Tika iketo cwinyi ka kwano Wi Lubele ducu me mwaka-ni? Ka kumeno, nen kong ka itwero gamo lapeny magi:

Ngo ma myero itim me ‘loko tammi wek odok nyen’? (Rom. 12:2)

Man pe kwako mere deyo kwowa ki tic mogo mabeco. Ento kwako ngiyo ngat ma wabedo ki i cwinywa kacel ki timo alokaloka ma mitte wek kwowa obed macok ki rwom me kwo ma Jehovah mito.—w23.01, pot 8-9.

Watwero gwokke nining ka wawoto ki neno jami ma tye ka timme i lobo-ni?

Watye ki miti me neno kit ma jami ma tye ka timme i lobo tye ka cobo kwede lok pa lunebi. Me ka byeko ni gin moni cobo lok pa lunebi, ma meno twero kelo anyobanyoba i kacokke, bedo ber ka wajengo lokwa i kom bukke ma dul pa Jehovah oyubo. (1 Kor. 1:10)—w23.02, pot 16.

I yo ma nining ma batija pa Yecu pat ki pa lulub kore?

Kinywalo Yecu i kin dano me rok ma dong gutyeko dyere woko bot Lubanga, pi meno onongo pe mitte ni en odyere bot Jehovah kit ma wan watimo kwede. Yecu onongo pe ki roc nyo bal mo keken. Onongo pe mitte ni en ongut pi balle.—w23.03, pot 5.

Watwero konyo jo mukene nining me miyo lagam i cokke?

Watwero miyo lagam macek wek wami kare ki jo mukene me miyo lagamgi. Watwero bene gwokke ki lok i kom jami mapol lawangacel. Meno biweko jami mukene dong ma jo mukene gitwero lok iye.—w23.04, pot 23.

“Yo Maleng” ma kiloko pire i Icaya 35:8 cung pi ngo?

Yo Maleng i kare macon onongo cung pi yo ma Lujudaya guwoto iye me a ki i Babilon me dok cen i lobogi. I karewa-ni kono? Mwaki miya mapol ma peya mwaka 1919 oromo, kitiyo tic me yubo yo—calo gonyo ki goyo Baibul, ki jami mukene mapol. Jo pa Lubanga dong gitye ka wot i “Yo Maleng” ma terogi i paradic me cwiny, dok bikelo mot i te Ker pa Lubanga.—w23.05, pot 15-19.

Carolok cura 9 tiyo ki lapor pa mon aryo mene me miniwa tira?

Carolok loko i kom “dako ma laming” ma lwongone tero dano “i lyel” kacel ki dako ma kilwongo ni ‘ryeko me ada,’ ma lwongone weko dano nongo “niang matut” kacel ki kwo. (Car. 9:​1, 6, 13, 18)—w23.06, pot 22-24.

Mwolo kacel ki niango pa Lubanga onen nining i kit ma en otero kwede ki Lot?

Jehovah ociko Lot ni oring woko ki i Codom ci ocit i wi godi. I kare ma Lot obako doge ni kiwek ecit i Joar, Lubanga oye tamme.—w23.07, pot 21.

Gin ango ma dako twero timone ka cware neno cal macilo me lewic?

En pe myero okok i kome kekene. En myero oket cwinye i kom watte ki Lubanga dok olwod lok i kom mon ma i Baibul ma gukato ki i ayelayela ento Lubanga okweyo cwinygi. En twero konyo cware me gwokke ki i jami ma romo bolle i peko.—w23.08, pot 14-17.

Ka ngat mo openyowa lok i kom niyewa, niang matut bikonyowa nining me dok iye ki mwolo?

Watwero neno lapeny man macalo yo me niang tam pa ngat meno. Man bikonyowa me bedo ma wayubbe me dok iye ki mwolo.—w23.09, pot 17.

Gin ango ma watwero pwonyo ki bot Maliam i kom kit me nongo teko?

Cutcut i nge niang ni en bidoko min Meciya, Maliam otute me nongo teko ki bot jo mukene. Lamalaika Gabriel kacel ki Elicabet gutiyo ki ginacoya me cuko cwiny Maliam. Wan bene watwero nongo teko ki bot Lukricitayo luwotwa.—w23.10, pot 15.

Jehovah twero gamo legawa nining?

En ocikke me winyo legawa kacel ki neno kit ma gikubbe kwede ki yubbe. (Jer. 29:12) En twero gamo lega aryo marom i yo mapatpat, ento kare ducu en bikonyowa.—w23.11, pot 21-22.

Kit macalo Jo Roma 5:2 loko i kom “gen,” pingo dok kinyamo lok i kom gen i tyeng me 4?

I nge winyo kwena maber, ngat moni romo cako bedo ki gen me kwo pi naka i lobo paradic. Ento ka en okato ki i can mapatpat, ocirogi, dok onongo cwak pa Lubanga, genne dongo matek.—w23.12, pot 12-13.