1. Pingo kica ma a ki bot dano pol kare niang iye tek?

 “ATIMMI KICA.” Lok meno pud dong kweyo cwinywa ya, tutwalle ka wangeyo ni waloko nyo watimo gin mo ma ocwero cwiny ngat mukene! Ento pol kare pe yot me niang tam pa ngat moni kadi bed en owaco ni “Atimmi kica.” Tika ngat ma icwero cwinye-ni tye ka wacci ni wat i kinwu dong oyubbe woko maber? Nyo mono en tye ka waco ni pe emito lok i kom gin mutimme ento liremwu dong oballe woko? Timo kica ma a ki bot dano i cawa mukene niang iye tek.

2. I Baibul, kitito kit ma Jehovah timo kwede kica nining? (Nen bene lok ma tye i tere piny.)

² Kit ma Jehovah timo ki wan lubalo kica pat adada ki kit ma wan watimo kwede kica ki luwotwa. Pe tye ngat mo ma twero timo kica kit ma Jehovah timo kwede. Laco jabuli oloko kit man i kom Jehovah: “Timo kica me ada tye boti, wek gilwori.” a (Jab. 130:4, NWT) Adada, timo kica pa Jehovah obedo “timo kica me ada.” En aye nyutiwa gin ma timo kica obedo. I tyeng mogo ma i Ginacoya me leb Ibru, luco Baibul gutito kit ma Jehovah timo kwede kica kun gitiyo ki nyig lok mogo ma pe gutiyo kwede me tito yo ma dano gitimo kwede kica.

3. I yo ma nining ma timo kica pa Jehovah pat ki megwa? (Icaya 55:​6, 7)

³ Ka Jehovah otimo kica ki ngat mo, nongo dong bal pa  ngat meno kijwayo woko. Wat ma onongo oballe woko i kingi roc woko kwicikwici. Watye ki pwoc madit adada ni Jehovah timiwa kica kwicikwici dok teretere.​—Kwan Icaya 55:​6, 7.

4. Jehovah konyowa nining me niang gin ma timo kica me ada obedo?

⁴ Ka ce timo kica pa Jehovah pat ki megwa, ci watwero niang gin ma timo kica me ada obedo nining? Jehovah otiyo ki lapor mogo mamwonya me konyowa niang kit ma en timiwa kwede kica. I pwony man, wabinyamo lapor mogo i kingi. Gibinyutiwa ni ka wangut, Jehovah jwayo balwa woko dok ye ni wabed lureme macok odoco. Ka wawoto ki nyamo lapor magi, wabidongo marwa kacel ki pwocwa pi Wonwa ma lakica-ni, ma nyuto kicane i yo mapatpat.

JEHOVAH KWANYO BALWA WOKO

5. Gin ango ma timme ka Jehovah oweko balwa?

⁵ I Baibul, pol kare kiporo bal ki yec mapek. Kabaka Daudi oloko kit man i kom balle: “Balla dong oketo koma woko; gipek calo yec ma pe aromo tingone.” (Jab. 38:4) Ento Jehovah weko bal pa labalo ma ongut. (Jab. 25:18; 32:5) Nyig lok me leb Ibru ma kigonyo ni “weko bal” i tyeng magi gonnye atir atir ni “kwanyone woko” nyo “tingone.” Dong ka Jehovah otimiwa kica, en tingo yec mapek me poto cwiny ma watye kwede woko. Bedo calo onongo watingo yec mo mapek i wi gwokwa ci en okwanyo woko.

6. Ka mabor rom mene ma Jehovah tero iye balwa?

⁶ Baibul otiyo ki lapor mukene me nyuto ni Jehovah tingo balwa ci tero ka mabor. Jabuli 103:12 tittiwa ni: ‘Kit macalo tung wokceng tye bor kwede ki tung potoceng-ngi, en kwanyo balwa woko ducu ki i komwa cwalo ka mabor kit meno.’ Tung kunyango aye kabedo mabor loyo ki tung kupoto ceng. Kabedo aryo magi pe gitwero rwatte matwal. Man tyen lokke ni, Jehovah tero balwa ka ma pud dong bor loyo ma watwero tamo pire. Man cuko cwinywa ni Jehovah timiwa kica i yo ducu!

7. I yo ma nining ma Baibul otito kwede kit ma Jehovah tero kwede ki balwa? (Mika 7:​18, 19)

⁷ Kadi bed Jehovah kwanyo balwa woko ci tero woko ka mabor, tika en pud medde ki gwokogi i wiye? Pe tye kit meno. Kabaka Kejekia ocoyo kit man i kom Jehovah: “Ibolo balla woko ducu yo tung i ngeyi.” (Ic. 38:​9, 17) Man tyen lokke ni Jehovah bolo woko bal pa lubalo ma gungut dok pe bedo ka neno balgi magi. Lok man bene gitwero gonyone ni: “Iloko balla obedo calo onongo pe otimme.” Baibul oweko lok man ocung ka maleng i lapor mukene doki, ma kitito pire i Mika 7:​18, 19. (Kwan.) Tyeng magi waco ni Jehovah bolo balwa ducu i kut me nam. I kare macon, ka onongo gin moni opoto i kut me nam, onongo dong pe kitwero nongone matwal.

8. Gin ango ma dong wapwonyo?

⁸ Baibul otiyo ki lapor mapatpat me nyutiwa ni ka Jehovah otimiwa kica, en kwanyo balwa woko matwal ma pe dok mitte ni cwinywa obed ka pidowa. Adada, kit ma Daudi owaco kwede, ‘jo ma dong kiweko balgi gitye ki yomcwiny, ma balgi bene dong kikwanyo woko; dano ma Jehovah dong pe kwano bal mo i kome tye ki yomcwiny.’ (Rom. 4:​7, 8)  Meno pud dong obedo timo kica me ada ya!

JEHOVAH JWAYO BALWA WOKO

9. Lapor mene ma Jehovah otiyo kwede me tito kit ma en timowa kwede kica?

⁹ Jehovah twero jwayo bal pa lubalo ma gungut kun tiyo ki ginkok pa Yecu. Nen kong kit ma Baibul otito kwede gin ma Jehovah timo. I Baibul, wakwano ni Jehovah lwoko bal woko. Man lonyo labalo weko bedo maleng. (Jab. 51:7; Ic. 4:4; Jer. 33:8) Jehovah kikome otito adwogi me timo kicane, ni: “Kadi bed dong balwu kwar ma rom mene, bidoko matar calo pee; kadi bed kwar calo pala, bidoko calo yer romo matar.” (Ic. 1:​18) Tek adada me lwoko odok makwar woko ki i bongo. Ento, Jehovah otiyo ki lapor man me cuko cwinywa ni balwa pud twero lwokke kwicikwici bedo maleng ma dong pe kitwero nenone.

10. I yo ma nining ma Baibul tito kwede yot cing ma Jehovah nyuto ka tye ka timiwa kica?

¹⁰ Kit ma kitito kwede i pwony mukato-ni, kitwero poro balwa ki banya. (Mat. 18:32-35) Dong kare ducu ka watimo bal i kom Jehovah, banyawa medde ameda ki doko dit. Watye ki banya pa Jehovah madit adada! Ento ka Jehovah otimiwa kica, bedo calo en ongolo banyawa woko. En pe pidowa me culo pi bal ma dong kityeko timo kica pire woko. Kit macalo ngat moni winyo agonya ka kingolo banyane woko, wan bene wabedo ki yomcwiny ka Jehovah otimiwa kica!

11. Tyen lokke ngo ka Baibul otito ni balwa kityeko jwayone woko? (Tic pa Lukwena 3:​19)

¹¹ Jehovah pe ngolo banyawa keken, ento en jwayogi woko. (Kwan Tic pa Lukwena 3:​19.) Go kong ni, itye ki banya pa ngat mo, ci en ongolo banya meno kun keto nukuta X madit i kom karatac ma ogwoko iye rekod me banyani. Ento kadi bed kiketo X iye, pud twero nen ni onongo ibedo ki banya. Ento jwayo gin moni dok pat. Me niang lapor madok i kom jwayo gin moni, wiwa myero opo ni kodi inki ma onongo kitiyo kwede i kare macon onongo kiyubo ki makar, odok, ki pii. Ngat mo onongo twero tic ki bongo mo madyak ci jwayo coc meno woko. Dong ka ‘kijwayo’ banya moni woko, onongo rucce woko kwicikwici. Kor gin ma onongo kicoyo con onongo dong pe twero nen kulu. Bedo calo banya meno pe obedo tye matwal. Pud dong watye ki pwoc madit ya me ngeyo ni Jehovah pe ngolo balwa keken, ento bene jwayogi woko kwicikwici!​—Jab. 51:9.

12. Pwony ango ma wanongo ki i lapor madok i kom pol mapek?

¹² Jehovah otiyo ki lapor mukene me tito kit ma en jwayo kwede balwa kwicikwici. En owaco ni: ‘Dong ayweyo balli woko ducu calo pol mapek.’ (Ic. 44:22) Pi meno, ka Jehovah otimiwa kica, bedo calo en tye ka tic ki pol mapek me umo balwa wek en kacel ki wan pe dong wanen bal magi.

13. Wawinyo nining ka Jehovah otimiwa kica pi balwa?

¹³ Pwony ango ma wanongo ki i lapor magi? Ka Jehovah otimo kica pi balwa, pe mitte ni cwinywa obed ka pidowa pi bal magi pi kare me kwowa olu. Ginkok pa Yecu otyeko culo pi balwa i yo ducu. Kadi wa kor banyawa dong pe twero nen. Man aye timo kica me ada ma a ki bot Jehovah ka wangut i kom balwa.

 JEHOVAH DWOKO CEN WAT MABER I KINWA KWEDE

14. Pingo watwero bedo ki gen ni Jehovah bitimiwa kica kwicikwici? (Nen bene cal.)

¹⁴ Timo kica me ada ma a ki bot Jehovah konyowa me bedo ki wat maber kwede odoco. Pien Jehovah timiwa kica i yo ducu, pe mitte ni wamedde ki bedo ki poto cwiny. Pe mitte ni wabed ki lworo ni Jehovah omakowa i cwinye dok tye ka yenyo yo me miniwa pwod. Gin ma kit meno pe bitimme matwal. Pingo watwero geno Jehovah ka en owaco ni etyeko timiwa kica? Jehovah otito bot lanebi Jeremia ni: ‘Abiweko balgi, pe dok abibedo ka po i kom gin marac ma gubedo ka timone.’ (Jer. 31:34) Lakwena Paulo otiyo ki lok meno i kare ma en owaco ni: ‘Pe dok abipo i kom balgi mo kadi ki acel.’ (Ibru 8:​12) Ento meno tyen lokke ngo?

15. Tyen lokke ngo ka Jehovah owaco ni wiye pe dong po i kom balwa?

¹⁵ I Baibul, lok man ni “po i kom” pe kare ducu kwako tamo i kom gin mo mutimme i kare mukato. Me ka meno, kwako timo gin mo. Labalo ma kiguro i nget Yecu-ni olego Yecu ni: “Yecu, po pira ka ibidonyo i kerri.” (Luka 23:42, 43) En onongo pe tye ka lego Yecu ni otam pire i cawa meno keken. Lagam pa Yecu onyuto ni en bicero labalo-ni. Dong, ka Jehovah owaco ni wiye pe dong bipo i kom balwa, nongo en tye ka waco ni etyeko timiwa kica dok pe ebitimo gin mo me miniwa pwod pi bal magi i kare me anyim.

16. I yo ma nining ma Baibul tito kwede bedo agonya ma bino ka kitimiwa kica?

¹⁶ Ka Jehovah otimiwa kica, wawinyo agonya. Baibul tiyo ki lapor mukene me konyowa niang lok man. Pi roc ma ­kinywalowa kwede kacel ki miti me timo bal, kilwongowa ni “opii me bal.” Ento ka Jehovah otimiwa kica, wabedo calo opii ma ‘dong kityeko gonyone woko ki i bal.’ (Rom. 6:​17, 18; Yabo 1:5) Ada, ­ka dong waniang ni Jehovah otyeko timiwa kica,  wabedo ma cwinywa yom calo opii ma kigonyo woko.

17. I yo ma nining ma timo kica kelo cango? (Icaya 53:5)

¹⁷ Kwan Icaya 53:5. Lapor me agikki ma wabinyamo porowa ki jo ma gitye ki two mo marac. Pi ginkok pa Wode, Jehovah ocangowa woko. (1 Pet. 2:​24) Ka watimo bal, watwa ki Jehovah bene balle woko. Ento pi ginkok pa Yecu, en twero timiwa kica dok weko watwero bedo ki wat macok kwede odoco. Kit macalo ngat ma kicango ki i two mo marac bedo ki yomcwiny madit, wan bene wabedo ki yomcwiny ka wanongo cango i yo me cwiny dok watwa ki Jehovah oyubbe odoco.

KIT MA TIMO KICA PA JEHOVAH GUDO KWEDE KWOWA

18. Pwony ango ma wanongo ki i lapor mapatpat ma Baibul otiyo kwede me tito pi timo kica pa Jehovah? (Nen bene bok ma wiye tye ni “Kit ma Jehovah Timiwa Kwede Kica.”)

¹⁸ Pwony ango ma wanongo ki i lapor mapatpat ma Baibul otiyo kwede me tito pi timo kica pa Jehovah? Ka Jehovah otimiwa kica, bedo calo pe onongo watimo bal meno dok en pe biminwa pwod pi bal magi i kare me anyim. Man weko wabedo ki wat maber ki Wonwa me polo odoco. Ki tungcel, wangeyo ni timo kica ma a ki bot Jehovah obedo mic ma en miniwa pien en marowa dok cinge yot, ento pe ni pien wapore pire.​—Rom. 3:​24.

19. (a) Gin ango ma omyero wabed ki pwoc pire? (Jo Roma 4:8) (b) Gin ango ma wabinyamo i pwony ma lubo man?

¹⁹ Kwan Jo Roma 4:8. Pud dong watye ki pwoc madit ya ni “timo kica me ada” tye bot Lubanga Jehovah! (Jab. 130:4, NWT) Ento ka wamito ni Jehovah otimiwa kica, omyero watim gin mo ma pire tek. Yecu otito ni: “Ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu.” (Mat. 6:​14, 15) Dong omyero walub lanen pa Jehovah kun watimo kica ki jo mukene. Ento watwero timo meno nining? Pwony ma lubo man binyutiwa.