1-2. Gin ango ma omyero ngat moni otim ma peya onongo batija?

 I MWAKI abic mukato-ni, dano makato milion acel gunongo batija macalo Lucaden pa Jehovah. Calo Temceo ma okwo i cencwari me acel, jo mapol i kingi bene kipwonyogi ada ‘cakke ki i tinogi.’ (2 Tem. 3:​14, 15) Jo mukene i kingi gupwonyo lok i kom Jehovah ma dong gidito. Macok cok-ki, mego mo ma obedo ka kwano Baibul ki Lucaden pa Jehovah onongo batija ma tye ki mwaka 97!

² Ka in latin kwan me Baibul nyo itye ka dongo i cing lunyodo ma gitye Lucaden, tika itye ki tam me nongo batija? Meno obedo yub maber adada! Ento ma peya inongo batija, bimitte ni kong idyere bot Jehovah. Pwony man bitito gin ma dyero kwoni bot Jehovah kwako. Bikonyi bene me neno pingo omyero pe ibed ki lworo me dyero kwoni kacel ki nongo batija ka dong iwinyo ni itye atera.

GIN MA DYERE OBEDO

3. Mi labol me Baibul pa jo mogo ma onongo gudyere bot Jehovah.

³ I Baibul, ngat ma odyere bot Jehovah onongo obedo ngat ma kiyero nyo kipoko pat pi tic mo ma pire tek. Rok me Icrael onongo dong gutyeko dyere woko bot Jehovah. Ento jo mogo ma i rok man onongo gudyere bot Jehovah i yo ma kite dok pat. Me labolle, Aron onongo tweyo akwaya jabu i kom kitambara ma i wiye macalo “lalukana maleng.” Akwaya jabu meno onongo nyuto ni kiyere dok odyere me  tic pi Jehovah i yo ma kite dok pat—macalo lalamdog madit me Icrael. (Levi 8:9) Ajula pa Lubanga bene onongo gudyere bot Jehovah i yo ma kite dok pat. Lok man ni Ajula pa Lubanga kigonyo ki i nyig lok me leb Ibru ni “Najir” ma tyen lokke tye ni “Ngat ma Opokke Woko,” nyo “Ngat ma Odyere.” Ajula pa Lubanga onongo gikwo ma lubbe ki kigeng mogo ma kiketo pigi i Cik pa Moses.—Wel 6:​2-8.

4. (a) Ka idyero kwoni bot Jehovah, gin ango ma pire doko tek loyo i kwoni? (b) Tyen lokke ngo me “kwerre” kekeni? (Nen bene cal.)

⁴ Ka idyero kwoni bot Jehovah, nongo iyero me doko lalub kor Yecu Kricito dok iketo tiyo miti pa Jehovah me bedo gin ma pire tek loyo i kwoni. Meno kwako gin ango? Yecu owaco ni: “Ka ce dano mo mito lubo kora, myero okwong kwerre kekene.” (Mat. 16:24) Macalo latic pa Jehovah ma odyere, bimitte ni ikwer gin mo keken ma pe yomo cwiny Jehovah. (2 Kor. 5:​14, 15) Meno kwako kwero “tic me kit pa dano,” calo tim tarwang. (Gal. 5:​19-21; 1 Kor. 6:18) Tika lubo cik magi biweko kwoni bedo matek? Kwoni pe bibedo tek ka imaro Jehovah dok iye ni cikke ducu tye pi ber bedoni. (Jab. 119:97; Ic. 48:​17, 18) Omego mo ma nyinge Nicholas owaco ni, “Itwero neno cik pa Jehovah calo cel me gang buc ma gengi ki timo gin ma cwinyi mito nyo macalo cel ma orumo ot pa labwor ma gwoki ki i awano.”

5. (a) Ngat moni dyere bot Lubanga nining? (b) Apokapoka ango ma tye i kin dyere ki batija? (Nen bene cal.)

⁵ Ngat moni dyere bot Lubanga nining? I legane pire kene, en cikke ni ebiworo Jehovah keken dok gin ma pire tek loyo i kwone bibedo timo miti pa Jehovah. Ki lok ada, nongo itye ka cikke bot Jehovah ni  ibimedde ki mare “ki cwinyi ducu, ki kwoni ducu, ki tammi ducu dok ki tekki ducu.” (Mar. 12:​30, NWT) Pe tye ngat mo ma ngeyo ka idyero kwoni pien timme i kin in ki Jehovah keken. Ki tungcel, batija obedo gin ma timme i nyim lwak; dok nyuto bot jo mukene ni dong ityeko dyere bot Jehovah. Dyereni obedo cikke ma pe myero iter tuko tuko. Yubbi myero obed me gwoko kwonge meno dok Jehovah bene mito ni itim meno.—Latit. 5:​4, 5.

PINGO OMYERO IDYERE BOT JEHOVAH?

6. Gin ango ma tugo cwiny ngat moni me dyere bot Jehovah?

⁶ Tyen lok ma pire tek loyo mumiyo idyere bot Jehovah aye pien imare matek. Mar man pe jenge i kom kit ma iwinyo kwede keken. Me ka meno, ipwonnye me maro Jehovah macalo adwogi me ngec matir ma inongo madok i kome kacel ki yubbe. (Pil. 1:9) Kwanni me Baibul oweko iye ni (1) Jehovah tye ada, (2) Baibul obedo Lokke, dok (3) en tiyo ki dulle me cobo yubbe.

7. Gin ango ma omyero wabed ka timone ma peya wadyere bot Lubanga?

⁷ Jo ma gudyere bot Jehovah myero gunge pwony ma pigi tego me Baibul dok gubed ka kwo ma lubbe ki cik pa Lubanga. Ginywako niyegi ki jo mukene kit ma gitwero kwede. (Mat. 28:​19, 20) Margi pi Jehovah odongo matek, dok mitigi tye me miyo worogi ducu bot en keken. Tika in bene iwinyo kit meno? Ka imaro Jehovah ki cwinyi ducu, pe ibidyere nyo ibinongo batija ki miti me yomo cwiny lapwonyi me Baibul  nyo lunyodoni, nyo ni pien man aye gin ma luremi ducu gitye ka timo.

8. Bedo ki pwoc konyi nining me moko tammi me dyere bot Jehovah? (Jabuli 116:​12-14)

⁸ Ka itamo i kom jami ducu ma Jehovah otimo piri, ci ibibedo ki pwoc bote kacel ki miti me dyero kwoni bote. (Kwan Jabuli 116:​12-14.) Pi tyen lok ma atir, Baibul lwongo Jehovah ni Lami “kit gin mo ducu maber, ki mot ducu mabeco twatwal.” (Yak. 1:17) Mot ma pud dong dit loyo ki i kin mot magi obedo ginkok pa Wode, Yecu. Tam kong iye! Ginkok oweko twerre piri me bedo ki wat macok ki Jehovah. Dok Jehovah omini gen me kwo pi naka. (1 Jon 4:​9, 10, 19) Dyero kwoni bot Jehovah obedo yo maber me nyuto pwocci pi mar madit loyo ma Jehovah onyuto, kacel ki mic mukene ma en omiyo boti. (Nwo. 16:17; 2 Kor. 5:15) Pwoc ma kit meno kiloko pire i pwony me 46, wi lok matidi me 4, i buk me Bed ki Kwo Maber Nakanaka!, ma tye ki vidio me dakika adek ma wiye tye ni Miyo Motti Bot Lubanga.

TIKA ITYE ATERA ME DYERE KI NONGO BATIJA?

9. Pingo omyero ngat moni pe odyere pi lyeto ma a ki bot jo mukene?

⁹ Twero bedo ni iwinyo ni pud pe itye atera me dyere ki nongo batija. Gwok nyo pud imito timo alokaloka mogo i kwoni wek ilub cik pa Jehovah, nyo imito kare me jingo niyeni. (Kol. 2:​6, 7) Pe lutino kwan me Baibul ducu gidongo marom, dok pe jo matino ducu nongo gitye atera me dyere ki nongo batija ka dong guo mwaka moni. Tute me niang alokaloka mene ma mitte ki boti, ci itimgi, labongo porre ki ngat mukene.—Gal. 6:​4, 5.

10. Gin ango ma itwero timone ka iniang ni peya itye atera me dyere ki nongo batija? (Nen bene bok ma wiye tye ni “ Pi Lutino ma Lunywalgi Tye Lucaden pa Jehovah.”)

¹⁰ Kadi bed iniang ni peya itye atera me dyere bot Jehovah, medde ki keto meno macalo yubbi. Leg bot Jehovah wek ogo laane i kom tuteni me timo alokaloka mo keken ma mitte. (Pil. 2:13; 3:16) Itwero bedo ki gen ni en biwinyo legani dok bigamone.—1 Jon 5:14.

GIN MUMIYO JO MUKENE GILWORO DYERE KI NONGO BATIJA

11. Jehovah bikonyowa nining me medde ki bedo lugen bote?

¹¹ Jo mukene ma dong gitye atera me dyere ki nongo batija, pud gibedo ki lworo. Giromo pennye kekengi ni, ‘Ka atimo bal madit ci kiryema woko ki i kacokke kono?’ Ka itye ki kodi lworo meno, bed ki gen ni Jehovah bimini jami ducu ma mitte ‘wek kwoni obed ma myero bote, ma yomo cwinye maber.’ (Kol. 1:10) En bene bimini teko ma mitte me timo gin ma atir. En dong otyeko konyo jo mukene mapol me timo gin ma atir. (1 Kor. 10:13) Meno aye tyen lok acel mumiyo jo manok keken aye kiryemogi ki i kacokke. Jehovah konyo jone me medde ki bedo lugen.

12. Watwero gwokke nining ki timo bal madit?

¹² Pi roc ma watye kwede, wan ducu wawok ki i abita me timo jami maraco. (Yak. 1:14) Ento, in aye myero iyer gin ma ibitimo ka ikemme ki atematema moni. Lok ada tye ni in aye idoro kit ma ikwo kwede. Jo mukene giwaco ni pe watwero doro kit ma wawinyo kwede kacel ki jami ma watimo. Ento meno lok goba. Itwero pwonnye me loyo mitini maraco. Dok kadi bed miti mo marac  obino, itwero kwerone woko. Tye bene jami mogo ma itwero timo me konyi wek igwokke ki timo bal. Me labolle, leg bot Jehovah nino ducu. Bed ki yub maber me kwan piri keni. Bed tye i cokke ducu. Nywak niyeni ki jo mukene. Timo jami magi kare ducu bimini teko me medde ki bedo lagen bot Jehovah. Dok wi pe owil ni Jehovah bikonyi me timo meno.—Gal. 5:16.

13. Lanen maber ango ma Yucepu owekiwa?

¹³ Pe bibedo tek tutwal me gwoko genneni ka imoko tammi woko con i kom gin ma ibitimo ka ce ikemme ki atematema. Baibul miniwa labol pa jo mapol ma gutimo man, kadi bed gin bene onongo gitye ki roc. Me labolle, dako pa Potipar obedo ka bito Yucepu teretere. Ento Yucepu onongo dong ngeyo gin ma ebitimo. Baibul tittiwa ni “en okwero woko,” dok owaco ni: “An dok acore ka tiyo bal madit marac kuman nining, kun atimo wa bal i kom Lubanga kulu?” (Acak. 39:​8-10) Onen ka maleng ni, Yucepu onongo dong ngeyo gin ma ebitimo ma peya dako-ni ocako bite. Meno oweko obedo yot bote me timo gin ma atir i kare ma okemme ki atematema man.

14. Watwero pwonnye nining me kwero atematema me timo bal?

¹⁴ Itwero lubo lanen pa Yucepu nining kun ikwero atematema woko? Itwero moko kombeddi gin ma ibitimo ka ce ikemme ki atematema. Pwonnye me kwero woko cutcut jami ma Jehovah dagi, dok ikwer kadi wa tam i kom jami magi. (Jab. 97:10; 119:165) Meno bikonyi pe me timo bal ka ikemme ki abita. Nongo dong ingeyo woko con kit ma ibidok kwede iye.

15. Ngat moni twero nyuto nining ni etye ka ‘yenyo’ Jehovah? (Jo Ibru 11:6)

¹⁵ Twero bedo ni, iye ni inongo ada dok imito tic pi Jehovah ki cwinyi ducu, ento pud iwinyo ni pe itye atera me dyere ki nongo batija. Ka tye kit meno, itwero timo gin ma Kabaka Daudi otimo. Itwero lega bot Jehovah ni: “Ngi kwona, ai Lubanga, wek ingi gin ma tye i cwinya; kong itema, wek ingi ka ma tamma tye iye. Inen ka kit mo marac tye i iya ci dong itela i yo ma bedo nakanaka.” (Jab. 139:​23, 24) Jehovah goyo laane i kom “jo ma yenye.” Tuteni  me cobo yubbi me dyere ki nongo batija nyuto bote ni itye i kin jo magi.—Kwan Jo Ibru 11:6.

MEDDE KI NYIKKE COK KI JEHOVAH

16-17. Jehovah ywayo jo ma lunywalgi tye Lucaden nining? (Jon 6:44)

¹⁶ Yecu owaco ni lupwonnyene ducu Jehovah aye ywayogi kelogi i ada. (Kwan Jon 6:44.) Tam kong i kom lok me aura meno ki kit ma gudi kwede. Jehovah neno gin mo maber i cwiny ngat acel acel ma en ywayo bote. En neno ngat meno macalo ‘danone kikome.’ (Nwo. 7:6) Meno aye kit ma en neni kwede bene.

¹⁷ Ento twero bedo ni, in latin ma itye ka dongo i cing lunywal ma gin Lucaden pa Jehovah. Itwero winyo calo itye ka tic pi Jehovah pien lunywali bene gitimo meno, ento pe ni pien Jehovah aye onyiki bote. Kadi bed kit meno, Baibul waco ni: “Wunyik cok bot Lubanga, ci en bene binyiko cok botwu.” (Yak. 4:8; 1 Tekwaro 28:9) Ka ikwanyo kare me nyikke cok ki Jehovah, en bene binyiko cok boti. Jehovah pe nenowa mere macalo gurup. En ywayo ngat acel acel—kadi wa ngat ma odongo i ada. Ka ngat ma kit meno okwanyo kare me nyiko cok bot Jehovah, Jehovah bene nyiko cok bote, kit ma waneno kwede i Yakobo 4:8.—Por ki 2 Jo Tecalonika 2:13.

18. Gin ango ma wabinyamo i pwony ma lubo man? (Jabuli 40:8)

¹⁸ Ka idyere bot Jehovah dok inongo batija, nongo itye ka nyuto kodi cwiny acel ma Yecu onyuto-ni. En omine kene bot Wonne me tiyo gin mo keken ma Wonne mito. (Kwan Jabuli 40:8; Ibru 10:7) I pwony ma lubo man, wabinyamo gin ma bikonyi me medde ki tic pi Jehovah ki gen i nge nongo batija.