1. Tam ango ma lutic pa Jehovah mogo ma lugen gilwenyo kwede?

 PUD dong tye me cuko cwiny me ngeyo ni watye ki cwak pa Jehovah macalo gurup! Baibul waco ni: “[Jehovah] cwinye yom i kom lwakke.” (Jab. 149:4) Ento i kare mogo, jo mukene cwinygi tur adada ma weko gipennye kekengi ni, ‘Tika Jehovah cwinye yom i koma?’ Lutic pa Jehovah mapol ma lugen ma kiloko i komgi i Baibul i kare mogo bene gunongo ni tek me ye ni Jehovah cwinye yom i komgi.—1 Cam. 1:​6-10; Yubu 29:​2, 4; Jab. 51:11.

2. Angagi ma ginongo cwak pa Jehovah?

² Baibul nyuto ka maleng ni dano ma gitye ki roc gitwero nongo cwak pa Jehovah. I yo ma nining? Omyero wanyut niyewa i kom Yecu Kricito dok wanong batija. (Jon 3:16) I yo meno, wanyuto ki jo mukene ni watyeko ngut i kom balwa dok wakwonge bot Lubanga me timo mitine. (Tic 2:38; 3:19) Cwiny Jehovah bedo yom i komwa ka watimo jami magi wek wanyikke cok kwede. Ka watimo gin ducu ma watwero me gwoko kwongewa me dyere, Jehovah bimiyo cwakke botwa kun nenowa macalo lureme macok.—Jab. 25:14.

3. Lapeny adek mene ma wabinyamogi?

³ Ento pingo jo mogo giwinyo ni gipe ki cwak pa Lubanga? Jehovah weko wangeyo nining ni watye ki cwakke? Dok Lakricitayo  twero jingo genne nining ni etye ki cwak pa Lubanga?

GIN MUMIYO JO MOGO GIWINYO NI PE GITYE KI CWAK PA JEHOVAH

4-5. Kadi bed i cawa mukene wawinyo calo konywa pe, gin ango ma watwero bedo ki gen iye?

⁴ Nicakke i kare ma onongo gitino, jo mogo i kinwa gulwenyo ki tam ni konygi pe. (Jab. 88:15) Omego mo ma nyinge Adrián owaco ni: “Kare ducu an alwenyo ki tam ni konya pe. I kare ma onongo pud atidi, wiya po ni alego ni Jehovah okony lupacowa me donyo i Paradic, kadi bed onongo awinyo ni pe apore me kwo kunu.” Tony, ma odongo i gang ma jone pe Lucaden, owaco ni: “Pe tye nino mo ma lunywalla guwacca ni gimara nyo gitye ki awaka i koma. Man oweko awinyo ni pe tye gin mo ma atwero timo me yomo cwinygi.”

⁵ Ka i cawa mukene walwenyo ki tam ni konywa pe, ci omyero wiwa opo ni Jehovah kikome aye onyikowa cok bote. (Jon 6:44) En neno kitwa mabeco ma wan kikomwa pe waromo neno, dok ngeyo gin ma tye i cwinywa. (1 Cam. 16:7; 2 Tekwaro 6:30) Pi meno, watwero gene ka en owacciwa ni piwa tek bote.—1 Jon 3:​19, 20.

6. Lakwena Paulo owinyo nining pi bal ma en otimo con?

⁶ Ma peya wapwonyo ada, jo mogo i kinwa gutimo bal ma weko cwinygi pud pidogi wa i kare-ni. (1 Pet. 4:3) Kadiwa jo mukene ma dong gutiyo pi Jehovah ki gen pi mwaki mapol, pud giyelle ki gorogi. In kono? Tika i kare mogo iwinyo calo Jehovah pe twero timmi kica? Ka tye kit meno, twero kweyo cwinyi me ngeyo ni lutic pa Jehovah mukene bene gulwenyo ki tam ma kit meno. Me labolle, lakwena Paulo owinyo calo konye pe i kare ma otamo i kom gorone. (Rom. 7:24) Tye lok ada ni, Paulo onongo otyeko ngut woko pi balle dok onongo batija. Kadi bed kit meno, en pud owaco ni, “an atidi twatwal i kin lukwena ducu” dok “abedo labal mukwongo.”—1 Kor. 15:9; 1 Tem. 1:15.

7. Gin ango ma omyero wiwa opo iye ma lubbe ki bal ma watimo i kare mukato angec?

⁷ Wonwa me polo ocikke me timiwa kica ka wangut i kom balwa. (Jab. 86:5) Dong ka ada wangut i kom balwa ki cwinywa ducu, watwero bedo ki gen ni lok pa Jehovah tye ada dok en otyeko timiwa kica.—Kol. 2:13.

8-9. I yo ma nining ma watwero lweny ki tam ni pe waromo timo tic muromo me yomo cwiny Jehovah?

⁸ Wan ducu wamito timo gin ducu ma watwero pi Jehovah. Ento, jo mukene giwinyo ni pe gitwero timo tic muromo me yomo cwinye. Laminwa mo ma nyinge Amanda owaco ni: “Pol kare atamo ni me miyo Jehovah gin maber loyo, myero abed ka tiyo tic mapol kare ducu. Pi meno, abedo ka keto gingi i koma kekena me timo gin ma pe atwero. Ci ka cobone oloya woko, atamo ni cwiny Jehovah pe yom i koma kit ma an bene nongo cwinya tye ka cwer kwede i koma kekena.”

⁹ I yo ma nining ma watwero lweny ki tam ni pe waromo timo tic muromo me yomo cwiny Jehovah? Wi opo ni Jehovah pe obedo lagingi. En pe mito ni watim gin ma kerowa pe twero. En pwoyo gin mo keken ma watimo pire ka obedo gin maber loyo ma watwero. Medo i kom meno, tam i kom jo mogo ma kiloko i komgi i Baibul ma gutiyo pi Jehovah ki cwinygi ducu. Me labolle, tam i kom lakwena Paulo. En otiyo matek pi mwaki mapol, kun woto pi mairo alip mapol dok ocako kacokke mapol. Ento i kare ma kwone olokke dok onongo pe twero tito kwena kit macon, tika en orwenyo cwak pa Lubanga woko? Pe kumeno. En omedde ki timo gin ma en twero, dok Jehovah ogoyo laane i kome. (Tic 28:​30, 31) I  yo acel-lu, gin ma watwero miyo ki Jehovah oromo lokke i kare mogo. Ento gin ma pire tek loyo bote obedo tyen lok mumiyo watiyo pire. Kong dong wanenu yo mogo ma Jehovah nyuto kwede ni cwinye yom i komwa.

JEHOVAH NYUTIWA NINING NI CWINYE YOM I KOMWA?

10. Watwero “winyo” dwan Jehovah nining i kare-ni? (Jon 16:27)

¹⁰ En ominiwa Baibul. Jehovah yenyo yo me nyuto ki jone ni emarogi dok cwinye yom i komgi. Ginacoya tittiwa tyen aryo mapatpat ma Jehovah olwongo Yecu ni Wode me amara, ma cwinye yom i kome. (Mat. 3:17; 17:5) Tika imito ni Jehovah otitti ni cwinye yom i komi? I kare-ni, Jehovah pe loko kwedwa ki i polo, ento loko kwedwa kun wok ki i Lokke, Baibul. Ka wakwano lok me mar ma Yecu oloko bot lupwonnyene, bedo calo watye ka “winyo” dwan Jehovah ka en waco lok meno botwa. (Kwan Jon 16:27.) Yecu olubo kit pa Wonne kore ki kore. Pi meno, ka wakwano ni Yecu onongo cwinye yom i kom lulub kore kadi bed onongo gitye ki roc, ci watwero goyo i wiwa ni Jehovah tye ka waco lok meno botwa.—Jon 15:​9, 15.

11. Pingo kato ki i peko pe tyen lokke ni warwenyo cwak pa Jehovah woko? (Yakobo 1:12)

¹¹ En miniwa jami ma mitte. Jehovah tye ki miti me konyowa, me labolle, en miyo botwa jami me kom ma mitte. Ento i kare mogo, Jehovah ye ni wakat ki i peko, kit ma en oye ni otimme i kom laticce Yubu. (Yubu 1:​8-11) Ka watye ka kato ki i peko, meno pe te lokke ni warwenyo cwak pa Lubanga woko. Me ka meno, pekki miniwa kare me nyuto ki Jehovah ni watye ki mar matut pire dok wagene. (Kwan Yakobo 1:12.) Dok i kare ma watye ka kato ki i peko, wabineno kit ma en marowa kwede dok tye ka konyowa me cirone.

12. Pwony ango ma wanongo ki i gin mutimme i kom Dmitrii?

¹² Tam kong i kom gin mutimme i kom omego mo ma nyinge Dmitrii ma bedo i Asia. En orwenyo ticce woko dok onongo pe twero nongo tic mukene pi dwe mapol. Pi meno, en omoko tamme me nyuto genne i kom Jehovah ki medo cawane i tic me pwony. Dwe kato ci kato, ento en onongo pud pe twero nongo tic. Ci two mo malit ogoye ma oweko onongo dong pe twero a ki i kabuto. En ocako bedo ki akalakala ka ada ebedo won ot nyo wego maber, dok obedo ka pennye ka ce  erwenyo cwak pa Jehovah woko. Ci otyeno mo acel, nyare orudo lok ma nonge i Icaya 30:15 i karatac mo. Ginacoya meno waco ni: “Ka wubedo mot ki gen, wubinongo teko.” Okelo karatac man bot wonne dok owacce ni, “Baba, ka itye ka winyo marac, wi opo i kom ginacoya man.” Dmitrii oniang ni, ki kony pa Jehovah, jo me ode onongo pud gitye ki cam muromo, bongo me aruka, ki kabedo. En owaco ni: “Gin ma onongo mitte ni atim, aye me bedo ma wiya opye mot kun amedde ki geno Lubangana.” Ka itye ka kato ki i peko macal ki man, bed ki gen ni Jehovah paro piri dok bikonyi me cirone.

13. Angagi ma Jehovah twero tic kwedgi me nyuto marre piwa, dok nining?

¹³ En tiyo ki utmegiwa. Jehovah tiyo ki omegiwa ki lumegiwa me tittiwa ni cwinye yom i komwa. Me labolle, en twero tugo cwiny jo mukene me cuko cwinywa i kare ma mitte kikome. Man aye gin mutimme i kom laminwa mo ma bedo i Asia i kare ma en onongo tye ka kato ki i pekki mapol. En onongo orwenyo ticce woko dok two mo malit ogoye. I nge meno, cware otimo bal madit dok orwenyo motte me tic macalo laelda. Laminwa-ni owaco ni: “Pe aniang kulu pingo jami magi otimme. Atamo ni gwok nyo atimo gin mo marac ci arwenyo cwak pa Jehovah woko.” Laminwa man obako doge bot Jehovah wek onyutte ni pud emare. Jehovah otimo man nining? Laminwa-ni otito ni, “Luelda guloko kweda dok gukonya me neno ni Jehovah pud mara.” Ento i nge kare mo, en dok openyo Jehovah ni okonye. En owaco ni: “I nino meno kikome, anongo waraga ma gurup pa omege ki lumege mogo me kacokkewa gucoyo. I kare ma akwano lok me cuko cwiny ma gucoyo, awinyo ni Jehovah ogamo legana.” Ada, Jehovah pol kare tiyo ki jo mukene me loko lok ma nyuto marre piwa.—Jab. 10:17.

14. I yo mukene ango ma Jehovah nyuto kwede marre piwa?

 ¹⁴ Jehovah bene nyuto marre piwa kun tiyo ki luye luwotwa me miyo botwa tira i kare ma mitte kikome. Me labolle, i cencwari me acel, Jehovah otiyo ki lakwena Paulo me coyo waraga 14 bot luye luwote. I waraga magi, Paulo omiyo ki omegine ki lumegine tira magwar ento i yo me mar. Pingo Jehovah oweko lakwena Paulo ocoyo tira ma kit meno? Jehovah obedo Wego maber, dok en ‘pwodo lutinone ma cwinye maro mada.’ (Car. 3:​11, 12) Dong ka ngat mo ominiwa tira ma jenge i Baibul, meno pe tyen lokke ni Jehovah cwinye tye ka cwer i komwa. Me ka meno, nyuto ni Jehovah pud marowa. (Ibru 12:6) I yo mukene ango ma Jehovah nyuto kwede cwakke piwa?

YO MUKENE MA JEHOVAH NYUTO KWEDE CWAKKE PIWA

15. Jehovah miyo cwiny mere maleng bot jo ma nining, dok pingo meno weko wabedo ki gen?

¹⁵ Jehovah miyo cwiny mere maleng bot jo ma gitye ki cwakke. (Mat. 12:18) Watwero pennye kekenwa ni, ‘Tika anyuto nyig mogo ma nyak pi cwiny maleng i kwona?’ Tika idiyo cwinyi i kare-ni makato i kare ma onongo peya ingeyo Jehovah? Ki lok ada, ka imedde ki dongo nyig ma nyak pi cwiny maleng, meno weko ibedo ki gen ni Jehovah cwinye yom i komi!—Nen bok ma wiye tye ni “ Nyig ma Nyak pi Cwiny Maleng Gin Aye . . . ”

16. Jo mene ma Jehovah tiyo kwedgi me tito kwena maber, dok meno weko iwinyo nining? (1 Jo Tecalonika 2:4)

¹⁶ Jehovah miyo tic me tito kwena maber bot jo ma gitye ki cwakke. (Kwan 1 Jo Tecalonika 2:4.) Laminwa mo ma nyinge Jocelyn omoko lok man i kare ma en obedo ka nywako lok me kwena maber ki jo mukene. I nino mo acel, Jocelyn oco odiko ma cwinye otur adada. En owaco ni: “Onongo ape ki kero dok awinyo calo konya pe. Ento onongo atye ka tic macalo painia, dok meno onongo ninona me cito i tic me pwony. Pi meno, alego bot Jehovah ci acito ka tito kwena.” Odiko meno, Jocelyn orwatte ki dako mo ma lakica ma nyinge Mary, ma oye kwano Baibul. Lacen i nge dwe mogo, Mary otito ni onongo etye ka lega bot Lubanga pi kony i kare ma Jocelyn odwongo doggolane. Pwony ango ma Jocelyn onongo ki i gin mutimme man? En owaco ni, “Awinyo calo Jehovah onongo tye  ka wacca ni, ‘Amari adada.’” Ngene kene ni, pe dano ducu gibijolo kwenawa i yo maber. Ento omyero wabed ki gen ni Jehovah cwinye yom i komwa ka watute ki kerowa ducu me nywako kwena maber ki jo mukene.

17. Gin ango ma ipwonyo ki i lok pa Vicky madok i kom ginkok? (Jabuli 5:12)

¹⁷ Jehovah tiyo ki wel me ginkok pa Kricito me timo kica bot jo ma gitye ki cwakke. (1 Tem. 2:​5, 6) Ento ket kong ni pe wawinyo ni watye ki cwak pa Jehovah, kadi bed watye ki niye i kom ginkok dok watyeko nongo batija? Wi opo ni, kare ducu pe watwero geno gin ma cwinywa wacciwa ento watwero geno Jehovah. En neno jo ma gitye ki niye i kom ginkok ni kitgi atir, dok ocikke me goyo laane i komgi. (Kwan Jabuli 5:12; Rom. 3:26) Laminwa mo ma nyinge Vicky onongo ni tye me kony adada me lwodo lok i kom ginkok. Nino mo acel, i nge lwodo lok matut i kom ginkok, en oniang ni: “Jehovah obedo ka diyo cwinye i koma pi kare malac adada. . . . Ento, bedo calo onongo atye ka wacce ni: ‘Pe apore me nongo marri. Ginkok pa Wodi pe twero kwanyo balla.’” Bedo ka lwodo lok i kom mic me ginkok okonyo Vicky me cako winyo ni Jehovah mare. Wan bene wabiwinyo ni Jehovah marowa dok ni watye ki cwakke ka wakwanyo kare me lwodo lok i kom ginkok.

18. Gin ango ma watwero bedo ki gen iye ka wamedde ki maro Wonwa me polo?

¹⁸ Kadi bed watute matek me keto i tic tam ma kimiyo botwa i pwony man, pud i kare mogo cwinywa tur dok wapennye ka ada watye ki cwak pa Jehovah. Ka gin ma kit meno otimme, wi myero opo ni Jehovah miyo cwakke bot “jo ma gimedde ki maro en.” (Yak. 1:​12, NWT) Pi meno, medde ki nyikke cok bot Jehovah kacel ki yenyo yo mapatpat ma en nyuto kwede marre piri. Dok wi pe owil ni Jehovah “pe tye cen ka mabor ki bot ngat acel acel i kinwa.”—Tic 17:27.