1-2. Mot ango ma ngat moni nongo i nge batija?

 CWINYWA bedo yom adada ka wanongo batija ci wadoko jo me ot pa Jehovah. Jo ma gitye ki mot meno giye lok pa laco jabuli Daudi, ma owaco ni: “Dano ma iyero ka ikelo cok boti [Jehovah] tye ki gum, me bedo i dyekal me kabedoni maleng!”—Jab. 65:4.

² Kodi dano ma nining ma Jehovah kelo i dyekalle? Kit ma wanyamo kwede i pwony ma okato-ni, en yero me nyikke cok ki jo ma ginyuto ni gimito bedo ki wat macok kwede. (Yak. 4:8) Ka idyero kwoni bot Jehovah dok inongo batija, inyikke cok bot Jehovah i yo ma kite dok pat. Itwero bedo ki gen ni i nge batijani en ‘bionyo yomcwiny ma opong madwong i komi.’—Mal. 3:10; Jer. 17:​7, 8.

3. Tic ma pire tek ango ma Lukricitayo ducu ma gudyere dok gunongo batija gitye kwede? (Latitlok 5:​4, 5)

³ Batija obedo acakki me kwoni i tic pi Jehovah. I nge nongo batija, bimitte ni imedde ki gwoko kwongeni me tic pi Jehovah kun ibedo lagen bote kadi bed ikemme ki atematema. (Kwan Latitlok 5:​4, 5.) Macalo lapwonnye pa Yecu, ibilubo lanen pa Yecu kacel ki cikke macok adada. (Mat. 28:​19, 20; 1 Pet. 2:21) Pwony man binyutti kit me timo meno.

 ‘MEDDE KI LUBO KOR’ YECU KADI BED ATEMATEMA TYE

4. I yo ma nining ma lupwonnye pa Yecu gitingo ‘yat’? (Luka 9:23)

⁴ Pe itam ni i nge nongo batija, pe ibibedo ki peko mo keken i kwoni. Yecu otito ka maleng ni lupwonnyene gibitingo ‘yat.’ Ki lok ada, gibitimo man “nino ki nino.” (Luka 9:​23, NWT) Tika onongo Yecu tye ka waco ni lulub kore gibideno can nino ducu? Pe tye kit meno. Me ka meno, en onongo tye ka nyuto ni medo i kom mot ma gibinongo, gibikato ki i pekki mogo. Pekki magi mukene bene twero bedo malit.—2 Tem. 3:12.

5. Mot ango ma Yecu ocikke pire bot jo ma gujalo jami wek giti pi Jehovah?

⁵ Oromo bedo ni ikato ki i aunauna ma oa ki bot lupacowu, nyo ijalo cente kacel ki jami me kom wek iket pi Ker pa Lubanga mukwongo i kwoni. (Mat. 6:33) Ka tye kit meno, ci bed ki gen ni Jehovah ngeyo jami ducu ma itimo pire. (Ibru 6:10) Nen calo dong ineno ki wangi ada pa lok pa Yecu man: “Pe tye ngatti mo ma oweko ode, nyo omege, nyo nyimege, nyo minne, nyo wonne, nyo litino, nyo pottine, pira ki pi lok me kwena maber, ma en pe bilimo lwak jami makato meno tyen miya i kare man, gin aye odi, omego, lamego, mego, litino, ki potti, kacel ki libo; ka dok wa i kare me anyim en binongo kwo ma pe tum.” (Mar. 10:​29, 30) Mot ma dong inongo dwong ma loyo jami mo keken ma ijalo.—Jab. 37:4.

6. Pingo bimitte ni imedde ki lweny ki “miti me komwa ma ginywalowa kwede” i nge batija?

⁶ Pud bimitte ni imedde ki lweny ki “miti me komwa ma ginywalowa kwede” kadi wa i nge batija. (1 Jon 2:16) Man mitte pien ibedo lakwar Adam dok itye ki roc. I kare mukene, itwero winyo kit ma lakwena Paulo owinyo kwede. En ocoyo ni: “Amaro kwano cik pa Lubanga, kun alwodo lokke ki iya. Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu.” (Rom. 7:​22, 23) Cwinyi twero tur pien itye ka yelle ki miti maraco. Ento, tamo i kom kwonge ma ikwongo i kare ma idyere bot Jehovah bijingo mitini me lweny ki atematema. Lok ada tye, ka ikemme ki atematema, kwongeni meno bikonyi. I yo ma nining?

7. Bedo ma idyero kwoni bot Jehovah bikonyi nining me medde ki bedo lagen bote?

⁷ I kare ma idyere bot Jehovah, ikwerre kekeni. Man tyen lokke ni iyero me kwero mitini kacel ki yubbi ma pe yomo cwiny Jehovah. (Mat. 16:24) Dong ka ikemme ki atematema mo, pe bimitte ni iter kare ka tamo pi gin ma ibitimo. Nongo dong ityeko moko woko con gin ma ibitimo—ma en aye bedo lagen bot Jehovah. Ibimedde ki bedo ma imoko tammi liking me yomo cwiny Jehovah. Ibibedo calo Yubu. Kadi bed en okato ki i can malit adada, en owaco ki tekcwiny ni: “Pe abituro gennena!”—Yubu 27:​5, NWT.

8. Bedo ka lwodo legani me dyere konyi nining me kwero atematema woko?

⁸ Ka ibedo ka lwodo legani me dyere bot Jehovah, ci ibinongo teko me kwero atematema mo keken. Me labolle, tika itwero cako nyuto miti i kom ngat mo ma dong onyomme woko? Pe twere kulu! Nongo dong ityeko cikke woko bot Jehovah ni pe ibitimo gin ma kit meno matwal. Ka pe iye ni miti ma kit meno odong i cwinyi, ci  pe ibibedo ki peko me jwayone lacen. Dong meno biweko ‘ilokke woko’ ki i “yo pa jo maraco.”—Car. 4:​14, 15.

9. Bedo ka lwodo legani me dyere konyi nining me medde ki keto woroni pi Jehovah mukwongo?

⁹ Ket kong ni kimini dog tic ma bigengi ki bedo tye i cokke mogo. Ibingeyo gin me atima cutcut. Ma peya kimini tic meno, onongo dong ityeko moko woko con ni pe ibiye tic mo keken ma bigengi ki bedo tye i cokke ducu. Pi meno, pe ibibedo i abita me ye tic man kun itamo ni ibirido cawa mo me keto Jehovah mukwongo i kwoni. Lwodo labol pa Yecu bikonyowa. En omoko tamme me yomo cwiny Wonne. Calo Yecu, mok tammi me kwero lajwac gin mo keken ma ingeyo ni pe biyomo cwiny Lubanga ma idyere bote-ni.—Mat. 4:10; Jon 8:29.

10. Jehovah bikonyi nining me ‘medde ki lubo’ kor Yecu i nge nongo batija?

¹⁰ Lok ada tye ni atematema nyo peko mini kare me nyuto ni imoko tammi me ‘medde ki lubo’ kor Yecu. Dok itwero bedo ki gen ni Jehovah bikonyi me timo meno. Baibul tito ni: “Lubanga genne, pe biye ni gibitwu matek makato ma wuromo cirone, ento i kare ma Catan tye ka bitowu, Lubanga bimiyowu yo ma myero wubwot kwede, wek wubed ki twero me ciro.”—1 Kor. 10:13.

KIT ME MEDDE KI LUBO KOR YECU

11. Tit kong yo acel maber me medde ki lubo kor Yecu. (Nen bene cal.)

¹¹ Yecu otiyo pi Jehovah ki cwinye ducu, dok lega okonye me medde ki bedo cok ki Jehovah. (Luka 6:12) Ki lok ada, yo acel maber me medde ki lubo kor Kricito i nge  batijani aye ki medde ki timo jami ma bikonyi me nyiko cok ki Jehovah. Baibul waco ni: “Myero wamedde me cung matek i yo ma dong wao iye.” (Pil. 3:16) Kare ki kare, ibiwinyo pi omege ki lumege ma gumedo ticgi pi Jehovah. Gwok nyo gucito i Cukul pi Lutit Kwena me Ker-ri nyo gukobo ka ma can lutit kwena tye iye. Ka itwero keto yub ma kit meno, ci nongo ber adada. Jo pa Jehovah kare ducu giyenyo yo me medo ticgi pire. (Tic 16:9) Ento, ket kong ni i kare-ni pe itwero timo meno? Pe itam ni jo ma gitwero medo ticgi, giber giloyi. Gin ma pire tek aye ni imedde ki diyo cwinyi i ngwec me kwo. (Mat. 10:22) Wi pe owil ni, iyomo cwiny Jehovah matek ka itiyo pire ma lubbe ki keroni. Meno obedo yo ma pire tek ma itwero medde ki lubo kor Yecu i nge nongo batija.—Jab. 26:1.

12-13. Ngo ma omyero itim ka mit komi ocako kwe woko? (1 Jo Korint 9:​16, 17) (Nen bene bok ma wiye tye ni “ Medde ki Ngwec me Kwo.”)

¹² Gin ango ma omyero itim ka iwinyo ni legani pe tye ka a ki i cwinyi, nyo pe itye ka nongo mit pa tito kwena kit ma yam con inongo kwede? Ket kong ni pe itye ka nongo mit pa kwano Baibul kit ma yam inongo kwede. Ka icako winyo kit meno i nge nongo batija, pe itam ni Jehovah dong okwanyo cwiny mere maleng woko ki boti. Macalo dano ma tye ki roc, kit ma wawinyo kwede bedo ka lokke kare ki kare. Ka mit komi ocako kwe woko, tam i kom lanen pa lakwena Paulo. Kadi bed en otute matek me lubo lanen pa Yecu, en onongo ngeyo ni i kare mogo pe ebibedo ki miti matek me cobo ticce. (Kwan 1 Jo Korint 9:​16, 17.) En owaco ni: “Ka atimo ma kun pe amito,  nongo atye ka cobo tic ma gimiya.” Man nyuto ni Paulo onongo omoko tamme me cobo ticce me pwony kadi bed mitine tye nyo pe.

¹³ I yo acel-lu, pe imok tam ma lubbe ki kit ma iwinyo kwede keken. Mok tammi me timo gin ma atir kadi bed iwinyo calo pe imito. Ka imedde ki timo gin ma atir, ci i nge kare mo kit ma iwinyo kwede bilokke. Nio wa i kare meno, bedo ki yub maber me kwan piri keni, lega, wire i cokke ducu kacel ki tito kwena bikonyi me medde ki lubo kor Yecu i nge batija. Ka omege ki lumege gineno kit ma idiyo kwede ki cwinyi i tic pi Jehovah, man bicuko cwinygi matek.—1 Tec. 5:11.

“KONG WUNGINE KEKENWU . . . WUTEMME KEKENWU”

14. Jami mene ma i kwoni ma omyero ibed ka ngiyone kare ki kare, dok pingo? (2 Jo Korint 13:5)

¹⁴ I nge nongo batija, pire tek adada me bedo ka ngine kekeni kare ducu. (Kwan 2 Jo Korint 13:5.) Kare ki kare, bedo ber me neno ka itye ka lega nino ducu, kwano ki lwodo lok me Baibul, cito i cokke, kacel ki nywako i tic me pwony. Tute me nongo yo mapatpat ma twero konyi me nongo adwogi maber kacel ki mit pa timo jami magi. Me labolle, pennye kekeni ki lapeny magi: ‘An mono atwero gonyo tyen pwony mogo ma pigi tego me Baibul bot jo mukene? Tika tye jami mogo ma atwero timo wek anong mit pa tic me pwony? Tika atito ki Jehovah gin ma tye i cwinya kikome, dok anyuto ni ajenge i kome ki cwinya ducu? Tika acito i cokke kare ki kare? Atwero dongo dirona me miyo lagam kacel ki keto cwinya i cokke nining?’

15-16. Pwony ango ma inongo ki i gin mutimme i kom omego mo acel madok i kom kwero atematema?

¹⁵ Pire tek bene ni inge goroni. Omego mo ma nyinge Robert otito gin mo ma otimme i kome ma moko lok man. En owaco ni: “I kare ma onongo atye ki mwaka 20, onongo atye ki dog tic ma atiyo nino mogo. Nino mo acel i nge tic, dako mo ma watiyo kacel kwede olwonga me cito i gange. En owaco ni wabibedo kenwa dok wabibedo ki kare me ‘bango raa.’ I acakkine, abedo ka junge ajunga ki miye lagam, ento i agikkine akwero woko ci atitte pingo.” Robert okwero atematema-ni dok meno gin maber. Ento lacen, en otamo i kom gin mutimme-ni ci oniang ni pe edok iye maber tutwal. En oye  ni: “Pe akwero abita pa dako-ni cutcut kit ma Yucepu okwero kwede dako pa Potipar. (Acak. 39:​7-9) Ki lok ada, abedo ki ur ni obedo tek adada bota me kwero abita man. Gin mutimme-ni okonya me niang ni omyero ajing watta ki Jehovah.”

¹⁶ Itwero nongo adwogi maber ka ikwanyo kare me ngine kekeni kit ma Robert otimo-ni. Kadi bed iloyo atematema mo, pennye kekeni ni, ‘Otera kare marom mene me waco ni adag?’ Ka ineno ni alokaloka mitte, pe iwek cwinyi otur. Bed ki yomcwiny ni dong ingeyo goro man. Leg bot Jehovah pi goroni meno, dok itim jami ma twero konyi me jingo mitini me bedo lawiny bot Jehovah.—Jab. 139:​23, 24.

17. I yo ma nining ma gin mutimme i kom Robert onongo gudo nying Jehovah?

¹⁷ Tye dok pwony mukene ma wanongo ki i gin mutimme i kom Robert. En omedde ni: “I nge kwero lwongo pa latic lawota-ni, en owacca ni, ‘Ikato peny maber adada!’ Apenye pingo en oloko kit meno. En otito ni lareme mo, ma yam obedo Lacaden, owacce ni Lucaden ducu ma gubedo bulu gitimo bal i mung ka gunongo kare. Pi meno, dako-ni otito ki lareme meno ni kong ebitemo bita. I cawa meno, cwinya obedo yom adada ni aketo deyo i nying Jehovah.”

18. Gin ango ma imoko tammi me timone i nge batija? (Nen bok ma wiye tye ni “ Pwony Aryo ma Ibinongo Mitte.”)

¹⁸ Ka idyere bot Jehovah dok inongo batija, inyuto ni imito lonyo nyinge kadi bed gin ango otimme. Dok itwero bedo ki gen ni Jehovah ngeyo pekki ma ikato ki iye ki atematema ma ikwero. En bigoyo laane i kom tuteni me medde ki bedo lagen. Itwero bedo ki gen ni en bimini teko kun tiyo ki cwiny mere maleng. (Luka 11:​11-13) Ki kony pa Jehovah, ibibedo ki kero me medde ki lubo kor Yecu i nge batija.