1-2. Ka pud peya itye atera me nongo batija, pingo omyero cwinyi pe otur? (Nen cal ma tye i pok ngeye.)

 KA ITYE ki miti me nongo batija, ci nongo iketo yub mamwonya adada piri keni. Tika itye atera me nongo batija kombeddi? Ka itamo ni itye atera dok luelda bene giye, ci pe igalle ki timone. Ka inongo batija, ci ibibedo ki kwo me yomcwiny adada i tic pi Jehovah.

² Ki tungcel, tika kiwacci ni omyero kong imedde ki dongo i yo me cwiny ma peya inongo batija? Nyo gwok iniang meno piri keni? Ka tye kit meno, pe iwek cwinyi otur. Itwero medde ki dongo wang ma icobo yub man ma pire tek-ki, kadi bed pud itidi nyo dong iti woko.

3. Laco mo ma latic i gang kal pa kabaka me Etiopia openyo Pilipo ningo, dok meno weko wabedo ki lapeny ango? (Tic 8:36, 38)

³ Kwan Tic pa Lukwena 8:36, 38. Laco mo ma latic i gang kal pa kabaka me Etiopia openyo Pilipo latit kwena ni: “Gin ango ma genga limo batija?” Laetiopia man onongo mito nongo batija, ento tika en onongo opore me nongone?

4. Laco ma Laetiopia-ni onyuto nining ni etye ki miti me medde ki pwonyo jami mapol?

⁴ Laco ma Laetiopia-ni onongo “oa ka woro Lubanga i Jerucalem.” (Tic 8:27) Dong nen calo en onongo olokke odonyo i dini pa Lujudaya. Labongo akalakala mo, en onongo opwonyo lok i kom Jehovah ki i coc maleng me Ginacoya me leb Ibru. Kadi bed kit meno, en onongo pud tye ki miti me pwonyo jami mukene. I kare ma Pilipo orwatte ki laco-ni i gudi, laco man onongo tye ka timo gin  ango? En onongo tye ka kwano buk adola pa lanebi Icaya. (Tic 8:28) Meno onongo lok ada me Baibul ma tere tut. Laetiopia-ni onongo pe oyeng ki pwony mayot keken me Baibul; ento onongo tye ki miti me medde ki pwonyo jami mapol.

5. Gin ango ma Laetiopia-ni otimo ki ngec ma en onongo?

⁵ Laco man onongo latic madit pa Kandake, kabaka ma dako me lobo Etiopia, “ladit ma lakan jamine ducu.” (Tic 8:27) Pi meno, en onongo nen calo tye ki tic mapol adada. Kadi bed kit meno, en okwanyo kare me woro Jehovah. En pe oyeng ki pwonyo lok ada keken; ento oketo i tic gin ma opwonyo. Meno oweko en owoto wot mabor nia ki i Etiopia me cito ka woro Jehovah i Jerucalem. Wot meno nen calo otero cawa malac kacel ki cente madwong, ento laco man onongo mito woro Jehovah, labongo paro pi wel cente ki cawa ma mitte.

6-7. Mar pa Laetiopia-ni pi Jehovah omedde ki dongo nining?

⁶ Laetiopia-ni opwonyo lok ada mogo manyen ki bot Pilipo. Lok ada acel i kingi aye ni Yecu aye obedo Meciya. (Tic 8:34, 35) Labongo akalakala mo, laco-ni cwinye obedo yom me pwonyo gin ma Yecu otimo pire. Ngo ma en otimo i nge pwonyo lok meno? En onongo romo medde ki bedo ngat ma olokke odonyo i dini pa Lujudaya. Me ka meno, marre pi Jehovah kacel ki Wode odongo. Meno otugo cwinye me moko tam ma pire tek me nongo batija macalo lalub kor Yecu Kricito. Pilipo oneno ni laco-ni tye ma opore, pi meno Pilipo obatija en.

⁷ Ka ilubo lanen pa Laetiopia-ni, in bene itwero yubbe pi batija. In bene ibibedo ki tekcwiny me waco ni, “Gin ango ma genga limo batija?” Kong dong wanenu kit ma itwero timo kwede jami ma Laetiopia-ni otimo: En omedde ki pwonyo lok ada, oketo i tic gin ma opwonyo, dok omedde ki dongo marre pi Lubanga.

8. Gin ango ma Jon 17:3 tito ni omyero itim?

⁸ Kwan Jon 17:3. Tika lok pa Yecu man okonyi me moko tammi me cako kwano Baibul? Meno aye gin mutimme bot pol pa wan. Ento tika pud mitte mi wamedde ki pwonyo lok ada? Eyo. Pe wabijuko medde ki ‘ngeyo Lubanga acel me ada.’ (Latit. 3:11) Wabimedde ki pwonyo lok ada pi naka. Ka wamedde ki pwonyo lok ada, wabimedde ki nyikke cok ki Jehovah bene.—Jab. 73:28.

9. Gin ango ma myero watim i nge pwonyo lok ada mayot me Baibul?

 ⁹ Ngene kene ni, pwonyo lok i kom Jehovah cakke ki ngeyo pwony mogo mayot me Baibul. I waragane bot Lukricitayo ma Luibru, lakwena Paulo olwongo pwony magi ni “lok mukwongo.” En onongo pe tye ka waco ni “lok mukwongo” meno pire pe tek. Me ka meno, en oporo ki cak ma yubo kom latin. (Ibru 5:12; 6:1) Ento en bene ocuko cwiny Lukricitayo ducu pe me gik ki pwonyo lok mukwongo keken ento me pwonyo lok ada me Baibul ma tere tut. Tika dong idongo miti me ngeyo lok ada me Baibul ma tere tut? Tika itye atera me medde ki dongo, ki me pwonyo lok madok i kom Jehovah kacel ki yubbe?

10. Pingo jo mukene ginongo ni kwan tek adada?

¹⁰ Ento, pol pa wan wanongo ni kwan pe mit. In kono iwinyo nining? I kare ma onongo itye i cukul, tika ipwonyo kit me kwan i yo matut? Tika onongo imaro kwan dok iwinyo calo ipwonyo jami mapol ki iye? Nyo mono imoko tammi ni wi pe dong twero lok madok i kom kwano bukke? Ka tye kit meno, ci pe itye keni. Ento, Jehovah twero konyi. En pe ki roc mo dok obedo Lapwony ma pud dong ber loyo.

11. Jehovah onyuto nining ni en ‘Lapwonywa?’

¹¹ Jehovah lwonge kekene ni “Lapwonywu.” (Ic. 30:20, 21) En Lapwony ma diyo cwinye, lakica, dok ma niang. En yenyo kit mo maber ma lutino kwanne tye kwede. (Jab. 130:3) Dok en pe keto gingi i komwa me cobo gin ma pe watwero. Wi opo ni, en aye ocweyo adammi, ma obedo mic mamwonya adada-ni. (Jab. 139:14) Watye ki miti ma kinywalowa kwede me pwonyo jami manyen. Lacwecwa mito ni wamedde ki nongo pwony pi naka—kun wanongo mitte. Dong tye me ryeko me dongo ‘miti’ pi lok ada me Baibul kombeddi. (1 Pet. 2:2) Ket yub ma itwero cobone, dok iket tek me kwano Baibul kacel ki lwodo lok ma iye nino ducu. (Yoc. 1:8) Ki kony pa Jehovah, ibinongo mit pa kwan ki pwonyo lok i kome.

12. Pingo omyero wakwan lok i kom kwo pa Yecu kacel ki ticce me pwony?

¹² Kwany kare me lwodo lok i kom kwo pa Yecu ki ticce me pwony kare ki kare. Pire tek ni walub lanen pa Yecu macok ka wamito tic pi Jehovah, tutwalle i kare man ma kwo tek-ki. (1 Pet. 2:21) Yecu otito ki lulub kore ni gibikato ki pekki. (Luka 14:27, 28) Kadi bed kit meno, en obedo ki tekcwiny ni lulub kore me ada gibibedo lugen bot Lubanga, kit ma en bene otimo kwede. (Jon 16:33) Kwan lok madok i kom kwo pa Yecu, dok iket yub me lubo lanene i kwoni me nino ducu.

13. Gin ango ma omyero ibed ka penyo Jehovah pire, dok pingo?

¹³ Ngec keken pe romo. Tyen lok mumiyo myero ibed ki ngec aye me konyi pwonyo lok i kom Jehovah ki me dongo kit mogo calo mar pire ki niye i kome. (1 Kor. 8:1-3) Ka iwoto ki pwonyo lok i kom Jehovah, bed ka penye wek okonyi me dongo niye. (Luka 17:5) En gamo lega ma kit meno. Niye me ada ma jenge i kom ngec ma atir i kom Lubangawa bikonyi me medde ki dongo.—Yak. 2:26.

14. I yo ma nining ma lakwena Petero onyuto kit ma pire tek kwede me keto i tic gin ma ipwonyo? (Nen bene cal.)

¹⁴ Lakwena Petero onyuto kit ma pire  tek kwede pi lulub kor Kricito me medde ki keto i tic gin ma gipwonyo. En otiyo ki lok me Baibul madok i kom Nua. Jehovah otito ki Nua ni ebitiyo ki pii aluka me tyeko jo maraco me kare meno. Bedo ki ngec keken ni pii aluka bibino onongo pe romo me laro Nua kacel ki jo me ode. Wi opo ni Petero onongo tye ka lok i kom kare ma Pii Aluka peya obino, “kare pa Nua ma onongo en tye ka payo yeya.” (1 Pet. 3:20) Ada, Nua kacel ki lupacone guketo i tic gin ma gupwonyo ki bot Lubanga kun gipayo yeya madit. (Ibru 11:7) I nge meno, Petero oporo tic pa Nua me payo yeya ki nongo batija, kun ocoyo ni: “Gin ma rom ki man ma koni larowu en aye batija.” (1 Pet. 3:21) Dong watwero poro tic ma itye ka timone kombeddi me yubbe pi batija ki tic ma Nua kacel ki lupacone gutimo pi mwaki mapol me yubo yeya. Tic ango ma omyero itim wek ibed ma ipore me nongo batija?

15. Wanyuto nining ni ada wangut i kom balwa?

¹⁵ Gin acel ma pire tek ma omyero watim aye ngut i kom balwa ki cwinywa ducu. (Tic 2:37, 38) Ka ada wangut i kom balwa, ci wabitimo alokaloka me ada bene. Tika in dong ijuko timo jami mogo ma pe yomo cwiny Jehovah, calo tim tarwang, mato taa, nyo tic ki leb macilo nyo yeto dano? (1 Kor. 6:9, 10; 2 Kor. 7:1; Ep. 4:29) Ka peya ijuko tim magi, medde ki tute me timo alokaloka ma mitte. Lok ki lapwonyi me Baibul, nyo peny luelda me kacokke pi kony ki tira. Ka pud itidi dok ibedo gang, bed ka penyo lunyodoni pi kony me juko tim maraco mo keken ma twero gengi nongo batija.

16. Yub maber me woro Jehovah kwako ngo?

¹⁶ Pire tek bene ni wabed ki yub maber me woro Lubanga. Meno kwako cito i cokke kacel ki nywako iye. (Ibru 10:24, 25) Dok ka itye ma ipore me tito kwena, tute matek me nywako iye kare ki kare. Ka ibedo ka nywako i tic me tito kwena kare ki kare, ci yomcwiny ma inongo ki iye bene bimedde. (2 Tem. 4:5) Ka pud itidi dok ibedo gang, pennye kekeni ni: ‘Tika mitte ni lunyodona gupo wiya me cito i cokke nyo i tic me pwony? Nyo  mono an atimo magi ducu pira kena?’ Ka itimo jami magi piri keni, inyuto ni itye ki niye, imaro Lubanga Jehovah, dok itye ki pwoc pi jami ducu ma en miyo boti. Meno aye “kit kwo maleng ki me woro Lubanga,” ma tye calo mic ma imiyo bot Jehovah. (2 Pet. 3:11; Ibru 13:15) Mic ducu ma wamiyo bot Jehovah kun a ki i cwinywa yomo cwiny Lubangawa. (Por ki 2 Jo Korint 9:7.) Watimo jami magi pien yomo cwinywa ka wamiyo bot Jehovah gin maber loyo ma watye kwede.

17-18. Kit ma pire tek mene ma bikonyi me dongo nio wa i batija, dok pingo? (Carolok 3:3-6)

¹⁷ Ka iwoto ki dongo nio wa i batija, ibikato ki i ariya mogo. Jo mogo gitwero ngali pi niyeni manyen-ni; mukene gitwero kweri nyo keto aunauna i komi. (2 Tem. 3:12) Ka itye ka tute matek me juko tim mo marac, itwero nongo ni idok cen ka timone. Nyo gwok iol woko ki diyo cwinyi dok cwinyi otur pien yubbi me nongo batija pe tye ka cobbe. Ngo ma bikonyi pe me ol woko? Kit mo ma pire tek—mar pi Jehovah.

¹⁸ Marri pi Jehovah obedo kit mo mamwonya adada, kit ma pud dong ber loyo ma itye kwede. (Kwan Carolok 3:3 NWT b; Carolok 3:4-6 Acholi Baibul.) Mar matut pi Lubanga twero konyi me loyo pekki ma ikato ki iye i kwoni. Baibul pol kare loko i kom mar ma pe lokke ma Jehovah tye kwede pi luticce. Man tyen lokke ni en pe bibwoto luticce nyo juko marogi. (Jab. 100:5) Kicweyi i cal pa Lubanga. (Acak. 1:26) Dong itwero nyuto mar ma kit meno nining?

19. Itwero dongo pwocci nining pi jami ducu ma Jehovah otimo piri? (Jo Galatia 2:20)

¹⁹ Cak ki nyuto pwoc. (1 Tec. 5:18) Nino ducu pennye kekeni ni, ‘I yo ma nining ma Jehovah onyuta mar?’ I nge meno, nen ni ipwoyo Jehovah i legani, kun itito gin moni kikome ma en otimo piri. Nen jami mabeco ma en timo calo lanyut me marre piri, kit macalo lakwena Paulo bene oniang kwede i kom Jehovah. (Kwan Jo Galatia 2:20.) Pennye kekeni ni, ‘Tika an bene amito nyutte  ni amare?’ Mar pi Jehovah bikonyi me medde ki loyo atematema ki me ciro pekki ma ikemme kwede. Medo i kom meno, ka imaro Woru, ibibedo ki miti me nyuto meno bote nino ki nino kun imedde ki wore.

20. Ngo ma myero itim me dyero kwoni bot Jehovah, dok tam meno pire tek lakwene?

²⁰ I nge kare mo, marri pi Jehovah bitugo cwinyi me lego lega mo ma pire tek adada bote. Ibidyero kwoni bot Lubanga. Wi myero opo ni, ka dong idyere bot Jehovah, ibibedo ki gen man mamwonya adada-ni: Itwero bedo dano pa Jehovah pi naka. Ka idyero kwoni bot Jehovah, icikke me tic pire i kare mabeco ki maraco bene. Pe bimitte ni dok inwo cikke meno odoco. Tye ada gire ni, ka wadyere, nongo watye ka moko tam ma pire tek adada. Ento tam kong i kom lok man: Ibimoko tam mapol i kwoni dok mukene bibedo mabeco, ento pe tye tam mo ma ibimoko maber loyo me dyero kwoni bot Jehovah. (Jab. 50:14) Catan bitute wek marri pi Woru obed legelege, ki miti ni itur genneni woko. Pe iwek Catan olo lweny man! (Yubu 27:5) Mar matek ma itye kwede pi Jehovah bikonyi me gwoko cikkeni me tic pire pi naka kun bene weko inyikke cok ki Woru me polo.

21. Pingo waromo waco ni batija pe obedo agikki me wotti ento acakkine?

²¹ I nge dyero kwoni bot Jehovah, lok ki luelda me kacokkewu i kom nongo batija. Ento wi myero opo ni, batija pe obedo agikki me wotti, ento acakkine. Batija obedo acakki me wotti i tic pi Jehovah. Pi meno, jing marri pi Woru kombeddi. Ket yub wek mar man omedde ki dongo nino ki nino. Lubo yo ma kit meno biteri i nongo batija. Meno bibedo nino me yomcwiny adada. Ento myero inge ni meno acakkine keken. Walego ni marri pi Jehovah kacel ki Wode omedde ki dongo pi naka!