1. Gin ango ma laco ma Lakricitayo myero otim me bedo muteggi i yo me cwiny?

 KABAKA Daudi ocuko cwiny wode Solomon ni: ‘Bed matek, nyut ni in laco.’ (1 Luker 2:​1-3) Tam meno pire tek adada bot co ducu ma gimito lubo lanen pa Yecu i kare-ni. Me timo meno, omyero gupwonnye me lubo cik pa Lubanga kacel ki keto pwony me Baibul i tic i kwogi me nino ducu. (Luka 2:52) Pingo pire tek tutwal ni omege matino gudok Lukricitayo muteggi i yo me cwiny?

2-3. Pingo pire tek pi omege matino me doko Lukricitayo muteggi?

² Laco ma Lakricitayo tye ki tic mapol ma pigi tego i paco kacel ki i kacokke bene. Wun omege matino, nen calo dong wutamo pi tic ducu ma wuromo bedo kwede i anyim. Gwok nyo itye ki yub me doko lapainia, lakony kor tic, ki dong lacen laelda. Itwero bene bedo ki miti me nyomme ki dong nywalo lutino. (Ep. 6:4; 1 Tem. 3:1) Me cobo yub magi maber, mitte ni idok Lakricitayo muteggi. b

³ Ngo ma twero konyi me doko Lakricitayo muteggi? Tye diro mogo ma mitte ni ipwonygi. Dong, gin ango ma itwero timone i kare-ni me yubbe pi tic mo keken ma ibikemme kwede i anyim wek icobgi maber?

4. Itwero nongo lanen mabeco me aluba ki kwene? (Nen bene cal.)

⁴ Yer labol mabeco me aluba. Baibul tye ki labol mabeco  mapol ma omege matino gitwero lubone. Co magi ma gukwo i kare macon onongo gimaro Lubanga dok gugwoko jo pa Lubanga i yo mapatpat. Itwero bene nongo labol mabeco me aluba ki bot Lukricitayo muteggi ma i pacowu nyo i kacokkewu. (Ibru 13:7) Dok itye ki lanen maber loyo pa Yecu Kricito. (1 Pet. 2:21) Ka iwoto ki kwedo labol pa co magi, tam i kom kitgi ma oyomo cwinyi. (Ibru 12:​1, 2) I nge meno, tam i kom kit ma ibilubo kwede lanengi.

5. Itwero dongo niang matut nining, dok pingo man pire tek? (Jabuli 119:9)

⁵ Dong, dok ‘igwok niang matut.’ (Car. 3:21) Laco ma tye ki niang matut pe rune ka timo jami ata, ento kong tamo matut ma peya omoko gin ma ebitimo. Dong, mitte ni iti matek me dongo diro meno ki me gwokone. Pingo? Pien pol pa awobe ma i lobo-ni gimoko tam ma jenge i kom kit ma giwinyo kwede. (Car. 7:7; 29:11) Medo i kom meno, jami ma katti i telebijon, filim, Intanet ki kabedo me nywako lok i Intanet twero gudo tammi ki jami ma itimo. Ento itwero dongo niang matut nining? Mukwongo, pwony ki i Baibul kit ma Jehovah tamo dok winyo kwede, ki dok pingo lubo tirane ber piri. I nge meno, ti ki jami ma ipwonyo me konyi moko tam ma biyomo cwiny Jehovah. (Kwan Jabuli 119:9.) Ka idongo diro man, ci bikonyi adada me doko Lakricitayo muteggi. (Car. 2:​11, 12; Ibru 5:14) Nen kong kit ma niang matut bikonyi kwede i yo aryo magi: (1) kit ma itero kwede lumege ki (2) moko tam ma lubbe ki rukki ki kit ma inen kwede.

6. Niang matut twero konyo omego matidi nining me nyuto woro bot lumege?

⁶ Laco ma opwonnye me tam calo Jehovah nyuto woro bot mon. Me labolle, omego mo twero bedo ki miti me ngeyo lamego mo maber, dok meno pe obedo gin marac. Ento, omego ma tye ki niang matut pe biwaco, coyo, nyo timo gin mo keken ma romo weko lamego mo tamo ni en tye ki miti i kome, ka en pe mito nyomo lamego meno. (1 Tem. 5:​1, 2) Ka  omego mo tye ka winnye ki lamego mo, en pe bitimo gin mo ma romo balo nying lamego meno, calo bedo ka kengi labongo ngat mo ka ngetgi.—1 Kor. 6:18.

7. Niang matut bikonyo omego matidi nining me moko tam mupore ka odok i kom rukke ki kit ma en nen kwede?

⁷ Laco ma opwonnye me tam calo Jehovah bene nyuto meno ki i rukke kacel ki kit ma en nen kwede. Pol pa jo ma giyubo cital bongi manyen pe giworo cik pa Jehovah. Dok bene, gikwo carocaro. Pi meno, bongi ma giyubo twero bedo ding adada nyo twero weko co ginen calo mon ka guruko bongi magi. Ka en tye ka yero bongo ma myero oruki, awobi ma tye ka dongo me doko Lakricitayo muteggi bitam matut i kom gin ma Jehovah mito dok en bilubo lanen mabeco ma i kacokke. En twero pennye kekene ni: ‘Tika bongina nyuto ni atye ki wic ma kwiri dok aparo pi jo mukene? Tika kit ma arukke kwede weko bedo yot bot jo mukene me niang ni abedo latic pa Lubanga?’ (1 Kor. 10:​31-33; Tito 2:6) Laco ma tye ki niang matut binongo woro ki bot omege ki lumege kacel ki bot Wonne me polo.

8. I yo ma nining ma omego matidi twero pwonnye me bedo ngat ma genne?

⁸ Bed ngat ma genne. Ka omego mo matidi tute matek me cobo ticce ducu kore ki kore, ci jo mukene gitwero genne. (Luka 16:10) Nen kong labol pa Yecu. En onongo kome pe wac. Me ka meno, en otimo jami ducu ma Jehovah owacce ni otim, kadi bed i kare mogo onongo timone pe yot. En onongo maro dano—tutwalle lupwonnyene—dok en omiyo kwone pigi. (Jon 13:1) Lub lanen pa Yecu kun itiyo matek me cobo tic mo keken ma kimini. Ka pe ingeyo kit me timone, nyut mwolo ki penyo omege ma guteggi i yo me cwiny. Pe iti ticci ki wac kom. (Rom. 12:11) Me ka meno, cob ticci ducu, calo itye ka tic “bot Rwot [Jehovah], ento pe pi dano.” (Kol. 3:23) Ngene kene ni, itye ki roc, pi meno bed ngat mamwol dok iye bal mo keken ma itimo.—Car. 11:2.

9. Pingo pire tek ni omego matidi opwony diro mapatpat?

⁹ Me doko laco muteggi i yo me cwiny, mitte ni idong diro mapatpat. Diro magi bikonyi me cobo tic ma i kacokke, me nongo ki gwoko tic ma bikonyi me gwoko jo gangi, ki me bedo ki wat maber ki jo mukene. Kong dong wanenu diro mogo ma itwero pwonyone.

10-11. Ka omego mo matidi opwonyo kit me kwan ki coc maber, adwogi maber ango ma en kacel ki jo me kacokke gibinongo? (Jabuli 1:​1-3) (Nen bene cal.)

¹⁰ Pwony kit me kwan ki coc maber. Baibul waco ni laco ma kwanyo kare nino  ducu me kwano ki lwodo Lok pa Lubanga bibedo ki yomcwiny dok kwone wok maber. (Kwan Jabuli 1:​1-3.) Ka en kwano Baibul nino ducu, en bingeyo kit ma Jehovah tamo kwede, dok bipwonyo kit me keto Ginacoya i tic. (Car. 1:​3, 4) Co ma kit meno gimitte adada i kacokke. Pingo?

¹¹ Omegiwa ki lumegiwa gimito kony pa co ma gingeyo pwony ki miyo tira maber ki i Baibul. (Tito 1:9) Ka ingeyo kwan ki coc maber, ci ibibedo ki kare me yubo pwony kacel ki miyo lagam ma konyo jo mukene dok jingo niyegi. Ibibedo ki kare me coyo lok ma pigi tego ka itye ka kwan piri keni nyo itye ka winyo pwony i cawa me cokke, gure me adwol, ki gure madito. Lok ma icoyo piny bikonyi me dongo niyeni ki me cuko cwiny jo mukene.

12. Ngo ma bikonyi me dongo dironi me lok?

¹² Dong dironi me lok. Laco ma Lakricitayo myero opwony kit me lok maber. Man tyen lokke ni en myero oter ite ka winyo lok wek oniang tam pa jo mukene kacel ki kit ma giwinyo kwede. (Car. 20:5) En twero timo man ki winyo kit ma dwan ngat moni tye kwede, neno wange, nyo neno kit ma en wito kwede ki cinge. Pe itwero pwonyo kit me timo man ka pe imaro bedo ki jo mukene. Ka kare ducu ibedo ka kubbe ki dano kun itiyo ki cim, calo cwalo email ki mecej, man biweko inongo ni tek me lok ki dano wang ki wang. Pi meno, yeny kare me lok ki dano wang ki wang.—2 Jon 12.

13. Gin ango mukene ma omego matidi myero opwony? (1 Temceo 5:8) (Nen bene cal.)

¹³ Pwony diro mo ma bikonyi me cung piri keni. Laco ma oteggi i yo me cwiny myero opwony diro mo ma bikonye me cung pire kene kacel ki gwoko jo me ode. (Kwan 1 Temceo 5:8.) I lobe mogo, awobe giromo pwonyo diro me tic ki bot wongi nyo watgi mo. I lobe mukene, awobi twero pwonyo tic cing mo i kare ma nongo pud tye ka kwan i cinia. Labongo paro pi gin ma timme i lobowu, pire tek ni ipwony diro mo ma bikonyi me nongo tic. (Tic 18:​2, 3; 20:34; Ep. 4:28) Bed latic matek kun ityeko tic mo keken ma icako. Jo mukene gibineno man dok gibipwoyo ticci. Ka itimo meno, ci bibedo yot piri me nongo kacel ki gwoko tic. Diro kacel ki kit ma dong wanyamogi-ni, pigi tego adada pi laco ma Lakricitayo wek en ocob tic ma en bikemme kwede i anyim. Kong dong wanyamu tic magi.

14. Omego matidi twero yubbe nining me donyo i tic pi kare malac?

¹⁴ Itwero donyo i tic pi kare malac. Pol pa Lukricitayo muteggi ma gitye ka tic pi Jehovah pi kare malac gucako ma pud gitino. Tic macalo painia marii konyo omego matidi me pwonyo kit me tic kacel ki dano mapatpat. Konye bene me pwonyo kit me tic ki cente ma en tye kwede maber kun pe wilo jami ma kerone pe romo. (Pil. 4:​11-13) Yo maber me donyo i tic pi kare malac aye me tic macalo painia pi tutunu. Jo mapol kong gitiyo macalo painia pi tutunu pi kare mo, ma meno yubogi me tic macalo painia marii. Ka dong gucako tic macalo painia marii, ci kitwero lwongogi pi tic mukene, calo tic me gedo nyo tic i Betel.

15-16. Ngo ma twero konyo omego matidi me bedo mupore me doko lakony kor tic nyo laelda?

¹⁵ Itwero doko lakony kor tic nyo laelda. Omege ducu myero gutute me bedo ma gupore me tic pi omegigi ki lumegigi macalo luelda. Baibul waco ni co ma gitye ka tute matek me bedo mupore i yo man nongo ‘gimito tic maber.’ (1 Tem. 3:1) Ma peya omego moni ocako tic macalo laelda, en myero kong obed mupore me tic macalo lakony kor tic. Lukony kor tic gikonyo luelda me gwoko omege ki lumege me kacokke. Luelda kacel ki lukony kor tic gimine ki mwolo me tic pi omege ki lumegigi dok gitito kwena ki mit kom. Omege matino gitwero doko lukony kor tic kadi bed peya guromo mwaka 20. Dok lakony kor tic ma tye mupore, kitwero cimme me tic macalo laelda kadi bed pud tye i kine ka mwaka 20 me o 25.

¹⁶ Jami ma omego moni myero otim me doko lakony kor tic nyo laelda tye nonge i Baibul dok jenge i kom mar pi Jehovah, lupacone, ki jo me kacokke. (1 Tem. 3:​1-13; Tito 1:​6-9; 1 Pet. 5:​2, 3) Ngo ma myero itim me bedo mupore? Tute me niang gin acel acel ma mitte. Leg Jehovah wek okonyi me cobo jami ma mitte magi. c

17. Omego matidi twero yubbe nining me doko won ot? (Nen bene cal.)

¹⁷ Won ot. Kit ma Yecu otito kwede, co mogo ma guteggi i yo me cwiny gitwero yero me bedo ma wigi nono. (Mat. 19:12)  Ento ka iyero me nyomme, ci ibibedo ki tic macalo lawi ot. (1 Kor. 11:3) Jehovah mito ni won ot omar dakone, omine jami me kom ma mitte, obed larem dakone, dok okony dakone me bedo ki wat macok ki Jehovah. (Ep. 5:​28, 29) Diro kacel ki kit mogo ma wanyamogi i pwony man, calo niang matut, bedo ki woro pi mon, ki dong bedo ngat ma genne, bikonyi me bedo lawi ot maber. Ibibedo ma iyubbe me cobo ticci macalo won ot maber.

18. Omego matidi twero yubbe nining me doko wego?

¹⁸ Itwero doko wego. I nge nyomme, iromo doko wego. Pwony ango ma itwero nongo ki bot Jehovah ka odok i kom bedo wego maber? Tye pwony mapol. (Ep. 6:4) Jehovah owaco ka maleng bot wode Yecu ni emare dok cwinye yom i kome. (Mat. 3:17) Ka idoko wego, nen ni iwaco ki lutinoni kare ki kare ni imarogi. Pwogi teretere pi jami mabeco ma gitimo. Wege ma gilubo lanen pa Jehovah, gikonyo lutinogi me doko Lukricitayo muteggi i yo me cwiny. Itwero yubbe kombeddi me bedo wego maber ka inyuto mar bot lupacowu ki jo me kacokke kun bene igwokogi maber. Pwonnye bene me tittigi ni imarogi dok pigi tek boti. (Jon 15:9) Man bikonyi me bedo won ot ki wego maber i anyim. Ento pi kombeddi, ibibedo ngat ma konye tye bot Jehovah, lupacowu, kacel ki kacokke.

19-20. Gin ango ma bikonyo omege matino me doko Lukricitayo muteggi? (Nen cal ma i pok ngeye.)

¹⁹ Wun omege matino, mitte ni wutute matek me doko Lukricitayo muteggi i yo me cwiny. Mitte ni iyer lanen mabeco me aluba, idong niang matut, ibed ngat ma genne, ipwony diro mapatpat ma bikonyi i kwo, dok iyubbe pi tic ma ibikemme kwede i anyim.

²⁰ Ka itamo pi jami ducu ma myero iti iye, ci itwero winyo calo ticce tek mukato kare woko. Ento itwero cobogi. Wi opo ni Jehovah tye atera me konyi. (Ic. 41:​10, 13) Ki lok ada, omege ki lumege me kacokke bene gibikonyi. Ka idoko kodi laco ma Jehovah mito-ni, ci kwoni bibedo me yomcwiny adada. Wamarowu matek wun omege matino! Walego ni Jehovah ogo laane i komwu ka wuwoto ki tute me doko co muteggi i yo me cwiny.—Car. 22:4.