1. Pingo watwero waco ni gen pa Abraim onongo pe bipoto nono?

 JEHOVAH ocikke bot lareme Abraim ni rok ducu ma i lobo gibilimo mot ki i kom likwaye. (Acak. 15:5; 22:18) Kit macalo Abraim onongo tye ki niye matek i kom Lubanga, en obedo ki gen matek ni cikke pa Lubanga bicobbe. Kadi bed kit meno, i kare ma Abraim tye ki mwaka 100 dok dakone tye ki mwaka 90, onongo pud peya gunywalo latin. (Acak. 21:​1-7) Ento Baibul waco ni: “Abraim yam oye, kun onongo oketo genne i kom gin ma nen calo pe gitwero geno, omiyo en odoko kwaro rok mapol, kit macalo yam gicoyo.” (Rom. 4:18) Wangeyo ni gin ma Abraim obedo ki gen iye ocobbe. En odoko won Icaka, latin ma gubedo ki gen pire pi mwaki mapol. Pingo onongo Abraim tye ki gen matek ni Jehovah bicobo cikkene?

2. Pingo Abraim onongo tye ki gen matek ni cikke pa Jehovah bicobbe?

² Kit macalo Abraim onongo ngeyo Jehovah maber-ri, ‘lok odonyo matut i cwinye ni, Lubanga twero tiyo gin ma ocikke pire.’ (Rom. 4:21) Cwiny Jehovah obedo yom i kom Abraim dok kikwane ni kite atir pi niyene. (Yak. 2:23) Kit ma kitito kwede i Jo Roma 4:​18, Abraim onongo tye ki niye kacel ki gen. Kong dong wanenu gin ma lakwena Paulo owaco madok i kom gen, kit ma kicoyo kwede i Jo Roma cura 5.

3. Gin ango ma Paulo otito madok i kom gen?

³ Paulo otito gin mumiyo watwero bedo ki tekcwiny ni “genwa . . . pe kelo botwa cwercwiny.” (Rom. 5:5) En bene okonyowa me niang kit ma genwa twero dongo kwede. Ka wawoto ki nyamo lok ma kicoyo i Jo Roma 5:​1-5,  bed ka tamo kit ma genni pi anyim dong odongo kwede. Nyamo lokwa bene binyuto kit ma itwero weko genni dongo matek makato kit ma tye kwede i kare-ni. Kong dong wacaku ki nyamo gen mo mamwonya ma Paulo owaco ni pe bipoto nono.

4. Gin ango ma kiloko iye i Jo Roma 5:​1, 2?

⁴ Kwan Jo Roma 5:​1, 2. Paulo ocoyo lok meno bot kacokke ma i Roma. Omege ki lumege ma kunnu onongo gupwonyo lok i kom Jehovah ki Yecu, gunyuto niye, ci gudoko Lukricitayo. Pi meno, Lubanga ‘okwanogi ni kitgi atir pi niye,’ ci owirogi ki cwiny maleng. Onongo dong gitye ki gen mamwonya ma gingeyo ni bicobbe ada.

5. Gen ango ma Lukricitayo ma kiwirogi gitye kwede?

⁵ Lacen Paulo ocoyo bot Lukricitayo ma kiwirogi ma gitye i kacokke ma i Epeco pi gen mamwonya ma kiminigi. Gen meno onongo kwako “mot me lonyo ki deyo madwong ma en [Jehovah] miyo bot jone.” (Ep. 1:18) Dok Paulo bene onyuto ki Lukricitayo ma i Kolocai ka ma gibinongo iye mot meno. En owaco ni ‘gin ma wageno meno kikano i polo piwu.’ (Kol. 1:​4, 5) Dong, gen pa Lukricitayo ma kiwirogi tye ni, kibicerogi me nongo kwo ma pe tum i polo, ka ma gibiloc iye kacel ki Kricito.—1 Tec. 4:​13-17; Yabo 20:6.

6. Omego mo acel ma kiwiro oloko nining i kom gen ma en tye kwede?

⁶ Lukricitayo ma kiwirogi gitye ki pwoc madit pi gengi mamwonya meno. Ngat acel i kingi, Omego Frederick Franz, owaco i mwaka 1991 kit ma en winyo kwede pi gen man, ni: “Genwa obedo gin ma kome, dok ngat acel acel i kin wan jo 144,000 binongo gin ma Lubanga ociko piwa. Mot ma wabinongo bibedo mwonya makato gin mo keken ma watamo pire.” I nge tic pi Jehovah pi mwaki  mapol, Omego Franz omoko ni: “Gen ma watye kwede pud pire tek botwa adada. . . . Ka wawoto ki kurone, pwocwa pire bene medde ki dongo. Obedo gin ma watye atera me kurone, kadi bed mitte ni wakur pi mwaki milion kulu. Atye ki pwoc pire i kare-ni makato kare mo keken.”

7-8. Gen ango ma pol pa wan watye kwede? (Jo Roma 8:​20, 21)

⁷ Pol pa dano ma giworo Jehovah i kare-ni gitye ki gen mapat. Gitye ki gen ma Abraim obedo kwede—gen me kwo pi naka i lobo i te Ker pa Lubanga. (Ibru 11:​8-10, 13) Paulo ocoyo pi mot mamwonya man. (Kwan Jo Roma 8:​20, 21.) I kare ma pud ipwonyo lok i kom cikke me Baibul pi anyim apwonya, gin ango ma ibedo ki miti iye loyo? Tika obedo ni nino mo acel ibibedo labongo roc mo? Nyo mono ibedo ki miti me pwonyo ni joni me amara ma guto gibikwo doki i lobo paradic? Pi gen ma Lubanga ominiwa, watye ki jami mapol ma watye ka kuro i anyim.”

⁸ Kadi bed watye ki gen me nongo kwo ma pe tum i polo nyo i lobo, nongo watye ki gen mamwonya ma miniwa tyen lok me bedo ki yomcwiny. Dok genwa meno twero medde ki dongo matek. Gin ma Paulo ocoyo tito kit ma meno twero timme kwede. Kong dong wanenu gin ma en ocoyo madok i kom genwa man. Lokke meno twero konyowa me bedo ki tekcwiny ni gin ma watye ki gen pire-ni bicobbe.

9-10. Kit ma waneno kwede ki i gin mutimme i kom Paulo, gin ango ma Lukricitayo ducu myero gunge? (Jo Roma 5:3) (Nen bene cal.)

⁹ Kwan Jo Roma 5:3. Paulo otito ni ka wakato ki i can mapatpat, ci genwa dongo. Meno twero weko wabedo ki ur. Ento lok ada tye ni, lulub kor Kricito ducu myero gunge ni gibikato ki i can. Nen kong labol pa Paulo. En owaco bot  jo ma i Tecalonika ni: “I kare ma pud watye kacel kwedwu watittiwu con ni, i kare mo i anyim wabineno can, ma dong bene otimme woko kit macalo wungeyo-ni.” (1 Tec. 3:4) Dok bot kacokke ma i Korint en ocoyo ni: “Wamito ni wuniang i kom can ma waneno . . . omiyo pe dong wabedo ki gen mo me bedo kwo doki.”—2 Kor. 1:8; 11:​23-27.

¹⁰ I kare-ni bene, Lukricitayo omyero gunge ni gibikato ki i can mapatpat. (2 Tem. 3:12) Tika meno otimme i komi? Tika dong ikato ki i aunauna pien inyuto niye i kom Yecu dok icako lubo kore? Twero bedo ni luremi ki wadini gucayi. Nyo bene guteri marac. Nyo gwok ladit ticci nyo lutic luwoti giketo aunauna i komi pien ibedo ngat ma genne? (Ibru 13:18) Tika luloc me gamente guketo aunauna i komi pi tito kwena maber bot jo mukene? Paulo owaco ni watwero bedo ki yomcwiny kadi bed wakat ki i can ma nining. Pingo?

11. Pingo omyero wamok tamwa me ciro atematema mo keken?

¹¹ Watwero bedo ki yomcwiny ka watye ka kato ki i can pien man twero konyowa me dongo kit mogo mabeco. Kit ma Jo Roma 5:3 waco kwede-ni, ‘bedo ki can kelo diyo cwiny me ciro can.’ Lukricitayo ducu gibikato ki i can, dong mitte ni gupwonnye me diyo cwinygi. Myero wamok tamwa me kanyo atematema mo keken ma wabikato ki iye. Wabinongo mot ma watye ka geno-ni keken ka wapwonnye me diyo cwinywa dok wamedde ki tic pi Jehovah. Pe wamito bedo calo jo ma Yecu oloko i komgi i kare ma obolo carolok i kom kodi ma opoto i kom pata got. I acakkine, gijolo kwena maber ki yomcwiny ento “ka can obino, nyo yelo dano [aunauna] pi lok man,” ci gipoto woko. (Mat. 13:​5, 6, 20, 21) Tye ada gire ni, kemme ki adegadega pe mit, ento ka waciro can dok wamedde ki tic pi Jehovah ci wabinongo adwogi maber. I yo ma nining?

12. Adwogi mabeco ango ma wanongo ka waciro can?

¹² Lapwonnye Yakobo oloko i kom adwogi mabeco ma bino pi ciro can. En ocoyo ni: “Wek wubed jo muteggi, ma roc mo pe i komwu, dok wubed ma gin mo bene pe orem botwu.” (Yak. 1:​2-4) Pi meno, Yakobo owaco ni ciro can tye ki ticce ma myero otim. Ciro can twero konyi me dongo kit mabeco calo diyo cwiny, niye, ki dong jenge i kom Jehovah. Ento, tye bene dok adwogi maber ma wanongo ka waciro can.

13-14. Ngo ma timme ka waciro can, dok meno kubbe nining ki genwa? (Jo Roma 5:4)

¹³ Kwan Jo Roma 5:4. Paulo otito ni, ‘diyo cwiny i ciro can weko gipwoyo kitwa.’ Dong, ka iciro can, man weko inongo cwak pa Jehovah. Meno pe tyen lokke ni cwiny Jehovah yom ka itye ka kato ki i peko. Me ka meno, cwinye bedo yom pien igwoko geneni. Tye me cuko cwiny me ngeyo ni ka waciro can wayomo cwiny Jehovah!—Jab. 5:12.

¹⁴ Wi opo ni Abraim okato ki i atematema mapol dok i kare ma ocirogi, cwiny Jehovah obedo yom i kome. Jehovah oneno en calo Lareme dok okwane ni kite atir. (Acak. 15:6; Rom. 4:​13, 22) Wan bene kitwero kwanowa ni kitwa atir. Jehovah cwinye bedo yom i komwa, pe pi tic mapol ma watimo nyo mot me tic ma watye kwede. Cwinye bedo yom i komwa ka wagwoko gennewa kadi bed watye ka  kato ki i atematema. Dok labongo paro pi mwakawa, kwo ma watye ka wok ki iye, nyo kerowa, wan ducu watwero ciro can. Tika itye ka ciro peko nyo atematema mo kombeddi? Ka tye kit meno, wi opo ni Jehovah cwinye yom i komi. Ka waniang ni Lubanga cwinye yom i komwa, ci genwa i kom mot ma en ocikke me kelone bijing matek.

15. Ngo ma Paulo owaco i Jo Roma 5:​4, 5 dok pingo meno twero weko jo mukene gibedo ki ur?

¹⁵ Kit ma Paulo otito kwede, cwiny Jehovah bedo yom i komwa ka wamedde ki bedo lugen bote i kare ma nongo watye ka ciro can. Nen kong kit ma Paulo omedde kwede ki nyamo lokke: “Ka dong pwoyo kitwa-ni miyowa bedo ki gen. Genwa meno pe kelo botwa cwercwiny.” (Rom. 5:​4, 5) Lok man twero nyweno wi jo mukene. Pingo? Pien con kong i Jo Roma 5:​2, Paulo owaco ni Lukricitayo ma i Roma onongo gitye ki gen me “nywako deyo pa Lubanga.” Dong, ngat mo romo penyo ni, ‘Ka onongo Lukricitayo magi gitye ki gen, ci pingo Paulo dok oloko i kom gen lacen?’

16. Gen cako dongo i cwiny dano nining? (Nen bene cal.)

¹⁶ Watwero niang lok pa Paulo ka wiwa opo ni gen obedo gin ma dongo. Me labolle: Wi tika po i kom tyen mukwongo ma iwinyo pi gen mamwonya ma nonge i Baibul? Twero bedo ni, i kare meno itamo ni gen me kwo pi naka i lobo paradic obedo mere lek mamwa. Ento, i kare ma imedde ki pwonyo lok i kom Jehovah ki cikke me Baibul, icako bedo ki tekcwiny ni gen man bicobbe ada.

17. Genni medde ki dongo nining i nge dyere ki nongo batija?

¹⁷ Kadiwa i nge dyere ki nongo batija, pud imedde ki pwonyo lok i kom Jehovah ki dongo marri pire. Meno oweko genni omedde ki dongo matek. (Ibru 5:13–6:1) Nen calo ikato ki i gin ma kitito pire i Jo Roma 5:​2-4. Ikato ki i can  mapatpat, ento icirogi ducu dok ineno cwak pa Jehovah. Kit ma dong ingeyo ni en mari dok cwinye yom i komi, i kare-ni dong itye ki tyen lok me geno ni ibinongo jami ma en ocikke pire. Genni i kare-ni tek ma loyo kit ma onongo tye kwede con. Odoko gin ma pire tek adada boti, gudo kwoni i yo ducu dok oloko kit ma itero kwede lupaconi, kit ma imoko kwede tam, ki dong kit ma itiyo kwede ki cawani.

18. Lok ango ma Jehovah oweko Paulo ocoyo?

¹⁸ Lakwena Paulo omedo lok mo ma pire tek adada madok i kom gen ma ibedo kwede i nge nongo cwak pa Lubanga. Jehovah ocuko cwinyi ni genni bicobbe ada. Pingo itwero bedo labongo akalakala mo i kom lok meno? Jehovah oweko Paulo ocoyo lok man bot Lukricitayo, ni: “Genwa meno pe kelo botwa cwercwiny, pien cwiny maleng dong omiyo gionyo mar pa Lubanga woko i cwinywa.” (Rom. 5:5) Pi meno, itye ki tyen lok ma pire tek me geno cikke pa Jehovah boti.

19. Itwero bedo ki tekcwiny ango ka odok i kom genni?

¹⁹ Lwod lok i kom cikke pa Jehovah bot Abraim ki dok i kom kit ma Jehovah onyuto kwede cwakke i kome dok okwane ni Lareme. Gen pa Abraim pe opoto nono. Baibul waco ni: “Pi diyo cwinye omiyo en onongo gin ma yam Lubanga ociko pire.” (Ibru 6:15; 11:​9, 18; Rom. 4:​20-22) Gen ma mege ocobbe kakare. In bene itwero bedo ki tekcwiny ni ka imedde ki bedo lagen, ibinongo mot ma itye ki gen pire-ni. Genni obedo gin ma kome; kelo yomcwiny dok pe bipoto nono! (Rom. 12:12) Paulo ocoyo ni: “Lubanga ma miyo dano ducu bedo ki gen myero omi yomcwiny ducu ki kuc opong i iwu pi niyewu i kome, wek genwu obed ka medde ameda pi tek pa cwiny maleng.”—Rom. 15:13.