1. Kodi pekki ango ma jo pa Jehovah gitwero kato ki iye?

TIKA itye ka kato ki i peko mo madit? Twero bedo ni ngat mo ma i kacokke ocwero cwinyi. (Yak. 3:2) Gwok nyo lutic luwoti nyo lutino kwan luwoti gibedo ka cayi pien itiyo pi Jehovah. (1 Pet. 4:3, 4) Nyo lupacowu gitye ka temme me juki ki cito i cokke nyo tito pi niyeni bot jo mukene. (Mat. 10:35, 36) Ka atematema moni tek adada, itwero winyo ni gin maber aye me juko tic pi Jehovah woko. Ento itwero bedo ki gen ni kadi bed ikat ki i atematema matek, Jehovah bimini ryeko me lweny kwede kacel ki kero me kanyone.

2. Ma lubbe ki Jo Roma 15:4, adwogi maber ango ma wanongo ki i kwano Lok pa Lubanga?

² I Lokke, Jehovah oweko kicoyo labol pa jo ma gitye ki roc ki kit ma guciro kwede pekki mapatpat ma gukato ki iye. Pingo en oweko kitimo man? Wek wanong pwony ki i labolgi. Meno aye oweko lakwena Paulo ocoyo lok ma i Jo Roma 15:4. (Kwan.) Kwano lok magi twero weko wanongo kwecwiny dok wabedo ki gen. Ento wek wanong adwogi maber, omyero watim makato kwano mere Baibul keken. Omyero waye ni Ginacoya olok tamwa dok ogud cwinywa. Ngo ma watwero timo ka watye ka yenyo tira me lweny ki peko ma watye ka kato ki iye? Watwero timo jami angwen magi: (1) Legi, (2) Go i wi, (3) Lwodi, dok (4) Iket i tic. Kong dong wanyamu gin ma jami angwen magi gikwako. * I nge meno wabitiyo ki yo me kwan man me nongo pwony ki  i gin mutimme i kwo pa Kabaka Daudi ki lakwena Paulo.

3. Ma peya icako kwano Baibul, ngo ma omyero itim, dok pingo?

³ (1) Legi. Ma peya icako kwano Baibul, leg bot Jehovah wek okonyi me neno adwogi maber ma itwero nongo ki i gin ma ibikwano. Me labolle, ka itye ka yenyo tira me lweny ki peko moni, leg Jehovah wek okonyi me nongo cik ma igi lac i Lokke ma twero konyi me moko tam.​—Pil. 4:6, 7; Yak. 1:5.

4. Ngo ma twero konyi wek inong adwogi maber ki i kwanni me Baibul?

⁴ (2) Go i wi. Jehovah ocweyowa ki kero mamwonya adada me goyo cal jami i wiwa. Ka itye ka kwano lok i kom ngat moni ma kicoyo i Baibul, tem goyo gin ma tye ka timme i wi, kun igoyo ni in aye ibedo ngat ma kicoyo lok i kome-ni. Tute me neno jami ma en oneno dok item winyo kit ma en gwok owinyo kwede.

5. Lwodo lok obedo ngo, dok itwero lwodo lok i yo maber nining?

⁵ (3) Lwodi. Lwodo lok tyen lokke ni itamo matut i kom gin ma ia ka kwanone dok ineno kit ma lok meno gudi kwede. Man konyi me kubo tam mapatpat ki me niang lok meno i yo matut. Kwano Baibul labongo lwodone bedo calo camo dek muranga ma bot ma pe kicelo. Lwodo lok tye calo medo kado, moo, mutungulu, nyanya, binjari, ki jami ducu ma mitte wek obed mamit. Me konyi lwodo lok, itwero pennye kekeni dok igam lapeny magi: ‘Ngo ma ngat ma kicoyo lok i kome-ni otimo me konnye kekene? Jehovah kono okonye nining? Atwero tic ki pwony ma anongo-ni nining me konya ciro can?’

6. Pingo omyero waket gin ma wapwonyo i tic i kwowa?

⁶ (4) Ket i tic. Yecu owaco ni ka pe waketo i tic jami ma wapwonyo, ci wabedo calo laco ma ogero ode i kweyo. En otiyo matek ento ticce ducu obedo me nono. Pingo? Pien ka kot ocwer ki yamo magwar i kom ode, ci ode bipoto woko. (Mat. 7:24-27) I yo acel-lu, ka walego, wagoyo i wiwa, dok walwodo gin ma wakwano ento pe waketo i tic, ci nongo wabalo cawawa nono. Ka wakato ki i atematema, ci niyewa pe bibedo matek. Ki tungcel, ka wakwano dok waketo i tic gin ma wakwano, wamoko tam mabeco, wanongo kuc i kwowa, dok wadongo niye matek. (Ic. 48:17, 18) Kong dong watiyu ki jami adek ma wanyamogi-ni me nyamo gin mutimme i kwo pa Kabaka Daudi dok wanenu gin ma watwero pwonyo ki iye.

7. Wabinyamo lok i kom anga?

⁷ Tika laremi mo nyo ngat mo me gangwu oteri marac? Ka tye kit meno, ci itwero nongo adwogi maber ki i kwano gin mutimme i kwo pa Abcalom wod pa Kabaka Daudi ma otero wonne marac dok otemo mayo ker ki bot wonne tektek.​—2 Cam. 15:5-14, 31; 18:6-14.

8. Ngo ma itwero timo wek inong kony pa Jehovah?

⁸ (1) Legi. Tit ki Jehovah kit ma cwinyi tye ka cwer kwede pi kit ma kiteri kwede marac. (Jab. 6:6-9) Tite kit ma iwinyo kwede kikome. Ci ipeny Jehovah wek okonyi me nongo cik ma igi lac ma twero konyi ngeyo gin ma myero itim.

9. Ngo mutimme i kin Abcalom ki Daudi?

⁹ (2) Go i wi. Tam i kom jami ma tye ka timme, dok igo i wi kit ma gin mutimme ogudo kwede Kabaka Daudi. Wod pa Daudi ma nyinge Abcalom otiyo matek pi mwaki mapol me loko cwiny dano i kome  wek gumarre. (2 Cam. 15:7) I kare ma Abcalom otamo ni karene dong oromo, en ocwalo lukwena me cito i lobo Icrael pi tugo cwiny lwak me jole macalo lalocgi. En bene oloko cwiny larem Daudi macok adada ma onongo mine tam, ma nyinge Akitopel me ribbe kwede i jemo meno. Abcalom okette kekene macalo kabaka dok otute me mako ki neko Daudi, kun nen calo i kare meno onongo Daudi kome lit adada. (Jab. 41:1-9) Daudi oniang yub pa Abcalom ci omayo kome woko ki i Jerucalem. Lacen, lumony pa Abcalom gulwenyo ki lumony pa Daudi. Kiloyo lumony ma lujemo man, dok kineko Abcalom wod pa Daudi woko.

10. Kabaka Daudi onongo twero dok i atematema ma en okato ki iye nining?

¹⁰ I nge meno, go i wi kit ma nen calo Daudi owinyo kwede i kare ma jami magi ducu tye ka timme i kome. En onongo maro Abcalom matek dok onongo geno Akitopel. Kadi bed kit meno, jo aryo magi pud gutere marac. Gucwero cwinye adada dok gutute me neke woko. Daudi onongo twero rwenyo gen woko i kom lureme ducu kun tamo ni gin bene guribbe ki Abcalom i jemo. En onongo twero tamo me laro kwone kun ringo woko kene ki i Jerucalem. Nyo cwinye onongo twero tur adada ma weko en ilo cinge woko. Ento Daudi pe otimo jami magi. Me ka meno, en oloyo atematema magi. Ngo ma okonye me timo meno?

11. Ngo ma Daudi otimo i kare man ma onongo kwo tek-ki?

¹¹ (3) Lwodi. Cik ma igi lac ango ma itwero nongogi ki i gin mutimme man? Gam lapeny man, “Gin ango ma Daudi otimo me konnye keken?” Daudi kome pe omyel ci omoko tam marac oyotoyot. Lworo bene pe obwoye matek ma oweko en onongo pe twero moko tam. Me ka meno, en olego Jehovah pi kony. En bene openyo kony ki bot lureme. Dok en oketo i tic oyotoyot tam ma en omoko-ni. Kadi bed ni cwiny Daudi ocwer matek, en pe oweko geno jo mukene dok pe omako kiniga i cwinye. En omedde ki geno Jehovah kacel ki lureme.

12. Gin ango ma Jehovah otimo me konyo Daudi?

¹² Jehovah okonyo Daudi nining? Ka itimo kwed manok, ci ibipwonyo ni Jehovah omiyo ki Daudi teko ma onongo en mito me kanyo peko man. (Jab. 3:1-8; lok ma i tere piny) Jehovah ogoyo laane i kom tam ma Daudi omoko. Dok en okonyo lurem Daudi ma lugen i kare ma gitye ka lweny me gwoko kabakagi.

13. Itwero lubo lanen pa Daudi nining ka ngat mo ocwero cwinyi adada? (Matayo 18:15-17)

¹³ (4) Ket i tic. Pennye kekeni ni, ‘Atwero lubo lanen pa Daudi nining?’ Mitte ni itim gin mo oyotoyot me cobo peko ma tye. Ma lubbe ki gin mutimme, itwero keto i tic tira ma Yecu omiyo i Matayo cura 18 nyo itwero tic ki cik ma igi lac ma nonge iye. (Kwan Matayo 18:15-17.) Ento pe omyero imok tam oyotoyot ka ii tye ka wang. Omyero ileg bot Jehovah wek omini wic ma opye mot kacel ki ryeko me cobo peko man. Pe irweny gen i kom luremi. Me ka meno, bed atera me jolo kony ma gimini. (Car. 17:17) Ma dong pire tek loyo, lub tira ma Jehovah mini i Lokke.​—Car. 3:5, 6.

14. Awene ma lok ma tye i 2 Temceo 1:12-16; 4:6-11, 17-22 twero cuko cwinyi?

¹⁴ Tika itye ka nongo aunauna ki bot wadini? Nyo itye ka kwo i lobo ka ma kiketo kigeng i tic pa Lucaden pa Jehovah? Ka tye kit meno, ci itwero nongo  cuko cwiny ki i kwano 2 Temceo 1:12-16 ki 4:6-11, 17-22. * Paulo ocoyo but Ginacoya man i kare ma en tye i buc.

15. Gin ango ma itwero lega pire ki bot Jehovah?

¹⁵ (1) Legi. Ma peya ikwano wang Ginacoya man, leg bot Jehovah dok ititte pekoni ki kit ma peko man weko iwinyo kwede. Tite kit ma iwinyo kwede kikome. I nge meno, penye wek okonyi me nongo cik ma igi lac ki i atematema ma lakwena Paulo okato ki iye ma twero konyi kanyo peko ma itye kwede.

16. Ngo ma otimme i kom lakwena Paulo?

¹⁶ (2) Go i wi. Go ni ibedo Paulo. En tye i buc mo i Roma. En onongo kong obedo i buc, ento i wang-ngi en ngeyo ni kibineke woko. Lureme mogo onongo gukwere woko dok en onongo winyo ni eol adada.​—2 Tem. 1:15.

17. Gin ango ma Paulo pe otimo?

¹⁷ Paulo onongo twero keto cwinye i kom jami mutimme i kare mukato angec, kun tamo ni ka onongo pe etiyo matek macalo Lakricitayo kono onongo pe kimake. En onongo twero mako lok i cwinye i kom omege ma i Acia ma guloko ngegi i kome, dok en onongo twero juko geno lureme ducu. Ento Paulo pe otimo gin ma kit meno. Ngo ma okonye me medde ki bedo ki gen matek?

18. Ngo ma Paulo otimo i kare ma tye ka kato ki i peko?

¹⁸ (3) Lwodi. Gam lapeny man, “Paulo okonnye kekene nining?” Kadi bed ni Paulo onongo ongeyo ni ebito woko, wiye pe owil ni pire tek adada me kelo deyo bot Jehovah. Dok en omedde ki tamo kit ma etwero cuko kwede cwiny jo mukene. En omedde ki jenge i kom Jehovah ki lega teretere. (2 Tem. 1:3) Me ka keto cwinye i kom omege ma guloko ngegi i kome, Paulo onyuto pwoc bot lureme ma lugen pi mar ki kony ma gunyutte. Medo i kom meno, Paulo omedde ki kwano Lok pa Lubanga. (2 Tem. 3:16, 17; 4:13) Ma dong pire tek loyo, en obedo ki gen matek ni Jehovah ki Yecu pud gimare. Jehovah ki Yecu onongo pe guweke, dok onongo gibimine mot pi ticce.

19. Jehovah okonyo Paulo nining?

¹⁹ Jehovah onongo ociko Paulo con ni en bikanyo aunauna pi bedo Lakricitayo. (Tic 21:11-13) Jehovah okonyo Paulo nining? En ogamo lega pa Paulo, dok omine teko. (2 Tem. 4:17) Jehovah omoko ki Paulo ni en binongo mot ma otiyo matek pire. Jehovah bene otiyo ki lurem Paulo ma lugen me mine kony.

20. Watwero lubo lanen me niye ma Paulo onyuto i Jo Roma 8:38, 39 nining?

²⁰ (4) Ket i tic. Pennye kekeni, ‘Atwero lubo lanen pa Paulo nining?’ Calo Paulo, wan bene omyero wange ni wabikato ki i aunauna pi niyewa. (Mar. 10:29, 30) Ka wek wagwok genewa ka watye ka kato ki i aunauna, omyero wajenge i kom Jehovah ki lega dok omyero wabed ki yub maber me kwan piwa kenwa. Dok omyero wiwa opo ni gin ma pire tek loyo aye obedo me kelo deyo bot Jehovah. Watwero bedo ki gen ni Jehovah pe biwekowa dok pe tye gin mo keken ma ngat mo twero timo ma bijukke ki marowa.​—Kwan Jo Roma 8:38, 39; Ibru 13:5, 6.

21. Gin ango ma okonyo Aya ki Hector me loyo ariya ma gukato ki iye?

²¹ Labol pa jo ma kicoyo lok i komgi i Baibul twero konyowa. Me labolle, laminwa  mo ma nyinge Aya, ma tye painia marii i lobo Japan, owaco ni lok i kom Yona okonye me lweny ki lworo me miyo caden i dye lwak. Bulu mo ma nyinge Hector, ma bedo i lobo Indonesia ma lunyodone pe gitiyo pi Jehovah, owaco ni labol pa Ruth otugo cwinye me moko tamme me pwonyo lok i kom Jehovah ki tic pire.

22. Ngo ma twero konyi me nongo adwogi maber ka itye ka winyo Kwan me Baibul i Kit me Goga nyo kwano pwony ma kati kare ki kare ma wiye tye ni “Lub Lanengi me Niye”?

²² Itwero nongo ngec mukene i kom jo ma kicoyo lok i komgi i Baibul ma twero konyi ki kwene? Vidiowa ki Kwan me Baibul i Kit me Goga kacel ki pwony ma kati kare ki kare ma wiye tye ni “Lub Lanengi me Niye” konyowa me niang maber jami mutimme i kare me Baibul. * Ma peya ineno, iwinyo, nyo ikwano jami mutimme magi, leg Jehovah wek okonyi me nongo pwony ma pigi tego ma twero konyi. Go ni in aye ibedo ngat ma kicoyo lok i kome-ni. Lwod gin ma lutic pa Jehovah magi gutimo ki kit ma en okonyogi kwede me loyo ariya. Ci iti ki pwony magi i kwoni. Pwo Jehovah pi kony ma en tye ka mini kombeddi. Dok inyut pwoc pi kony meno ki yenyo yo me konyo ki cuko cwiny jo mukene.

23. Ma lubbe ki lok ma kicoyo i Icaya 41:10, 13, gin ango ma Jehovah ocikke me timo piwa?

²³ Kwo i lobo ma Catan aye lalocce-ni twero bedo tek adada ma i kare mogo bene pe watwero ngeyo gin ma omyero watim. (2 Tem. 3:1) Ento pe mitte ni wabed ki par nyo lworo. Jehovah ngeyo pekki ma watye ka kato ki iye. Ka wapoto dok wamito kony, en ocikke me makowa matek ki cinge ma lacuc. (Kwan Icaya 41:10, 13.) Watye ki gen matek ni Jehovah bikonyowa, dok Baibul miniwa kero me kanyo peko mo keken.