekengi, gubed ma gunote, dok gulub cikke. (Jon 15:10, 12, 13) Tira ma Yecu omiyo bot lupwonnyene onongo tye me kony adada! Tira ma en omiyo pud pire tek i kare-ni marom aroma ki kare ma Yecu omiyo iye.

10-11. Watwero nyutone nining ni watye ka winyo lok pa Yecu?

¹⁰ Yecu owaco ni: “Dano ducu ma gicung pi ada giwinyo dwana.” (Jon 18:37, Baibol) Wanyuto ni watye ka winyo dwan Yecu ka ‘wadiyo cwinywa kekenwa, ngat acel acel diyo cwinye i kom lawote, kun watimo kica ki luwotwa.’ (Kol. 3:13; Luka 17:3, 4) Wanyuto bene ni watye ka winyo dwan Yecu ka watito kwena maber-ri ki mit kom “i kare maber ki i kare marac.”​—2 Tem. 4:2.

¹¹ Yecu owaco ni: “Romina winyo dwana.” (Jon 10:27) Lulub kor Kricito ginyuto ni giwinyo Yecu pe ki winyo lokke keken ento bene ki timone. Pe giweko “lok me kwo man” wiro tamgi ki i winyo  dwan Yecu. (Luka 21:34) Me ka meno, giketo winyo cik pa Yecu bedo gin ma pire tek loyo i kwogi, kadi wa i kare ma nongo kwo tek. Omegiwa mapol gitye ka kanyo pekki madongo, calo aunauna ma lumonewa keto i komgi, can lim, ki peko ma poto atura. Kadi bed kit meno, pud gimedde ki bedo lugen bot Jehovah. Yecu cuko cwinygi ni: “Ngat ma tye ki cikka, ma gwokogi, en aye ngat ma mara; ngat ma mara Wora bimare.”​—Jon 14:21.

12. I yo mukene ango ma watwero nyutone ni watye ka winyo Yecu?

¹² Man aye yo mukene ma wanyuto kwede ni watye ka winyo Yecu: Ka wawinyo lok pa jo ma Jehovah ocimogi me telo wiwa. (Ibru 13:7, 17) Dul pa Jehovah otimo alokaloka mapol i mwaki mogo macok cok-ki, calo jami tic kacel ki yo me pwony manyen pi ticwa me pwony, kit ma cokkewa me dye cabit woto kwede, ki kit ma wagero dok waroco kwede Odiwa me Ker. Pud dong watye ki pwoc madit pi tira ma kimiyowa ki mar! Watwero bedo labongo akalakala mo ni Jehovah bigoyo laane i kom tutewa me lubo tira ma en miyowa kun wok ki i dulle.

13. Adwogi maber ango ma wanongo pi winyo Yecu?

¹³ Watwero nongo adwogi maber ki i winyo jami ducu ma Yecu opwonyo. Yecu ocikke bot lupwonnyene ni jami ma en epwonyogi bimiyo gilimo yweyo. Yecu owaco ni: “Wubilimo yweyo i cwinywu. Pien yatta yot, ki yecca bene pe pek.” (Mat. 11:28-30) Lok pa Lubanga, ma tye iye Jiri angwen ma tito lok i kom kwo pa Yecu ki ticce me pwony, miyo walimo yweyo dok wabedo maryek. (Jab. 19:7; 23:3) Yecu otito ni: ‘Gitye ki yomcwiny, jo ma giwinyo lok pa Lubanga, dok gigwoko!’​—Luka 11:28.

14-15. (a) Kit ma kitito kwede i Jon 12:27, 28, tyen me adekke ma Jehovah oloko ki i polo obedo awene? (b) Pingo lok pa Jehovah man okweyo dok ojingo cwiny Yecu?

¹⁴ Kwan Jon 12:27, 28. Jiri pa Jon otito tyen me adekke ma Jehovah oloko ki i polo. Nino mogo manok ma Yecu peya oto, en onongo tye i Jerucalem ka kwero kwer me Kato me agikki ma en obedo  iye. En owaco ni: “Cwinya koni ongabbe angaba.” Ci olego Lubanga ni: “Abana, ket deyo i kom nyingi.” Wonne ogamo legane ki i polo ni: “Dong aketo deyo i kome, dok abiketo aye.”

¹⁵ Cwiny Yecu onongo ongabbe angaba pi tic madit ma tye i nyimme me gwoko gennene bot Jehovah. Yecu onongo ngeyo ni kibipwode matek dok ebito to malit. (Mat. 26:38) Gin ma pire tek loyo ma Yecu onongo mito aye me keto deyo i nying Wonne. Kimoro adot i kom Yecu ni en oyeto Lubanga, dok en obedo ka paro kit ma tone bilano kwede Lubanga. Lok pa Jehovah-ni nen calo ocuko cwiny Yecu adada! Man oweko en obedo ki gen ni kibiketo deyo i kom nying Jehovah. Lok pa Wonne myero obed ni okweyo cwinye dok ojinge me kanyo can ma en bikemme kwede. Kadi bed nen calo Yecu keken aye oniang gin ma Wonne owaco i nino meno, ento Jehovah oweko kicoyo Lokke man pi wan ducu.​—Jon 12:29, 30.

16. Pingo i kare mukene watwero bedo ki par ni dano bikelo lewic i kom nying Jehovah?

¹⁶ Calo Yecu, twero bedo ni wan bene watye ka paro ni dano bikelo lewic i kom nying Jehovah. Gwok nyo kiterowa marac calo Yecu. Nyo waromo bedo ka paro lok goba ma jo ma dagwa giwaco i komwa. Watwero bedo ka tamo kit ma ripot gobagoba magi lano kwede nying Jehovah  ki dulle. I kare ma kit man, lok pa Jehovah kweyo cwinywa adada. Pe omyero wabed ki par mukato kare woko ni kibiketo lewic i kom nying Jehovah ki dulle. Watwero bedo ki gen ni ‘kuc pa Lubanga ma kato ngec pa jo ducu bigwoko cwinywa ki tamwa maber i Kricito Yecu.’ (Pil. 4:6, 7) Jehovah kare ducu keto deyo i kom nyinge. Jehovah bitic ki Ker-ri me yubo jami ducu maraco ma Catan ki lobone otimo i kom Luticce ma lugen.​—Jab. 94:22, 23; Ic. 65:17.

17. Ma lubbe ki Icaya 30:21, Jehovah loko kwedwa nining i kare-ni?

¹⁷ Jehovah pud tye ka lok kwedwa i kare-ni. (Kwan Icaya 30:21.) Tye ada gire ni pe wawinyo dwan Lubanga ka loko ki i polo. Ento en miyowa tira kun tiyo ki Lokke, Baibul. Ki dok bene Jehovah tiyo ki cwiny mere maleng wek “lagwok-ot ma lagen” omedde ki miyo cam me cwiny bot luticce. (Luka 12:42) Pud dong watye ki cam me cwiny madwong i kabedowa me intanet, i bukke, vidio ki jami ma kimako i dwan!

18. I yo ango ma lok pa Jehovah dongo niyeni dok mini tekcwiny?

¹⁸ Omyero wiwa opo i kom lok ma Jehovah oloko i kare ma Wode tye i wi lobo! Dong, Lok pa Lubanga, ma kicoyo i Baibul myero ominiwa tekcwiny ni Jehovah tye ki twero dok en biroco gin mo keken marac ma Catan ki lobone gutimo i komwa. Dok omyero wamok tamwa me keto cwinywa ka winyo dwan Jehovah. Ka watimo kit meno, ci wabikanyo peko mo keken ma wakato ki iye i kare-ni ki ma bibino i anyim. Baibul poyo wiwa ni: “Mito wubed kun wuciro, wek omi wuti gin ma Lubanga mito, ci dong wunongo gin ma yam en ociko pire.”​—Ibru 10:36.