Jack gin ki Marie-Line gitye i tic pi kare malac kacel nicakke i mwaka 1988. Gingene tutwal pi jolo alokaloka ma gukato ki iye, dok gutiyo i kabedo mapol i lobo Guadeloupe ki French Guiana. Lobe aryo magi gitye i te twero pa jang gang kal me lobo France. Kong dong wapeny Jack gin ki Marie-Line lapeny mogo manok.

Ngo ma otugo cwinywu me donyo i tic pi kare malac?

Marie-Line: I kare ma an pud latin matidi i lobo Guadeloupe, onongo pol kare atito kwena cakke odiko wa otyeno kacel ki mamana, ma onongo tye Lacaden ma kome mit. An amaro dano, dong cutcut ma atyeko kwan i mwaka 1985, acako tic macalo painia.

Jack: I kare ma atye bulu, onongo pol kare amaro bedo ki jo ma gitye i tic pi kare malac, ma gimaro tic me pwony. Onongo atiyo macalo painia pi tutunu i kare me yweyo. I tum cabit, onongo kare mogo waito bac me cito i wang tic pa lupainia mukene. Onongo watito kwena cakke odiko me o wa otyeno ci lacen wacito ka yweyo i dog nam. Nino magi onongo yomo cwinywa adada!

I nge nyomo Marie-Line i mwaka 1988, apenye kekena ni, ‘Watye agonya, dong pingo pe amed cawana i tic me pwony?’ Acako tic macalo painia kacel ki Marie-Line. I nge tic macalo painia pi mwaka acel, kilwongowa i cukul pi painia ci ingeye kicimowa me tic macalo painia keken. Wabedo ki mot me tic mapatpat i lobo Guadeloupe ma peya kicimowa me cito ka tic i lobo French Guiana.

Mot me ticwu obedo ka lokke tyen mapol i mwaki mogo mukato. Ngo ma okonyowu me jolo alokaloka magi?

Marie-Line: Omege ma gitye i Betel me French Guiana gingeyo ni ginacoya ma wamaro loyo obedo Icaya 6:8. Dong ka gugoyo cim botwa, onongo pol kare gicako ki waco tukutuku ni, “Wiwu po i kom ginacoya ma wumaro loyo-ni?” Ka guwaco kit meno onongo waniang ni kibikobowa woko, pi meno onongo wawaco ni, “Wan waene; orwa!”

Wagwokke pe me bedo ka poro ticwa manyen ki macon pien timo meno twero gengowa  ki nyuto pwoc pi tic ma watye kwede. Wakwanyo bene kare me ngeyo omegiwa ki lumegiwa ma i kabedo manyen-ni.

Jack: I kare mukato angec, omege ki lumege mogo gutemo gengowa ki kobo i wang tic manyen pien onongo gimito ni wabed cok kwedgi. Ento i kare ma waa ki i Guadeloupe, omego acel opoyo wiwa i kom lok pa Yecu ma tye i Matayo 13:38 ma wacci: “Poto aye lobo man.” Dong ka kiminiwa mot me tic manyen, wiwa po ni pud watye ka tic i poto acel kadi bed kikobowa ka manyen. Tye kit meno pien dano aye pigi tek loyo wang tic!

Ka wao i wang tic manyen, kare ducu waneno ni jo ma gibedo kunnu gitye ka kwo ki yomcwiny. Pi meno, wan bene watute me kwo calo gin. Camgi twero bedo pat, ento wacamo gin ma gicamo dok wamato gin ma gimato, kun nongo bene wagwoko yotkomwa i yo ma mitte. Watute matek me lok maber i kom kabedo mo keken ma kicwalowa iye.

Marie-Line: Wapwonyo bene jami mapol ki bot omege me kabedo magi. Wiya po i kom gin mo mutimme i kare ma pud wao nyen i French Guiana. Kot onongo tye ka cwer ma ayom dene, ci watamo ni myero kong wakur kot ocok ka wek wakat woko ka tito kwena. Ento lamego mo openya ni, “Watwero cito?” Ki ur, apenye ni, “Nining?” En ogamo ni, “Kwany amburelani, ci wanyon lela waciti.” Meno aye kit ma apwonyo kwede kit me mako amburela ki cinga acel kun anyono lela ki cinga tungcel. Kono onongo pe apwonyo, kono pe abedo ka tito kwena i kare me cwir!

Dong wudak tyen ma romo 15 kulu. Tika wutye ki tam mo madok i kom dak ma twero konyo jo mukene?

Marie-Line: Kobo pe yot. Kadi bed kit meno, pire tek ni inong ot mo ma itwero bedo agonya iye ka idwogo ki i tic me pwony.

Jack: Pol kare awero i ot manyen ma wakobo iye-ni. Ka omege ma gitye i jang gang kal guniang ni pe wabiri i kabedo meno, onongo kare mogo giwacca tukutuku ni, “Jack, pe iyelle me wero ot-ti!”

Marie-Line ladiro adada i cano jami maber. En keto jami ducu i bok mapatpat ci coyo i komgi ni, “jami me cagati,” “kicika,” “jokon,” ki mukene. Man weko ka wao i kabedowa manyen, watingo bok magi waketogi ka ma myero gubed iye oyotoyot. En coyo piny jami ma tye i  bok acel acel wek wanong gin ma wamito oyotoyot.

Marie-Line: Kit ma dong wapwonnye me bedo ma wayubbe maber, watwero cako ticwa me tito kwena cutcut i nge o i kabedo manyen.

Wutiyo ki cawawu nining ma weko ‘wucobo ticwu ducu kakare’?—2 Tem. 4:5.

Marie-Line: I Ceng Baraja, waywe dok wayubbe pi cokke. Cakke ki i Ceng Aryo me o wa i tum cabit, wabedo i tic me pwony.

Jack: Kadi bed ni watye ki cawa ma omyero wami dwe ki dwe, wan pe waketo cwinywa iye. Tic me pwony aye obedo gin ma pire tek loyo i kwowa. Cakke i cawa ma waa kwede ki gang nio wa i cawa ma wadwogo kwede, watute me lok ki jo ducu ma warwatte kwedgi.

Marie-Line: Me labolle, ka watye ka cito ka namo, kare ducu atingo trak mogo. Jo mukene gibino gipenyowa pi bukkewa, kadi bed nongo pe watitigi ni wabedo Lucaden pa Jehovah. Pi tyen lok meno, wagwokke adada i kit ma warukke kwede ki timwa. Dano gineno jami ma kit meno.

Jack: Wan bene wamiyo caden ki nyuto kica bot jiraniwa. Acoko yugi, ka baket me yugi opong atero woko aonyo, dok acoko oboke ma oony i dyekal. Jiraniwa gineno jami magi dok i kare mukene gipenyowa ni, “Tika wutye ki Baibul mo pira?”

Kare ki kare wubedo ka tito kwena i caro. Tika tye gin mo ma kite dok pat ma otimme i kare me wotwu ma wiwu po iye?

Jack: I lobo Guiana, wang tic mogo o iye tek adada. Pol kare omyero wawot pi mairo 370 (kilomita 600) i cabit acel i yo marac. Wiwa pe twero wil i kom kare ma walimo caro me St. Élie, ma tye i dye bunga me Amazon. Watero cawa malac me o kunnu kun watiyo ki mutoka ma kanyo yo marac kacel ki yeya injin. Pol pa dano ma gibedo kunnu gubedo lutot jabu. Pwoc ma gubedo kwede pi bukkewa oweko jo mogo guminiwa jabu matinotino macalo mot me cwako ticwa! I otyeno, wanyuto vidiowa acel. Jo mapol gubino ka nenone.

Marie-Line: Mwaki mogo angec, kipenyo Jack ni omi pwony me Nipo i caro ma kilwongo ni Camopi. Me cito kunnu, waringo pi cawa angwen ki yeya injin i kulu ma kilwongo ni Oyapock River. Man obedo gin ma oyomo cwinywa adada.

Jack: Ka ma tye lung, acurcur pii twero keto kwo pa dano ka mading. Wek awacciwu, acurcur pii-ni leng adada ka wutye i yeya kun wuwoto ki nyikke cok kwede. Lakwang yeya myero obed ladiro wek okwang i wi acurcur pii man. Ento wot man oyomo cwinywa adada. Kadi bed ni Lucaden 6 keken aye gitye i caro meno, dano ma romo 50 gubedo tye pi Nipo, kadiwa Amerindians (rok ma gukwongo kwo i lobo Amerika)!

Marie-Line: Jo matino gitwero nongo kwo me yomcwiny kit man ka gumine me tic pi Jehovah. Myero igen Jehovah i jami magi ducu, ci niyeni bijing. Pol kare waneno kit ma Jehovah konyowa kwede.

Wupwonyo leb mapol. Tika onongo yot botwu me pwonyo leb?

Jack: Pe wacel. Apwonyo leb magi pien onongo mitte. Onongo mitte ni ador Nyamo Wi Lubele i leb Sranantongo * ma peya amiyo kadi wa pwony me kwano Baibul! Apenyo omego mo ka guniang lokka. En ogamo ni, “I kare mogo pe waniang lokki kulu, ento itimo maber adada.” Lutino matino aye onongo pol kare gikonya. Ka aloko lok ma pe tye kakare, onongo giwacca, ento ludito onongo pe giwacca gin mo. Apwonyo jami mapol ki bot lutino matino.

Marie-Line: I wang tic acel mo, onongo atye ki lutino kwan ma gikwano i leb French, Portuguese, ki Sranantongo. Lamego mo omina tam ni bedo ber ka acako kwan ki latin kwan ma loko leb ma an pe aniang iye maber, ma en aye Portuguese, ci atyek ki ma loko leb ma angeyo maber. Ma pe orii, aniang ryeko ma tye i tam meno.

 I nino mo acel, acako ki latin kwan ma loko leb Sranantongo ci latin kwan me aryone onongo loko leb Portuguese. I kare ma acako kwan ki latin kwan me aryo, lamego ma onongo tye ka tic kweda owacci, “Marie-Line, nen calo peko mo tye!” Aniang ni onongo atye ka lok ki dako ma a ki i lobo Brazil i leb Sranantongo me ka loko leb Portuguese!

Jo ma gutiyo kwedwu gimarowu matek. Wucako doko lurem maber kuman nining?

Jack: Carolok 11:25 waco ni: “Dano ma cwinye yom i miyo mot gimedo lonyo madwong bote.” Pe wagalle ki mine pi jo mukene kun bene watimo jami pigi. Ka odok i kom gwoko lengo ki roco Ot me Ker, omege mogo guwacca ni: “Wek lutit kwena aye gutim.” Ento an awaccigi ni: “Ba, an bene atye latit kwena. Dong ka tic mo mito atima, an bene myero abed iye.” Kadi bed wan ducu wamito kare mo me bedo kenwa, pol kare wapoyo wiwa kekenwa ni meno pe myero ogengwa ki timo jami mabeco pi jo mukene.

Marie-Line: Wakwanyo kare me nyuto miti i kom omegiwa ki lumegiwa. Pi meno, wangeyo ka gimito ni ngat mo okonygi ki gwoko lutinogi nyo gamogi ki i gang kwan. Ci waromo loko yubwa wek wabed atera me konyogi. Man weko wadongo wat macok kwedgi, kun nongo wabedo atera me konyogi ka gimito kony.

Mot ango ma wunongo pi tic ka ma can lutit kwena tye iye?

Jack: Tic pi kare malac okeliwa mot mapol adada. Pol kare wanongo mit pa neno cwec pa Jehovah. Kadi bed ni ariya tye mapol, watye ki wic ma opye mot pien wangeyo ni watye ki cwak pa jo pa Lubanga ka mo keken ma wacito iye.

I kare ma onongo pud an bulu, kitweya i lobo French Guiana pien akwero donyo i mony. Pe onongo atamo ni abidok cen kunu macalo lamiconari kun bene kimina mot me tic me limo lumabuc macalo latic pa Lubanga. Ki lok ada, Jehovah miyo mot ki yot cing!

Marie-Line: Gin ma yomo cwinya loyo aye jalle me tic pi jo mukene. Cwinywa yom me bedo i tic pa Jehovah. Man bene oweko wat i kinwa macalo jo munyomme tye macok. I kare mogo, Jack twero penyo ka waromo lwongo luot mo ma cwinygi otur ka cam kacel kwedwa. Pol kare amaro gamo ni, “An bene onongo atye ka tamo kit meno kikome!” Pol kare wanongo ni tamwa orwatte woko.

Jack: Cokcok-ki, kinongo ni atye ki two kanca ma mako kom me co. Kadi bed Marie-Line pe mito winyo lok man, ento dong atitte ni: “Lapalcwinya, ka ato diki, nongo ato ma ‘mwakana pud pe dit.’ Ento abito ma ayeng ki kwona, kun angeyo ni atiyo ki kwona me timo tic ma konye tye, me tic pi Jehovah dok man oweko cwinya yom.”—Acak. 25:8.

Marie-Line: Jehovah ominiwa mot me tic mapol ma onongo pe wabyeko. Adada kwowa opong ki jami mabeco. Wabicito ka mo keken ma dul pa Jehovah ocwalowa iye pien wageno ni Jehovah kare ducu bibedo kwedwa!