1. Gin ango ma omyero watim me doko Lukricitayo muteggi?

 WABEDO ki ur me neno kit ma latin dongo kwede oyotoyot me doko dano madit. Dongo man twero nen calo timme pire kene. Ento, dongo me doko Lakricitayo muteggi pe timme pire kene. b (1 Kor. 13:11; Ibru 6:1) Wek meno otwere, mitte ni wadong wat macok ki Jehovah. Wamito bene cwiny mere maleng wek okonywa me dongo kit mogo ma en pwoyo, me pwonyo diro mapatpat, ki dong yubbe pi cobo tic ma waromo kemme kwede i anyim.—Car. 1:5.

2. Gin ango ma wapwonyo ki i Acakki 1:​27, dok ngo ma wabinyamo i pwony man?

² Jehovah ocweyo laco ki dako. (Kwan Acakki 1:27.) Laco pat ki dako i kit ma ginen kwede, ento gipat i yo mukene bene. Me labolle, Jehovah ocweyo laco ki dako ni gucob tic mapatpat, pi meno mitte ni gubed ki diro kacel ki kit mogo ma twero konyogi me cobo ticgi magi. (Acak. 2:18) I pwony man, wabinyamo jami ma lamego matidi twero timo wek odok Lakricitayo muteggi. Dok i pwony ma lubo man, wabinyamo jami ma omege matino myero gutim.

3-4. Lumegiwa matino gitwero nongo lanen mabeco me aluba ki kwene? (Nen bene cal.)

³ Baibul loko i kom mon ma lugen mapol ma onongo gimaro Jehovah dok gutiyo pire. (Nen ki i jw.org pwony ma wiye tye ni “Mon ma i Baibul—Ngo ma Watwero Pwonyo  ki Botgi?”) Kit ma ginacoya ma pwony man jenge iye otito kwede, mon magi gubedo “jo ma gwokke kengi dok jo ma lugen i jami ducu.” Medo i kom meno, lumegiwa matino gitwero yero me lubo lanen pa lumege ma i kacokkegi ma guteggi i yo me cwiny.

⁴ Wun lumege matino, pingo pe wutam i kom lumege mogo ma wungeyogi ma wutwero lubo lanengi? Nen kitgi mabeco; i nge meno, tam i kom kit ma itwero porone kwede. I paragraf mogo ma lubo man, wabinyamo kit aryo ma pigi tek ma mitte ni lumege gudong.

5. Pingo mwolo pire tek adada i kwo pa lamego muteggi i yo me cwiny?

⁵ Me doko Lakricitayo mucwiny, mitte ni wabed jo mamwol. Ka dako moni mwol, ci en bibedo ki wat maber ki Jehovah kacel ki jo mukene. (Yak. 4:6) Me labolle, dako ma maro Jehovah bimine ki mwolo me lubo tira ma kimiyo i 1 Jo Korint 11:​3, ka ma Jehovah otito anga ma En omiyo bote tic me telo wi kacokke, ki anga ma lawi ot. c

6. Pwony ango ma lumege matino gitwero nongo ki bot Labeka?

⁶ Nen kong labol pa Labeka. En onongo obedo dako maryek dok i kare me kwone ducu omoko tam matego i cawa mupore dok i yo mupore. (Acak. 24:58; 27:​5-17) Kadi bed kit meno, en onongo obedo dako ma wor dok mine i te twero pa cware. (Acak. 24:​17, 18, 65) Ka imwol calo Labeka dok icwako yub me tela pa Jehovah, ci ibibedo lanen maber pi jo ducu ma i pacowu kacel ki i kacokkewu.

7. Lumege matino gitwero lubo lanen me mwolo pa Esta nining?

⁷ Lukricitayo ducu ma guteggi i yo me cwiny myero gunge ka ma kerogi gik iye. Baibul cuko cwinywa me bedo jo mamwol kun wangeyo ka ma kerowa gik iye.  (Car. 11:2) Esta onongo obedo dako mamwol dok ma lworo Lubanga. Kit macalo en onongo mwol, en pe odoko lawaka i kare ma odoko daker. En owinyo dok olubo tam pa Mordekai, ma obedo latin pa omin wonne. (Esta 2:​10, 20, 22) In bene itwero nyuto ni ingeyo ka ma keroni gik iye ka ipenyo pi tam mabeco dok ilubo.—Tito 2:​3-5.

8. Ma lubbe ki 1 Temceo 2:​9, 10, i yo ma nining ma mwolo konyo lumege me moko tam me ryeko ka odok i kom rukgi ki kit ma ginen kwede?

⁸ Esta onyuto ni engeyo ka ma kerone gik iye i yo mukene bene. Kadi bed en “onongo ber dok mwonya mada”; ento en pe oywayo tam pa dano i kome. (Esta 2:​7, 15) Lumegiwa gitwero lubo lanen pa Esta nining? Kinyuto yo acel i 1 Temceo 2:​9, 10. (Kwan.) Lakwena Paulo otito ki mon ma Lukricitayo ni myero gurukke maber ki mwolo, kun gigwokke. Me rukke maber dok i yo me mwolo, ruk pa dako ma Lakricitayo myero onyut ni en paro pi kit ma jo mukene giwinyo nyo gitamo kwede. Pud dong watye ki awaka madit i kom wun lumegiwa ma wurukke i yo ma nyuto woro pi jo mukene!

9. Pwony ango ma watwero nongo ki i lanen pa Abigail?

⁹ Niang matut obedo kit mukene ma lumege ducu ma guteggi i yo me cwiny myero gunyut. Niang matut obedo ngo? Obedo kero me poko kin gin ma atir ki gin marac, ki me yero me timo gin ma atir. Nen kong labol pa Abigail dako pa Nabal. Cware omoko tam marac ma onongo biweko kineko jo ma i ode ducu. Abigail otimo gin mo cutcut. Pien en onyuto niang matut, olaro kwo pa jo mapol. (1 Cam. 25:​14-23, 32-35) Niang matut bene konyowa me ngeyo kare me lok ki kare me ling alinga. Dok konyowa me nyuto miti i kom jo mukene i yo mupore.—1 Tec. 4:11.

10-11. Adwogi maber ango ma in ki jo mukene wunongo ka ipwonyo kwan ki coc maber? (Nen bene cal.)

¹⁰ Mitte ni dako ma Lakricitayo opwony diro mapatpat ma twero konye. Diro mogo ma nyako pwonyo i gang kwan bikonye pi kare me kwone ducu. Nen kong labol mogo.

¹¹ Pwony kit me kwan ki coc maber. I tekwaro mogo, pe kineno kwan ki coc calo obedo diro ma pire tek pi mon. Ento obedo gin maber dok pire tek ni Lukricitayo ducu gupwony kit me kwan ki coc maber. d (1 Tem. 4:13) Dong pe iwek gin mo  keken ogengi ki pwonyo kwan ki coc maber. Adwogi maber ango ma ibinongo? Diro ma kit meno twero konyi me nongo tic. Medo i kom meno, biweko bedo yot boti me kwano Baibul piri keni kacel ki pwonyo jo mukene. Ma dong pire tek loyo, ibinyikke cok ki Jehovah ka iwoto ki kwano Lokke kun ilwodo bene.—Yoc. 1:8; 1 Tem. 4:15.

12. Carolok 31:26 twero konyi nining me dongo dironi me lok?

¹² Dong dironi me lok. Pire tek adada ki Lakricitayo me pwonyo kit me lok maber. Lapwonnye Yakobo omiyo botwa tam maber man, ni: “Dano acel acel myero owiny lok oyotoyot, ento pe myero orune me gamone.” (Yak. 1:19) Ka iciko iti me winyo lok pa jo mukene, ci nongo inyuto botgi “kica.” (1 Pet. 3:8) Ka pe iniang lok pa ngat moni nyo kit ma en winyo kwede, penye ki lapeny mupore. I nge meno, kwany kare me tam ma peya iloko. (Car. 15:28) Pennye kekeni ni: ‘Tika lok ma amito waco-ni tye ada dok me cuko cwiny? Tika nyuto woro ki kica?’ Nong pwony ki bot lumegiwa muteggi ma giciko itgi ka winyo lok dok giloko ki kica. (Kwan Carolok 31:26.) Ket cwinyi me winyo kit ma giloko kwede. Ka ipwonyo diro man maber, watti ki jo mukene bene bibedo maber.

13. Itwero pwonnye nining me gwoko gang? (Nen bene cal.)

¹³ Pwonnye me gwoko gang. I kabedo mapol, mon aye gitiyo tic mapol me gwoko gang. Mamani nyo lamego mo ma oteggi twero konyi me pwonyo kit me cobo tic man maber. Laminwa mo ma nyinge Cindy owaco ni: “Pwony acel ma pire tek adada ma anongo ki bot mamane aye ni tic matek kelo yomcwiny. Pien apwonyo kit me tedo, gwoko lengo, kwoyo bongo, ki kit me tic ki cente ki diro ka atye ka wil, oweko abedo ki kero me cung pira kena ki me tic pi Jehovah. Mamana bene opwonya kit me gwoko wele, dok man omina kare me rwatte ki omege ki lumege mapol ma atwero lubo lanengi.” (Car. 31:​15, 21, 22) Dako ma latic matek, ma jolo wele dok opwonnye me gwoko gang obedo mot madit bot jo ducu ma i pacone ki i kacokke.—Car. 31:​13, 17, 27; Tic 16:15.

14. Pwony ango ma inongo ki i labol pa Crystal, dok gin ango ma omyero iket cwinyi iye?

¹⁴ Pwony diro mo ma bikonyi me cung piri keni. Pire tek adada ni Lukricitayo ducu ma guteggi gupwony kit me timo jami pigi kengi kun bene giyeng ki jami ma gitye kwede. (Pil. 4:​11, 2 Tec. 3:​7, 8) Laminwa mo ma nyinge Crystal owaco ni: “Lunyodona gucuko cwinya me pwonyo diro mo ki i cukul ma bikonya lacen. Babana ocuko cwinya me kwano accounts, ma meno kwako kit me kwano ki gwoko  rekod me lim ma kitiyo kwede i kampuni. Meno okonya adada lacen.” Medo i kom pwonyo kit me nongo cente, myero bene ipwony kit me tic kwede maber. (Car. 31:​16, 18) Ka iyeng ki jami manok ma itye kwede, dok pe itute me wilo jami ma keroni pe twero, ci ibibedo ki kare muromo me tic pi Jehovah.—1 Tem. 6:8.

15-16. Pingo lumege ma wigi nono pigi tek adada? (Marako 10:​29, 30)

¹⁵ Ka idongo kit mogo ma Jehovah pwoyo dok ipwonyo bene diro me tic mapatpat, man bikonyi me yubbe pi tic ma ibikemme kwede i anyim. Nen kong jami mogo ma itwero timo.

¹⁶ Itwero moko tammi me bedo ma wi nono pi kare mo. Kit ma Yecu owaco kwede, jo mogo giromo yero pe me nyomme, kadi bed i tekwarogi pe kicwako bedo ma wi nono. (Mat. 19:​10-12) Jo mukene gibedo ma wigi nono pi tyen lok mapatpat. Bed ki gen ni Jehovah gin ki Yecu pe gitamo ni kit macalo pe inyomme-ni, konyi dong pe. I twok lobo-ni ducu, lumegiwa ma wigi nono gubedo mot ma pire tek adada i kacokke. Pien gimaro dok giparo pi jo mukene, gidoko calo lumege ki mege bot jo mapol.—Kwan Marako 10:​29, 30; 1 Tem. 5:2.

17. Gin ango ma lamego matidi twero timone kombeddi wek oyubbe me donyo i tic pi kare malac?

¹⁷ Itwero donyo i tic pi kare malac. Lumege aye gitiyo pol pa tic me tito kwena i but lobo-ni ducu. (Jab. 68:11) Tika itwero goyo pulan kombeddi wek idony i tic pi kare malac? Gwok nyo itwero cako tic macalo painia marii, Labetel, nyo miyo kony i tic me gedo. Leg bot Jehovah pi yubbi meno. Lok ki jo mukene ma dong gucobo yub ma kit meno, wek iniang gin ma myero itim wek ibed mupore. I nge meno, mok gin ma myero itim wek icob yubbi. Ka idonyo i tic pi kare malac, ci biyabo yo boti me tiyo tic mukene mabeco pi Jehovah.

18. Pingo pire tek ni lamego oyer ngat ma ebinyomme kwede ki diro adada? (Nen bene cal.)

¹⁸ Itwero yero me nyomme. Diro kacel ki kit mogo ma dong wanyamogi i pwony man gitwero konyi me bedo min ot makwiri. Ngene kene ni, ka itye ki miti me nyomme, ci omyero iyer ngat ma ibinyomme kwede ki diro adada. Man tye i  kin tam ma pud dong pire tek loyo ma ibimokone i kwoni. Wi myero opo ni, ibibedo i te tela pa laco ma ibiyero me nyomme kwede-ni. (Rom. 7:2; Ep. 5:​23, 33) Pi meno, pennye kekeni ni: ‘Tika en obedo laco muteggi i yo me cwiny? Tika en keto Jehovah mukwongo i kwone? En mono moko tam me ryeko? Tika en ye balle? En mono woro mon? Tika en bikonya me gwoko watta ki Jehovah wek obed matek, kun mina jami me kom ma mitte, dok bene bedo larema macok? Tika en cobo ticce maber? Me labolle, tic ango ma en tye kwede i kacokke, dok en cobo tic magi nining?’ (Luka 16:10; 1 Tem. 5:8) Ngene kene ni, ka imito nongo laco maber, in kikomi bene myero ibed dako maber.

19. Pingo tic me bedo “lakony” obedo tic me deyo?

¹⁹ Baibul waco ni dako maber obedo “lakony” bot cware “ma romme” nyo ma opore pire. (Acak. 2:18) Tika lok man dwoko rwom pa dako piny? Pe wacel! Tic pa dako macalo lakony obedo tic me deyo. Ki lok ada, tyen mapol i Baibul, kilwongo Jehovah ni “lakony.” (Jab. 54:4; Ibru 13:6) Dako bedo lakony me ada bot cware ka en miyo cwak bot cware. Me labolle, ka cware omoko tam mo pi jo me ode, dakone tiyo kacel kwede wek tam meno ocobbe maber. Dok pien en maro Jehovah, en bitimo jami ducu ma twero wek jo mukene gunen kit mabeco ma cware tye kwede. (Car. 31:​11, 12; 1 Tem. 3:11) Itwero yubbe kombeddi me doko min ot maber ki dongo marri pi Jehovah kacel ki bedo lakony bot jo me paconi ki jo me kacokke.

20. Jami mabeco ango ma mego twero timone pi lupacone?

²⁰ Itwero doko mego. I nge nyomme, in kacel ki cwari wutwero doko lunyodo. (Jab. 127:3) Pi meno, bedo me ryeko me tam i kom gin ma mitte me bedo mego maber. Diro kacel ki kit mogo ma wanyamogi i pwony man gibikonyi ka idoko min ot kacel ki mego. Ka in lamar, lakica, dok idiyo cwinyi, ci ibiweko lupaconi gibedo ma cwinygi yom dok lutinoni gibiwinyo ni kimarogi.—Car. 24:3.

21. Wawinyo nining i kom lumegiwa, dok pingo? (Nen cal ma i pok ngeye.)

²¹ Wamarowu adada, wun lumegiwa, pi jami ducu ma wutimo pi Jehovah kacel ki jone. (Ibru 6:10) Wutiyo matek me dongo diro kacel ki kit mapatpat ma weko kwowu ki kwo pa jo ma i ngetwu bedo mamit, dok wutute matek me yubbe pi tic ma wubikemme kwede i anyim. Piwu tek adada bot dul pa Jehovah!