1-2. Gin ango ma pol kare timme ka ngat moni onongo batija, dok gin ango ma wabinyamo i pwony man?

 TIKA nino mo dong ineno gurup pa dano ma gibinongo batija? Iwinyo gen matek ma gitye kwede i cawa ma nongo gitye ka gamo lapeny aryo ma kare ducu kipenyo ma peya ngat moni onongo batija. Ineno ka wadigi nyo luremgi gitye ka bwunyo ki awaka i kare ma jo ma gunongo batija-ni gikati ki i pii. Iwinyo bene ka dano gitye ka dongo cinggi dok ineno yomcwiny ma tye i wang jo ma gunongo batija nyen-ni. Cabit ki cabit, dano alip mapol gidyero kwogi bot Lubanga Jehovah dok ginongo batija macalo Lucadenne.

² In kono? Ka itye ki tam me nongo batija, ci ibedo ngat mo ma pire tek adada i lobo man marac-ci pien nongo ibedo ngat ma ‘yenyo Jehovah.’ (Jab. 14:1, 2) Pwony man kiyubo piri kadi bed pud itidi nyo ibedo ngat muteggi. Ento wan ma dong watyeko nongo batija woko-ni, bene wamito jingo mitiwa me medde ki tic pi Jehovah pi naka. Pi meno, kong dong wanenu tyen lok adek i kin tyen lok mapol ma watye kwede me tic pi Jehovah.

3. Pingo lutic pa Jehovah gimaro ada ki kit ma atir? (Jabuli 119:128, 163)

³ Jehovah ociko jone ni “wumar ada.” (Jek. 8:19) Yecu ocuko cwiny lulub kore ni omyero guyeny kit ma atir. (Mat. 5:6) Man tyen lokke ni ngat moni myero obed ki miti matek me timo gin ma atir, maber, ki maleng i wang Lubanga. In tika imaro ada ki kit ma atir? Wangeyo ni imaro. In bene idag goba kacel ki jami ducu maraco. (Kwan Jabuli 19:8; 119: 163.) Ngat ma lagoba nongo lubo kit pa  Catan, ma en aye lalo lobo man marac-ci. (Jon 8:44; 12:31) Yub acel ma pire tek bot Catan aye me balo nying maleng pa Lubangawa Jehovah. Catan obedo ka waco goba mapol i kom Lubanga nicakke i kare me jemo ma otimme i poto me Eden. En tute wek dano gutam ni Jehovah obedo Laloc ma laworo, ma pe genne dok twono dano jami mabeco. (Acak. 3:1, 4, 5) Goba pa Catan madok i kom Jehovah pud tye ka medde ki balo tam kacel ki cwiny dano nio wa i kare-ni. Ka dano pe guyero me ‘maro ada,’ ci Catan twero weko giyero me timo tim mogo macilo ki maraco mapatpat.—Rom. 1:25-31.

4. I yo ma nining ma Jehovah onyuto ni en aye “Lubanga me ada”? (Nen bene cal.)

⁴ Jehovah aye “Lubanga me ada,” dok en pwonyo ada bot jo ma gimare. (Jab. 31:5) I timo meno, en konyogi wek lok goba pa Catan pe dong obwolgi. Jehovah bene pwonyo luticce me bedo jo ma lugen dok ma kitgi atir. Meno weko gibedo ki woro i komgi kekengi kacel ki wic ma opye mot. (Car. 13:5, 6) Twero bedo ni Jehovah otimo meno piri i kare ma itye ka kwano Baibul. Dong ityeko pwonyo ni yo pa Jehovah aye yo maber loyo pi dano ducu ki piri bene. (Jab. 77:13) Pi meno, itye ki miti me timo gin ma Lubanga waco ni tye atir. (Mat. 6:33) Imito ni dano gunge ada, dok imito nyuto ki dano ni gin ma Catan owaco i kom Lubangawa Jehovah obedo goba. Itwero timo meno nining?

5. Itwero miyo cwak pi ada ki gin ma atir nining?

⁵ Itwero yero me kwo i yo ma nyuto bot dano ducu ni ikwero goba pa Catan dok icwako gin ma tye atir. Itwero nyuto ni imito ni Jehovah obed Lalocci dok ni imito timo gin ma en waco ni tye atir. Itwero timo meno nining? Dyere bot Jehovah i lega, dok inyut bot dano ducu ni ityeko dyere kun inongo batija. Mar pi ada ki gin ma atir obedo gin ma pire tek ma tugo cwinywa me nongo batija.

6. Jabuli 45:4 miyo boti tyen lok ango me maro Yecu Kricito?

⁶ Pingo imaro Yecu Kricito? Nen kong tyen lok mogo ma pigi tego ma nonge i Jabuli 45:4. (Kwan.) Yecu maro ada, mwolo, ki kit ma atir. Ka in imaro ada ki kit ma atir, ci nongo ngene kene ni imaro  Yecu Kricito bene. Tam kong i kom kit ma Yecu ocung kwede matek pi ada ki gin ma atir. (Jon 18:37) Ento Yecu pwonyowa nining me bedo jo mamwol?

7. Gin ango ma gudo cwinyi loyo madok i kom mwolo pa Yecu?

⁷ Yecu pwonyowa me bedo jo mamwol ki i lanen ma en owekkiwa. Me labolle, en pe jolo deyo mo keken ma kimine ento dwoko ducu bot Wonne. (Mar. 10:17, 18; Jon 5:19) Neno mwolo pa Yecu weko iwinyo nining? Meno mono pe tugo cwinyi me maro Wod pa Lubanga ki me lubo lanenne? Ngene kene ni tugo cwinyi. Pingo Yecu obedo ngat mamwol? Pien en maro dok lubo lanen pa Wonne ma obedo ngat mamwol. (Jab. 18:35; Ibru 1:3) Man mono pe tugo cwinyi me nyikke cok ki Yecu, pien en lubo kit pa Wonne macok?

8. Pingo wamaro Yecu macalo Kabakawa?

⁸ Wamaro Yecu macalo Kabakawa pien en aye obedo Laloc maber loyo. Jehovah kikome aye opwonyo wode dok ocime macalo laloc. (Ic. 50:4, 5) Tam bene i kom mar ma Yecu onyuto ma kwako jalle ken. (Jon 13:1) Macalo Kabakani, Yecu opore me nongo marri. En otito ni elwongo jo ma gimare ni lureme dok ni ginyuto margi pire ki lubo cikke. (Jon 14:15; 15:14, 15) Pud dong obedo mot madit ya, me bedo larem Wod pa Jehovah!

9. I yo ma nining ma Batija pa Lukricitayo rom aroma ki pa Kricito?

⁹ Cik pa Yecu acel aye ni lulub kore omyero gunong batija. (Mat. 28:19, 20) En oweko lanen pigi. I yo mogo, batijane pat ki batija pa lulub kore. (Nen bok ma wiye tye ni “ Batija pa Yecu ki Batija pa Lulub Kore—Kit ma Gipat Kwede.”) Ento i yo mukene girom aroma. I kare ma Yecu onongo batija, en omine kene me timo miti pa Wonne. (Ibru 10:7) I yo acel-lu, ka lulub kor Kricito gudyere bot Lubanga dok gunongo batija, ginyuto bot jo ducu ni gibitic ki kwogi me timo miti pa Lubanga ento pe mitigi. I yo meno, nongo gitye ka lubo lanen pa Laditgi.

10. Tyen lok ango ma itye kwede me maro Yecu, dok mar meno myero otug cwinyi me timo gin ango?

¹⁰ In iye ni Yecu obedo Wod pa Lubanga acel me ada dok cwinyi yom ni en obedo Kabaka ma Lubanga ocimo me loyowa. Ingeyo ni Yecu mwol dok lubo lanen pa Wonne kore ki kore. Dong ipwonyo ni en opito jo ma kec onongo nekogi, okweyo cwiny jo ma cwinygi otur, dok ocango wa lutwo. (Mat. 14:14-21) Ineno kit ma en doro kwede kacokkene i kare-ni. (Mat. 23:10) Dok ingeyo ni macalo Kabaka me Ker pa Lubanga, en bitimo tic madongo makato i kare me anyim. Itwero nyuto marri pire nining? Itimo meno ki lubo lanenne. (Jon 14:21) Gin acel ma pire tek aye me dyere bot Lubanga ki nongo batija.

11. Tyen lok ma pire tek loyo me nongo batija obedo ngo?

¹¹ Tyen lok ma pire tek loyo me nongo batija obedo ngo? Yecu onyuto cik ma pire tek loyo i kare ma owaco ni: “Mar Jehovah Lubangani ki cwinyi ducu, ki kwoni ducu, ki tammi ducu ki tekki ducu.” (Mar. 12:30, NWT) Tika lok meno tito kit ma marri pi Lubanga tye kwede?

12. Pingo imaro Jehovah? (Nen bene cal.)

¹² Watye ki tyen lok mapol me maro Jehovah. Me labolle, ipwonyo ni en aye “wang it me kwo” dok ni en aye Lami “kit gin mo ducu maber, ki mot ducu mabeco.”  (Jab. 36:9; Yak. 1:17) Jami mabeco ducu ma itye kwede a ki bot Lubangawa ma lamar dok ma cinge yot adada-ni.

13. Pingo ginkok obedo mic mamwonya adada?

¹³ Ginkok obedo mot mamwonya adada ma Jehovah ominiwa. Pingo wawaco kit meno? Tam kong i kom wat ma tye i kin Jehovah ki Wode. Yecu owaco ni: “Won mara” dok “an amaro Won.” (Jon 10:17; 14:31) Wat ma i kingi odoko cok adada pi mwaki bilion mapol ma gubedo ka tic kacel. (Car. 8:22, 23, 30) Kong dong itam kit ma cwiny Lubanga ocwer kwede i kare ma oye ni Wode oden can malit nio wa i to. Jehovah maro dano ducu—kadi wa in—mumiyo en obedo atera me miyo Wode macalo ginkok wek in kacel ki jo mukene wunong kwo ma pe tum. (Jon 3:16; Gal. 2:20) Meno aye tyen lok ma pire tek loyo mumiyo wamaro Lubanga.

14. Yub ma dong ber loyo ma itwero ketone i kwoni obedo ngo?

¹⁴ Marri pi Jehovah woto ki dongo ka iwoto ki medde ki pwonyo lok mapol i kome. Labongo akalakala mo, imito medde ki nyiko cok kwede i kare-ni ki dok pi naka. Dok meno twere. Ki cwiny me kica, en cuko cwinyi ni itim jami ma biweko cwinye bedo yom. (Car. 23:15, 16) Itwero timo meno pe ki lokki keken ento ki i jami  ma itimo bene. Kit ma ikwo kwede binyuto ni ada imaro Jehovah. (1 Jon 5:3) Yero yo me kwo ma yomo cwiny Jehovah aye obedo yub maber loyo ma itwero ketone i kwoni.

15. Itwero nyuto marri pi Jehovah nining?

¹⁵ Itwero nyuto marri pi Jehovah nining? Mukwongo, ilego lega ma kite dok pat me dyere bot Lubanga acel me ada. (Jab. 40:8) I nge meno, inyuto bot dano ducu ni ityeko dyere kun inongo batija. Kit ma wanyamo kwede con i pwony man, nino me batijani obedo nino ma pire tek dok me yomcwiny adada i kwoni. Icako kwo manyen pe me kwo piri keni ento pi Jehovah. (Rom. 14:8; 1 Pet. 4:1, 2) Meno twero nen calo tam madit adada me amoka, dok bene tye kit meno. Ento yabo yo pi kwo ma pud dong ber loyo. Nining?

16. Kit ma Jabuli 41:12 nyuto kwede, Jehovah bimiyo bakacic ango bot jo ma gidyero kwogi me tic pire?

¹⁶ Jehovah obedo Ngat ma cinge yot loyo. Kadi bed imiye gin ango, en pud bimini makato. (Mar. 10:29, 30) En bimini kwo mamit me yomcwiny, ma opong ki mot mapol kadi wa i kare-ni ma watye ka kwo i lobo marac-ci. Dok meno pud acakkine keken. Pe mitte ni kwo ma ocakke i nino me batijani ogik woko. Itwero medde ki tic pi Woru ma lamar-ni pi naka. Mar ma tye i kin in ki Woru bimedde ki dongo dok ibimedde ki kwo nakanaka calo en.—Kwan Jabuli 41:12.

17. Gin ango ma itwero miyo bot Jehovah ma en pe tye kwede?

¹⁷ Ka idyere dok inongo batija, nongo itye ki mot me miyo ki Jehovah gin mo ma pire tek adada. En omiyo boti jami ducu mabeco ki gin mo keken ma okeli yomcwiny i kwoni. Itwero dok iye ki miyo bot Lalo polo ki lobo gin mo ma en pe tye kwede—ma en aye tic pire ki cwinyi ducu. (Yubu 1:8; Car. 27:11; Rom. 11:35, 36) Meno aye pud dong yo maber loyo me tic ki kwoni! Labongo akalakala mo, marri pi Jehovah aye obedo tyen lok ma pire tek loyo me nongo batija.

18. Lapeny mene ma itwero pennye kwede?

¹⁸ Dong ibidok iye nining ka kipenyi ki lapeny man ni, Tika ibinongo batija? In keken aye ma itwero gamo lapeny meno. Ento twero bedo me kony ka ipennye kekeni ni, ‘Pingo atye ka galle ki nongo batija?’ (Tic 8:36) Wi opo i kom tyen lok adek ma wanyamogi. Me acel, myero imar ada ki kit ma atir. Pennye kekeni ni, ‘Tika atye ka kuro nino ma nongo dano ducu loko lok ada dok gitimo gin ma atir?’ Me aryo, myero imar Yecu Kricito. Pennye kekeni ni, ‘Tika amito ni Wod pa Lubanga obed Kabakana, dok mono amito lubo lanenne?’ Me adek dok ma pire tek loyo, omyero imar Jehovah. Pennye kekeni ni, ‘Tika amito yomo cwiny Jehovah kun atiyo pire macalo Lubangana?’ Ka lagammi pi lapeny magi tye ni eyo, ci pingo peya inongo batija? Tyen lok ango ma itye kwede me galle ki nongo batija?—Tic 16:33.

19. Pingo pe omyero ibed ki lworo me nongo batija? Mi lapor. (Jon 4:34)

¹⁹ Ka itye ki lworo me nongo batija, tam kong i kom lapor mo ma Yecu otiyo kwede. (Kwan Jon 4:34.) Nge ni Yecu oporo timo miti pa Wonne ki camo dek. Pingo? Pien cam ber piwa. Yecu onongo ngeyo ni jami ducu ma Jehovah penyowa me timone ber piwa. Jehovah pe mito ni watim gin mo keken ma twero kelo awano i komwa. Tika miti pa Jehovah piri kwako nongo batija? Eyo. (Tic 2:38) Dong itwero bedo ki gen matek ni lubo cikke me nongo batija bikelo adwogi maber boti. Ka pe ibedo ki lworo me camo dek mo mamit ma imaro, ci pingo itye ki lworo me nongo batija?

20. Ngo ma wabinyamo i pwony ma lubo man?

²⁰ Pingo jo mukene gigalle ki nongo batija? Jo mapol gigamo kit man ni, “An pud pe atye atera.” Tye lok ada ni tam ma imoko me dyere ki nongo batija aye obedo tam ma pire tek loyo ma ibimoko i kwoni. Pi meno, mitte ni itam matut i kom lok meno dok bitero kare kacel ki kero me bedo ma ipore. Ento ka itye ki miti matek me nongo batija, ngo ma itwero timo kombeddi me yubbe? Wabinyamo lagam pi lapeny meno i pwony ma lubo-ni.