Pingo laco ma Boaj olwongo ni “omera,” owaco ni nyomo Ruth bimiyo ‘ebalo’ ginaleyane? (Ruth 4:1, 6)

I kare me Baibul, ka laco munyomme oto labongo nywalo lutino, ci ngo ma onongo timme i kom lobone nyo jamine? Tika nying doggolane birwenyo woko matwal? Cik pa Moses onongo gamo lapeny magi.

Ka laco ma tye ki ngom oto, ominne nyo watte mo macok onongo leyo ngom meno. Nyo ka laco mo odoko lacan dok ocato lobone, ominne nyo watte mo macok aye twero waro nyo koko lobo meno. Man onongo weko lobo meno bedo i doggola me pacogi.—Levi 25:23-28; Wel 27:8-11.

Man onongo twero weko nying doggola pa laco ma oto-ni pe rwenyo nining? Omin lato-ni onongo lako dako pa ominne wek enywal kwede latin ma bileyo nying lato kacel ki jamine. Yub ma kit man onongo nyuto mar pien weko kigwoko dako-to maber.—Nwo. 25:5-7; Mat. 22:23-28.

Nen kong gin mutimme i kom Naomi. En onongo onyomme ki laco mo ma nyinge Elimelek. I kare ma Elimelek kacel ki awobene aryo guto woko, onongo dong pe tye laco mo i paco meno ma twero gwoko Naomi. (Ruth 1:1-5) Lacen, i kare ma Naomi odok i lobo Juda kacel ki ci-wode Ruth, en owaco ki Ruth ni openy Boaj wek okok lobogi odwok cen. Boaj onongo obedo wat macok pa Elimelek. (Ruth 2:1, 19, 20; 3:1-4) Ento Boaj onongo ngeyo watgi mukene macok makato en ma Baibul olwongo ni ‘ominne.’ Pi meno en aye myero okwong moko tamme ka ce ebilako Ruth nyo pe.—Ruth 3:9, 12, 13.

I acakkine, ‘ominne’ oye me koko lobo meno. (Ruth 4:1-4) En onongo ngeyo ni bimitte ni eti ki cente mo olo me wilo lobo meno, ento en bene onongo ngeyo ni Naomi dong oti woko ma pe twero nywalo latin ma bileyo ngom ki bot Elimelek. Man onongo biweko laco-ni leyo ngom meno dok medo i kom lobone. Dong, man onongo twero nen calo bikelle magoba mabup.

Ento laco-ni oloko tamme woko i kare ma oniang ni, ka ekoko ngom meno ci omyero bene enyom Ruth. En owaco ni: “An pe atwero kokone pira, miyo abalo ginaleyana woko.” (Ruth 4:5, 6) Pingo en oloko tamme?

Ka laco-ni nyo ngat mo mukene onyomo Ruth dok onywalo latin awobi, ci latin meno onongo bigamo lobo pa Elimelek woko. Man onongo ‘balo ginaleya’ pa laco-ni nining? Baibul pe tittiwa, ento nen kong tyen lok mogo ma oromo miyo en oloko tamme.

• Mukwongo, cente ma onongo en bitic kwede me wilo lobo meno onongo twero nen calo obalo abala, pien ngom pa Elimelek onongo pe bibedo mege. Ngom meno onongo bibedo pa wod pa Ruth.

• Me aryo, en onongo bibedo ki tic me pito ki gwoko Naomi kacel ki Ruth.

• Me adek, ka onongo Ruth onywalo lutino mukene ki laco-ni, ci lutino magi onongo gibinywako ginaleya pa lutino mukene pa laco meno ma onywalo ki dakone.

• Me angwen, ka laco-ni pe ki lutino ma mege, ci latin awobi ma Ruth onongo binywalo onongo bileyo lobo pa Elimelek ki mege bene. Man onongo biweko laco-ni rwenyo lobone bot latin ma bileyo nying doggola pa Elimelek ento pe nying laco-ni. Laco-ni onongo pe tye atera me keto ginaleyane ka mading wek ekony Naomi. En oye ni Boaj, okok ngom meno. Boaj otimo meno pien onongo mito “dwoko nying lato i kom ginaleyane.”—Ruth 4:10.

Laco-ni onongo tye ki miti madit me gwoko nyinge kacel ki ginaleyane. Cwiny me woro onongo obwoyo tamme woko. Ento kadi bed laco-ni otute matek me gwoko nyinge, i kare-ni pe wangeyo nyinge kulu. En bene okeng mot mamwonya ma Boaj onongo, nying Boaj tye kiketo i kin kwari pa Meciya, Yecu Kricito. Adwogine pud dong obedo rac ya, pi laco-ni ma onongo wor dok okwero konyo ngat ma mito kony!—Mat. 1:5; Luka 3:23, 32.