1. Kwoni onongo tye nining i kare ma peya icako kwano Baibul?

 KWONI onongo tye nining i kare ma peya icako kwano Baibul ki Lucaden pa Jehovah? Pol pa wan lworo romo makowa ka watamo i kom kwowa macon. Kit ma waneno kwede jami kacel ki kitwa onongo nen calo jenge i kom jami ma jo me lobo-ni giwaco ni ber nyo rac. Ka tye kit meno, ci onongo ‘wabedo i lobo man labongo gen mo, Lubangawa bene onongo pe.’ (Ep. 2:12) Ento i kare ma wacako kwano Baibul, kwowa olokke woko!

2. Ngo ma iniang iye i kare ma kicako kwano Baibul kwedi?

² I kare ma kicako kwano Baibul kwedi, iniang ni itye ki Woru me polo ma mari matek. Iniang ni ka imito yomo cwiny Jehovah wek idok ngat acel i kin jo ma wore, onongo bimitte ni itim alokaloka madongo i kwoni ki kit ma itamo kwede. Onongo bimitte ni ipwonnye me timo gin ma Jehovah waco ni ber kun ikwero jami ma en dag.—Ep. 5:3-5.

3. Ma lubbe ki Jo Kolocai 3:9, 10, ngo ma Jehovah mito ni watim, dok ngo ma wabinyamo i pwony man?

³ Jehovah aye ocweyowa dok en aye Wonwa me polo, pi meno en tye ki twero me moko kit ma jo me ode myero gukwo kwede. Dok en mito ni ma peya wanongo batija, wayelle matek me ‘weko kwowa macon ki ticce ducu.’ * (Kwan Jo Kolocai 3:9, 10.) Pwony man bikonyo jo ma gimito nongo batija me gamo lapeny adek: (1) ‘Kit me kwo macon’ obedo ngo? (2) Pingo Jehovah mito ni wawek kwo meno? (3) Watwero timo meno nining? Pi wan ma dong wanongo batija woko, pwony man bikonyowa pe me kwo  nyo tam kit ma onongo watimo kwede ma peya waweko kwowa macon.

4. Ngat ma lubo ‘kit me kwo macon’ bedo nining?

⁴ Ngat ma kwo ma lubbe ki ‘kit me kwo macon’ pol kare tamo dok timo jami i yo me kom. Twero bedo ni en pe paro pi jo mukene, akemo make oyot, pe nyuto pwoc, dok lawakke. Gwok nyo en maro neno cal macilo ma tugo miti me buto ki neno filim ma opong ki tim tarwang nyo tim gero. Labongo akalakala mo, en nongo tye ki kite mogo mabeco, dok cwinye romo pide pi jami maraco ma en timo nyo waco. Ento mitine pe tye matek ma romo konye me loko tamme ki kite.—Gal. 5:19-21; 2 Tem. 3:2-5.

5. Tika twere piwa me weko kit me kwowa macon kwicikwici? Tit kong. (Tic pa Lukwena 3:19)

⁵ Watye ki roc, pi meno pe tye ngat mo i kinwa ma twero jwayo tam ki miti maraco ducu ki i wiye kacel ki cwinye. I kine mukene, watimo nyo wawaco gin mo ma weko wakoko ange lacen. (Jer. 17:9; Yak. 3:2) Ento ka waweko kit me kwowa macon, tam ki miti me kom pe dong bidoro kwowa. Wadoko ngat mapat.—Ic. 55:7; kwan Tic pa Lukwena 3:19.

6. Pingo Jehovah cuko cwinywa me weko tam ki kit maraco ma kubbe ki kwowa macon?

⁶ Jehovah cuko cwinywa me weko tam ki tim maraco pien en marowa tutwal dok mito ni wabed ki kwo maber. (Ic. 48:17, 18) En ngeyo ni jo ma pe gilwenyo ki mitigi maraco gikelo peko i komgi kekengi dok gicwero cwiny jo macok kwedgi. Cwero cwiny Jehovah matek ka en neno wakelo peko i komwa ki i kom jo mukene.

7. Ma lubbe ki Jo Roma 12:1, 2, tam ango ma omyero wamoki?

⁷ Luremwa ki wadiwa mogo giromo ngalowa pien watye ka tute me timo alokaloka i kitwa. (1 Pet. 4:3, 4) Giromo wacciwa ni watye ki twero me timo gin mo keken ma cwinywa mito dok ni pe omyero wawek jo mukene gutitiwa gin me atima. Ento jo ma gikwero rwom me kwo ma atir pa Jehovah pe gibedo agonya. Ki lok ada, nongo gitye ka miyo kare ki lobo pa Catan me dorogi. (Kwan Jo Roma 12:1, 2.) Wan ducu watye ki tam  me amoka: Waromo gwoko kit me kwowa macon, ma roc ki lobo pa Catan aye doro, nyo waye ni Jehovah olokwa me bedo dano maber loyo ma watwero bedo i kare-ni.—Ic. 64:8.

8. Gin ango ma bikonyowa me lweny ki tam kacel ki tim maraco?

⁸ Jehovah ngeyo ni bitero kare kacel ki tute matek me lweny ki tam kacel ki tim maraco. (Jab. 103:13, 14) Ento Jehovah tiyo ki Lokke, cwiny mere maleng, ki dulle me miyo botwa ryeko, teko, ki kony ma wamito me loko ngat ma wabedo. Labongo akalakala mo, en dong okonyi i yo ma kit meno. Kong dong wanenu jami mogo ma iromo timone me weko kit me kwoni macon wek ibed ma ipore me nongo batija.

9. Lok pa Lubanga twero konyi me timo gin ango?

⁹ Ti ki Baibul me ngine kekeni. Lok pa Lubanga tye calo kiyo; twero konyi me ngiyo tammi, lokki, ki jami ma itimo. (Yak. 1:22-25) Lapwonyi me Baibul ki Lukricitayo mukene ma guteggi i yo me cwiny giromo mini tam. Me labolle, giromo tic ki Baibul me konyi me neno tekoni ki goroni. Giromo pwonyi kit me nongo tam ma jenge i kom Baibul ma romo konyi me lweny ki kiti maraco. Dok Jehovah kare ducu tye atera me konyi. En ngeyo yo maber loyo me konyi pien en ngeyo gin ma tye i cwinyi. (Car. 14:10; 15:11) Pi meno, wek odok kiti me lega bote ki kwano Lokke nino ducu.

10. Ngo ma ipwonyo ki i gin mutimme i kwo pa Elie?

¹⁰ Mok piri keni ni rwom me kwo ma atir pa Jehovah aye ber loyo. Watwero nongo adwogi maber ki i jami ducu ma Jehovah penyowa me timo. Jo ma gikwo ma lubbe ki rwomme me kit ma atir gibedo ki woro i komgi kekengi, dok gitye ki tyen lok me kwo ki yomcwiny me ada. (Jab. 19:7-11) Ki tungcel, jo ma gikwero rwom me kwo pa Jehovah ginongo adwogi marac ma bino pi cobo tic me kit pa dano. Nen kong gin ma laco mo ma nyinge Elie owaco i kom kwero rwom me kwo ma atir pa Lubanga. En odongo i cing lunywal ma gimaro Jehovah. Ento i kare ma Elie tye ki mwaka apar ki wiye, en oyero lurem maraco. En ocako tic ki yadi calo jayigi-ni, odonyo i tim me tarwang ki kwalo kwo. Elie owaco ni enongo ni etye ka doko ngat ma ger medde ameda. En oye ni, “Ki lok ada, atimo jami ducu ma kipwonya ni pe atim macalo Lakricitayo.” Kadi bed kit meno, Elie wiye pe owil i kom gin ma opwonyo i kare ma en pud tidi. Lacen, en ocako kwano Baibul odoco. En oyelle matek me jwayo kite maraco-ni ci onongo batija i mwaka 2000. Kwo i yo ma lubbe ki rwom pa Jehovah okelo adwogi maber ango bote? Elie owaco ni: “I kare-ni dong atye ma wiya opye mot dok cwinya pe pida.” * Kit ma gin mutimme man nyuto kwede, jo ma gikwero rwom me kwo ma Jehovah oketo, gikelo peko i komgi. Kadi bed kit meno, Jehovah tye atera me konyogi me timo alokaloka.

11. Jami ango ma Jehovah dag?

¹¹ Pwonnye me kwero gin ma Jehovah dagi. (Jab. 97:10) Baibul tito ni Jehovah “dag dano ma tamo ni eryek pire kene, ma loko lok goba, en bene dag jo ma gioyo  remo pa jo ma pe ki bal.” (Car. 6:16, 17) En bene dag “jo ma gin lutim bwami ma gineko dano kun gin lubwola kwede.” (Jab. 5:6) Jehovah dag cwiny ki tim ma kit meno matek adada mumiyo en ojwero jo maraco ducu i kare pa Nua pien onongo gupongo lobo ki tim gero. (Acak. 6:13) Nen kong dok labol mukene. Jehovah otiyo ki lanebi Malaki me tito ni cwinye dag jo ma giketo nyomgi tektek kun nongo luotgi pe otimo bal mo. Lubanga kwero worogi woko, dok en bingolo kop i komgi pi timgi maraco.—Mal. 2:13-16; Ibru 13:4.

12. Tyen lokke ngo me ‘kwero gin marac’?

¹² Jehovah mito ni ‘wakwer gin marac.’ (Rom. 12:9) Nyig lok man ni ‘kwero’ tyen lokke ni idag gin moni matek adada, kun ineno calo gin me kwer ma balo cwinyi. Tam kong kit ma ibiwinyo kwede ka kiwacci ni icam dek mutop. Tamo i kom meno twero weko iwinyo calo komi lit. I yo acel-lu, kadi wa tamo i kom gin ma Jehovah waco ni rac myero obed gin me kwer botwa.

13. Pingo omyero wagwok tamwa?

¹³ Gwok tammi. Tamwa doro jami ma watimo. Meno aye gin mumiyo Yecu owaco ni omyero wakwer tam mo keken ma twero terowa i timo bal madit. (Mat. 5:21, 22, 28, 29) Wamito yomo cwiny Wonwa me polo, pe kumeno? Pi meno, pire tek adada ni wakwer tam maraco ducu ma bino i wiwa cutcut!

14. Lokwa nyuto gin ango i komwa, dok lapeny mene ma omyero wagamgi?

¹⁴ Gwok lebi. Yecu owaco ni: “Gin ma katti ki i dog a ki i cwiny dano.” (Mat. 15:18) Ada, lok ma katti ki i dogwa nyuto jami mapol ma tye i cwinywa. Pi meno, pennye kekeni ki lapeny magi: ‘Tika akwero loko lok goba, kadi bed ni loko ada bikela peko? Macalo ngat munyomme, tika agwokke ki loko lok oree ki jo mukene? Tika agwokke ki loko lok macilo kwicikwici? Tika adok iye ki mwolo ka ngat mo ocwero cwinya?’ Ibinongo ni tye me kony adada me tam matut i kom lapeny magi. Kitwero poro lokki ki jarara me bongo. Ka iyabo jarara, ibinongo yot adada me lunyo bongo. I yo acel-lu, ka ikwanyo yet, goba, ki lok macilo me oree woko ki i lokki, ibinongo ni yot adada me weko kit me kwoni macon.

15. Tyen lokke ngo me guro kwowa macon ‘i kom yat?’

 ¹⁵ Bed atera me timo gin mo keken ma mitte. Lakwena Paulo otiyo ki lapor me pwonyowa kit ma pire tek kwede ni walok kit me kwowa. En ocoyo ni omyero wagur kwowa macon ‘i kom yat.’ (Rom. 6:6) Yecu oye ni kigure i kom yat me yomo cwiny Jehovah. I yo acel-lu, ka wamito yomo cwinye, omyero wabed atera me jwayo woko tam ki tim mogo ma Jehovah dagi. Omyero watim jami magi wek wabed ma cwinywa pe pidowa dok wabed ki gen me nongo kwo ma pe tum. (Jon 17:3; 1 Pet. 3:21) Wi myero opo ni Jehovah pe biloko rwomme me kwo ma atir me yomo cwinywa. Me ka meno, wan aye omyero walok ngat ma wabedo me lubo rwom me kwo ma atir ma mege.—Ic. 1:16-18; 55:9.

16. Pingo omyero imok tammi me medde ki lweny matek i kom miti maraco me kom?

¹⁶ Medde ki lweny ki miti maraco me kom. Kadi wa i nge nongo batija, bimitte ni imedde ki lweny i kom miti maraco. Tam kong i kom gin mutimme i kom laco ma nyinge Maurício. I kare ma en onongo pud awobi, en ocako buto ki co luwote. Lacen en orwatte ki Lucaden pa Jehovah ci ocako kwano Baibul. I nge timo alokaloka i kwone, en onongo batija i mwaka 2002. Kadi bed en dong otiyo pi Jehovah pi mwaki mapol, Maurício owaco ni: “Omyero aye ni pud alwenyo ki miti maraco i kare mogo.” En pe ye ni meno obal cwinye. Me ka meno, en owaco ni: “Cuko cwinya me ngeyo ni ka ayero me lweny i kom miti maraco magi, ayomo cwiny Jehovah.” *

17. Gin ango ma ocuko cwinyi ki i gin mutimme i kwo pa Nabiha?

¹⁷ Leg pi kony pa Jehovah dok ijenge i kom cwiny mere maleng, pe i kom tekoni. (Gal. 5:22; Pil. 4:6) Omyero wayelle matek ka wamito bwoto kit me kwo macon kun pe wadok cen iye. Tam kong gin mutimme i kwo pa dako mo ma nyinge Nabiha. Wonne okwere woko i kare ma en tye ki mwaka abicel keken. En owaco ni, “Man okela arem madwong adada i cwinya.” I kare ma Nabiha woto ki dongo, en odoko ngat ma akemo mako oyot dok  maro tim gero. En ocako cato yadi calo jayigi-ni, kimake, ci obedo i buc pi mwaki mogo. Lucaden pa Jehovah ma onongo gilimo buc meno gucako kwano Baibul kwede. Nabiha ocako timo alokaloka madongo i kwone. En owaco ni, “Obedo yot me weko tim mogo maraco ma onongo atimo. Ento juko mato taa obedo tek adada.” Nabiha oyelle matek pi mwaka makato acel ci lacen ojuko mato taa. En otimo man nining? En owaco ni, “Ma dong pire tek loyo, lega bot Jehovah kare ducu aye okonya me juko mato taa.” I kare-ni, en dong waco bot jo mukene ni: “Ka onongo an atwero timo alokaloka i kwona me yomo cwiny Jehovah, ngat mo keken twero timone!” *

18. Ma lubbe ki 1 Jo Korint 6:9-11, gin ango ma lutic pa Lubanga mapol gubedo ki teko me timone?

¹⁸ I cencwari me acel, co ki mon mogo ma Jehovah oyero me loc kacel ki Yecu onongo gutimo jami maraco adada i kare mukato angec. Me labolle, onongo gubedo lutim abor, co ma gibuto ki co wadgi, ki lukwo. Ento ki kony pa cwiny maleng pa Lubanga, gutimo alokaloka i kwogi. (Kwan 1 Jo Korint 6:9-11.) I yo acel-lu, i kare-ni bene Baibul okonyo dano milion mapol ata me timo alokaloka i kwogi. * Guloyo miti maraco ma onongo omoko matek i kwogi calo okwodo. Lanengi nyuto ni in bene itwero loko kiti ci iloyo mitini maraco wek ibed mupore me nongo batija.

19. Ngo ma wabinyamo i pwony ma lubo man?

¹⁹ Medo i kom yelle matek me bwoto kit me kwogi macon, jo ma gimito nongo batija myero gutute me ruko kit pa dano manyen. Pwony ma lubo man binyamo kit ma waromo timo kwede meno ki bene kit ma jo mukene gitwero konyowa kwede.