Kitwero timiwa kica keken ki kony pa ginkok ma Yecu oculo ki remone. (Ep. 1:7) Ento, Baibul tito ni: “Lubanga oye me timo kica pi bal ma kitimo i kare macon,” ma meno aye, bal ma kitimo ma peya kiculo ginkok. (Rom. 3:​25, NWT) Jehovah onongo twero timo man nining ma peya kiculo ginkok kun en pud medde ki bedo Lubanga ma ngolo kop atir?

Ki tung bot Jehovah, cutcut i kare ma en ocikke me miyo ‘lakwaro’ ma bilaro jo ma ye en, onongo dong bedo calo kityeko culo ginkok woko. (Acak. 3:15; 22:18) Lubanga onongo pe ki akalakala mo keken ni Wode biculo ginkok ka karene oromo. (Gal. 4:4; Ibru 10:​7-10) I kare ma Yecu tye i lobo, Jehovah omine twero me timo kica pi bal ma peya kiculo ginkok. Yecu onongo twero timo kica bot jo ma gitye ki niye pien en onongo ngeyo ni ginkok ma ebiculone bijwayo balgi woko.—Mat. 9:​2-6.