1. Gin ango ma jo ma gibino i cokkewa pi tyen mukwongo gineno? (Nen bene cal.)

 GO KONG ni luot mo gubino i Ot me Ker pa Lucaden pa Jehovah pi tyen mukwongo. Cwinygi obedo yom adada me neno cwiny me lirem ma omege ki lumege gunyuto botgi ki kit ma ginyuto kwede mar i kingi. I kare ma gitye ka dok cen paco i nge cokke, dako-ni owaco ki cware ni, ‘Lucaden pa Jehovah gipat ki jo mukene ma warwatte kwedgi, dok anongo mit pa ribbe kwedgi.’

2. Gin ango ma ogengo jo mogo ki tic pi Jehovah?

² Mar ma tye i kin jo pa Jehovah pe nonge ka mo mukene. Ki lok ada, Lucaden pa Jehovah gitye ki roc. (1 Jon 1:8) Pi meno, ka wawoto ki ngeyo jo ma i kacokke maber, wabineno bene goro ma meggi. (Rom. 3:23) Ki cwer cwiny, jo mukene guweko roc ma dano gitye kwede ogengogi ki tic pi Jehovah.

3. Kit mene ma nyuto lulub kor Yecu me ada? (Jon 13:34, 35)

³ Kong dok inen wang Ginacoya ma pwony man jenge iye. (Kwan Jon 13:34, 35.) Dano twero ngeyo jo ma gubedo Lukricitayo me ada nining? Gibinyuto mar bot luwotgi. Baibul pe tito ni gibibedo labongo roc. Nen bene ni Yecu pe owaco ni: ‘Pi man wun wubingeyo ni wun lupwonnyena.’ Ento en owaco ni: ‘Pi man dano ducu bingeyo ni wun lupwonnyena.’ I yo meno, Yecu onyuto ni pe lulub kore keken, ento kadi wa jo ma pe gitye i kacokke gibingeyo lulub kore me ada pi mar ma ginyuto pi luwotgi.

4. Lapeny mene ma jo mukene gitwero bedo kwede i kom Lukricitayo me ada?

 ⁴ Jo mogo ma pe gubedo Lucaden pa Jehovah giromo penyo ni: ‘I yo ma nining ma mar nyuto lulub kor Yecu me ada? Yecu onyuto mar bot lukwenane nining? Dok twere nining i kare-ni me lubo lanen pa Yecu?’ Lucaden bene gitwero kwanyo kare me lwodo lagam me lapeny magi. Timo meno konyowa me nyuto mar i yo matut, tutwalle ka wakemme ki goro pa jo mukene.—Ep. 5:2.

5. Tit kong tyen lok pa Yecu ma nonge i Jon 15:12, 13.

⁵ Yecu onyuto ka maleng ni mar mo ma kite dok pat aye binyuto lulub kore me ada. (Kwan Jon 15:12, 13.) Yecu ocikogi ni: ‘Wumarre kekenwu macalo ceng amarawu.’ Man tyen lokke ngo? Kit ma Yecu otito kwede, mar man kwako maro jo mukene makato kit ma imare kwede kekeni, nyo twero weko Lakricitayo moni to pi lawote. b

6. I yo ma nining ma Lok pa Lubanga nyuto ni mar pire tek?

⁶ Lok pa Lubanga pwonyowa ni mar pire tek adada. Me labolle, dano mapol giketo tyeng magi i kin tyeng me Baibul ma gimaro loyo: “Lubanga aye mar.” (1 Jon 4:8) “Mar lawoti macalo imarre keni.” (Mat. 22:39) “Mar umo lwak bal mapol.” (1 Pet. 4:8) “Mar pe gik.” (1 Kor. 13:8) Tyeng magi kacel ki mukene nyuto ka maleng bot ngat mo keken ni pire tek adada me dongo kacel ki nyuto mar.

7. Pingo Catan pe twero pwonyo dano me mare i kingi ki me ribbe kacel?

⁷ Jo mapol gipennye ni: ‘Atwero ngeyo  dini me ada nining? Dini ducu giwaco ni gipwonyo ada, ento gin ducu gipwonyo jami mapatpat madok i kom Lubanga.’ Catan onyayo dini goba mapol i kin piny dok man weko bedo tek adada pi dano me ngeyo dini me ada. Ento en pe twero ribo dano ma i but lobo-ni kacel wek gin ducu gubed ki mar i kingi. Jehovah keken aye twero timo meno. Wangeyo man pien mar a ki bot Jehovah. Jo ma gitye ki cwiny maleng pa Jehovah kacel ki motte keken aye gitwero nyuto mar me ada i kingi. (1 Jon 4:7) Meno aye tyen lok ma oweko Yecu owaco ni lulub kore keken aye gibinyuto mar me ada bot luwotgi.

8-9. Mar ma jo mapol guneno i kin Lucaden pa Jehovah ogudogi nining?

⁸ Kit ma Yecu otito kwede con, jo mapol dong gungeyo lulub kore me ada pi mar ma ginyuto i kingi. Me labolle, omego mo ma nyinge Sam c wiye pud po i kom gure madit mukwongo ma en ocito iye ma obedo i bar mo macok ki gange. Sam onongo kong ocito i bar meno dwe mogo angec ka neno tuko mo. En owaco ni: “Dano ma gubedo tye i gure madit-ti kitgi obed pat adada ki jo ma gubedo tye ka neno tuko-ca. Lucaden onongo gimwol dok lutinogi ducu kitgi beco.” En omedo ni: “Jo-ni onongo ginen calo guyeng ki kwogi dok gitye ki kuc. Meno aye gin ma onongo amito i kwona. Wiya pe po i kom pwony mo keken ma kimiyo i nino meno, ento wiya pe biwil i kom kit maber ma Lucaden gubedo kwede.” d Ngene kene ni kit mabeco meno obedo adwogi me mar me ada ma watye kwede pi luwotwa. Pien wamaro omegiwa ki lumegiwa, waterogi ki kica kacel ki woro.

⁹ Omego mo ma nyinge John bene owinyo kit meno i kare ma ocako bino i cokke. En owaco ni: “Cwiny me lirem ma dano ducu gubedo kwede i cokke magi ogudo cwinya adada. Onongo kitgi ber adada ma oweko atamo ni nen calo gipe ki roc. Mar me ada ma gunyuto oweko amoko ni anongo dini me ada.” e Jami mutimme magi kacel ki mukene mapol nyuto ka maleng ni Lucaden pa Jehovah gubedo Lukricitayo me ada.

10. I kare ma kit mene ma watwero nyuto kwede mar me ada? (Nen bene lok ma i tere piny.)

¹⁰ Kit ma waneno kwede i acakki me pwony man, omegiwa ki lumegiwa ducu gitye ki roc. I cawa mogo, giwaco nyo gitimo jami ma cwero cwinywa. f (Yak. 3:2) I kare ma kit meno, watwero nyuto ni wamarogi adada ki i kit ma wadok kwede i lokgi nyo i timgi. Ma lubbe ki lok meno, gin ango ma watwero pwonyo ki bot Yecu?—Jon 13:15.

11. Kodi kit maraco mene ma Yakobo ki Jon gunyuto? (Nen bene cal.)

¹¹ Yecu onongo pe keto gingi ni lulub kore gubed labongo roc. Me ka meno, en okonyogi me lweny ki gorogi kacel ki timo alokaloka wek guyom cwiny Jehovah. I nino mo acel, lukwenane aryo, Yakobo ki Jon, guoro mamagi me penyo  Yecu ni ominigi rwom mamalo i Ker pa Lubanga. (Mat. 20:20, 21) Gin ma Yakobo ki Jon gutimo-ni onyuto ni gitye ki awaka dok gimito bedo jo ma pigi tek loyo jo mukene.—Car. 16:18.

12. Tika Yakobo ki Jon keken aye gunyuto kit maraco? Tit kong.

¹² Pe Yakobo ki Jon keken aye gunyuto kit maraco i nino meno. Nen kong kit ma lukwena mukene-ni gudok kwede iye: “Ka jo mukene apar guwinyo lokke, ci cwinygi ocwer mada i kom omego aryo-nu.” (Mat. 20:24) Watwero goyo kit daa malyet ma obedo i kin Yakobo, Jon, ki lukwena mukene-ni. Oromo bedo ni guwaco lok ma kit man: ‘Wun wutamo ni wuber wuloyowa ce? Meno aye oweko wupenyo pi rwom mamalo loyowa? Pe wun keken ma dong wutiyo ki Yecu. Wan bene wapore me nongo rwom mamalo calo wun!’ Labongo paro pi gin ma gutamo nyo guwaco, i nino meno wigi owil woko ni omyero ginyut mar ki kica bot luwotgi.

13. Yecu odok i kom goro pa lukwenane nining? (Matayo 20:25-28)

¹³ Yecu ocobo lok man nining? En pe odok iye ki gero. En pe owaco ni ebiyenyo lukwena maber loyogi, co ma ginyuto mwolo dok gitero luwotgi ki mar kare ducu. Me ka meno, Yecu odiyo cwinye i cawa ma tye ka lok kwedgi pien  onongo ngeyo ni gimito timo gin ma atir. (Kwan Matayo 20:25-28.) Yecu kare ducu otero lukwenane ki kica kadi bed gubedo ka laro lok teretere i kom anga ma ladit i kingi.—Mar. 9:34; Luka 22:24.

14. Lukwena pa Yecu gudongo i kin dano ma nining?

¹⁴ Yecu wiye opo ni tekwaro ma lukwenane gudongo iye onongo ogudogi matek. (Jon 2:24, 25) Lupwony Cik ki Luparicayo onongo gipwonyo ni dano ma gitye ki rwom ma lamal keken aye ma pigi tek. (Mat. 23:6; por ki vidio me The Front Seats in the Synagogue, ma tye i jami me akwana me nwtsty-E pi Matayo 23:6.) Lupwonye dini magi bene onongo gitamo ni giber giloyo jo mukene. g (Luka 18:9-12) Yecu oniang ni dongo i kin dano ma kit meno twero gudo tam pa lukwenane i kom jo mukene. (Car. 19:11) En pe oketo gingi ni lukwenane pe gutim bal mo keken dok odiyo cwinye i komgi i kare ma gubalo. En oniang ni gimito timo gin maber. Pi meno, en odiyo cwinye dok opwonyogi me bedo mwol ki me nyuto mar bot jo mukene me kaka tute me bedo ki rwom madito.

15. Ngo ma watwero pwonyone ki i gin mutimme i kin Yakobo, Jon, ki lukwena mukene-ni?

¹⁵ Watwero nongo pwony mapol ki i kom gin mutimme ma kwako Yakobo ki Jon. Onongo pe opore pi Yakobo ki Jon me penyo Yecu pi rwom madito i Ker-ri. Ento lukwena mukene-ni bene gutimo rac me ye ni lok meno obal ribbe ma tye i kingi. Kadi bed kit meno, Yecu otero lukwena 12 ducu i yo me kica ki mar. Pwony ango ma wanongo? Kadi bed watye ki tyen lok me keco i kom gin ma ngat moni otimo, myero waket cwinywa i kom kit ma wadok kwede i kom gorogi. Pud mitte ni wanyut mar ki kica. Ngo ma twero konyowa? Ka cwinywa ocwer i kom Lakricitayo lawotwa mo, watwero pennye kekenwa ni: ‘Pingo gin ma en otimo-ni tye ka cwero cwinya tutwal? Tika nyuto goro mo ma myero ati iye? Mono oromo bedo ni ngat ma ocwero cwinya-ni tye ka yelle ki peko mo? Kadi bed atye ki tyen lok me keco, tika atwero nyuto mar kun atimo kica ki dano meno?’ Ka wamedde ki nyuto mar bot luwotwa, ci wanyuto ni wabedo lulub kor Yecu me ada.

16. Gin ango mukene ma watwero pwonyo ki i lanen pa Yecu?

¹⁶ Lanen pa Yecu bene pwonyowa ni omyero watute me niang omegiwa ki lumegiwa maber. (Car. 20:5) Tye lok ada gire ni, Yecu onongo twero neno gin ma tye i cwiny dano. Wan pe watwero. Ento watwero diyo cwinywa i kom omegiwa ki lumegiwa ka gucwero cwinywa. (Ep. 4:1, 2; 1 Pet. 3:8) Timo meno doko yot ka wangeyogi maber. Nen kong gin mutimme man.

17. Adwogi maber ango ma laneno me adwol mo onongo ki i tutene me ngeyo laye lawote mo maber?

¹⁷ Laneno me adwol mo wiye po i kom omego mo ma onongo tye i kacokke acel i adwolle i East Africa. I acakkine, laneno me adwol-li onongo tamo ni omego-ni kite tek. Laneno me adwol-li odok iye  nining? En owaco ni: “Me kaka wene ki omego-ni, amoko tamma me ngeye maber.” I kare ma laneno me adwol man otero kare ki omego-ni, en oniang kit ma omego-ni odongo kwede ma ogudo kit ma en tero kwede ki jo mukene. Laneno me adwol man omedde ni: “I kare ma aniang ni obedo tek adada pire me timo alokaloka ma mitte wek eter jo mukene maber, ki dong alokaloka madongo ma en otimo i kwone, man otugo cwinya me mare adada. Wadoko lurem macok.” Ki lok ada, ka watute me niang omegiwa ki lumegiwa maber, ci pol kare wabinongo ni yot me nyutigi mar.

18. Lapeny mene ma watwero pennye kwede ka laye lawotwa mo ocwero cwinywa? (Carolok 26:20)

¹⁸ I kare mukene, watwero winyo ni omyero walok ki omego nyo lamego mo ma ocwero cwinywa. Ento mukwongo, omyero kong wapennye ki lapeny calo magi: ‘Tika aniang maber jami ducu mutimme?’ (Car. 18:13) ‘Mono twero bedo ni en pe otimo gin man akaka?’ (Latit. 7:20) ‘An mono dong nino mo atimo bal ma kit meno?’ (Latit. 7:21, 22) ‘Ka aloko ki ngat-ti i kom peko-ni, tika nongo amedo kado i wang bwur?’ (Kwan Carolok 26:20.) Ka wakwanyo kare me lwodo lapeny magi, ci mar twero tugo cwinywa me jalo gin mutimme meno.

19. Gin ango ma imoko tammi me timone?

¹⁹ Macalo lwak, Lucaden pa Jehovah gitye ka nyuto ni gin gubedo lulub kor Yecu me ada. Wan ducu ki acel acel wanyuto ni wabedo lulub kor Yecu ka wanyuto mar bot omegiwa ki lumegiwa kadi bed gitye ki goro. Ka watimo meno, waromo konyo jo mukene me ngeyo dini me ada ki me ribbe kwedwa i woro Jehovah, Lubanga me mar. Dong, wamoku tamwa me medde ki nyuto kit mar man ma nyuto Lukricitayo me ada.