TIKA dong kare mo ibedo ki par pien onongo itye ki peko ento pe ingeyo ngat mo ma twero konyi? Watye ka kwo “i kare me agikki” ma piny tye marac dok meno twero miyo cwinywa tur dok wawinyo ni watye kenwa. (2 Tem. 3:1) Ento, ka watye ki peko, tye jo mapol ma gitwero konyowa. Baibul waco ni lurem me ada gitwero konyowa matek “i kare me can.”—Car. 17:​17, NWT.

Lakwena Paulo onongo woto kacel ki lureme mogo i wotte macalo lamiconari dok gubedo ka konyo Paulo i yo mapol. (Kol. 4:​7-11) I kare ma kitweyo Paulo i buc i Roma, lureme gukonye me cobo tic mogo ma en onongo pe twero timone. Me labolle, Epaprodito okelo bot Paulo jami mogo ma omege ki lumege ma i Pilipi gucwalo. (Pil. 4:18) Tukiko otero waraga ma Paulo ocoyo bot kacokke mapatpat. (Kol. 4:7; nen jami me akwana me nwtsty-E.) Ki kony pa lureme, Paulo omedde ki cuko cwiny kacokke kadi bed onongo kitweye macalo mabuc i ode kene dok lacen obedo i buc. Itwero bedo larem me ada i kare-ni nining?

Tye omege ki lumege mapol i kare-ni ma ginyuto gin ma lurem me ada gitwero timo me konyo luwotgi. Laminwa Elisabet, ma tiyo macalo painia marii i lobo Spain, otito kit ma lamego mo okonye kwede i kare me peko. I kare ma kinongo ni mama pa Elisabet tye ki two kanca, lamego-ni obedo ka cwalo bot Elisabet mecej mapol ma jenge i Baibul me cuko cwinye. Elisabet owaco ni: “Ka onongo aneno mecej mua ki bote, onongo cwinya bedo yom me ngeyo ni ngat mo tye ka tamo pira, dok onongo abedo ki teko me cobo tic ma mitte.”—Car. 18:24.

Watwero jingo liremwa ki luye luwotwa ka wakonyogi me cito i cokke kacel ki tic me pwony. Me labolle, tika itwero jalle me tic ki mutokani me tero omego nyo lamego mo mutii i cokke nyo i tic me pwony? Ka itimo kit meno, ci wubibedo ki kare me cuko cwinywu kekenwu. (Rom. 1:12) Ento, Lukricitayo mogo pe dong gitwero a ki gang. Itwero bedo larem me ada botgi nining?

Omege ki lumegiwa mukene pe gitwero bedo tye i cokke i Ot me Ker pien gitye ki two malit nyo peko mukene ma gengogi. Meno aye gin mutimme i kom omego mo ma nyinge David, ma kinongo ni tye ki two kanca. Pi dwe makato abicel, en obedo ka nongo yat pi two meno. I kare ma en obedo ka nongo yat, David ki dakone Lidia, gubedo ka kubbe pi cokke ki gang.

Omege ki lumege me kacokkegi gukonyogi nining? I nge cokke ducu, jo mogo ma i Ot me  Ker onongo gitute me lok ki David ki Lidia kun gikubbe ki vidio. Medo i kom meno, ka onongo David ki Lidia gumiyo lagam i cokke, omege ki lumege onongo gicwalo botgi mecej i nge cokke me pwoyogi pi lagam ma gumiyo. Adwogine obedo ningo? David ki Lidia pe guwinyo calo gitye kengi.

Tika watwero keto yub me tito kwena kacel ki omego nyo lamego mo ma pe twero a ki pacone? Watwero timo alokaloka matinotino i yubwa wek wabed ki kare me tic kwedgi. I yo ma kit man, wanyuto botgi ni wiwa pe owil woko i komgi. (Car. 3:27) Pingo pe ikwany kare me tito kwena kacel kwede kun wucoyo waraga nyo wutiyo ki cim? Luelda giromo keto yub wek jo ma pe gitwero a ki gang gukubbe pi cokke me cito i tic me pwony kun gitiyo ki vidio. David ki Lidia gupwoyo adada ni kacokkegi oketo yub man. David otito ni, “Kubbe ki gurupwa me tito kwena pi dakika manok pi nyamo lok kacel ki lega onongo cuko cwinywa adada.” Gwok nyo kare ki kare itwero kelo latin kwanni me Baibul i gang pa omego nyo lamego ma pe twero a ki gang wek wukwan kacel. Ento, myero kong ipeny omego nyo lamego meno ka pore.

Ka watiyo kacel ki omegiwa ki lumegiwa ma pe gitwero a woko ki gang, wabedo ki kare me ngeyogi kacel ki kitgi mabeco, dok wadoko lurem macok. Me labolle, ka inywako i tic me pwony ki latit kwena meno dok ineno dirone me tic ki Lok pa Lubanga me gudo cwiny dano, ci ibidongo woro pire. Ka ikonyo luye luwoti me bedo tye i cokke ki tic me pwony, ci ibibedo ki kare me mako lurem manyen.—2 Kor. 6:13.

I kare ma Paulo okemme ki pekki mapol, lareme Tito ocito ka limme dok man okweyo cwiny Paulo matek. (2 Kor. 7:​5-7) Ber adada me waco lok me cuko cwiny bot omegiwa ki lumegiwa. Ento lanen pa Tito pwonyowa ni watwero bene kweyo cwinygi ka wacwalo cawa kacel kwedgi kun watimo jami me konyogi.—1 Jon 3:18.

Omegiwa ki lumegiwa ma i lobo Russia gitye ka weko lanen maber adada ka odok i kom miyo cwak bot luwotgi. Nen kong gin mutimme i kom Sergey ki dakone, Tatyana. I ngeye ma abili guketo jami ma i otgi, kiterogi i polic citecen me apenya. Kikwongo gonyo Tatyana ci en odok gang. Sergey otito ni: “Cutcut ma Tatyana oo gang, laminwa mo ma cwinye tek obino ka nene. Ma pe orii, omege ki lumege mukene gubino me dwoko jami ma abili guketo-ni kakare.”

Sergey omedo ni: “Kare ducu amaro lok ma nonge i Carolok 17:17 (NWT), ma waco ni: ‘Larem me ada bedo ki mar kare ducu, dok bene bedo macalo omeru i kare me can.’ I kare man me aunauna, onongo amito kony pa lurema matek adada. Aniang ni lok ma nonge i Carolok 17:17 tye ada. Jehovah omina lurem ma cwinygi tek ma gikonya.” a

Wamito kony pa luremwa matek i kare man ma kwo tek-ki. Wabimito konygi makato i kare me twon can madit atika-ni. Dong omyero watute wunu matek me bedo lurem me ada i kare-ni!—1 Pet. 4:​7, 8.