LABONGO akalakala mo, itye ka nongo mit pa jami mapatpat ma Jehovah mini, dok itye ki pwoc madit ni en oye ni imok tammi i kom kit me tic ki jami magi. Ma lubbe ki lok ma tye i Baibul, kongo obedo mot mua ki bot Lubanga. Baibul waco ni: “Cam miyo dano bedo ki nyero ki kongo vino kelo yomcwiny bot jo ma gimato.” (Latit. 10:19; Jab. 104:15) Twero bedo ni ineno jo ma gitye ki pekki ma mato kongo olajo kelo. Dok bene jo ma i but lobo-ni ducu gitye ki tam mapatpat ka odok i lok me mato kongo. Gin ango ma dong twero konyo Lukricitayo me moko tam me ryeko ka odok i lok me mato kongo?

Ka watye ka moko tam, omyero wajenge i kom tira pa Lubanga, pe i kom gin ma dano ma i ka ngetwa gitamo. Ka walubo tira pa Lubanga, ci wabibedo ki yomcwiny i kwowa.

Twero bedo ni ineno jo mapol ma gimato kongo nino ducu dok gimato madwong. Jo mogo gimato kongo pien weko giwinyo agonya. Jo mukene gimato wek owil wigi woko ki i pekkigi. Dok i kabedo mukene, dano gineno ngat ma mato kongo madwong calo oteka.

Macalo Lukricitayo, watye ki tira ma oa ki bot Lacwecwa maryek. Me labolle, en otitiwa adwogi marac ma mato kongo olajo kelo. Twero bedo ni dong ikwano ki i Carolok 23:​29-35 kit ma kitito kwede kore ki kore kit ma lamero timme kwede kacel ki pekki ma mero kelo. a Laelda mo ma nyinge Daniel ma bedo i lobo Ulaya, wiye pud po i kom kit ma kwone onongo tye kwede i kare ma peya opwonyo ada. En owaco ni: “Onongo amato kongo wa i labyel kweri, dok meno oweko amoko tam maraco. Macalo adwogine, akato ki i pekki madwong dok pud cwinya cwer ka atamo i kom jami ma akato ki iye.”

Watwero moko tam me ryeko nining ka odok i lok me mato kongo ki kit me wene ki i adwogi maraco ma ngat mo twero nongo pi mato kongo olajo? Omyero waye ni tira pa Lubanga odor tamwa kacel ki ticwa.

Kong dong wanenu tira mogo me Baibul kacel ki tyen lok mogo ma oweko dano gimato kongo.

Lok pa Lubanga pe kwero mato kongo i yo mupore. Ki lok ada, Baibul bene moko ni mato kongo twero kelo yomcwiny. Baibul waco ni: “Dong icit icam kwonni ki yomcwiny, dok imat kongo vinoni ma nongo cwinyi yom ata.” (Latit. 9:7) Yecu onongo mato kongo vino i kare mogo, dok lutic pa Jehovah ma lugen bene onongo gimato kongo.—Mat. 26:​27-29; Luka 7:34; 1 Tem. 5:23.

Kadi bed Lok pa Lubanga pe gengo mato kongo mo manok, ento kwero tim me mero. Tito ka maleng ni: “Pe myero wumer ki kongo.” (Ep. 5:18) Dok bene waco ni ‘lumero pe gibibedo i ker pa Lubanga.’ (1 Kor. 6:10) Ada, Jehovah dag tim me mato kongo olajo ki mero. Me ka moko tam ma lubbe ki tekwarowa, wamoko tamwa ma lubbe ki tira me Baibul wek wayom cwiny Lubanga.

Jo mogo gitamo ni kadi gimat kongo madwong, pe gimer kulu. Ento timo meno keto kwowa ka mading. Ginacoya waco ka maleng ni bedo “opii pa kongo” twero weko laco (nyo dako) moko tam maraco ci balo watte woko ki Jehovah. (Tito 2:3; Car. 20:1) Yecu bene ociko ni “mero kongo” twero gengo ngat moni ki donyo i lobo manyen pa Lubanga.  (Luka 21:​34-36) Dong gin ango ma twero konyo Lakricitayo me wene ki i pekki ma twero bino macalo adwogi me mato kongo?

Rac adada ka ngat moni lubo tam me tekwaro ma en odongo iye ka odok i kom mato kongo. Ka odok i lok kom cam ki mat, Lukricitayo ginyuto ryeko ki moko tam ma yomo cwiny Jehovah. Baibul poyo wiwa ni: “Ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubanga.” (1 Kor. 10:31) Kong itam i kom lapeny kacel ki cik ma igi lac me Baibul magi:

Tika amato kongo pien amito ni lurema gumara? Nia 23:2 owaco ni: “Pe ilub lwak.” Ki kany, Jehovah onongo tye ka ciko Luicrael ni omyero pe gulub kor lwak ma onongo gitimo jami ma pe yomo cwinye. Tam man bene tye me kony adada bot Lukricitayo i kare-ni. Ka waweko tam pa jo mukene doro tam ma wamoko ka odok i kom mato kongo, ci man biweko motmot wajuko kwo ma lubbe ki rwom pa Jehovah kacel ki kit ma atir dok weko wabalo watwa kwede.—Rom. 12:2.

Tika amato kongo wek dano gunena ni abedo oteka? I tekwaro mogo, mato kongo nino ducu dok madwong pe obedo gin marac. (1 Pet. 4:3) Ento nen kong gin ma 1 Jo Korint 16:13 cuko cwinywa me timone: “Wuki piny, wucung matek liking i kom niyewu, wubed co kikome, wubed ki teko.” Tika mato kongo weko ngat moni bedo laco kikome? Pe tye kit meno. Kongo twero kwanyo woko kero pa ngat moni me tam maber kacel ki moko tam me ryeko. Dong, mato kongo madwong pe nyuto ni ngat moni obedo oteka. Ento nyuto mingo keken. Icaya 28:7 owaco ni mato kongo balo wi ngat moni dok weko en pe moko tam ma atir.

Teko me ada a ki bot Jehovah dok kwako ‘kiyo piny ki cung matek i niye.’ (Jab. 18:32) Watimo man ki bedo ma wagwokke ki i owic mo keken kun wamoko tam ma pe balo watwa ki Jehovah. Yecu onyuto teko ma kit meno i kare ma en tye i lobo, dok jo mapol onongo giwore macalo laco kikome ma cwinye tek.

Tika amato kongo wek wiya owil woko i kom pekkina? Jehovah oweko laco jabuli mo ocoyo ni: ‘Ka atamo pi jami mapol, in  [Jehovah] ikweyo cwinya ki kicani.’ (Jab. 94:19) Ka iwinyo ni par onuri woko, jenge i kom Jehovah pi kony, ento pe i kom kongo. Yo maber loyo me rwenyo par aye ki lega kare ki kare bot Jehovah. Medo i kom meno, jo mapol gunongo ni ber ka gipenyo pi kony ki bot laremgi mo muteggi i yo me cwiny i kacokke. Ki lok ada, mato kongo ni wek owil wi woko ki i pekkini, twero weko bedo yot boti adada me timo gin ma pe tye atir. (Koc. 4:11) Daniel, ma kiloko i kome con-ni, owaco ni: “Onongo alwenyo ki par dok cwinya pida adada. Onongo amato kongo wek pe abed ki par mapol ento man omedo pekkina ameda dok arwenyo lurema mapol kacel ki woro i koma kekena.” Gin ango ma okonyo Daniel? En owaco ni, “Aniang ni omyero ajenge adada i kom Jehovah pi kony, ento pe kongo. Lacen, ki kony pa Jehovah, abedo ki kero me lweny kacel ki loyo pekkina.” Lok ada tye ni Jehovah kare ducu tye atera me konyowa, kadi bed watamo ni gen mo dong pe.—Pil. 4:​6, 7; 1 Pet. 5:7.

Ka i kare mogo imato kongo, ci pingo pe ingine kekeni kun itiyo ki lapeny magi: ‘Tika watta mo nyo larema mo macok dong owacca ni atye ka mato kongo i yo marac?’ Ka tye kit meno, ci man twero bedo lanyut ni miti me mato kongo olajo tye ka dongo i kwoni kun in kikomi pe itye ka ngeyone. ‘Tika atye ka mato kongo madwong makato kit ma onongo amato kwede con?’ Ka tye kit meno, ci man twero bedo lanyut ni miti me mato kongo wa i labyel kweri ocako rwako lwite woko i kwoni. ‘Tika anongo ni kwo tek ka akeng mato kongo pi nino mogo manok nyo mapol?’ Ka iwinyo kit meno, ci twero bedo ni mato kongo dong orwako lwite matut adada i kwoni. Dok twero mitte ni inong kony ki bot ludiro me yotkom wek ibed ki kare me loyo peko meno.

Kit macalo mato kongo twero kelo pekki mapol, Lukricitayo mogo gumoko tamgi pe me mato kit kongo mo keken. Jo mukene gitwero yero pe me mato kongo pien ginongo kongo pe mit. Ka laremi mo omoko tam ma  kit meno, itwero nyutte cwiny me kica ki woro tamme kun pe iloko marac i kome.

Twero bedo ni dong ineno ni tye me ryeko ka iketo wang co piri keni ka odok i kom kongo ma rom mene ma ibimato. Nyo bene itwero keto cik ka odok i kom tyen adi ma omyero imat kwede ki kongo, twero bedo tyen acel nyo makato i cabit acel. Nyo itwero yero me mato kongo i cawa me cam. Jo mogo giyero kit kongo mene ma omyero gimati, calo mato wine nyo beer i yo mupore ento pe arege nyo bene rubone ki ginamata mukene. Ka ngat moni ocomo cik ma mege madok i kom mato kongo, ci man bibedo yot bote me lubone. Dok pe mitte ki Lakricitayo obed ki lewic pi lok pa dano ka en omoko cik ma kit meno dok tye ka lubone.

Ka watye ka moko tam madok i kom mato kongo, pire tek bene me tam i kom kit ma bigudo kwede jo mukene. Jo Roma 14:21 waco ni: “Bedo ber mada ka pe icamo ringo, nyo kadi ki mato kongo, nyo tiyo gin mo ma bimiyo omeru poto.” Itwero keto tira man i tic nining? Nyut mar me omego. Ka itamo ni mato kongo i nget ngat mo twero cwero cwinye, ci mar twero tugo cwinyi pe me mato kongo i cawa meno. Ka itimo meno, ci nyuto ni iworo dok imaro jo mukene dok iketo mitigi mukwongo ma loyo megi.—1 Kor. 10:24.

Medo i kom meno, twero bedo ni gamente oketo cik madok i kom mato kongo. Dok ngene kene ni, Lakricitayo myero olub cik meno. Cik magi twero waco ni omyero kong io mwaka moni ka wek icak mato kongo. Cik bene twero gengo ngat moni ki dwoyo mutoka nyo tic ki macin mogo ka en omato kongo.—Rom. 13:​1-5.

Jehovah omiyo botwa mot mapol adada, dok mot acel i kin magi aye obedo kerowa me moko tam ka odok i kom kit me nongo mit pa mot magi. Man kwako yero gin ma wabicamo nyo ma wabimato. Watwero nyuto ni watye ki pwoc pi mot me bedo agonya man ka wayero me moko tam ma yomo cwiny Wonwa me polo.