1. Ka watamo i kom niye pa Abraim, lapeny ango ma watwero pennye kwede?

 KADI bed jo mapol dong guwinyo pi Abraim, polgi gitye ki ngec manok i kome. Ento in ingeyo jami mapol i kom Abraim. Me labolle, ingeyo ni Baibul lwongo Abraim ni “kwaro dano ducu ma giye.” (Rom. 4:11) Ento itwero pennye kekeni ni, ‘Tika atwero lubo kodi niye ma yam Abraim obedo kwede-ni?’ Ada, itwero.

2. Pingo pire tek ni wakwan lok i kom Abraim? (Yakobo 2:​22, 23)

² Yo acel ma watwero dongo kwede niye matek calo Abraim aye ki kwano lok i kome. Kare ducu Abraim otimo gin ma Lubanga owacce ni otim. En odak i lobo mabor ki tugi, ci ocako kwo i kema dok onongo tye atera me tyero wode me amara Icaka. Abraim otimo jami magi ducu pien onongo tye ki niye matek i kom Jehovah. Niye pa Abraim ki ticce oyomo cwiny Jehovah dok oweko en odoko larem Jehovah. (Kwan Yakobo 2:​22, 23.) Jehovah mito ni wan ducu, kadi wa in, wanong cwakke dok wadok lureme. Pi tyen lok meno, en oweko lakwena Paulo ki Yakobo guloko i kom lanen pa Abraim. Wabinyamo gin ma buk pa Jo Roma cura 4 ki Yakobo cura 2 loko i kom Abraim. Cura aryo magi ducu gitito gin mo ma pire tek adada madok i kom Abraim.

3. Tyeng mene me Baibul ma lakwena Paulo ki Yakobo guloko iye?

³ Lakwena Paulo ki Yakobo gunwoyo lok ma nonge i Acakki 15:​6, ma waco ni: “[Abraim] oye lok pa Rwot [Jehovah]; ci gikwane ni en dano ma kite atir.” Jehovah kwano ngat moni ni kite atir nyo ni pe ki bal mo ka Cwinye  yom i kom ngat meno. Pud dong tye me ur ya ni Lubanga twero neno dano ma labalo ma tye ki roc ni kite atir! Labongo akalakala mo, imito ni Lubanga oneni ni kiti atir dok meno twere. Kong dong wanyamu tyen lok mumiyo Jehovah okwano Abraim ni kite atir ki gin ma omyero watim wek kilwongwa ni kitwa atir.

4. Gin ango ma gengo dano me bedo ma kitgi atir?

⁴ I waragane bot jo Roma, Paulo otito ka maleng ni dano ducu gubalo. (Rom. 3:23) Dong ngo ma romo weko cwiny Lubanga bedo yom i komwa kun nenowa ni kitwa atir? Me konyo Lukricitayo ma cwinygi atir me gamo lapeny meno, Paulo otiyo ki lanen pa Abraim.

5. Pingo Jehovah olwongo Abraim ni kite atir? (Jo Roma 4:​2-4)

⁵ Jehovah olwongo Abraim ni kite atir i kare ma en bedo i lobo Kanaan. Pingo Jehovah onongo twero lwongo Abraim ni kite atir? Tika obedo pien ni Abraim onongo lubo Cik pa Moses kore ki kore? Pe tye kit meno. (Rom. 4:13) Kimiyo Cik meno bot rok me Icrael mwaki makato 400 i nge Lubanga lwongo Abraim ni kite atir. Dong pingo Lubanga olwongo Abraim ni kite atir? Jehovah onyuto ki Abraim kica ma pe opore pire ci olwonge ni kite atir pi niyene.—Kwan Jo Roma 4:​2-4.

6. Pingo Jehovah twero lwongo dano ma tye ki bal ni kite atir?

⁶ Paulo omedde ki lokke kun waco ni ka ngat mo tye ki niye i kom Lubanga, “kit dano macalo meno gikwano ni kite atir pi niyene.” (Rom. 4:5) Paulo dok omedde ni: “I kit acel-lu, Daudi bene yam oloko pi gum ma dano tye kwede, ka Lubanga okwane ni en dano ma kite atir labongo tic mo ma en otiyo, macalo yam gicoyo ni: ‘Jo ma dong giweko balgi gitye ki gum, ma balgi bene dong gikwanyo woko; dano ma Rwot [Jehovah] dong pe kwano bal mo i kome tye ki yomcwiny.’” (Rom. 4:​6-8; Jab. 32:​1, 2) Lubanga timo kica nyo umo bal pa jo ma giketo niyegi i kome. En timmigi kica i yo ducu dok pe kwano balgi i komgi. Ki tung bote, jo ma kit meno gipe ki bal dok kitgi atir pi niyegi.

7. Pingo watwero waco ni lutic pa Lubanga me kare macon onongo kitgi atir?

⁷ Kadi bed Lubanga olwongogi ni kitgi atir, Abraim, Daudi, ki lutic pa Jehovah mukene ma lugen onongo pud gitye ki roc. Ento pi niyegi, Lubanga onenogi calo jo ma balgi pe, tutwalle ka kiporogi ki jo ma onongo pe giworo Lubanga. (Ep. 2:12) I waragane bot jo Roma, Paulo otito ni omyero wabed ki niye wek wabed lurem Lubanga. Abraim ki Daudi gubedo lurem Lubanga pien onongo gitye ki niye. Wan bene watwero bedo lurem Lubanga pi niyewa.

8-9. Tam ma pe tye kakare ango ma jo mukene gumoko madok i kom lok pa Paulo ki Yakobo, dok pingo?

⁸ Pi mwaki miya mapol, lupwonye dini pa Lukricitayo ata-ni gubedo ka laro lok madok i kom kubbe ma tye i kin niye ki tic. Lupwonye dini mogo gipwonyo ni gin ma mitte ni itim me larre aye me ye Rwot Yecu Kricito keken ci otum. Twero bedo ni iwinyo ka giwaco ni: “Jol Yecu macalo Rwotti ki Lalari ci kibilari.” Lupwonye dini mogo giromo nwoyo lok pa Paulo ni: “Lubanga okwane [Abraim] ni en dano  ma kite atir labongo tic mo ma en otiyo.” (Rom. 4:6) Ento mukene giwaco ni itwero nongo larre ki limo kabedo mogo ma kanicagi tero ni gubedo kabedo maleng kacel ki tiyo tic mabeco. Me cwako lokgi, giromo tic ki Yakobo 2:​24, ma waco ni: “Dano gikwane ni kite atir pi tic, ento pe pi niye keken.”

⁹ Pi tam mapatpat magi, lucoc mogo ma gukwano Baibul i yo matut gitamo ni Paulo ki Yakobo tamgi pe orwatte i kom gin ma dano myero otim wek onong cwak pa Lubanga. Ma lubbe ki lok pa lupwonye dini mogo, Paulo onongo ye ni niye keken aye mitte me yomo cwiny Lubanga, ento Yakobo onongo ye ni ngat moni myero otim tic mabeco wek onong cwak pa Lubanga. Profesa mo me dini owaco ni: “Yakobo pe oniang kulu pingo Paulo otito ka maleng ni niye keken aye mitte wek kilwong ngat moni ni kite atir.” Ento Jehovah aye otiro Paulo ki Yakobo me coyo lok ma gucoyo kun tiyo ki cwiny mere maleng. (2 Tem. 3:16) Pi meno, nen calo tye yo mo mayot me niang gin ma guwaco. Omyero kong wanen gin mukene ma gucoyo i waragagi wek waniang lokgi maber.

10. Kodi “tic” mene ma Paulo obedo ka lok iye? (Jo Roma 3:​21, 28) (Nen bene cal.)

¹⁰ “Tic” mene ma lakwena Paulo oloko iye i Jo Roma cura 3 ki 4? En obedo ka lok i kom “tic me cobo cik,” ma kwako lubo Cik pa Moses ma kimiyo bot Luicrael i wi Got Cinai. (Kwan Jo Roma 3:​21, 28.) Nen calo i kare pa lakwena Paulo, Lujudaya mogo ma gudoko Lukricitayo onongo pud giye ni omyero gilub Cik pa Moses. Pi meno, Paulo otiyo ki lanen pa Abraim me nyuto ni pe mitte ni ngat  moni oti “tic me cobo cik” wek oyom cwiny Lubanga. Me ka meno, Paulo otito ni omyero wabed ki niye. Meno cuko cwinywa pien pwonyowa ni ka watye ki niye i kom Lubanga ki Kricito, ci watwero bedo ki cwak pa Lubanga.

11. Kodi “tic” mene ma Yakobo obedo ka lok iye?

¹¹ Ki tungcel, “tic” ma kiloko pire i Yakobo cura 2 pe obedo “tic me cobo cik” pa Moses ma lakwena Paulo oloko iye-ni. Yakobo obedo ka lok i kom tic ma Lukricitayo gitimo i kwogi me nino ducu. Tic magi nyuto ka ce Lakricitayo tye ki niye me ada i kom Lubanga nyo pe. Nen kong labol aryo ma Yakobo otiyo kwede.

12. Labol mene ma Yakobo otiyo kwede me nyuto kit ma niye kubbe kwede ki tic? (Nen bene cal.)

¹² I labol mukwongo, Yakobo otito ni Lukricitayo omyero pe gunyut cwiny me apokapoka. En omiyo lapor i kom laco mo ma onyuto cwiny me kica bot lalonyo ento ocayo lacan. Yakobo otito ni laco ma kit meno twero waco ki doge ni etye ki niye, ento ticce nongo nyuto ka maleng ni en pe ki niye. (Yak. 2:​1-5, 9) I labol me aryo, Yakobo oloko i kom ngat mo ma oneno ‘ominne nyo laminne ma bongone pe, kun cam me nino ducu bene remo,’ ento pe omine kony mo. Kadi bed ngat meno owac ni etye ki niye, ento ticce nyuto ni en pe ki niye. Kit ma Yakobo ocoyo kwede, “niye kene ka pe giketo i tic, dong oto woko.”—Yak. 2:​14-17.

13. Yakobo otiyo ki labol pa anga me nyuto ni omyero wabed ki niye ma nen i tic? (Yakobo 2:​25, 26)

¹³ Yakobo oloko i kom Rakab macalo labol maber pa ngat mo ma onyuto ki i ticce ni etye ki niye. (Kwan Yakobo 2:​25, 26.) Rakab onongo owinyo lok i kom Jehovah dok oniang ni Jehovah tye ka  miyo cwak ki Luicrael. (Yoc. 2:​9-11) Ticce onyuto ni en tye ki niye. Pi niyene, en ogwoko Luicrael aryo ma gubedo lurot piny i kare ma onongo kwogi tye ka mading. Macalo adwogine, dako man ma labalo dok pe obedo Laicrael-li, kikwane ni kite atir, kit ma kikwano kwede Abraim bene. Gin ma wapwonyo ki i labol pa Rakab aye ni pire tek adada me nyuto ki i ticwa ni watye ki niye.

14. I yo ma nining ma gin ma Paulo ocoyo rwatte kwede ki gin ma Yakobo ocoyo?

¹⁴ Dong onen ka maleng ni Paulo ki Yakobo onongo gitye ka tito lok madok i kom niye kacel ki tic i yo aryo mapatpat. Paulo onongo tye ka tito ki Lujudaya ma gudoko Lukricitayo ni pe gitwero nongo cwak pa Jehovah ki lubo Cik pa Moses. Yakobo onongo tye ka tito kit ma pire tek kwede ni Lukricitayo ducu omyero gunyut niyegi ki timo jami mabeco pi jo mukene.

15. Tit kong yo mogo ma watwero nyuto kwede niyewa i tic. (Nen bene cal.)

¹⁵ Jehovah pe owaco ni ka wamito ni kikwanwa ni kitwa atir omyero watim gin ma Abraim otimo kikome. Ki lok ada, tye yo mapol ma watwero nyuto kwede ki i ticwa ni watye ki niye. Watwero jolo jo manyen ma gubino i kacokkewa, konyo omege ki lumege ma gimito kony i yo me kom, kun bene watimo jami mabeco pi lupacowa. (Rom. 15:7; 1 Tem. 5:​4, 8; 1 Jon 3:18) Yo acel ma pire tek adada ma wanyuto kwede ni watye ki niye aye ki tito kwena maber-ri ki mit kom. (1 Tem. 4:16) Wan ducu watwero nyuto ki i ticwa ni watye ki niye ni cikke pa Jehovah ducu bicobbe dok ni lubo yone aye pud dong ber loyo piwa. Dok ka watimo meno, ci watwero  bedo labongo akalakala mo keken ni Lubanga bikwanowa ni kitwa atir dok wabibedo lureme.

16. I yo ma nining ma gen okubbe kwede ki niye pa Abraim?

¹⁶ Jo Roma cura 4 tito pwony mukene ma pire tek ma watwero nongo ki bot Abraim: myero wamedde ki bedo ki gen. Jehovah ocikke ni Abraim bidoko “kwaro rok mapol” dok ni pi en, ‘kaka ducu ma i wi lobo gibilimo mot.’ Go kong gen mamwonya meno ma Abraim obedo kwede! (Acak. 12:3; 15:5; 17:4; Rom. 4:17) Ento, kadi wa i kare ma Abraim onongo dong tye ki mwaka 100 dok Cara tye ki mwaka 90, onongo pud peya gunywalo latin. Onongo twero nen calo Abraim ki Cara pe dong gibinywal. Meno obedo gin ma otemo niye pa Abraim matek. Ento en “onongo oketo genne i kom gin ma nen calo pe gitwero geno, omiyo en odoko kwaro rok mapol.” (Rom. 4:​18, 19) Dok lacen, gin ma Abraim obedo ka geno-ni ocobbe kakare. En odoko won Icaka, latin laco ma en obedo ki gen pire-ni.—Rom. 4:​20-22.

17. Wangeyo nining ni kitwero kwanowa ni kitwa atir macalo lurem Lubanga?

¹⁷ Watwero nongo cwak pa Lubanga kun kikwanowa ni kitwa atir dok wabedo lureme, kit ma kikwano kwede Abraim. Ki lok ada, Paulo oloko i kom gin meno i kare ma ocoyo ni: “Lok man ni, ‘yam gikwane’ onongo pe gicoyo pi en kene, ento gicoyo pi wan bene. Wan bene gibikwanowa ni kitwa atir, wan jo ma dong waye Lubanga ma yam ocero Rwotwa Yecu Kricito.” (Rom. 4:​23, 24) Calo Abraim, myero wabed ki niye i kom Jehovah, watim tic mabeco, dok wabed ki gen matek ni cikke pa Jehovah ducu bicobbe. Paulo omedde ki nyamo lok i kom genwa i Jo Roma cura 5, ma wabinyamo i pwony ma lubo man.